Manekseka Sangkum:
If the corruption allegations are founded, the accused will be a peanut among the regime's much bigger crooks, and his prosecution can only help to temper the ACU's reputation as a tool of the CPP, and will certainly provide added rationale and credibility in its politically motivated harassments and pursuits of opposition figures as well as other civil dissidents and activists.
អង្គភាពប្រឆាំងអំពើពុករលួយរៀបចំបញ្ជូនសំណុំរឿងឯកអគ្គរាជទូតខ្មែរនៅកូរ៉េទៅតុលាការ
ដោយ យ៉ង ចាន់តារា
2016-04-05
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ថ្លែងទៅកាន់ក្រុមយុវជនក្នុងកម្មវិធីប្រកាសលទ្ធផលនៃការធ្វើកោសល្យវិច័យខ្សែអាត់សំឡេងដែលគេចោទថា ជាសំឡេងរបស់លោក កឹម សុខា ជាមួយស្រីកំណាន់ នៅថ្ងៃទី២៤ មីនា ឆ្នាំ២០១៦។
RFA/Cheu Sideth
អង្គភាពប្រឆាំងអំពើពុករលួយ អាចនឹងចោទប្រកាន់ឯកអគ្គរាជទូតខ្មែរប្រចាំប្រទេសកូរ៉េខាងត្បូង លោក ស៊ុត ឌីណា ចំនួនពីរករណី ពាក់ព័ន្ធនឹងរឿងពុករលួយ បន្ទាប់ពីអង្គភាពមួយនេះអះអាងថា បានរកឃើញភាពមិនប្រក្រតីជាច្រើនក្នុងការបំពេញមុខងាររបស់ លោក ស៊ុត ឌីណា នាពេលកន្លងមក។ ប្រធានអង្គភាពប្រឆាំងអំពើពុករលួយ បញ្ជាក់ថា បទល្មើសដែលលើកយកមកចោទ លោក ស៊ុត ឌីណា ទៅកាន់តុលាការជាករណីធូរស្រាល បើធៀបនឹងករណីធំៗផ្សេងទៀតដែលអង្គភាពប្រឆាំងអំពើពុករលួយ កំពុងស៊ើបអង្កេតក្នុងសំណុំរឿងរបស់គាត់។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ឲ្យវិទ្យុអាស៊ីសេរី ដឹងនៅថ្ងៃទី៥ មេសា ថា អង្គភាពរបស់លោកកំពុងដំណើរការនីតិវិធីសាកសួរ និងបញ្ជូនសំណុំរឿងរបស់ លោក ស៊ុត ឌីណា ទៅកាន់តុលាការ ដើម្បីចោទប្រកាន់ពាក់ព័ន្ធនឹងអំពើពុករលួយ៖ «យើងខ្ញុំបានឃាត់ខ្លួនគាត់កាលពីម្សិលមិញម៉ោង ៧យប់។ អ៊ីចឹងយើងខ្ញុំមានពេល ៤៨ម៉ោងរហូតដល់ស្អែកម៉ោង ៧យប់។ គ្រប់ ៤៨ម៉ោងរួចហើយ បានន័យថាត្រូវតែនាំខ្លួនគាត់ និងសំណុំរឿងនេះឲ្យបានដល់ដៃតុលាការ មុនថ្ងៃស្អែកម៉ោង ៧យប់»។
លោក ស៊ុត ឌីណា៖ «បើខ្ញុំបាទមិនមានជំហររឹងមាំទេ គឺមិនអាចយកឈ្នះលើសមរភូមិការងាររដ្ឋបាល ការទូត និងនយោបាយដ៏ក្តៅនេះបានឡើយ ពីព្រោះមួយគ្រប់គ្រងការងាររដ្ឋបាល និងនយោបាយ និងមួយទៀតត្រូវរវល់ទប់ទល់នឹងកម្លាំងបុករុកមួលបង្កាច់ បង្ខូច បំភ័ន្តមតិថ្នាក់លើ ដើម្បីដកការទុកចិត្ត ឬក៏ដកគ្រវាត់ចោល។ មន្ត្រីដែលបញ្ជូនមកក្រោយៗនេះ គឺគ្មានមនសិការការងារ គ្មានភាពលះបង់ ស្អាតស្អំ ក្នុងឋានៈជាមន្ត្រីបម្រើពលករ និងពលរដ្ឋខ្មែរទេ។ គេគិតតែប្រមូលផ្តុំក្បាលគ្នារកគ្រប់ឧបាយកល ប្ដឹងមួលបង្កាច់ និងបង្ខូចកេរ្តិ៍ឈ្មោះខ្ញុំបាទ ដើម្បីកម្ចាត់ខ្ញុំចេញពីតួនាទីបម្រើរាស្ត្រ និងបាំងផលប្រយោជន៍ពួកគេ និងពួកនៅពីក្រោយខ្នង»។
លោក ឱម យ៉ិនទៀង អះអាងថា អង្គភាពប្រឆាំងអំពើពុករលួយ មានភស្តុតាងជាច្រើនដើម្បីចោទប្រកាន់ លោក ស៊ុត ឌីណា ដែលភស្តុតាងទាំងនោះមានភាពប្រាកដប្រជាដល់ទៅ ៩០ភាគរយ។ លោក ឱម យ៉ិនទៀង សង្កត់ធ្ងន់ថា បើទោះបីជាមានមតិខ្លះចេញមុខអះអាងថា លោក ស៊ុត ឌីណា មិនបានប្រព្រឹត្តដូចការចោទប្រកាន់ក៏ដោយ ក៏ចម្លើយសារភាពរបស់ លោក ស៊ុត ឌីណា បានបង្ហាញពីភាពស៊ីសង្វាក់គ្នាទៅនឹងបទចោទ និងភស្តុតាងនានាដែលអង្គភាពប្រឆាំងអំពើពុករលួយ មានក្នុងដៃ៖ «យើងខ្ញុំមានការលំបាកមួយត្រង់ថាពេលវេលា ៤៨ម៉ោង វាមិនគ្រប់។ យើងឃើញចំណុចច្រើនពេក។ អ៊ីចឹងយើងប្រហែលជាជ្រើសរើសយកតែពីរចំណុចសិនទេ ដើម្បីបញ្ជូនខ្លួនគាត់ទៅឲ្យទាន់ ៤៨ម៉ោង។ ឯចំណុចផ្សេងៗទៀត យើងនឹងធ្វើការពេលក្រោយទៀតលើបញ្ហានេះ»។
ទោះបីជាបែបនេះក្តី លោក ឱម យ៉ិនទៀង មិនបានបកស្រាយអំពីចំណុចពីរសំខាន់ដែលអង្គភាពប្រឆាំងអំពើពុករលួយ នឹងយកមកធ្វើជាមូលដ្ឋានក្នុងការចោទប្រកាន់ លោក ស៊ុត ឌីណា នោះទេ ដោយលោកអះអាងថា វាជាកិច្ចការរបស់ចៅក្រម និងព្រះរាជអាជ្ញា។
ទាក់ទងនឹងការចោទប្រកាន់ទាំងឡាយនេះ កាលពីពាក់កណ្ដាលខែមីនា កន្លងទៅ លោក ស៊ុត ឌីណា ធ្លាប់បានបង្ហោះសារតាមរយៈបណ្ដាញសង្គមហ្វេសប៊ុក (Facebook) របស់លោក ស្នើសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ឲ្យពិនិត្យ និងផ្តល់យុត្តិធម៌ដល់រូបលោក។ លោក ស៊ុត ឌីណា បានសរសេរថា លោកបានប្រឹងប្រែងបំពេញមុខងារ និងលះបង់គ្រប់យ៉ាងដើម្បីបម្រើរដ្ឋាភិបាល និងគណបក្សប្រជាជនកម្ពុជា ព្រមទាំងប្រជាពលរដ្ឋខ្មែរដែលកំពុងសិក្សា និងធ្វើការនៅប្រទេសកូរ៉េខាងត្បូង ប៉ុន្តែបែរជាត្រូវគេរៀបចំសេណារីយូមួលបង្កាច់ និងបង្ខូចកេរ្តិ៍ឈ្មោះរបស់លោកទៅវិញ។
លោក ស៊ុត ឌីណា សរសេរទៀតថា៖ «បើខ្ញុំបាទមិនមានជំហររឹងមាំទេ គឺមិនអាចយកឈ្នះលើសមរភូមិការងាររដ្ឋបាល ការទូត និងនយោបាយដ៏ក្តៅនេះបានឡើយ ពីព្រោះមួយគ្រប់គ្រងការងាររដ្ឋបាល និងនយោបាយ និងមួយទៀតត្រូវរវល់ទប់ទល់នឹងកម្លាំងបុករុកមួលបង្កាច់ បង្ខូច បំភ័ន្តមតិថ្នាក់លើ ដើម្បីដកការទុកចិត្ត ឬក៏ដកគ្រវាត់ចោល។ មន្ត្រីដែលបញ្ជូនមកក្រោយៗនេះ គឺគ្មានមនសិការការងារ គ្មានភាពលះបង់ ស្អាតស្អំ ក្នុងឋានៈជាមន្ត្រីបម្រើពលករ និងពលរដ្ឋខ្មែរទេ។ គេគិតតែប្រមូលផ្តុំក្បាលគ្នារកគ្រប់ឧបាយកល ប្ដឹងមួលបង្កាច់ និងបង្ខូចកេរ្តិ៍ឈ្មោះខ្ញុំបាទ ដើម្បីកម្ចាត់ខ្ញុំចេញពីតួនាទីបម្រើរាស្ត្រ និងបាំងផលប្រយោជន៍ពួកគេ និងពួកនៅពីក្រោយខ្នង»។
លោក ស៊ុត ឌីណា គឺជាអតីតប្រធានរណសិរ្ស ប្រជាធិបតេយ្យ និស្សិតបញ្ញវន្តខ្មែរ ដែលគាំទ្រសម្ដេចក្រុមព្រះនរោត្តម រណឫទ្ធិ និងជាសកម្មជននយោបាយម្នាក់ដែលធ្លាប់ដឹកនាំបាតុកម្មនានាប្រឆាំងរដ្ឋាភិបាលដឹកនាំដោយគណបក្សប្រជាជនកម្ពុជា។ តែក្រោយមកនៅឆ្នាំ២០០៩ លោកបានចុះចូលជាមួយគណបក្សប្រជាជនកម្ពុជា ហើយភ្លាមៗនោះ ត្រូវបានតែងតាំងជាអនុរដ្ឋលេខាធិការក្រសួងការបរទេស និងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន។ នៅឆ្នាំ២០១៤ លោក ស៊ុត ឌីណា ត្រូវបានតែងតាំងជាឯកអគ្គរាជទូតខ្មែរប្រចាំប្រទេសកូរ៉េខាងត្បូង រហូតមក។
ជុំវិញការឃាត់ខ្លួន លោក ស៊ុត ឌីណា ពាក់ព័ន្ធនឹងរឿងពុករលួយនេះ នាយកប្រតិបត្តិអង្គការតម្លាភាពកម្ពុជា លោក ព្រាប កុល ថ្លែងសាទរចំពោះចំណាត់ការរបស់អង្គភាពប្រឆាំងអំពើពុករលួយ។ លោក ព្រាប កុល ថ្លែងថា វាជាសមត្ថកិច្ច និងភារកិច្ចរបស់អង្គភាពមួយនេះ ក្នុងការស៊ើបអង្កេត និងនាំខ្លួនមន្ត្រីណាដែលពាក់ព័ន្ធនឹងរឿងពុករលួយមកឆ្លើយបំភ្លឺ។ ក្រៅពីនេះ លោកចង់ឃើញការដាក់ទោសទណ្ឌចំពោះមន្ត្រីណាដែលប្រព្រឹត្តអំពើពុករលួយ ធ្វើឡើងដោយគ្មានការយោគយល់ និងអត់ឱន៖ «ជាការចង់បានរបស់ប្រជាពលរដ្ឋទូទៅ គឺចង់ឃើញអង្គភាពប្រឆាំងអំពើពុករលួយ ចាត់ការករណីពុករលួយទាំងអស់។ ដូច្នេះយើងនឹងរង់ចាំមើលបន្តទៅទៀត»។
នេះជាលើកទី២ ហើយដែលអង្គភាពប្រឆាំងអំពើពុករលួយ ឃាត់ខ្លួនមន្ត្រីក្រសួងការបរទេស ពាក់ព័ន្ធនឹងសំណុំរឿងពុករលួយ។ កាលពីសប្ដាហ៍មុន អង្គភាពមួយនេះបានឃាត់ខ្លួនមន្ត្រីក្រសួងការបរទេស ម្នាក់ឈ្មោះ លោក ហ៊ា សែន ដែលមានតួនាទីជាប្រធានការិយាល័យប្រទេសអូស្ត្រាលី និងញូវហ្សេលែននៃអាស៊ី២ ដោយចោទប្រកាន់ពីបទទទួលលុយពីក្រុមហ៊ុនបរទេស ដើម្បីប្រថាប់ត្រាបញ្ជាក់លើឯកសារ៕
1 comment:
why no one doing an investigate YUON YIN TEUNG How He was so rich? He drive so expensive car, a big mansion . I hope some youth will sue him about this.
Post a Comment