ដោយ ម៉ម មុនីរតន៍
2016-04-25
មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ លោក ហ៊ុន ម៉ាណែត ថ្លែងក្នុងសន្និសីទសារព័ត៌មាននាអាកាសយានដ្ឋានអន្តរជាតិភ្នំពេញ នៅថ្ងៃទី២៥ ខែមេសា ឆ្នាំ២០១៦។ RFA/Morm Moniroth
RFA/Morm Moniroth
មេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ លោក ហ៊ុន ម៉ាណែត បញ្ជាក់ថា រហូតមកដល់ពេលនេះ លោកនៅមិនដឹងថា បណ្ដឹងដែលប្ដឹងលោកជុំវិញការចាប់ខ្លួន លោក មាជ សុវណ្ណារ៉ា និងមួយករណីទៀតដោយចោទថា អង្គរក្សរបស់លោក ប្រើហិង្សាបណ្ដាលឲ្យជនជាតិអាមេរិកាំងម្នាក់មានរបួសនៅសហរដ្ឋអាមេរិក នោះ ថាជាសំណុំរឿងពិត ឬមិនពិតនៅឡើយទេ។ លោក ហ៊ុន ម៉ាណែត អះអាងថា ប្រសិនបើពិតជាមានសំណុំរឿងទាំងនេះមែន លោកនឹងមិនខ្លាចបង្ហាញជូនជាសាធារណៈទេ។
គ្រាន់តែជើងយន្តហោះជាន់ដល់ដីភ្លាម ដោយមិនរង់ចាំយូរ កូនប្រុសច្បងរបស់លោកនាយករដ្ឋមន្ត្រី ហ៊ុន សែន បានប្រាប់អ្នកកាសែតថា លោកនៅរក្សាជំហរស្ងប់ស្ងាត់នៅឡើយ រហូតមានសំណុំរឿងនៅក្នុងដៃរបស់លោក ទើបអាចបញ្ជាក់បានថា នឹងត្រូវឆ្លើយតបបែបណា។
ការប្រើពេលប្រមាណជាង ១ម៉ោងនៅអាកាសយានដ្ឋានអន្តរជាតិភ្នំពេញ កាលពីព្រឹកថ្ងៃទី២៥ មេសា លោក ហ៊ុន ម៉ាណែត បញ្ជាក់ថា មកដល់ពេលនេះ លោកមិនទាន់អាចប្រាប់បាននៅឡើយទេចំពោះចំណាត់ការ ដោយសារពុំទាន់ឃើញមានសំណុំរឿងណាមួយដូចព័ត៌មានដែលគេចុះផ្សព្វផ្សាយកន្លងមកនេះទេ។ លោកបន្តថា ក្នុងរយៈពេលប្រមាណ ៣សប្ដាហ៍ ទាំងនៅប្រទេសកាណាដា និងសហរដ្ឋអាមេរិក គឺលោកពុំទទួលបានដីកាកោះហៅអ្វីឡើយ។ លោក ហ៊ុន ម៉ាណែត ចាត់ទុកព័ត៌មានដែលបែកធ្លាយថា លោកនឹងត្រូវប្រឈមមុខជាប់បណ្ដឹងនៅសហរដ្ឋអាមេរិក នោះ គឺជាការប្រឌិតប៉ុណ្ណោះ។ លោកបន្តថា «ប៉ុន្តែខ្ញុំគ្រាន់តែបានឮតាមព័ត៌មានថាមានការប្ដឹងខ្ញុំប៉ុន្មានចំណុចណោះ រួមទាំងភេរវកម្មអន្តរជាតិ ហើយខ្ញុំកប់យោបល់រឿងហ្នឹង ព្រោះបើជ្រុលថាប្ដឹងដាក់រឿងអីដែលវាសមហេតុផលផងទៅ។ ឥឡូវប្រជាពលរដ្ឋខ្មែររាប់លាននាក់ដែលស្គាល់ ហ៊ុន ម៉ាណែត ហើយតាមដានរបស់ខ្ញុំប្រហែលជាគាត់កប់យោបល់ដែរហើយ នៅពេលឮថាប្ដឹងខ្ញុំភេរវកម្មអន្តរជាតិ។ ខ្ញុំគិតថាការប្ដឹងកន្លងមកនេះ ដែលគ្មានមូលដ្ឋានច្បាស់លាស់ គឺគ្រាន់តែជារៀបកេងចំណេញផ្នែកខាងនយោបាយតែប៉ុណ្ណោះ»។
មុនមួយថ្ងៃដែល លោក ហ៊ុន ម៉ាណែត ទៅដល់សហរដ្ឋអាមេរិក កាលពីថ្ងៃទី៩ មេសា ប្រពន្ធលោក មាជ សុវណ្ណារ៉ា គឺអ្នកស្រី ជេមី មាជ បានដាក់បណ្ដឹងមួយច្បាប់ទៅតុលាការសហព័ន្ធសហរដ្ឋអាមេរិក នៅក្រុងឡូសអែនជឺឡេស (Los Angeles) ពីបទធ្វើទារុណកម្ម និងអំពើភេរវកម្ម។
នៅក្នុងពាក្យបណ្ដឹងទៅតុលាការសហព័ន្ធអាមេរិក កាលពីថ្ងៃទី៨ មេសា នោះ មេធាវីតំណាងឲ្យភរិយាលោក មាជ សុវណ្ណារ៉ា ចំនួន ២រូប គឺលោក មូរតុន ក្លារ (Morton Sklar) និងលោក ណាហ្សារ៉ាត់ អៃស្បើត (Nagareth Haysbert) ចោទរដ្ឋាភិបាលកម្ពុជា និងលោក ហ៊ុន ម៉ាណែត ដែលជាមេបញ្ជាការរងកងទ័ពជើងគោក និងជានាយរងសេនាធិការចម្រុះនៃកងយោធពលខេមរភូមិន្ទ ថាជាអ្នកទទួលខុសត្រូវពីបទធ្វើទារុណកម្ម តាមរយៈការឃុំឃាំងខ្លួនស្រេចតែអំពើចិត្តក្រៅច្បាប់ ឃុំខ្លួនរយៈពេលយូរ និងអំពើភេរវកម្មអន្តរជាតិ។
មិនតែប៉ុណ្ណោះ ក្នុងបណ្ដឹងនោះក៏បានទាមទារការខូចខាតដែលបង្កឲ្យប៉ះពាល់ដោយចេតនាលើផ្លូវចិត្ត ការវាយដំ ការចាប់ដាក់ពន្ធនាគារ និងបាត់បង់សិទ្ធិរស់នៅជួបជុំក្រុមគ្រួសារថែមទៀតផង។ ក្រៅពីនេះ លោក ហ៊ុន ម៉ាណែត ក៏រងបណ្ដឹងមួយទៀតពីបទថា អង្គរក្សរបស់លោកបានធ្វើឲ្យអ្នករត់សំបុត្រជនជាតិអាមេរិក គឺលោក ផល ហេយស៍ (Paul Hayes) ម្នាក់របួសបែកក្បាល។
ឆ្លើយតបរឿងនេះ លោក ហ៊ុន ម៉ាណែត បានបដិសេធថា ការបំពេញទស្សនកិច្ចរបស់លោកលើកនេះ គឺពុំមានអង្គរក្សទៅតាមឡើយ ក្រៅពីមន្ត្រីជំនាញរបស់រដ្ឋនោះ។ ម្យ៉ាងទៀត ការប៉ះទង្គិចដែលរហូតបណ្ដាលឲ្យជនជាតិអាមេរិកាំង មានរបួសស្នាមផងនោះ គឺលោកពុំបានដឹងពីមូលហេតុអ្វីឲ្យប្រាកដដែរនោះទេ។
ជុំវិញរឿងនេះ ប្រពន្ធរបស់លោក មាជ សុវណ្ណារ៉ា គឺអ្នកស្រី ជេមី មាជ ឲ្យដឹងថា អ្នកស្រីពិតជាបានដាក់បណ្ដឹងពិតមែនប្រឆាំងលោក ហ៊ុន ម៉ាណែត។ អ្នកស្រីបន្តថា ដំណើរការបែបនៃបណ្ដឹងនោះ គឺមិនទាន់ដឹងនៅឡើយទេ ព្រោះសំណុំរឿងនេះបានរុញដល់ដៃតុលាការរួចហើយ។ អ្នកស្រីបន្តថា «ចំពោះពាក្យបណ្ដឹងហ្នឹង គឺពួកយើងបានយកដល់ដៃលោក ផល ហេយស៍ ថ្ងៃដែលលោក ហ៊ុន ម៉ាណែត មកដល់ទីក្រុងឡុងប៉ិច ក្នុងភោជនីយដ្ឋានឡានលូន។ ហើយក៏មានឧបទ្ទវហេតុដែលកងការពារបានធ្វើឲ្យគាត់ (ផល ហេយស៍) មានរបួសស្នាមធ្ងន់ធ្ងរ»។
អង្គការផ្នែកសិទ្ធិមនុស្សយល់ឃើញថា ប្រសិនបើសំណុំរឿងនេះអាចមានទម្ងន់ ប្រហែលលោក ហ៊ុន ម៉ាណែត អាចប្រឈមនឹងការចោទប្រកាន់ ឬឈានទៅដល់ចាប់ខ្លួន។
អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការលីកាដូ (LICADHO) លោក អំ សំអាត យល់ឃើញថា វាពិបាកសន្និដ្ឋានណាស់ថា តើសំណុំរឿងនេះ លោក ហ៊ុន ម៉ាណែត អាចត្រូវចាប់ខ្លួន ឬត្រូវរងការចោទដោយតុលាការសហព័ន្ធរបស់សហរដ្ឋអាមេរិក ដែរឬយ៉ាងណា។ លោកបន្តថា ចំណុចនេះ គឺគេត្រូវពិនិត្យជាមុនសិនពីគោលការណ៍របស់សហរដ្ឋអាមេរិក។ លោកបន្តថា «ជាធម្មតាសិទ្ធិអ្នកប្ដឹង គឺមានសិទ្ធិក្នុងការប្ដឹង ប៉ុន្តែស្ថានភាពនៃតុលាការគេ គេនឹងពិនិត្យមើលទៅលើបញ្ហាទាំងអស់ហ្នឹង ថាតើចូលទៅក្នុងគោលការណ៍គេ ឬមិនចូល ឬមួយគេដំណើរការ ឬមិនដំណើរការនោះបាទ»។
បើទោះជាបែបណា លោក ហ៊ុន ម៉ាណែត អះអាងថា ក្នុងដំណើរបំពេញទស្សនកិច្ចរបស់លោកប្រមាណ ៣សប្ដាហ៍មកនេះ គឺមានទាំងផ្អែមល្ហែមផង និងជូរចត់ផង។ យ៉ាងនេះក្តី លោកបញ្ជាក់ថា លោកនឹងមិនប្ដឹងផ្ដល់អ្វីទាំងអស់ប្រឆាំងអ្នកធ្វើបាតុកម្មប្រឆាំងលោក ទាំងនៅសហរដ្ឋអាមេរិក និងនៅកាណាដា។ ថ្លែងក្នុងកាយវិការ និងសម្ដីកំប្លុកកំប្លែងផង លោក ហ៊ុន ម៉ាណែត ចាត់ទុកថា មូលហេតុដែលលោកមិនតបតដោយហិង្សាវិញ គឺក្នុងស្មារតីបង្រួបបង្រួមជាតិ៕
No comments:
Post a Comment