A Change of Guard
សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican
Wednesday 8 June 2016
ជនជាតិដើមភាគតិចម៉ុងតាញ៉ា-វៀតណាមខ្លាចអាជ្ញាធរខ្មែរចាប់បញ្ជូនទៅវៀតណាមវិញ
ដោយ យាង សុជាមេត្តា
2016-06-07
ជនជាតិដើមភាគតិចម៉ុងតាញ៉ា-វៀតណាម ស្នាក់នៅក្រោមការឧបត្ថម្ភរបស់ឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួន (UNHCR) នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ នៅថ្ងៃទី៧ ខែមិថុនា ឆ្នាំ២០១៦។ RFA/Yeang Socheametta
RFA/Yeang Socheametta
ជនជាតិដើមភាគតិចម៉ុងតាញ៉ា-វៀតណាម បារម្ភខ្លាចអាជ្ញាធរខ្មែរចាប់បញ្ជូនខ្លួនពួកគេប្រគល់ទៅឲ្យអាជ្ញាធរវៀតណាម វិញ។ ការបារម្ភជាថ្មីទៀតនេះ នៅពេលនាយកមន្ទីរនគរបាលខេត្តយ៉ាឡាយ (Gia Lai) ប្រទេសវៀតណាម បានចុះមកដល់កន្លែងស្នាក់នៅរបស់ជនជាតិម៉ុងតាញ៉ា នៅព្រឹកថ្ងៃទី៧ មិថុនា ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
នេះជាលើកទីមួយដែលមានមន្ត្រីនគរបាលជាន់ខ្ពស់នៃខេត្តយ៉ាឡាយ របស់វៀតណាម មកដល់អគារស្នាក់នៅរបស់ជនជាតិដើមភាគតិចម៉ុងតាញ៉ា-វៀតណាម ដើម្បីសួរនាំពួកគេ។
ជនជាតិម៉ុងតាញ៉ា ឲ្យដឹងថា ពេលមន្ត្រីនគរបាលវៀតណាម ចុះសួរនាំពួកគេ ក៏មានវត្តមានមន្ត្រីនគរបាលកម្ពុជា និងមន្ត្រីអង្គការសហប្រជាជាតិ ផងដែរ។
ថ្លែងប្រាប់វិទ្យុអាស៊ីសេរី នៅមុខអគារស្នាក់នៅដែលជាផ្ទះល្វែង ៣ខ្នងជាប់គ្នានៅក្នុងភូមិត្រពាំងថ្លឹង សង្កាត់ចោមចៅ នៅរសៀលថ្ងៃទី៧ មិថុនា ជនជាតិម៉ុងតាញ៉ា ដែលភាគច្រើនចេះនិយាយភាសាវៀតណាម ឲ្យដឹងថា ពេលនាយកមន្ទីរនគរបាលខេត្តយ៉ាឡាយ ចុះជួបពួកគេ មន្ត្រីនគរបាលរូបនេះបាននិយាយលួងលោមឲ្យពួកគេវិលត្រឡប់ទៅរស់នៅក្នុងប្រទេសវៀតណាម វិញ ដោយសន្យាថានឹងមិនធ្វើបាបពួកគេឡើយ។
ទោះជាបែបនេះក្តី ជនជាតិម៉ុងតាញ៉ា ជិត ១៥០នាក់នោះនិយាយថា ពួកគេមិនជឿលើសម្ដីលួងលោមបញ្ចុះបញ្ចូលរបស់មន្ត្រីនគរបាលរូបនោះឡើយ។ ពួកគេយល់ថា នេះគ្រាន់តែជាល្បិចរបស់រដ្ឋាភិបាលវៀតណាម ធ្វើយ៉ាងណាឲ្យពួកគេត្រឡប់ទៅវិញ ប៉ុន្តែពេលទៅដល់ប្រទេសវៀតណាម ហើយ ពួកគេអាចប្រឈមនឹងការធ្វើបាប ឬការចាប់ដាក់គុកដោយអាជ្ញាធរវៀតណាម ក៏ថាបាន។
ជនជាតិដើមភាគតិចម៉ុងតាញ៉ា-វៀតណាម ទាំងអស់នេះដែលកន្លងមកតែងបារម្ភខ្លាចអាជ្ញាធរខ្មែរចាប់បញ្ជូនពួកគេទៅឲ្យអាជ្ញាធរវៀតណាម វិញនោះ និយាយថា ពេលនេះពួកគេរឹតតែបារម្ភជាងពេលមុនទៀត ដោយហេតុថា នគរបាលវៀតណាម បានស្គាល់កន្លែងស្នាក់នៅរបស់ពួកគេអស់ហើយ ខ្លាចថ្ងៃណាមួយពិសេសនៅពេលយប់ នគរបាលវៀតណាម មកចាប់ពួកគេច្រកចូលឡាននាំខ្លួនទៅកាន់ប្រទេសវៀតណាម វិញ។ ពេលនោះ ពួកគេប្រាកដជាមិនបានសុខឡើយ។
ពួកគេចាត់ទុកការចុះមកដល់កន្លែងស្នាក់នៅដោយនគរបាលវៀតណាម ពេលនេះ ថាជាការគំរាមកំហែងមួយ។ ពួកគេទទូចសុំរដ្ឋាភិបាលកម្ពុជា កុំឲ្យចាប់បញ្ជូនពួកគេត្រឡប់ទៅវៀតណាម វិញ និងស្នើឲ្យឧត្តមស្នងការអង្គការសហប្រជាជាតិ ទទួលបន្ទុកជនភៀសខ្លួនជួយធ្វើយ៉ាងណា ឲ្យពួកគេទទួលបានឋានៈជាជនភៀសខ្លួន ដើម្បីអាចឲ្យពួកគេសុំសិទ្ធិជ្រកកោននៅប្រទេសទី៣។
ប្រធាននាយកដ្ឋានជនភៀសខ្លួននៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ លោក តាន់ សុខវិជ្ជា មានប្រសាសន៍ថា លោកមិនដឹងពីការចុះជួបជនជាតិម៉ុងតាញ៉ា ដោយនគរបាលវៀតណាម ឡើយ៖ «ខ្ញុំអត់ដែលទទួលបានព័ត៌មានអីទេ ព្រោះខាងនេះ រឿងគឺថ្នាក់ Politics (នយោបាយ) ថ្នាក់ដឹកនាំលោកជជែកគ្នា តែខាងពួកខ្ញុំមន្ត្រីអនុវត្ត អត់ដែលដឹងកិច្ចការហ្នឹង ខាង UN គេមិនដែលមានទាក់ទងទេ គ្រាន់តែថាឲ្យកម្ពុជា អនុវត្តតាមគោលការណ៍ច្បាប់ដែលកម្ពុជា មានអនុលោមទៅតាមច្បាប់អន្តរជាតិ»។
ចំណែកមន្ត្រីផ្នែកព័ត៌មានសាធារណៈប្រចាំតំបន់របស់ យូ.អិន.អេច្ឆ.ស៊ី.អ (UNHCR) អ្នកស្រី វីវៀន តាន់ (Vivian Tan) បញ្ជាក់ប្រាប់វិទ្យុអាស៊ីសេរី តាមសារអេឡិចត្រូនិកនៅថ្ងៃទី៧ មិថុនា ថា មន្ត្រី យូ.អិន.អេច្ឆ.ស៊ី.អ ត្រូវបានគេប្រាប់ឲ្យដឹងពីគម្រោងចុះទៅជួបជនជាតិម៉ុងតាញ៉ា ដើម្បីចែកអំណោយដល់ជនជាតិម៉ុងតាញ៉ា ទាំងអស់នោះ។ ប៉ុន្តែអ្នកស្រីបញ្ជាក់ថា អង្គការសហប្រជាជាតិ មិនមែនជាអ្នករៀបចំ ហើយក៏មិនគាំទ្រការចុះជួបនោះដែរ ប៉ុន្តែការដែលមានមន្ត្រីរបស់ យូ.អិន.អេច្ឆ.ស៊ី.អ ចុះទៅជាមួយនគរបាលវៀតណាម គឺដើម្បីពិនិត្យមើលស្ថានភាពប៉ុណ្ណោះ។ អ្នកស្រីបន្ថែមថា គ្មានអ្នកស្វែងរកសិទ្ធិជ្រកកោនណាមួយ គួរត្រូវបានគេបង្ខំឲ្យជួបតំណាងរដ្ឋាភិបាល ដែលពួកគេចោទថា ជាអ្នកធ្វើទុក្ខបុកម្នេញលើពួកគេនោះទេ។
ឆ្លើយនឹងសំណួរទាក់ទងការបារម្ភរបស់ជនជាតិម៉ុងតាញ៉ា ចំពោះការចាប់បញ្ជូនខ្លួនទៅវៀតណាម វិញ អ្នកស្រី វីវៀន តាន់ អះអាងថា គ្មានជនណាម្នាក់គួរត្រូវគេចាប់បញ្ជូនខ្លួនទៅកាន់ទីកន្លែងដែលជីវិត និងសេរីភាពរបស់ពួកគេជួបនឹងគ្រោះថ្នាក់នោះឡើយ។
ជនជាតិដើមភាគតិចម៉ុងតាញ៉ា-វៀតណាម ឬវៀតណាម ហៅថា ងើយ ទឿង (người Thượng) គឺជាក្រុមជនជាតិដើមភាគតិចរស់នៅក្នុងតំបន់ភ្នំក្នុងខេត្តយ៉ាឡាយ (Gia Lai) ខេត្តដាក់ឡាក់ (Dak Lak) និងខេត្តកនតុំ (Kon Tum) ដែលឋិតនៅប៉ែកកណ្ដាលប្រទេសវៀតណាម ជាប់ព្រំប្រទល់នឹងខេត្តរតនគិរី និងខេត្តមណ្ឌលគិរី របស់កម្ពុជា។
ចាប់ពីចុងឆ្នាំ២០១៤ មក មានជនជាតិដើមភាគតិចម៉ុងតាញ៉ា-វៀតណាម ជាង ២០០នាក់ បាននាំគ្នារត់កាត់ព្រៃឆ្លងដែនចូលទឹកដីកម្ពុជា ជាបន្តបន្ទាប់ ដើម្បីរត់គេចពីការធ្វើទុក្ខបុកម្នេញរបស់អាជ្ញាធរវៀតណាម និងដើម្បីឲ្យអង្គការសហប្រជាជាតិ ជួយ។ ក្នុងចំណោមពួកគេទាំងអស់នោះ ខ្លះត្រូវបានអាជ្ញាធរខ្មែរចាប់បញ្ជូនទៅឲ្យអាជ្ញាធរវៀតណាម វិញ។ ប៉ុន្តែមាន ១៣នាក់ត្រូវបានរដ្ឋាភិបាលកម្ពុជា ទទួលស្គាល់ថា មានឋានៈជាជនភៀសខ្លួនកាលពីដើមឆ្នាំ២០១៦។ ពួកគេត្រូវបានអង្គការសហប្រជាជាតិ បញ្ជូនទៅកាន់ប្រទេសហ្វីលីពីន (Philippines) កាលពីថ្ងៃទី២៧ ឧសភា កន្លងទៅ។ ចំណែកជនជាតិម៉ុងតាញ៉ា ១៩៤នាក់ផ្សេងទៀត កំពុងស្ថិតក្នុងការកំណត់ឋានៈជាជនភៀសខ្លួនដោយអាជ្ញាធរខ្មែរនៅឡើយ។ អ្នកស្រី វីវៀន តាន់ ឲ្យដឹងថា ពួកគេមួយចំនួនបានឆ្លងកាត់ការសម្ភាសដើម្បីកំណត់ឋានៈជាជនភៀសខ្លួនរួចហើយ តែអ្នកស្រីមិនទាន់ឲ្យដឹងពីលទ្ធផលនោះឡើយ។
កន្លងមក អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) បានរិះគន់ប្រទេសវៀតណាម ដែលធ្វើទុក្ខបុកម្នេញលើជនជាតិម៉ុងតាញ៉ា។ អង្គការឃ្លាំមើលសិទ្ធិមនុស្សអន្តរជាតិ ក៏ទទូចឲ្យរដ្ឋាភិបាលកម្ពុជា កុំឲ្យចាប់បញ្ជូនខ្លួនពួកគេទៅឲ្យអាជ្ញាធរវៀតណាម វិញ៕
Subscribe to:
Post Comments (Atom)
No comments:
Post a Comment