A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Wednesday 8 June 2016
ពលរដ្ឋខេត្តស្ទឹងត្រែងថាឈ្មួញនៅតែដឹកឈើប្រណិតចូលបរិវេណបាតអាងទំនប់វារីអគ្គិសនី
ដោយ ម៉ែន សុធីរ
2016-06-07
កំណាត់ឈើដែលគេកាប់ក្នុងព្រៃក្រៅបរិវេណអាងស្តុកទឹកនៃគម្រោងសាងសង់វារីអគ្គិសនីសេសានក្រោមពីរ នាខេត្តស្ទឹងត្រែង កាលពីខែវិច្ឆិកា ឆ្នាំ២០១៤។
Photo Adhoc
ពលរដ្ឋរស់នៅឃុំស្ដៅ ស្រុកសេសាន ខេត្តស្ទឹងត្រែង អះអាងថា សកម្មភាពដឹកជញ្ជូនឈើមូលក្រៅតំបន់ផ្ទៃអាងទំនប់វារីអគ្គិសនីសេសានក្រោមពីរ នៅតែបន្តកើតមាន និងពុំមានការទប់ស្កាត់ទេ។ អ្នកភូមិថា ឈើទាំងនោះត្រូវឈ្មួញដឹកពីតំបន់ឆ្ងាយៗក្នុងស្រុកសៀមប៉ាង និងស្រុកសេសាន ទៅទុកក្នុងបរិវេណបាតអាងទំនប់វារីអគ្គិសនីសេសានក្រោមពីរ ចាប់តាំងពីខែមេសា រហូតមក។
ពលរដ្ឋរស់នៅភូមិស្ដៅ ឃុំស្ដៅ ស្រុកសេសាន ឲ្យដឹងនៅថ្ងៃទី៦ មិថុនា ថា គោយន្តរាប់រយគ្រឿង និងរថយន្តប៉ាកុង ឬហៅថារថយន្តដឹកឈើហ៊ុបជាច្រើនគ្រឿង បានដឹកជញ្ជូនឈើមូល និងឈើប្រណិតពីតំបន់ឆ្ងាយៗមកទុកនៅក្នុងផ្ទៃបាតអាងទំនប់វារីអគ្គិសនីសេសានក្រោមពីរ។
ឈើទាំងនោះ គេដឹកមកពីតំបន់ព្រៃស្រោងនៃភ្នំក្រឡាពស់ ឋិតក្នុងចន្លោះទន្លេសេសាន និងទន្លេស្រែពក ឬហៅថាតំបន់កោះ ជាប់ព្រំប្រទល់ប្រទេសឡាវ ដោយមានជនជាតិវៀតណាម ជាអ្នកដឹកជញ្ជូន។
ពលរដ្ឋរស់នៅភូមិស្ដៅ ស្រុកសេសាន ថ្លែងសុំមិនបញ្ចេញឈ្មោះ រៀបរាប់ថា ស្ទើរជារៀងរាល់ថ្ងៃមានគោយន្តជាង ១០០គ្រឿង និងរថយន្តដឹកឈើហ៊ុបជាង ១០គ្រឿង ដឹកជញ្ជូនឈើមូលទាំងនោះដែលមានមុខកាត់ចាប់ពី ៥តឹកដល់ ២ម៉ែត្រ ប្រវែងចាប់ពី ៨ម៉ែត្រដល់ ១២ម៉ែត្រ។ ចំណែកឈើប្រណិតដូចជាគ្រញូង បេង នាងនួន និងធ្នង់ គេដឹកជញ្ជូនតាមគោយន្ត មានមុខកាត់ចាប់ពី ១តឹកកន្លះដល់ ៨តឹក ប្រវែង ១ម៉ែត្រ ២តឹក ដល់ ២ម៉ែត្រ ២តឹក។ លើសពីនេះ មានអាប៊ុល និងគ្រឿងចក្របានឈូសឆាយធ្វើផ្លូវខ្វាត់ខ្វែងនៅតំបន់នោះ ដើម្បីងាយស្រួលចរាចរឈើទាំងនោះចូលបរិវេណបាតអាងទំនប់វារីអគ្គិសនី៖ «ឥឡូវឈើប្រណិតក៏នៅតែបន្ត ហើយឈើហ៊ុបក៏នៅតែបន្តសកម្មភាព គេដឹករហូតចឹង។ ឈើក្នុងស្រុកខ្មែររបស់យើងរលាយ សួរថាកូនខ្មែរជំនាន់ក្រោយរបស់យើងនឹងរងគ្រោះធម្មជាតិយ៉ាងណាខ្លះ?»។
ឆ្លើយតបការលើកឡើងនេះ តំណាងក្រុមហ៊ុនសម្អាតអាងទំនប់វារីអគ្គិសនីសេសានក្រោមពីរ លោក អ៊ុំ រ៉េត បដិសេធថា មិនមានការដឹកជញ្ជូនឈើដូចការលើកឡើងរបស់ពលរដ្ឋនោះឡើយ៖ «អត់មានទេ ព្រោះខ្ញុំឈប់ធ្វើតាំងពីដើមឆ្នាំ»។
អ្នកនាំពាក្យសាលាខេត្តស្ទឹងត្រែង លោក ម៉ែន គុង ឲ្យដឹងថា លោកពុំទាន់ទទួលព័ត៌មាននេះនៅឡើយទេ។ យ៉ាងណាលោកថា កន្លងមកអាជ្ញាធរខេត្ត បានកំណត់ឲ្យក្រុមហ៊ុនទំនប់វារីអគ្គិសនីសេសានក្រោមពីរ ផ្តល់គ្រឿងផ្ទះជូនពលរដ្ឋដែលរងផលប៉ះពាល់ពីទំនប់វារីអគ្គិសនី៖ «ព្រៃឈើដែលពាក់ព័ន្ធបាតអាងនេះ។ ខ្ញុំអត់ទាន់ទទួលថាតើអាហ្នឹងជាឈើបទល្មើស ឬក៏ជាឈើសម្រាប់រៀបចំជាគ្រឿងផ្ទះជូនពលរដ្ឋ»។
វិទ្យុអាស៊ីសេរី មិនអាចទាក់ទងនាយខណ្ឌរដ្ឋបាលព្រៃឈើ លោក ឈៀង តុលា ដើម្បីសុំការបំភ្លឺបញ្ហានេះបានទេនៅថ្ងៃទី៦ មិថុនា។
មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខេត្តស្ទឹងត្រែង លោក ហូ សំអុល កត់សម្គាល់ថា តំបន់បាតអាងនៃទំនប់វារីអគ្គិសនីសេសានក្រោមពីរ គឺជាទីតាំងសម្រាប់បម្លែងឈើខុសច្បាប់ឲ្យស្របច្បាប់ជាច្រើនឆ្នាំមកហើយ។ លោកចាត់ទុកការដឹកជញ្ជូនឈើនេះ ថាជាទង្វើផ្គើននឹងបទបញ្ជាលោកនាយករដ្ឋមន្ត្រី។ លោកថា អាជ្ញាធរខេត្តស្ទឹងត្រែង ជាពិសេសមន្ត្រីរដ្ឋបាលព្រៃឈើត្រូវទទួលខុសត្រូវចំពោះមុខច្បាប់ បើរកឃើញថា បណ្តោយឲ្យបទល្មើសនេះ៖ «ក្នុងមាត្រា១០១ គេបាននិយាយហើយដូចជាផ្ដោតឲ្យមន្ត្រីរដ្ឋបាលព្រៃឈើ អនុវត្តឲ្យបានខ្ជាប់ខ្ជួនទៅនឹងច្បាប់ព្រៃឈើហ្នឹង។ ប្រសិនមានការបណ្តែតបណ្តោយ ត្រូវទទួលខុសត្រូវចំពោះមុខច្បាប់»។
ផ្ទៃអាងទំនប់វារីអគ្គិសនីសេសានក្រោមពីរ មានផ្ទៃដី ៣៦.០០០ហិកតារ ឋិតក្នុងស្រុកសេសាន ខេត្តស្ទឹងត្រែង ដែលមានឧកញ៉ា លឹម ប៊ុនណា ហៅ ខ្នារ ទទួលសិទ្ធិសម្អាតបាតអាងតាំងពីឆ្នាំ២០១២។
ដោយឡែកមេឃុំស្រែគរ លោក សៀក មេគង្គ រកឃើញថា ឈើដែលគេកាប់ និងដឹកជញ្ជូននោះ មិនមែនសម្អាតបាតអាងប៉ុណ្ណោះទេ គឺកាប់ពីតំបន់ផ្សេងៗឆ្ងាយពីផ្ទៃអាង ៣០គីឡូម៉ែត្រ ដែលក្រុមហ៊ុននៅតែមានឈើប្រភេទនេះដឹកជញ្ជូនចេញមិនចេះអស់សោះតាំងពីឆ្នាំ២០១៣។ ចំណែកការកំណត់ផ្ទៃដីកំណត់បាតអាងទំហំជាង ៣ម៉ឺនហិកតាររបស់អាជ្ញាធរជំនាញមកទល់ពេលនេះ ក៏ហាក់នៅមានអាថ៌កំបាំងដែរ។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី មានប្រសាសន៍ថា លោកពុំទាន់ទទួលព័ត៌មាននេះដែរ។ លោកថានឹងចាត់មន្ត្រីជំនាញចុះស៊ើបអង្កេតករណីនេះ៖ «ខេត្តស្ទឹងត្រែង កាលណាមានការដឹក យើងចាប់ជាប់រហូត ហើយច្រើនចឹងដូចមិនមាន។ ចាំមើលខ្ញុំទាក់ទងហ្នឹងឲ្យគេឆែកបន្ត»។
ច្បាប់ព្រៃឈើឆ្នាំ២០០២ មាត្រា១០០ ចែងថា សកម្មភាពទាំងឡាយដែលធ្វើឡើងដោយមន្ត្រីអាជ្ញាធរដែនដី មន្ត្រីនគរបាលកងកម្លាំងប្រដាប់អាវុធដែលបានអន្តរាគមន៍ ឬផ្ដល់ការអនុញ្ញាតដោយផ្ទាល់ ឬប្រយោលជួយដល់អាជីវកម្មព្រៃឈើ និងគំរាមកំហែងមន្ត្រីរដ្ឋបាលព្រៃឈើ ឬរារាំងកិច្ចការរបស់មន្ត្រីរដ្ឋបាលព្រៃឈើ គឺចាត់ទុកជាបទល្មើស ដោយត្រូវផ្ដន្ទាទោសពី ១ឆ្នាំទៅ ៥ឆ្នាំ និងពិន័យជាប្រាក់ពី ១០លានរៀលដល់ ១០០លានរៀល៕
Subscribe to:
Post Comments (Atom)
No comments:
Post a Comment