ក្រសួងយុត្តិធម៌ស្នើរដ្ឋសភាដកអភ័យឯកសិទ្ធិតំណាងរាស្ត្របក្សប្រឆាំង២រូប
ដោយ សុ ជីវី
2016-07-01
រដ្ឋមន្ត្រីក្រសួងយុត្តិធម៌ លោក អង្គ វង្សវឌ្ឍានា ថ្លែងទៅកាន់អ្នកសារព័ត៌មាន នាវិមានរដ្ឋសភា កាលពីថ្ងៃទី២៥ ខែមីនា ឆ្នាំ២០១៦។
RFA/Brach Chev
ក្រសួងយុត្តិធម៌ស្នើប្រធានរដ្ឋសភា ដកអភ័យឯកសិទ្ធិសភា របស់តំណាងរាស្ត្រគណបក្សប្រឆាំងចំនួន២រូបមកពីគណបក្សសង្គ្រោះជាតិ ដែលពាក់ព័ន្ធនឹងសំណុំរឿងសញ្ចារកម្ម។ តំណាងរាស្ត្រ និងជាសមាជិកគណៈកម្មាធិការអចិន្ត្រៃយ៍ គណបក្សសង្គ្រោះជាតិ បញ្ជាក់ថា គណបក្សនេះស្វាគមន៍ប្រសិនបើរដ្ឋសភាបំពេញតាមនីតិវិធីត្រឹមត្រូវ។
អគ្គលេខាធិការ និងជាអ្នកនាំពាក្យរដ្ឋសភាបញ្ជាក់ថា កំពុងដំណើរការតាមច្បាប់ចំពោះសំណើរបស់រដ្ឋមន្ត្រីក្រសួងយុត្តិធម៌នេះ។
អគ្គលេខាធិការ និងជាអ្នកនាំពាក្យរដ្ឋសភា លោក ឡេង ប៉េងឡុង ថ្លែងថា រដ្ឋសភាបានទទួលសំណើរួចហើយ ប៉ុន្តែនៅរង់ចាំការសម្រេចរបស់គណៈកម្មាធិការអចិន្ត្រៃយ៍រដ្ឋសភា៖ «បាទបានទទួល ហើយបានធ្វើកំណត់បង្ហាញជូនទៅដល់គណៈកម្មាធិការអចិន្ត្រៃយ៍រដ្ឋសភាហើយ។ ខ្ញុំបានដាក់ជូនហើយគឺ គណៈកម្មាធិការអចិន្ត្រៃយ៍ជាអ្នកសម្រេច»។
លិខិតរបស់រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍានា ចុះថ្ងៃទី ៣០ខែ មិថុនា ស្នើប្រធានរដ្ឋសភា គឺលោក ហេង សំរិន អោយដកអភ័យឯកសិទ្ធិសភាតំណាងរាស្ត្រពីររូប គឺលោក តុ វ៉ាន់ចាន់ និង លោក ពិន រតនា។
ក្នុងលិខិតនោះបញ្ជាក់ថា សំណើនេះជាការឆ្លើយតបចំពោះលិខិតរបស់អយ្យការអមសាលាដំបូងរាជធានីភ្នំពេញ ដែលសំអាងថា លោក តុ វ៉ាន់ចាន់ តំណាងរាស្ត្រមណ្ឌលកណ្ដាល និងលោក ពិន រតនា តំណាងរាស្ត្រមណ្ឌលបាត់ដំបងកំពុងជាប់សង្ស័យក្នុងបទប្រព្រឹត្តអំពើសញ្ចារកម្មជាបទល្មើសព្រហ្មទណ្ឌ តាមមាត្រា២៨៤ នៃក្រមព្រហ្មទណ្ឌ។ លិខិតបញ្ជាក់ទៀតថា ការសម្រេចដកអភ័យឯកសិទ្ធិសភា របស់អ្នកតំណាងរាស្ត្រទាំង២រូបនឹងបើកផ្លូវអោយតុលាការបន្តនីតិវិធី ដែលនឹងជួយពង្រឹងនីតិរដ្ឋ។
កាលពីថ្ងៃទី១៦ ខែឧសភា តុលាការក្រុងភ្នំពេញ កោះហៅតំណាងរាស្ត្របក្សប្រឆាំង ២រូបនោះ ឲ្យចូលបំភ្លឺក្នុងសំណុំរឿងសញ្ចារកម្មពាក់ព័ន្ធ រឿងអាស្រូវស្នេហារវាងលោក កឹម សុខា និងអ្នកនាង ខុម ចាន់តារាទី ហៅ ស្រីមុំ។
ប៉ុន្តែតំណាងរាស្ត្រទាំង២រូបនោះ បដិសេធមិនចូលទៅបំភ្លឺឡើយ ក្រោយគណបក្សបានចេញសេចក្ដីថ្លែងការណ៍ ដោយប្រកាន់ជំហរមិនចូលបំភ្លឺ និងស្នើឲ្យបញ្ឈប់ការចេញដីកាទាំងនេះជាបន្ទាន់ ហើយគណបក្សចាត់ទុកថាជាអំពើរំលោភបំពានយ៉ាងធ្ងន់ធ្ងរលើអភ័យឯកសិទ្ធិរបស់អ្នកតំណាងរាស្ត្រ ដែលធានាការពារដោយមាត្រា៨០នៃរដ្ឋធម្មនុញ្ញ។
តំណាងរាស្ត្រ និងសមាជិកគណៈកម្មាធិការអចិន្ត្រៃយ៍ លោក គីមសួរ ភីរិទ្ធ បញ្ជាក់ថា គណបក្សនេះស្វាគមន៍ប្រសិនបើរដ្ឋសភាបំពេញតាមនីតិវិធី៖ «ខ្ញុំគិតថាដកព្យួរលើកគឺតែមួយ សំឡេង២ភាគ៣ គេអត់មានចែងថាព្យួរតែពាក់កណ្ដាល (សំឡេង) តែ៦០នាក់ឯណា! គឺសភាពេញអង្គសំឡេង២ភាគ៣។ បើគេគោរពច្បាប់ទៅគ្មានបញ្ហាទេ សង្រ្គោះជាតិតាមតែ ហ្នឹងទេព្រោះច្បាប់ចែងច្បាស់ណាស់»។
បើទោះជាយ៉ាងណាមកដល់ពេលនេះតំណាងរាស្ត្រគណបក្សសង្គ្រោះជាតិទាំងអស់បានពហិការមិនចូលរួមប្រជុំសភាឡើយ។
មាត្រា៨០ នៃរដ្ឋធម្មនុញ្ញ ចែងថា តំណាងរាស្ត្រមានអភ័យឯកសិទ្ធិសភា ហើយមិនត្រូវចោទប្រកាន់ ចាប់ខ្លួន ឃាត់ខ្លួនឬ ឃុំខ្លួន ដោយសារបានសំដែងយោបល់ ឬបញ្ចេញមតិក្នុងការបំពេញមុខងាររបស់ខ្លួនឡើយ។ ការចោទប្រកាន់ចាប់ឃាត់ខ្លួន ឬឃុំខ្លួនអាចធ្វើបានលុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់ រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែបទល្មើសព្រហ្មទណ្ឌជាក់ស្ដែង។ សេចក្ដីសម្រេចរបស់គណៈកម្មាធិការអចិន្ត្រៃយ៍រដ្ឋសភាត្រូវដាក់ជូនកិច្ចប្រជុំសភា ដើម្បីអនុម័តតាមមតិភាគច្រើន ពីរភាគបីនៃសមាជិកទាំងមូល៕
1 comment:
Ang Yuon Vathana,
How about the person who let the illegal Vietnamese flow into Cambodia?
How about the persons who are responsible for preserving Khmer natural resource? Etc...
Should they be stripped from their power?
Post a Comment