ដោយ ឡេង ម៉ាលី
2016-04-03
រូបសំណាកក្ដាមសេះ តំណាងឲ្យខេត្តកែប។ រូបថតថ្ងៃទី២៨ វិច្ឆិកា ២០១៥
RFA/Chuop Sereyroth
បញ្ហាទឹកសមុទ្រនៅឆ្នេរកែប មានពណ៌បៃតង និងក្លិនស្អុយ ដែលក្រសួងបរិស្ថាន ណែនាំប្រជាពលរដ្ឋ និងអ្នកទេសចរទៅលេងនៅខេត្តកែប ឲ្យប្រុងប្រយ័ត្ននោះ បានត្រឡប់មករកសភាពស្ទើរតែធម្មតាវិញហើយ នៅថ្ងៃទី៣ មេសា នេះ។ ទោះជាយ៉ាងនេះក្ដី អាជីវករនៅតែរងផលប៉ះពាល់ខ្លាំងដោយសារតែបញ្ហានេះ។
អាជីវករលក់ដូរអាហារសមុទ្រម្នាក់នៅឆ្នេរកែប ដែលសុំមិនបញ្ចេញឈ្មោះ ថ្លែងថា របរលក់ដូររបស់លោកស្រីស្ងាត់ភ្ញៀវខ្លាំង នៅថ្ងៃទី៣ មេសា ថ្វីបើទឹកសមុទ្រចាប់ផ្ដើមល្អវិញហើយក្ដី៖ «ស្ងាត់ច្រៀប! អត់មានឡានផង! មានឡានពីរបី។ គេអត់សូវហ៊ាននៅ ស្ងាត់មែនទែន។ រាល់ដងថ្ងៃអាទិត្យ អ៊ីចឹង មិនបាច់ទេ ឡើងញ៉ុក។ ទើបប៉ះពាល់ថ្ងៃហ្នឹងទេ ម្សិលមិញអត់អីទេ។ ម្សិលម្ង៉ៃអីភ្ញៀវគាត់ញ៉ាំគ្រឿងសមុទ្រហូបចុក ប៉ុន្តែនៅតែមានភ្ញៀវគាត់កុម្ម៉ង់ញ៉ាំខ្លះៗ។ គាត់ថាធ្វើមក គាត់ហ៊ានញ៉ាំ។ គាត់ថាអត់អីផង»។
លោកស្រីថ្លែងថា បញ្ហាស្ងាត់ភ្ញៀវនេះ គឺបន្ទាប់ពីក្រសួងបរិស្ថាន ចេញសេចក្ដីណែនាំសាធារណជន នៅថ្ងៃទី២ មេសា ឲ្យផ្អាកការចុះងូតទឹកសមុទ្រ និងកុំបរិភោគគ្រឿងសមុទ្រនៅតំបន់កែបមួយរយៈ នៅពេលដែលទឹកសមុទ្រមានពណ៌បៃតង និងលឿង ហើយមានក្លិនស្អុយ។ អាជីវកររូបនេះបញ្ជាក់ថា ទឹកសមុទ្រដែលមានបញ្ហានោះ បានប្រែមកថ្លាវិញហើយ ប៉ុន្តែអាជ្ញាធរនៅហាមសាធារណជនមិនឲ្យចុះងូត៖ «បាត់ពណ៌បាត់ក្លិនអីអស់ហើយ។ ម្សិលមិញមានភ្ញៀវងូតច្រើនម្សិលមិញ។ ភ្ញៀវងូតអត់អីផង ទើបតែព្រឹកមិញហ្នឹង អ្នកធ្វើការគាត់ចុះបោះផ្លាកកុំឲ្យភ្ញៀវមុជទៅខ្លាចមានបញ្ហា អត់អ្នកទទួលខុសត្រូវ។ ហាមអាជីវករអត់ឲ្យលក់គ្រឿងសមុទ្រដែរ ខ្លាចពុលប៉ះពាល់ដល់ភ្ញៀវ»។
អាជីវករនៅតំបន់កែប កំពុងព្រួយបារម្ភខ្លាចភាពស្ងាត់ភ្ញៀវអូសបន្លាយយូរថ្ងៃ នៅពេលដែលថ្ងៃបុណ្យចូលឆ្នាំខ្មែរជិតមកដល់។
ទាក់ទងនឹងបញ្ហានេះ នាយខុទ្ទកាល័យ និងជាមន្ត្រីនាំពាក្យក្រសួងបរិស្ថាន លោក សៅ សុភាព ឲ្យដឹងនៅរសៀលថ្ងៃទី៣ មេសា ថា ទឹកសមុទ្រពណ៌បៃតងនៅឆ្នេរកែប ប្រែមកល្អវិញ ៩០% ហើយ ហើយនៅថ្ងៃទី៤ មេសា នឹងមានសភាពធម្មតាវិញ៖ «ក្រសួងគ្រោងរៀបចំចេញសេចក្ដីជូនដំណឹងមួយ ស្អែកយើងអាចជម្រាបព័ត៌មានបច្ចុប្បន្នភាពពាក់ព័ន្ធនឹងបញ្ហាស្លែនៅកែប។ ដូច្នេះ យើងឃើញថាការវិវឌ្ឍន៍ទៅរកភាពប្រក្រតី យើងនឹងជូនដំណឹងថា វាមិនមានបញ្ហាអីធ្ងន់ធ្ងរ ឬប៉ះពាល់ដល់សុខភាពទេ។ ដូច្នេះភ្ញៀវទេសចរ ឬអ្នកនៅទីនោះ គាត់អាចរកស៊ី លំហែ ឬក៏ចុះងូតទឹកកម្សាន្តដូចធម្មតា»។
លោកមានប្រសាសន៍ថា បន្ទាប់ពីយកសំណាកគំរូទឹកសមុទ្រនោះមកពិនិត្យ រកឃើញថា ពណ៌បៃតងនោះ គឺជាស្លែសមុទ្របណ្ដាលមកពីបាតុភូតធម្មជាតិ ដែលប្រទេសកម្ពុជា កំពុងរងអាកាសធាតុខ្យល់ និងក្ដៅខ្លាំងក្នុងរយៈពេលប៉ុន្មានអាទិត្យនេះ។ លោកពន្យល់ថា បញ្ហាកម្ដៅខ្លាំង ហើយទឹកសមុទ្រនៅខេត្តកែប នោះរាក់ផង ទើបធ្វើឲ្យកើតមានស្លែ។ លោកថា បញ្ហាស្លែនេះក៏ធ្លាប់កើតឡើងនៅប្រទេសដទៃទៀតដែរ ហើយនៅប្រទេសកម្ពុជា ក៏ធ្លាប់កើតឡើងនៅទឹកសាប គឺបឹងយក្សឡោម ខេត្តរតនគិរី កាលពីប៉ុន្មានឆ្នាំមុន។ លោក សៅ សុភាព បញ្ជាក់ថា ប្រសិនបើស្លែនេះឡើងច្រើន អាចប៉ះពាល់សុខភាពមនុស្ស និងសត្វ ប៉ុន្តែបញ្ហាស្លែនៅឆ្នេរកែប ពេលនេះ មិនមានបញ្ហាអីធ្ងន់ធ្ងរទេ៕
No comments:
Post a Comment