A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Saturday, 16 July 2016

កម្ពុជា​បាត់​កម្លាំង​កសាង​ជាតិ​ដោយ​សារ​លំហូរ​ពលករ​ទៅ​ក្រៅ​ប្រទេស​


កម្ពុជា​បាត់​កម្លាំង​កសាង​ជាតិ​ដោយ​សារ​លំហូរ​ពលករ​ទៅ​ក្រៅ​ប្រទេស​
16 កក្កដា 2016
អូន ឆេងប៉រ

រូប​ឯកសារ៖ ពលករ​ខ្មែរ​រង់​ចាំ​ឯកសារ​នៅ​ការិយាល័យ​ប៉ូលិស​ស្រុក​អារញ្ញ​ប្រទេស​ថៃ​កាល​ពី​ថ្ងៃ​ទី​១៥ មិថុនា ឆ្នាំ​២០១៤ ដើម្បី​ត្រឡប់​មក​ប្រទេស​កម្ពុជា​វិញ។
រូប​ឯកសារ៖ ពលករ​ខ្មែរ​រង់​ចាំ​ឯកសារ​នៅ​ការិយាល័យ​ប៉ូលិស​ស្រុក​អារញ្ញ​ប្រទេស​ថៃ​កាល​ពី​ថ្ងៃ​ទី​១៥ មិថុនា ឆ្នាំ​២០១៤ ដើម្បី​ត្រឡប់​មក​ប្រទេស​កម្ពុជា​វិញ។



ចលនា​ឧស្សាហនូបនីយ​កម្ម ​និង​នគរូបនីយកម្ម​ដ៏​ធំ​សម្បើម​របស់​កម្ពុជា​​​បាន​​ជំរុញ​​​ឱ្យ​​ប្រជាជន​​​ខ្មែរ​មួយ​ភាគ​ធំ​​នៅ​​គ្រប់​​ច្រក​​ល្ហក​​នៃ​​ប្រទេស ​ធ្វើ​ដំណើរ​ចាក​ចោល​​ភូមិ​ករ​​ទៅ​​រក​​ការ​ងារ​​ធ្វើ​នៅ​​ទី​​ប្រជុំជន ​និង​​នៅ​​ក្រៅ​ប្រទេស


ភ្នំពេញ —

នៅ​ក្នុង​លិខិត​មួយ​ផ្ញើ​ទៅ​ជូន​លោក​ស្រី​រដ្ឋ​មន្ត្រី​ការ​បរ​ទេស​អូស្ត្រាលី ​Julie ​Bishop ​កាលពីថ្ងៃព្រហស្បតិ៍ ​លោកអ៊ិត​ សំហេង​ រដ្ឋ​មន្ត្រី​ក្រសួង​ការងារ​កម្ពុជា​បាន​ស្នើ​ឱ្យ​រដ្ឋាភិបាល​ក្រុង​កង់បេរ៉ា ​(Canberra)​ ពិចារណាបើកច្រក​ទទួលយក​កម្លាំង​ពលកម្ម​កម្លាំង ​និង​ពលកម្ម​ប្រើ​បញ្ញា​របស់​កម្ពុជា​ចូល​ទៅ​ធ្វើ​ការ​នៅ​ប្រទេស​អូស្ត្រាលី។​

ក្នុង​លិខិត​ដដែល​នេះ​ ​លោកឋ ​អ៊ិត សំហេង ​បាន​សរសេរ​បញ្ជាក់​ថា៖​

«និយោជកជាតិអូស្ត្រាលីនឹងស្គាល់នូវឥរិយាបថ​ធ្វើការ​ប្រកប​ដោយ​ភាព​ឧស្សាហ៍​ព្យាយាម ​និងមានវិន័យខ្ជាប់ខ្ជួនរបស់និយោជិកជនជាតិខ្មែរទៅពីកម្ពុជា»។​



លោក​រដ្ឋមន្ត្រី​ក្រសួង​ការងារ​បាន​បន្ថែម​ថា៖​

«វា​[ឱកាស​ការងារ​នៅ​អូស្ត្រាលី]​ក៏​ផ្ដល់​ឱ្យ​ផង​ដែរ​នូវ​ចំណេះ​ដឹង ​និង​ចំណេះ​ធ្វើ​ដល់​និ​យោជិក​ជាតិ​ខ្មែរ ​ដែល​នឹង​ទទួល​បាន​ពី​ការ​បណ្ដុះ​បណ្ដាល​នៅ​ហ្នឹង​កន្លែង​ធ្វើ​ការ​ងារ​នៅឯ​ប្រទេស​អូស្រ្តាលី ​ដែល​នឹង​ផ្ដល់​ជា​វិភាគ​ទាន​ដល់​ការ​អភិវឌ្ឍ​ប្រទេស​កម្ពុជា​ផង​ដែរ»។​

នេះ​មិន​មែន​ជា​ការ​ប៉ុន​ប៉ង​លើក​ដំបូង​នោះ​ទេ​ដែលរដ្ឋាភិបាល​លោក​នាយក​រដ្ឋ​មន្ត្រីហ៊ុន ​សែន ​បញ្ជូន​កម្លាំង​ពលករ​ខ្មែរ​ចេញ​ទៅ​ធ្វើការ​អនុវត្ត​ជំនាញ​នៅ​បណ្ដា​ប្រទេស​ដែល​មាន​តម្រូវការ​កម្លាំង​ពលកម្មច្រើន​ពី​បណ្ដា​ប្រទេស​កំពុង​អភិវឌ្ឍ​ដូច​ជា​កម្ពុជា។​

កម្ពុជា​កំពុង​តែ​មាន​កិច្ច​សហការ​ជាមួយ​ប្រទេស​កូរ៉េ​ខាងត្បូង ​ប្រទេស​ថៃ ​ប្រទេស​ម៉ាឡេស៊ី ​ហើយបន្តិច​ទៀតនឹង​មាន​កិច្ច​សហការ​ជាមួយ​បណ្ដា​ប្រទេស​នៅ​ឯ​តំបន់​មជ្ឈឹម​បូព៌ា​ដែល​ល្បី​ខាង​រំលោភ​សិទ្ធិ​ពលករ​ឆ្លង​ដែន ​ក្នុង​ការ​បញ្ជូន ​បើកច្រក​ឱ្យ​ពលករ​ខ្មែរ​មាន​ឱកាស​ចេញ​ទៅ​បម្រើ​ការងារ​ស្វែង​រក​ប្រាក់​ចំណូល​ផ្ញើ​មក​ភូមិ​កំណើត។​

ចលនា​ឧស្សាហនូបនីយ​កម្ម ​និង​នគរូបនីយកម្ម​ដ៏​ធំ​សម្បើម​របស់​កម្ពុជា​បានជំរុញ​ឱ្យប្រជាជន​ខ្មែរ​មួយ​ភាគ​ធំនៅគ្រប់ច្រកល្ហកនៃប្រទេស ​ធ្វើ​ដំណើរ​ចាក​ចោលភូមិ​ករទៅរកការ​ងារធ្វើ​នៅទីប្រជុំជន ​និងនៅក្រៅ​ប្រទេស។​

តួលេខ​ត្រួសៗ​ចុង​ក្រោយ​បង្អស់ ​គិត​ត្រឹម​ដើម​ឆ្នាំ​២០១៦​នេះ ​បង្ហាញ​ថា​ ​ប្រជាជន​ខ្មែរ​ជិត​មួយ​លាន​នាក់​កំពុង​បម្រើ​ការនៅ​ប្រទេស​ដទៃ ​រួម​មាន​ប្រទេស​ថៃ ​ម៉ាឡេស៊ីនិង​នៅ​កូរ៉េ​ខាង​ត្បូង​ជា​ដើម ​ហើយ​បាន​ផ្ញើ​ប្រាក់​មក​ស្រុក​វិញចំនួន១​ពាន់​លាន​ដុល្លារអាមេរិកកាល​ពី​ឆ្នាំ​២០១៥។ ​នេះ​បើ​យោង​តាម​ក្រសួង​ការងារ។​

នៅ​ស្រប​ពេល​ដែល​មាន​ការ​ប៉ាន់​ប្រមាណ​ថា ​អ្នក​ចេញ​ទៅ​ធ្វើ​ការ​ក្រៅ​ប្រទេស​អាច​មាន​លើសពីមួយ​លាននាក់​ រាប់​ទាំង​ពលករ​ដែល​ចេញ​ទៅ​មិន​ស្រប​ច្បាប់​ផងនោះ​ ​អ្នក​ជំនាញ ​និង​អ្នក​ស្រាវ​ជ្រាវ​បាន​ផ្ដល់​នូវ​ការ​ពន្យល់អំពី​ផល​ចំណេញ ​និង​ការ​ខាតបង់នៃ​លំហូរ​ធនធាន​មនុស្ស។​

ការហូរ​ចេញធន​ធាន​បញ្ញា ​ដែល​រួម​មាន​អ្នក​ចេះ​ដឹង ​និង​ពលករ​ដែល​មាន​ជំនាញ​ទៅ​ធ្វើការ​នៅ​ក្រៅ​ប្រទេសនោះ​ ត្រូវ​បាន​អ្នកស្រាវ​ជ្រាវ​គូស​បញ្ជាក់​ឱ្យ​ឃើញ​ផង​ដែរ​ថា​ ​ផ្នែក​ខ្លះ​នៃ​ប្រព័ន្ធ​ទីផ្សារ​ការងារ​មាន​លក្ខណៈ​ផុយ​ស្រួយ ​និងមិនមានសម​ធម៌​ក្នុង​ការ​ជ្រើស​រើស។​

អ្នកស្រី​សែម សោភ័ណ​លក្ខិណ​បាន​ធ្វើការ​សិក្សា​ស្រាវ​ជ្រាវ​ឱ្យ​សាកល​វិទ្យាល័យ​ស្ត្រី​ Ewha ​របស់កូរ៉េខាង​ត្បូង ​អំពី​ឥរិយាបថ ​និង​ចរន្ត​លំហូរ​សាច់ប្រាក់​ដែល​ពលករ​ខ្មែរ​បញ្ជូន​មក​ស្រុក​កំណើត​វិញ​ នៅ​ពេល​ដែល​ពួកគេកំពុងបម្រើការ​នៅប្រទេសកូរ៉េខាងត្បូង។​ ​អ្នកស្រី​បានឱ្យដឹងថា​ ​កម្រិត​ប្រាក់​បៀ​វត្សរ៍​នៅ​កូរ៉េ​ខ្ពស់​ជាង​នៅ​កម្ពុជា​នោះ​គឺជា​កត្តាដែល​មានឥទ្ធិពល​ជា​ខ្លាំង​ដល់​ការ​សម្រេច​ចិត្ត​ចាក​ចេញ​របស់​ពលករ​ទៅ​ធ្វើការ​នៅ​ឯ​ប្រទេស​កូរ៉េ ​ហើយ​មួយ​ចំនួន​នៃពួក​គេ​សុខ​ចិត្ត​បោះ​បង់​ការ​ងារ​ដែល​ប្រើ​បញ្ញា​នៅ​ស្រុក​ខ្មែរ។​

«អ្នក​ខ្លះ​គាត់​មាន​ការងារ​ដែរ​នៅ​ខ្មែរ ​ក៏​ប៉ុន្តែ​ការ​ងារ​ហ្នឹង​គាត់​មិន​អាច​យក​ប្រាក់​ខែ​ទៅ​ផ្គត់​ផ្គង់​គ្រួសារ​គាត់​បាន ​អញ្ចឹងទាម​ទារ​ឱ្យ​គាត់​ធ្វើ​ចំណាក​ស្រុក​ដើម្បី​យក​ប្រាក់​ហ្នឹង​មក​រ៉ាប់​រង​នៅ​ក្នុង​គ្រួសារ​របស់​គាត់»។​

អ្នកស្រី​សោភ័ណ​លក្ខិណា ​ដែល​ជា​អ្នក​ស្រាវ​ជ្រាវ រក​ឃើញថា ​ពលករមួយ​ចំនួន​ដែល​កំពុងបម្រើ​ការងារ​នៅ​កូរ៉េ​មាន​អតីត​ភាព​ការងារ​ និង​កម្រិត​វប្បធម៌ជានិស្សិត​ មន្ត្រី​រាជការ ​បុគ្គលិក​ក្រុមហ៊ុន​ឯកជន​ថែម​ទៀត​ផង​ ពេលគេនៅ​ប្រទេសកម្ពុជា។​

ដូច​ជាលោក ​លីម ថេងហាក់​ ដែល​កំពុង​បម្រើ​ការងារ​នៅ​ឯ​តំបន់​ប៉ែក​ខាង​កើត​ប្រទេស​កូរ៉េ​ខាងត្បូង ​ធ្លាប់ជា​និស្សិត​បញ្ចប់​ការ​សិក្សា​ថ្នាក់​បុរាណ​វិទ្យា ​តែ​បាន​សម្រេច​ចិត្ត​បោះ​បង់​ការងារ​ជំនាញ​របស់​ខ្លួន​ចេញ​ទៅប្រទេស​នៅ​តំបន់​ចុង​បូព៌ា​ខាង​លើ​ដើម្បី​ស្វែង​រក​ការ​ងារ​ធ្វើ។​

លីម ថេងហាក់​បាន​និយាយ​ប្រាប់​ VOA ​ថា ​នៅ​ប្រទេស​កូរ៉េ​ខាង​ត្បូង ​រូប​គេ​អាច​នឹង​រក​បាន​ប្រាក់​ចំណូល​ជាមធ្យម​ជាង​១​ពាន់​ដុល្លារអាមេរិកក្នុង​មួយ​ខែ ដោយ​មានផល​ប្រយោជន៍ជា​ប្រាក់​ជា​ច្រើន​ផ្សេង​ទៀត ​ហើយ​ថា​ ​ជីវភាព ​និង​ចំណូល​របស់​គេ​មាន​ការ​ប្រសើរ​ជាង​ការងារ​ជំនាញ​របស់​រូប​គេ​នៅស្រុក​ខ្មែរ​ស្ទើរ​តែ​១០​ដង។​

«គ្មាន​នរណា​ចង់​ចាក​ចេញទេ ​អ្នក​ខ្លះ​គេ​មាន​ប្រពន្ធ ​មាន​កូន ​មាន​ម្ដាយ​ចាស់​ជរា ​ត្រូវ​ព្រាត់​គ្នាមួយរយៈមកធ្វើការនៅ​កូរ៉េ ​គ្មាន​នរណា​ចង់​ទេ។ ​ប៉ុន្តែ​ដោយ​សារ​កត្តា​ជីវភាព ​ដោយ​សារ​តែ​ពេល​ខ្លះ​មាន​ការ​រើស​អើង ​ដោយសារខ្សែ​ហ្នឹង ​យើង​និយាយ​ថា​ ខ្សែ​ចុះ ​ហើយ​ប្រាក់​ខែ​អត់​សមរម្យ ​ធ្វើឱ្យយើងមិនអាចរស់នៅក្នុងស្រុកខ្មែរបានណាស់»។​

ថេងហាក់​ក៏​បាន​និយាយ​ជា​បន្ថែម​ផង​ដែរ​អំពី​ការណ៍​ដែល​បរិយាកាស​ការងារមាន​ការ​រើស​អើង​ និង​បក្ស​ពួកនិយម ជា​កត្តា​ជំរុញមួយ​ដ៏​សំខាន់​បង្ខំ​ឱ្យ​គេ​ធ្វើ​ចំណាក​ស្រុក​ ជិះ​យន្តហោះ​ទៅ​ធ្វើការ​នៅ​កូរ៉េ។​

លោក​សេដ្ឋវិទូ ​តេង ​ដឺលុច​ បាន​និយាយ​ថា​ ការ​ដែល​ប្រជាជន​ចេញ​ទៅ​ធ្វើការ​នៅ​ក្រៅ​ប្រទេស ​ចាក​ចោលភូមិ​ដ្ឋាន ​វាល​ស្រែ​ ចម្ការ ​ច្បារ​ដំណាំ​នេះ ​អាច​ជា​កាំបិត​មុខ​ពីរ​ដល់​កម្ពុជា ​ពោល​គឺ​អាច​នឹង​ផ្ដល់​ជា​ផល​វិជ្ជមានផង ​និង​អវិជ្ជមាន​ផង។​

ផល​វិជ្ជមាន​នៅ​ត្រង់​ថា ​កត្តា​ជីវភាព​គ្រួសារ ​និង​សាម៉ី​ខ្លួន​ពលករ​ផ្ទាល់ ​មាន​ភាព​ប្រសើរ​ឡើង​ហើយ​ថែម​ទាំងអាច​នឹង​ទទួល​បាន​ជំនាញ​បច្ចេកទេស​ពី​ការងារ​ដែល​ខ្លួន​បម្រើការ​នៅ​ក្រៅ​ប្រទេស ​ហើយ​ផល​អវិជ្ជមាន​នៅត្រង់​ថា ​ប្រទេស​ជាតិ​ដែល​ត្រូវ​ការ​ធន​ធាន​មនុស្ស​មក​ជួយ​រុញ​ច្រាន​វិស័យ​ឧស្សាហកម្ម​ និង​ខ្នែងផ្សេងទៀតនៃសេដ្ឋកិច្ចនោះ​ ត្រូវ​បាត់​បង់​កម្លាំង​ធន​ធាន​អស់​ជា​ច្រើន។ ​នេះ​បើ​តាម​លោក​តេង​ ដឺលុច។​

ក៏​ប៉ុន្តែ​បញ្ហា​នេះ​នៅ​តែ​ជា​ចំណោទនៅ​ឡើយ​ នៅ​ពេល​បណ្ឌិត​ បញ្ញ​វ័ន្ត​ខ្មែរ​ជា​ច្រើន​រូបដែលទទួលបានអាហារូបករណ៍ទៅ​រៀន​នៅ​ក្រៅ​ប្រទេស បាន​សម្រេច​ចិត្ត​ត្រឡប់​មក​បំពេញ​កិច្ច​ការ​ងារ​នៅ​មាតុ​ភូមិវិញក្រោយ​ពី​បញ្ចប់​ការ​សិក្សា។​

លោក ​អ៊ិត ​សំហេង ​រដ្ឋ​មន្ត្រី​ការងារ​ ​បាន​បដិសេធ​មិន​ផ្ដល់​បទ​សម្ភាសន៍​ទេ។​ លោក​បាន​បង្វែរ​សំណួរ​ទៅ​កាន់​អ្នក​នាំពាក្យ​ក្រសួង​គឺ​លោក​ហេង សួរ ​ដែល​មិន​បាន​ឆ្លើយ​តបទៅ​នឹង​សំណើ​របស់​ VOA ដើម្បី​សុំមតិ​យោបល់​ឡើយ។

ការ​ធ្វើ​ចំណាក​ស្រុក ​និង​លំហូរ​ធន​ធានបញ្ញា​ពី​ប្រទេស​មួយ​ទៅ​ប្រទេស​មួយ​ទៀត​ ​គឺ​ជា​កត្តា​សកលបណ្តាល​មកពីចរន្ត​ប្រែ​ប្រួល​ចុះ​ឡើង​នៃ​កម្រិត​ប្រាក់បៀវត្សរ៍​ ​និង​ការ​វិនិយោគ ​តែនៅកម្ពុជាបញ្ហានេះមិនសូវជាចោទប៉ុន្មាន​ទេ។​ នេះ​ជាការ​អះ​អាង​របស់​លោក​រស់ សាលីន ​អ្នក​នាំ​ពាក្យ​ក្រសួង​អប់រំ។​

លោក​រស់ សាលីន​បាន​បន្ថែម​ថា​ ​ក្នុងចំណោមនិស្សិតដែលជាប់អាហារូបករណ៍ទៅរៀននៅបរទេស​ទាំង​អស់​នោះ​ ​មាន​ដល់​ទៅ៩៥%​បានដែលត្រឡប់មក​កម្ពុជា​វិញ​បម្រើការងារតាមវិស័យសាធារណៈ​ ​វិស័យ​ឯកជន ​និង​សង្គម​ស៊ីវិល​ជាដើម។​

«អញ្ចឹង Issue ​(បញ្ហា) ​នៃ ​Brain-Drain​ (លំហូរ​ចេញ​នៃ​ធនធានបញ្ញា) ​សម្រាប់​កម្ពុជា​យើង​ វា​មិន​មាន​ជាបញ្ហាអ្វីទេ ​ដោយ​សារ​ឱកាស​ការងារ​ ការ​ប្រកួត​ប្រជែង​នៅ​ក្នុង​ស្រុក​ហ្នឹង​គឺ​វា​អំណោយ​ផល ​ទៅ​ដល់​យុវជនដែលមាន​ជំនាញ​ខ្ពស់​ ក៏​ដូច​ជា​យុវជន​ ទាំង​យុវជន​ដែល​សិក្សា​ក្នុ​ង​ស្រុក ​ទាំង​យុវ​ជន​ដែល​ទៅ​រៀន​នៅ​ខាង​ក្រៅ»។​

នៅ​ក្នុង​សុន្ទរកថា​មួយ​នៅ​ឯ​ប្រទេស​វៀតណាម​កាល​ពី​ខែ​ឧសភា ​លោក​ប្រធានាធិបតី​អាមេរិក បារ៉ាក់​ អូបាម៉ា ​ក៏បាន​គូស​បញ្ជាក់​ផង​ដែរ​អំពី​បញ្ហា​នៃ​លំហូរ​ធនធានមនុស្ស​ទៅក្រៅ​ប្រទេស។​

លោក​អូបាម៉ា​បានថ្លែង​ថា​ កាល​ណា​ប្រទេស​មួយ​បាត់​បង់​ធនធាន​មនុស្ស​ដែល​មាន​ជំនាញ ​និង​ទេព​កោសល្យ​ ដែល​ទៅ​ធ្វើការ​នៅ​ប្រទេស​ដទៃ​នោះ​ ​បានន័យថាប្រទេសសាម៉ីនោះមានអំពើពុករលួយចាក់ស្រែះ ​និងមិនបានបង្កបរិយាកាសស្មើភាពក្នុងទីផ្សារ​ការងារ ​សេដ្ឋកិច្ច​ ​ដែលនាំឱ្យប្រទេសបាត់បង់ធនធានដ៏​មាន​តម្លៃ​សម្រាប់​កសាង​ការ​អភិវឌ្ឍ​ទៅ​មុខ៕

3 comments:

Kalonh Chuck ខ្មែរពីស្បែកដល់ឆ្អឹង! said...

Hun Sen runs Cambodia according to Hanoi's plan. It's that simple!!!

HUN SEN reigne le Cambodge strictement selon le plan de Hanoi. C'est aussi simple que ça!!!

ហ៊ុនសែន ទទួលបញ្ជាពី ហាណូយ។ គ្មានអីក្រៅពីហ្នឹងទៀតទេ៕

P.s. Khmerization Admins, please get rid of the pop-ups like you all have been doing during the past few weeks. Thanks a million. If Srey Mao over at KIMEDIA can do it, how hard can it be for you guys???

Anonymous said...



ទឹកត្រជាក់ត្រីកុម។
ស្រុកខ្មែរមិនមែនជាទីត្រជាក់ត្រជុំ សំរាប់ប្រជាជនខ្មែរទេ។ ផ្ទុយទៅវិញគឺសំរាប់យួនរស់នៅយ៉ាងស្រួលទៅវិញ។



Kim Ea said...

The creation of an influx of foreigners Vietnam illegal immigrant in this country by order their official to be more leniency away toward illegal races. When we said this they will accused us as racist or enemy to obstruct their well being good policy .But this attitude of hinding their incompetency can propelled a root cause of splitting of Khmer poor outside of cities families or can said force Khmer poor to emigrate and find work abroad . This is a reciprocal ripple affect intentionally, well planned to replace Khmer labors performance with their favorite Yuan race in this nation . This government puppet mafia seem to satisfied and acceptable with this exodus of their own people to be slave labor abroad than organized a true help of Khmer labor inside the country . In this mafia dictatorship mind Yuan tend to be more acceptable in this societies than Khmer who opposed his idea and and created political mess and embarrassing to his transformation of Vietnam federation in his home land .