A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Sunday 3 July 2016
សង្គមស៊ីវិលរិះគន់អាជ្ញាធររឿងមិនទប់ស្កាត់ការជួញដូរសត្វព្រៃនៅស្ទឹងត្រែង
ដោយ ម៉ែន សុធីរ
2016-07-03
សត្វព្រៃត្រូវបានគេដាក់លក់នៅក្នុងផ្សារខែត្រស្ទឹងត្រែង កាលពីថ្ងៃទី៣០ ខែមិថុនា ឆ្នាំ២០១៦។
RFA/Men Sothyr
សាច់សត្វព្រៃដូចជា ឈ្លូស ប្រើស និងត្រកួតជាដើម ត្រូវបានគេដាក់លក់ប្រចាំថ្ងៃនៅផ្សារខែត្រស្ទឹងត្រែង ដោយពុំមានការទប់ស្កាត់ពីអាជ្ញាធររដ្ឋាភិបាលឡើយ។ សង្គមស៊ីវិលរិះគន់មន្ត្រីជំនាញ និងអាជ្ញាធរខែត្រនេះថា ហាក់ធ្វើមិនដឹងមិនឮចំពោះការជួញដូរសត្វកម្រជិតផុតពូជនៅកម្ពុជា ខណៈអង្គការមួយចំនួនកំពុងប្រឹងប្រែងអភិរក្សសត្វទាំងនោះ។
មន្ត្រីអង្គការសង្គមស៊ីវិលរកឃើញថា សាច់ព្រៃដែលកំពុងលក់នៅផ្សារខែត្រស្ទឹងត្រែង គឺជាទម្រង់នៃការបំផ្លាញសត្វចតុប្បាទព្រៃដ៏កម្រនៅកម្ពុជា បន្ទាប់ពីការចរាចរ និងការជួញដូរនៅតែបន្តកើតមាន។ ក្រុមអង្គការសង្គមស៊ីវិលស្នើឲ្យអាជ្ញាធររដ្ឋាភិបាលបង្កើនការអប់រំផ្សព្វផ្សាយស្ដីពីអត្ថប្រយោជន៍សត្វព្រៃ និងរឹតបន្តឹងការអនុវត្តច្បាប់ព្រៃឈើ ដើម្បីរួមចំណែកអភិរក្សសត្វព្រៃ។
មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខែត្រស្ទឹងត្រែង លោក ហូ សំអុល កត់សម្គាល់ថា មកទល់ពេលនេះ ទីតាំងលក់ដូរសត្វព្រៃមាន ៤ ទៅ ៥កន្លែង នៅផ្សារខែត្រស្ទឹងត្រែង ហើយសត្វព្រៃដែលកំពុងដាក់លក់នោះមានដូចជា ប្រើស ឈ្លូស និងជ្រូកព្រៃជាដើម។ លោកបន្តថា សត្វព្រៃទាំងនោះទំនងជាត្រូវបានចរាចរណ៍ពីព្រៃឡង់ ស្រុកថាឡាបរិវ៉ាត់ តំបន់ឧទ្យានជាតិវីរជ័យ ក្នុងស្រុកសៀមប៉ាង និងតំបន់ព្រៃស្រោងមួយចំនួនទៀតនៃស្រុកសេសាន និងស្រុកសៀមបូក។
លោកថា ការបណ្ដោយឲ្យមានលក់សត្វព្រៃ ហាក់ដូចជាលើកទឹកចិត្តឲ្យមានការបរបាញ់សត្វព្រៃដើម្បីធ្វើជំនួញ៖ «យើងកុំបណ្ដែតបណ្ដោយ បើសិនជាបណ្ដែតបណ្ដោយវាមិនយូរទេ។ ឥឡូវព្រៃក៏កាប់ សត្វក៏បរបាញ់ បន្តិចទៀតនឹងវិនាសហិនហោចមិនខាន បើសិនជាមិនមានការយកចិត្តទុកដាក់ មានសមត្ថកិច្ចក្នុងការអនុវត្តហ្នឹង»។
ឆ្លើយតបការលើកឡើងនេះ នាយខណ្ឌរដ្ឋបាលព្រៃឈើ ខែត្រស្ទឹងត្រែង លោក ឈៀង តុលា ឲ្យដឹងថា មន្ត្រីជំនាញបានចុះចាប់ទីតាំងលក់ដូរសត្វព្រៃនៅផ្សារខែត្រស្ទឹងត្រែង បាន ៤ករណី រយៈពេលមួយឆមាសនៃឆ្នាំ២០១៦នេះ។ លោកអះអាងថា នឹងបញ្ជូនមន្ត្រីជំនាញទៅទប់ស្កាត់ជាបន្ទាន់នៅពេលទទួលព័ត៌មាននេះ៖ «យើងបានកសាងសំណុំរឿងទៅតុលាការអស់ហើយ។ តុលាការកំពុងហៅបើកសវនាការនេះ ហើយឥឡូវអត់ដឹងថា មាន បើដឹងថាមានទៅតទៀត»។
ប្រធានកម្មវិធីប្រចាំកម្ពុជា នៃអង្គការអភិរក្សសត្វស្លាបអន្តរជាតិ លោក ប៊ូ វីរសក្ស បារម្ភយ៉ាងខ្លាំងពីការតាំងលក់សត្វព្រៃនៅខែត្រស្ទឹងត្រែង ខណៈអង្គការលោកកំពុងប្រឹងប្រែងអភិរក្សសត្វស្លាប និងសត្វចតុប្បាទព្រៃនៅស្រុកសៀមប៉ាង លើផ្ទៃដីជាង ១៣ម៉ឺនហិកតារ។ លោកស្នើឲ្យសមត្ថកិច្ចនិងមន្ត្រីជំនាញរកមធ្យោបាយទប់ស្កាត់ជាបន្ទាន់ចំពោះករណីនេះ ដើម្បីរួមចំណែកការពារសត្វព្រៃជិតផុតពូជនៅកម្ពុជា៖ «យើងត្រូវតែសហការគ្នា។ ខាងខ្ញុំធ្វើការនៅក្នុងព្រៃ បើមកដល់ទីផ្សារ កន្លែងដែលប្រើប្រាស់ យើងត្រូវតែបង្ក្រាបអ្នកប្រើប្រាស់ទៀត។ កាលណាការប្រើប្រាស់មានការថយចុះ ក៏វាជួយបញ្ឈប់ការបរបាញ់ផងដែរ»។
មន្ត្រីជំនាញបរិស្ថានរកឃើញថា ការយល់ដឹងស្ដីពីអត្ថប្រយោជន៍សត្វព្រៃរបស់ពលរដ្ឋនៅមានកម្រិត។ ខ្លះបរបាញ់ ដាក់អន្ទាក់ និងប្រើថ្នាំពុលនៅទីតាំងជ្រកសត្វព្រៃរស់នៅ បើទោះបីជាប្រមុខរដ្ឋាភិបាលធ្លាប់ជំរុញឲ្យពលរដ្ឋចូលរួមការពារសត្វព្រៃ និងសត្វស្លាបនៅកម្ពុជាក្តី។ ជាងនេះទៅទៀត ពលរដ្ឋខ្លះមិនចាប់អារម្មណ៍ចំពោះការអភិរក្សសត្វព្រៃ ដោយសារខ្វះការយល់ដឹង បញ្ហាជីវភាព និងប្រពៃណី។ ក្រៅពីនេះ ចំនួនអ្នកបរិភោគសត្វព្រៃក៏កាន់តែកើនឡើង ដែលមិនបានគិតពីការផុតពូជសត្វកម្រទាំងនោះ។
ច្បាប់ស្ដីពីព្រៃឈើឆ្នាំ២០០២ មាត្រា៤៩ ចែងថា ហាមឃាត់ដាក់ខាត់រាល់សកម្មភាពបរបាញ់ យាយីបំផ្លាញសត្វព្រៃគ្រប់ប្រភេទ ជាពិសេសការដឹកជញ្ជូន ការធ្វើពាណិជ្ជកម្ម និងការនាំចេញនាំចូល៕
Subscribe to:
Post Comments (Atom)
No comments:
Post a Comment