ដោយ សាន សែល
2016-04-15
សមាជិកព្រឹទ្ធសភាបក្សប្រឆាំង លោក ហុង សុខហួរ ពេលនាំខ្លួនចេញពីតុលាការកំពូល កាលពីព្រឹកថ្ងៃទី២៦ ខែកុម្ភៈ ឆ្នាំ២០១៦។
RFA/Rann Samnang
តាមចំណាំពេលចូលឆ្នាំថ្មីប្រពៃណីខ្មែរមកដល់ម្ដងៗ សាច់ញាតិក្នុងក្រុមគ្រួសារតែងមកជួបជុំគ្នា ហើយបើអ្នកខ្លះរស់នៅឆ្ងាយពីគ្នា គេធ្វើដំណើរថ្កាត់រកគ្នា ដើម្បីអបអរពិធីបុណ្យប្រពៃណីជាតិ។ ដោយឡែក ក្រុមគ្រួសាររបស់អ្នកទោសនយោបាយវិញ ពិធីបុណ្យចូលឆ្នាំថ្មី ប្រែក្លាយជាពេលរីករាយជុំគ្នាទៅជាពេលាមួយ ដើម្បីយកមកធ្វើការបួងសួងឲ្យសាច់ញាតិរបស់ពួកគេទទួលនូវយុត្តិធម៌ និងមានសេរីភាព។
នៅផ្ទះមួយតាមបណ្ដោយមាត់ទន្លេស្ថិតក្នុងរាជធានីភ្នំពេញ គេឃើញសមាជិកក្រុមគ្រួសារមួយ កំពុងអង្គុយជុំគ្នា លើកដៃច្រងេងច្រងាង ជជែកគ្នាពីនេះពីនោះ យូរៗម្ដងគេឮសម្លេងសំណើចក្អាកក្អាយផ្ទុះឡើង លប់ទៅលើសំឡេងចម្រៀងភីសវង់ ដែលលេងកំដរបរិយាកាសនារដូវចូលឆ្នាំ។
ក៏ប៉ុន្ដែ បើក្រឡេកមើលទៅផ្ទះមួយក្បែរនេះ មានសភាពស្ងប់ស្ងាត់។ មិនមែន ផ្ទះនេះគ្មានមនុស្សរស់នៅនោះទេ។ នេះជាផ្ទះរបស់លោក ហុង សុខហួរ អ្នកនយោបាយរបស់គណបក្សសង្គ្រោះជាតិ ដែលកំពុងជាប់ពន្ធនាគារ។
អ្នកស្រី គុណ លំអង វ័យ៥៨ឆ្នាំ ដែលជាភរិយារបស់សមាជិកព្រឹទ្ធសភារូបនេះ បានប្រាប់ថា អ្នកស្រី បានទៅជួបស្វាមីនៅពន្ធនាគារ កាលពីថ្ងៃសុក្រ ទី០៨ ខែមេសា។ អ្នកស្រីប្រាប់ថា បានយកចង្ហាន់ទៅប្រគេនព្រះសង្ឃ ដើម្បីបួងសួងសុំសេចក្ដីសុខឲ្យប្ដីអ្នកស្រី ហើយសង្ឃឹមថា ប្ដីអ្នកស្រី អាចមានសេរីភាពឡើងវិញ។
ភរិយារបស់សមាជិកព្រឹទ្ធសភាបក្សប្រឆាំង លោក ហុង សុខហួរ អ្នកស្រី គុណ លំអង ផ្ដល់បទសម្ភាសន៍ក្រោយពីតុលាការកំពូល សម្រេចឲ្យបន្តឃុំខ្លួនស្វាមីរបស់អ្នកស្រី កាលពីព្រឹកថ្ងៃទី៤ មីនា ឆ្នាំ២០១៦។ RFA/Um Raingsy
លោក ហុង សុខហួរ ត្រូវបានសមត្ថកិច្ចចាប់ខ្លួន កាលពីថ្ងៃទី ១៤ ខែសីហា ឆ្នាំ២០១៥ ក្រោមបទចោទក្លែងសន្ធិសញ្ញាព្រំដែនកម្ពុជាវៀតណាម និងញុះញង់ឲ្យមានអសន្តិសុខសង្គម។
ទោះបីជាយ៉ាងណាអ្នកស្រី គុណ លំអង អះអាងថា ស្វាមីអ្នកស្រី មិនបានប្រព្រឹត្តខុសដូចបទចោទទាំងនេះទេ៖ «បំណងប្រាថ្នារបស់ខ្ញុំ ចង់ឲ្យប្ដីមានសេរីភាពមកវិញ មកនៅធម្មតា។ ខ្ញុំយល់ថា អ្វីដែលស្វាមីខ្ញុំធ្វើ មិនគួរត្រូវជាប់ពន្ធនាគារទេ។ អ្វីដែលគាត់ធ្វើ គឺទង្វើស្នេហាជាតិ ទង្វើចែករំលែកព័ត៌មានដល់ជនរួមជាតិខ្មែរ មិនទាន់បានដឹង។ ផ្ទុយទៅវិញ គាត់ត្រូវជាប់ពន្ធនាគារ។ ខ្ញុំនៅតែមិនយល់ពី តុលាការ ច្បាប់ខ្មែរ។ ច្បាប់ដែលខ្ញុំធ្លាប់អាន ល្អណាស់ ចែងមក តែទង្វើ ដូចជាផ្ទុយ។ ប្រសិនបើ គេធ្វើតាមច្បាប់ ស្វាមីខ្ញុំ មិនត្រូវគេយកទៅឃុំឃាំងក្នុងពន្ធនាគារទេ»។
តុលាការកំពូល បានបដិសេធសំណើសុំនៅក្រៅឃុំបណ្ដោះអាសន្នរបស់លោក ហុង សុខហួរ កាលពីថ្ងៃទី៤ ខែមីនា។ អ្នកស្រី គុណ លំអង ចាត់ទុកការច្រានចោលនេះថា ជារឿងអយុត្តិធម៌ និងមិនត្រឹមត្រូវ ខណៈគ្រួសារអ្នកស្រី យល់ព្រមដាក់តម្កល់លិខិតឆ្លងដែន នឹងប្រាក់ចំនួន ២០លានរៀលជាថ្នូរនឹងការស្នើនៅក្រៅឃុំ។
នៅពេលអ្នកស្រី ជួបអ្នកជិតខាង ឬបងប្អូន អ្នកស្រីអួលដើមក ពេលគេសួរពីស្ថានភាពស្វាមីអ្នកស្រី៖ «មួយរយៈនេះ បងប្អូនគាត់សួរសុខទុក្ខស្វាមីខ្ញុំ។ ម្នាក់ៗ ចេះតែសួរថា ចេញពេលណា ហើយខ្ញុំ ក៏ពិបាកឆ្លើយ។ ម្នាក់ៗពេលជួបគ្នា មានតែសម្រក់ទឹកភ្នែក គិតតែពីយំ។ ដូច្នេះ ឆ្នាំនេះ វាខុសពីឆ្នាំមុនមែនទែន។ ពីឆ្នាំមុនៗ យើងជួបគ្នា យើងសប្បាយ យើងបរិភោគជួបជុំគ្រួសារ តែឆ្នាំនេះអត់។ ម្នាក់ៗ គិតតែពីសម្រក់ទឹកភ្នែក ចឹងខ្ញុំតែគេចពីគេ មិនចង់ឲ្យគេយំ»។
មិនខុសពីអ្នកស្រី គុណ លំអង អ្នកស្រី ឡេង កល្យាណ ដែលស្វាមី ត្រូវបានតុលាការកាត់ទោសជាប់ពន្ធនាគារ ក្នុងឱកាសពិធីបុណ្យចូលឆ្នាំខ្មែរនេះ អ្នកស្រី និងកូន ទៅលេងស្រុកកំណើតរបស់ប្ដី ដើម្បីជួបសួរសុខទុក្ខម្ដាយឪពុកក្មេក។
លោក ឃិន ជំរឿន ជាសកម្មជនគណបក្សសង្គ្រោះជាតិ ត្រូវបានតុលាការកាត់ទោសឲ្យជាប់ពន្ធនាគារចំនួន២០ឆ្នាំ ពីបទដឹកនាំចលនាកុប្បកម្មនៅក្បែរទីលានប្រជាធិបតេយ្យ កាលពីខែកក្កដា ឆ្នាំ២០១៤។
អ្នកស្រី កល្យាណ ថ្លែងបន្ទាប់ពីទៅសួរសុខទុក្ខស្វាមីនៅពន្ធនាគារ មុនពេលចូលឆ្នាំថា អ្នកស្រីមិនអស់ចិត្តដែលសា្វមី ត្រូវគេចាប់ដាក់ ពន្ធនាគារ។ អ្នកស្រី រំពឹងថា គ្រួសារអ្នកស្រី នឹងអាចជួបជុំគ្នាឡើងវិញ ក្នុងពេលឆាប់ៗ៖ «សុភមង្គល មិនកក់ក្តៅពេលគ្មានឪពុកចឹង។ ហេលហាល មានតែម្ដាយ អត់ឪ។ ដំបូង ខ្ញុំរំពឹងថា គេនឹងដោះលែងប្ដី នៅថ្ងៃចូលឆ្នាំ បានជុំគ្នាសប្បាយ។ ចូលឆ្នាំនឹង ខ្ញុំសូមប្រាថា្ន ឲ្យគេដោះលែងប្ដីខ្ញុំឆាប់ៗទៅ។ សូមមានការចរចានយោបាយត្រូវទៅ នឹងបានដោះលែង»។
កាលពីថ្ងៃទី៨ ខែមេសា អ្នកនាំពាក្យពន្ធនាគារ លោក នុត សាវនា ឲ្យដឹងថា ទណ្ឌិតពី ៧០០ ទៅ ៨០០នាក់ នឹងត្រូវស្នើឲ្យលើកលែង និងបន្ធូរបន្ថយទោសក្នុងពិធីបុណ្យចូលឆ្នាំ និងពិធីបុណ្យវិសាខបូជា ហើយការលើកលែង និងបន្ធូរបន្ថយទោសឆ្នាំនេះ គឺមានការរឹតបន្តឹងខ្លាំង ហើយត្រូវពិនិត្យម្ដងមួយករណីៗ ដែលលទ្ធផលនឹងត្រូវដឹងក្រោយបុណ្យចូលឆ្នាំថ្មី។ លោក នុត សាវនា មិនទាន់ឲ្យដឹងថា តើសកម្មជនបក្សប្រឆាំង នឹងមានឈ្មោះនៅក្នុងបញ្ជីនៃសំណើលើកលែងទោស ឬបន្ធូរបន្ថយទោសនោះទេ។ ទោះជាបែបនេះក្តី គេហាក់ពុំសូវមានសង្ឃឹមឡើយថា នឹងមានការលើកលែង ឬបន្ធូរបន្ថយទោសដល់មន្ត្រីនិងសកម្មជនបក្សប្រឆាំងក្នុងអំឡុងពេលចូលឆ្នាំ។
អ្នកតាមដានស្ថានការណ៍នយោបាយនៅកម្ពុជាតែងលើកឡើងថា ដោយសារតែការចាប់ខ្លួនសកម្មជនបក្សប្រឆាំងជារឿងនយោបាយ ដូច្នេះលុះណាតែមានការសម្របសម្រួល ផ្នែកនយោបាយទើបគេមានសង្ឃឹមថា អ្នកទាំងអស់នោះនឹងត្រូវបានតុលាការដោះលែងឲ្យមានសេរីភាពវិលមកជួបជុំគ្រួសារដូចដើមវិញ៕
No comments:
Post a Comment