A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Monday 18 April 2016

មន្ត្រី​ក្រសួង​មហាផ្ទៃ​បដិសេធ​ការ​រៀបចំ​កម្លាំង​នគរបាល​ចុះ​មូលដ្ឋាន​ដើម្បី​ពង្រឹង​បក្ស



Manekseka Sangkum: We deny, deny, deny.... therefore we are?

....

មន្ត្រី​ក្រសួង​មហាផ្ទៃ​បដិសេធ​ការ​រៀបចំ​កម្លាំង​នគរបាល​ចុះ​មូលដ្ឋាន​ដើម្បី​ពង្រឹង​បក្ស
ដោយ ម៉ម មុនីរតន៍
2016-04-17

ខៀវ សុភ័គ ២០១៦ ៨៥៥
លោក ខៀវ សុភ័គ អ្នកនាំពាក្យ​ក្រសួង​មហាផ្ទៃ ចូលរួម​ក្នុង​កិច្ចប្រជុំ​បូក​សរុប​ពី​ការ​អនុវត្ត​ច្បាប់​ចរាចរណ៍​ដើម​ឆ្នាំ២០១៦ នា​ក្រសួង​មហាផ្ទៃ កាល​ថ្ងៃទី២១ ខែ​មករា ឆ្នាំ​២០១៦។
 RFA/Brach Chev


មន្ត្រី​នគរបាល​ក្រសួង​មហាផ្ទៃ ត្អូញត្អែរ​ចំពោះ​ផែនការ​របស់​ក្រសួង ដែល​តម្រូវ​ឲ្យ​ចុះ​មូលដ្ឋាន ហើយ​ចំណាយ​លុយ​ផ្ទាល់​ខ្លួន ដែល​ចុះ​ទៅ​ដើម្បី​ពង្រឹង​គណបក្ស​ប្រជាជន​កម្ពុជា ក្រោម​ហេតុផល​ចុះ​ជួយ​ប្រជាពលរដ្ឋ​នៅ​តាម​មូលដ្ឋាន។ ចំណែក​គណបក្ស​ប្រឆាំង​វិញ​អះអាង​ថា បើ​ខ្លួន​ឈ្នះ​ឆ្នោត នឹង​ធ្វើ​ច្បាប់​ដាក់​ឲ្យ​មន្ត្រី​រាជការ និង​កម្លាំង​នគរបាល ស្ថិត​នៅ​ដោយ​ឯករាជ្យ មិន​ចំណុះ​ឲ្យ​បក្ស​នយោបាយ​ណា​មួយ​ឡើយ។

មន្ត្រី​ជាន់​ខ្ពស់​ក្រសួង​មហាផ្ទៃ ទទួល​ស្គាល់​ថា កម្លាំង​នគរបាល​ពិត​ជា​បាន​ចុះ​មូលដ្ឋាន ក៏ប៉ុន្តែ​ការ​ចុះ​នេះ មិន​មែន​ស្ថិត​ក្នុង​ក្របខ័ណ្ឌ​មន្ត្រី​នគរបាល ជា​នាយ​នគរបាល ពល​នគរបាល ឬ​ថ្នាក់​ឧត្ដមសេនីយ៍ ទៅ​ចុះ​មូលដ្ឋាន​ឡើយ។ ផ្ទុយ​ទៅ​វិញ អ្នក​ដែល​ត្រូវ​ចុះ​មូលដ្ឋាន​នោះ គឺ​ជា​អ្នក​ដែល​ពុំ​មាន​បណ្ដា​ស័ក្ដិ​អ្វី​ទាំងអស់។

មន្ត្រី​នាំ​ពាក្យ​ក្រសួង​មហាផ្ទៃ លោក ខៀវ សុភ័គ ឲ្យ​ដឹង​នៅ​ថ្ងៃ​ទី​១៧ មេសា ថា ក្រសួង​ពុំ​បាន​ដាក់​បទបញ្ជា​ឲ្យ​កង​កម្លាំង​ទាំងអស់ ត្រូវ​តែ​ចុះ​មូលដ្ឋាន ដើម្បី​គាំទ្រ​គណបក្ស​កាន់​អំណាច​ឡើយ។ មិន​តែ​ប៉ុណ្ណោះ ការ​ចុះ​មូលដ្ឋាន​នេះ គឺ​តែង​ធ្វើ​ក្នុង​ថ្ងៃ​ឈប់​សម្រាក​របស់​កម្លាំង​នគរបាល ដែល​មិន​ប៉ះពាល់​ដល់​ម៉ោង​រដ្ឋបាល ហើយ​ក៏​មិន​បាន​ប្រើប្រាស់​ថវិកា​រដ្ឋ និង​មធ្យោបាយ​របស់​រដ្ឋ​ផង​ដែរ។ លោក​បន្ត​ថា «មិន​ថា​កម្លាំង​នគរបាល និង​មន្ត្រី​រាជការ ឬ​ពលរដ្ឋ​ទេ តែង​មាន​កាតព្វកិច្ច និង​ចូលរួម​ក្នុង​ជីវិត​នយោបាយ​ដូចៗ​គ្នា និង​ស្មើ​ភាព​គ្នា។ ហេតុ​នេះ ការ​គាំទ្រ​បក្ស​នយោបាយ​ណា​មួយ​នោះ មិន​ស្ថិត​ក្រោម​បញ្ញត្តិ​នៃ​ច្បាប់​ឡើយ»។ លោក​បន្ត​ថា «នាយ​នគរបាល ឬ​ពល​នគរបាល មាន​សិទ្ធិ​ធ្វើ​នយោបាយ​ដូច​ពលរដ្ឋ​អ៊ីចឹង។ ទី​មួយ យើង​មិន​ប្រើប្រាស់​នគរបាល​ទេ ហើយ​ការ​ចុះ​មូលដ្ឋាន​ទៀតសោត ក្រសួង​បាន​ហាម​មិន​ឲ្យ​ប្រើប្រាស់​ឡាន​របស់​រដ្ឋ សាំង​របស់​រដ្ឋ និយាយ​រួម​សម្ភារៈ​ផ្ទាល់​ខ្លួន​ជា​បុគ្គល មិន​យក​ពេល​ម៉ោង និង​សម្ភារៈ​របស់​រដ្ឋ​ទៅ​ប្រើ​ប្រាស់​ទេ»។



កាល​ពី​ខែ​មីនា វិទ្យុ​អាស៊ីសេរី បាន​ទទួល​លិខិត​ចុះ​មូលដ្ឋាន​ចំនួន ២​ច្បាប់ ដែល​មាន​បញ្ជី​ឈ្មោះ និង​តួនាទី​នៃ​ការ​ទទួល​ខុស​ត្រូវ​តាម​ភូមិ-ឃុំ​ពី​មន្ត្រី​នគរបាល​នៃ​ក្រសួង​មហាផ្ទៃ។ ក្នុង​លិខិត​នោះ បាន​សរសេរ​ថា គណបក្ស​ប្រជាជន​កម្ពុជា នៃ​ក្រុម​ការងារ​គណៈកម្មាធិការ​កណ្ដាល និង​សមាសភាព​សម្រាប់​ចុះ​ជួយ​មូលដ្ឋាន ហើយ​បាន​បែង​ចែក​ជា​ក្រុមៗ ក្នុង​នោះ​សម្រាប់​មួយ​ក្រុម​មាន​អ្នក​ទទួល​ខុស​ត្រូវ​ប្រមាណ ៣​នាក់​ក្នុង​ភូមិ​នីមួយៗ។

យ៉ាង​នេះ​ក្តី លោក ខៀវ សុភ័គ អះអាង​ថា អ្នក​ដែល​ទម្លាយ​ឯកសារ​នេះ​ចេញ​ដល់​ដៃ​អ្នក​កាសែត គឺ​ជា​មនុស្ស​បក្ស​ផ្សេង ហើយ​ធ្វើ​ឡើង​ក្នុង​រូបភាព​មិន​ល្អ​ថែម​ទៀត​ផង។ ដោយឡែក​សម្រាប់​អ្នក​ដែល​គាំទ្រ​បក្ស​កាន់​អំណាច នឹង​មិន​ធ្វើ​ដូច​នេះ​ឡើយ។ លោក​បន្ត​ថា «អ្នក​ដែល​បាន​ទម្លាយ​រឿង​ហ្នឹង​ឲ្យ​អ្នក​កាសែត ឬ​វីអូឌី ដឹង អ្នក​ហ្នឹង​គឺ​បន្លំ​ខ្លួន​ធ្វើ​ជា​សមាជិក​បក្ស​ប្រជាជន ទេ។ បន្លំ​ខ្លួន​អ៊ីចឹង​ទៅ​ដើម្បី​ផ្សព្វផ្សាយ​ឲ្យ​គេ​ដឹង។ តាម​ពិត បើ​គេ​ជា​សមាជិក​បក្ស​ប្រជាជន ពិត​ប្រាកដ មិន​ដែល​មាត់​ក មិន​ដែល​មាន​អី​ទេ»។

បើ​ទោះ​បី​ជា​បែប​ណា មន្ត្រី​នគរបាល​នៃ​ក្រសួង​មហាផ្ទៃ ថ្លែង​សុំ​មិន​បញ្ចេញ​ឈ្មោះ បាន​ឲ្យ​ដឹង​ថា ចាប់​ពី​ពេល​នេះ​រហូត​ដល់​បោះឆ្នោត កម្លាំង​នគរបាល​នៃ​ក្រសួង​មហាផ្ទៃ អាច​ច្រើន​ជាង ៣០​នាយកដ្ឋាន ហើយ​មាន​កម្លាំង​នគរបាល​រាប់​ពាន់​នាក់ ត្រូវ​បាន​គេ​បញ្ជូន​ចុះ​តាម​ភូមិ-ឃុំ​នៅ​ទូទាំង​ប្រទេស​កម្ពុជា។ មន្ត្រី​នគរបាល​រូប​នេះ​បញ្ជាក់​ថា មូលហេតុ​ដែល​ធ្វើ​ឲ្យ​មន្ត្រី​នៅ​ថ្នាក់​ក្រោម​មិន​សប្បាយ​ចិត្ត គឺ​ក្រៅ​ពី​ត្រូវ​ចុះ​មូលដ្ឋាន​រៀង​រាល់​ថ្ងៃ​អាទិត្យ​ជា​ប្រចាំ​ហើយ ថែម​ទាំង​ត្រូវ​ចំណាយ​លុយ​ស្នាក់នៅ ហូប​ប្រចាំ​ថ្ងៃ និង​ថ្លៃ​ធ្វើ​ដំណើរ​ដោយ​ខ្លួន​ឯង​ថែម​ទៀត​ផង។

ក្រៅ​ពី​នេះ​វិញ រាល់​ពេល​មាន​បុណ្យ​សព ឬ​មាន​ពិធី​រៀបការ ក្នុង​មួយ​គ្រួសារ​នឹង​ទទួល​បាន​លុយ ១០​ម៉ឺន​រៀល។ លុយ​ទាំង​នេះ ជា​ថវិកា​ដែល​ត្រូវ​គេ​រៀបចំ​បម្រុង​ទុក។ ដោយឡែក​អ្នក​ដែល​ត្រូវ​ចូលរួម​ក្នុង​ពិធី​ប្រជុំ​ម្តងៗ​វិញ នឹង​ទទួល​បាន​លុយ ២​ម៉ឺន​រៀល។ ដោយឡែក​មន្ត្រី​ណា​មួយ​ដែល​ត្រូវ​គេ​រក​ឃើញ​ថា មិន​មាន​សកម្មភាព នឹង​ត្រូវ​បញ្ឈប់​ពី​តួនាទី ឬ​មិន​ដំឡើង​បុណ្យ​ស័ក្តិ​ក៏​មាន​ដែរ។

ចំណែក លោក យឹម សុវណ្ណ មន្ត្រី​នាំ​ពាក្យ​គណបក្ស​សង្គ្រោះ​ជាតិ បញ្ជាក់​ថា នេះ​ដោយសារ​ច្បាប់​មិន​បាន​ធានា និង​កំណត់​និយមន័យ​ឲ្យ​បាន​ច្បាស់លាស់ ចំពោះ​តួនាទី និង​ភារកិច្ច​កម្លាំង​ប្រដាប់​អាវុធ។ ហេតុ​នេះ បណ្ដាល​ឲ្យ​មាន​ភាព​ច្របូកច្របល់​យ៉ាង​នេះ។ លោក​បន្ត​ថា ក្នុង​ពេល​បក្ស​ប្រឆាំង​ដឹក​នាំ​ប្រទេស នឹង​តាក់តែង​ច្បាប់​ឲ្យ​កម្លាំង​នគរបាល និង​មន្ត្រី​រាជការ ត្រូវ​មាន​ភាព​ឯករាជ្យ។ លោក​បន្ត​ថា «ច្បាស់​ណាស់​គណបក្ស​ណា​គេ​ធ្វើ​ម៉េច​ជា​រឿង​របស់​គេ ប៉ុន្តែ​បើ​គណបក្ស​សង្គ្រោះ​ជាតិ នឹង​រៀបចំ​ធ្វើ​វិសោធនកម្ម​ច្បាប់​ពាក់ព័ន្ធ ឬ​មួយ​ក៏​ធ្វើ​ច្បាប់​បន្ថែម​ដើម្បី​ធានា​ថា មន្ត្រី​រាជការ ប៉ូលិស ទាហាន​ទាំងអស់ ត្រូវ​តែ​ឈរ​នៅ​អព្យាក្រឹត្យ មិន​មាន​ជាប់​ពាក់ព័ន្ធ​នឹង​គណបក្ស​នយោបាយ​ទេ»។

បើ​ទោះ​បី​ជា​បែប​ណា មាត្រា​៣៥ នៃ​រដ្ឋធម្មនុញ្ញ ចែង​ថា ប្រជាពលរដ្ឋ​ខ្មែរ​ទាំង​ពីរ​ភេទ​មាន​សិទ្ធិ​ចូលរួម​យ៉ាង​សកម្ម​ក្នុង​ជីវិត​នយោបាយ សេដ្ឋកិច្ច សង្គមកិច្ច និង​វប្បធម៌​របស់​ប្រទេស​ជាតិ។ ថ្វី​បើ​មាន​ការ​ធានា​ដោយ​ច្បាប់​កំពូល​របស់​ប្រទេស​ដូច​នេះ​ក៏ដោយ​ចុះ លោក យឹម សុវណ្ណ យល់​ឃើញ​ថា ដោយសារ​ការ​ផ្ដល់​និយមន័យ​មិន​ច្បាស់លាស់ និង​នៅ​មាន​ការ​រំលោភ​អំណាច​ដ៏​លើសលប់​នៅ​ឡើយ។ លោក​បញ្ជាក់​ថា ដើម្បី​ឲ្យ​កម្លាំង​នគរបាល ទាហាន និង​មន្ត្រី​រាជការ​ស្ថិត​នៅ​ដោយ​ឯករាជ្យ គឺ​ចាំបាច់​ត្រូវ​តាក់តែង​ច្បាប់​មួយ​ដាច់​ដោយឡែក ហើយ​ដាក់​ឲ្យ​អនុវត្ត​ដោយ​មាន​ប្រសិទ្ធភាព​ថែម​ទៀត​ផង៕

No comments: