ដោយ ទីន ហ្សាការីយ៉ា
2016-03-24
ប្រធានស្ដីទីគណបក្សសង្គ្រោះជាតិ លោក កឹម សុខា និងកញ្ញា ខុម ចាន់ដារាទី ហៅ ស្រីមុំ។
Photo: RFA
រឿងអាស្រូវស្នេហារបស់ លោក កឹម សុខា ប្រធានស្ដីទីគណបក្សសង្គ្រោះជាតិ ត្រូវបានគេផ្សព្វផ្សាយនៅក្នុងបណ្ដាញសង្គមហ្វេសប៊ុក (Facebook) និងតាមបណ្ដាញសារព័ត៌មានផ្សេងៗមិនទាន់បញ្ចប់នៅឡើយ។ លើសពីនេះទៀត ស្ថាប័នរដ្ឋពីរសំខាន់ៗ ក៏គ្រោងនឹងចាត់ការលើបុគ្គល លោក កឹម សុខា ដែរ គឺស្ថាប័នប្រឆាំងអំពើពុករលួយ និងស្ថាប័នរដ្ឋសភា។
ករណីរឿងអាស្រូវរបស់ លោក កឹម សុខា ដែលគេបញ្ចេញជាសាធារណៈនៅពេលនេះ ត្រូវបានអ្នកវិភាគមើលឃើញថា គឺជាចេតនារបស់រដ្ឋាភិបាលបង្កើតបញ្ហាដើម្បីដោះស្រាយបញ្ហាទៅវិញទេ ពោលគឺបញ្ហាជាច្រើនដែលកើតមាននៅក្នុងសង្គម ដែលរដ្ឋាភិបាលដោះស្រាយមិនបាន បែរជាបង្វែរសាច់រឿង លោក កឹម សុខា ឲ្យមហាជនចាប់អារម្មណ៍ទៅវិញ។
រឿងអាស្រូវស្នេហារបស់ប្រធានស្ដីទីគណបក្សសង្គ្រោះជាតិ រដ្ឋាភិបាលកំពុងយកចិត្តទុកដាក់ដើម្បីចាត់ការ លោក កឹម សុខា តាមផ្លូវច្បាប់ ទោះបីជាគណបក្សសង្គ្រោះជាតិ មិនតទល់ ឬមិនឆ្លើយ មិនឆ្លង និងមិនឈ្លោះក្ដី។
មកទល់ពេលនេះ ស្ថាប័នជាតិសំខាន់ៗចំនួនពីរ កំពុងតែចាត់ការករណីរឿងអាស្រូវស្នេហាមេដឹកនាំកំពូលគណបក្សប្រឆាំង គឺអង្គភាពប្រឆាំងអំពើពុករលួយ និងស្ថាប័នសភាជាតិ ទៅតាមបណ្ដឹងរបស់យុវជនមួយក្រុមដែលអះអាងថាខ្លួនជានិស្សិតនោះ ទោះបីជាចំណាត់ការនេះទទួលរងការរិះគន់ជាច្រើនពីសាធារណជនក្ដី។
ផ្ទុយទៅវិញ អ្នកវិភាគមើលឃើញថា ការបញ្ចេញរឿងអាស្រូវស្នេហា លោក កឹម សុខា នេះ គឺជាការរៀបចំជាប្រព័ន្ធ និងស៊ីសង្វាក់របស់រដ្ឋាភិបាល ដើម្បីវាយបំបាក់ដៃគូប្រកួតប្រជែងនៅមុនពេលបោះឆ្នោតនៅពេលខាងមុខ។ លើសពីនេះទៀត អ្វីដែលជាកត្តាសំខាន់នោះ គឺរដ្ឋាភិបាលបង្កើតបញ្ហា ដើម្បីដោះស្រាយបញ្ហា។ ប្រការនេះមានន័យថា បញ្ហាអយុត្តិធម៌សង្គមជាច្រើនបានកើតមាន តែរដ្ឋាភិបាលហាក់មិនដោះស្រាយនោះទេ តែបែរជាបង្វែរសាច់រឿងបុគ្គល លោក កឹម សុខា ឲ្យសាធារណជនចាប់អារម្មណ៍ទៅវិញ។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត កែម ឡី មានប្រសាសន៍ថា បញ្ហាជាច្រើនបានកើតឡើង ដោយលោកប្រៀបប្រដូចជាសម្បុកពីងពាង ដែលរដ្ឋាភិបាលមិនមានការដោះស្រាយ ដូចជា ការផ្ដល់ដីសម្បទានសេដ្ឋកិច្ចដែលប៉ះពាល់ដល់ប្រជាពលរដ្ឋ ជាពិសេសជម្លោះដីធ្លីបានកើតមានជាបន្តបន្ទាប់ អំពើពុករលួយនៅក្នុងសង្គម ដូចជាអំពើពុករលួយលើការសាងសង់ហេដ្ឋារចនាសម្ព័ន្ធផ្លូវថ្នល់ អំពើពុករលួយលើថ្លៃសេវាកម្មផ្សេងៗនៅក្នុងស្ថាប័នរដ្ឋ និងករណីផ្សេងៗទៀត៖ «ជំងឺមួយដែលយើងមើលឃើញមានដំបៅ ជំងឺមហារីក ហើយមិនដោះស្រាយ ទៅបង្កើតរបួសផ្សេងទៀត ហើយទៅព្យាបាលរបួសតិចតួចនោះ ជំងឺមហារីកនោះនឹងផ្ទុះ ព្រោះជាបទពិសោធន៍ប្រទេសមួយចំនួននៅលើពិភពលោកមានការបះបោរ»។
រដ្ឋសភា បានដាក់លិខិតឲ្យ លោក កឹម សុខា មកឆ្លើយបំភ្លឺរឿងអាស្រូវស្នេហានៅរដ្ឋសភា តាមបណ្ដឹងរបស់ក្រុមយុវជនមួយក្រុមដែលអះអាងថាជាក្រុមនិស្សិតនោះ។
ឱម យ៉ិនទៀង ២០១៦ ៨៥៥
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ថ្លែងក្នុងកិច្ចប្រជុំដេញដោលទាក់ទងនឹងខ្សែអាត់សំឡេងដែលគេថាជាសំឡេង លោក កឹម សុខា នៅព្រឹកថ្ងៃទី២៤ ខែមីនា ឆ្នាំ២០១៦។ RFA/Cheu Sideth
ការស្នើឲ្យ លោក កឹម សុខា ឆ្លើយបំភ្លឺនេះ អគ្គលេខាធិការនៃរដ្ឋសភា លោក ឡេង ប៉េងឡុង បញ្ជាក់ថា រដ្ឋសភាធ្វើបែបនេះ គឺស្របទៅតាមរដ្ឋធម្មនុញ្ញមាត្រា៣៥ ដែលបានចែងថា ប្រជាពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្ដីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងម៉ត់ចត់ពីអង្គការរដ្ឋ។
រីឯប្រធានអង្គភាពប្រឆាំងអំពើពុករលួយវិញ លោក ឱម យ៉ិនទៀង បានកោះហៅក្រុមយុវជនទៅស្ដាប់ការដេញដោលរបស់ក្រុមការងារលោក អំពីបណ្ដឹងប្រឆាំង លោក កឹម សុខា អំពីបណ្ដឹងរបស់ក្រុមយុវជនកាលពីថ្ងៃទី២២ មីនា។ លោកបញ្ជាក់ថា បើសិនជាអង្គភាពលោក ស្រាវជ្រាវរកឃើញបទល្មើសមានអំពើពុករលួយ លោក កឹម សុខា ទិញដីទិញផ្ទះឲ្យស្រីកំណាន់នោះ មិនអាចយកលេសអភ័យឯកសិទ្ធិតំណាងរាស្ត្រ មករារាំងដំណើរការនីតិវិធីរបស់អង្គភាពបានឡើយ៖ «ខ្លួនបានលុយមក ខ្លួនទិញផ្ទះភ្លាម កំណើនផ្ទះមួយទៀត ពន្យល់យើងសិន ថាបានមកពីណាទិញហ្នឹង ពន្យល់មិនត្រូវ ពន្យល់មិនសមស្រប រឹបអូសយកផ្ទះមួយសិន ទើបបើកការស៊ើបអង្កេតមួយទៀតថា លុយហ្នឹងមានពាក់ព័ន្ធពុករលួយទេ? បើពុករលួយ រុញទៅកាត់ទោសពុករលួយ។ ចឹងពាក់ព័ន្ធអភ័យឯកសិទ្ធិអ្នកតំណាងរាស្ត្រទេ? សូមពិចារណាមើលកន្លែងហ្នឹង ព្រោះអត់មានពាក់ព័ន្ធរឿងឃុំខ្លួនគាត់ អត់មានទេ។ សួរថា ច្បាប់នេះគ្របដណ្ដប់លើតំណាងរាស្ត្រ ឬអត់? វាគ្របមន្ត្រីរាជការសាធារណៈ។ ទី២ មន្ត្រីដែលមានអាណត្តិដល់ការបោះឆ្នោត។ ពីរហ្នឹងហើយធ្ងន់ហើយ បទល្មើសជាក់ស្ដែង គេវាយខ្នោះភ្លាម»។
ទោះបីជាយ៉ាងនេះក្ដី ក្រុមអ្នកវិភាគលើកឡើងថា កន្លងមក គេកម្រឃើញអង្គភាពប្រឆាំងអំពើពុករលួយ និងស្ថាប័នសភា ចាត់ការបណ្ដឹងពលរដ្ឋឆាប់រហ័សដូចដែលស្ថាប័នទាំងពីរកំពុងតែអនុវត្តនីតិវិធីរបស់ខ្លួន ចាត់ការបណ្ដឹងរបស់ក្រុមយុវជននេះណាស់។ បញ្ហានេះ បង្ហាញឲ្យឃើញថា ស្ថាប័នជាតិទាំងពីរនេះ អនុវត្តការងារគ្មានតម្លាភាព និងឯករាជ្យរបស់ខ្លួន។
អ្នកជំនាញខាងវិទ្យាសាស្ត្រនយោបាយ លោកបណ្ឌិត រស់ រ៉ាវុធ មានប្រសាសន៍ថា ស្ថាប័នសភា និងអង្គភាពប្រឆាំងអំពើពុករលួយ ត្រូវតែធ្វើការងារឲ្យមានតម្លាភាព មិនត្រូវធ្វើការស្ថិតនៅក្រោមឥទ្ធិពលរបស់គណបក្សណាមួយនោះទេ។ លោកបញ្ជាក់ថា ការធ្វើដូច្នេះ គឺជាការឆ្លុះបញ្ចាំងពីភាពទន់ខ្សោយរបស់ស្ថាប័នជាតិ ក្នុងការរក្សាឯករាជភាពរបស់ខ្លួន៖ «ឧទាហរណ៍ដូចជាលិខិតគណបក្សប្រឆាំងស្នើសុំឲ្យមន្ត្រីមកឆ្លើយបំភ្លឺនៅសភា បញ្ហាអធិបតេយ្យភាពឲ្យរដ្ឋសភាកោះហៅតាមការស្នើសុំ អាហ្នឹងទើបតម្លាភាពដែលជៀសផុតពីការតិះដៀលពីសាធារណជន»។
រស់ រ៉ាវុធ ២០១៦ ៨៥៥
សាស្ត្រាចារ្យផ្នែកវិទ្យាសាស្ត្រនយោបាយ លោកបណ្ឌិត រស់ រ៉ាវុធ ក្នុងកិច្ចពិភាក្សាបន្ថែមរបស់វិទ្យុអាស៊ីសេរី នៅថ្ងៃទី៨ ខែមករា ឆ្នាំ២០១៦។
ការប្រើប្រាស់យុទ្ធសាស្ត្រវាយបំបាក់ដៃគូប្រកួតរបស់រដ្ឋាភិបាលនេះ តាមមើលទៅមិនមែនជារឿងថ្មីនោះទេ យុទ្ធសាស្ត្រមិនចុះសម្រុងគ្នារវាងអ្នកនយោបាយ និងការយកឈ្នះចាញ់គ្នារបស់អ្នកនយោបាយ បានកើតមានជាហូរហែនៅក្នុងសង្គមនយោបាយកម្ពុជា។ ជាងនេះទៅទៀត នរណាក៏ដឹងដែរថា គណបក្សប្រជាជនកម្ពុជា ធ្លាប់បានចាត់ការសម្ដេចក្រុមព្រះ នរោត្តម រណឫទ្ធិ ដោយជំរុញឲ្យសភាបង្កើតច្បាប់ឯកពន្ធភាព ដែលគេដឹងថា ច្បាប់នេះសម្រាប់ចាត់ការព្រះអង្គ។
ករណី លោក កឹម សុខា មកទល់ពេលនេះ គណបក្សប្រឆាំងមិនឆ្លើយតបចំពោះការផ្សព្វផ្សាយខ្សែអាត់សំឡេងនេះទេ។ បញ្ហានេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា គណបក្សសង្គ្រោះជាតិ មិនចាប់អារម្មណ៍រឿងនេះទេ។ លោកថា បញ្ហាចំពោះមុខដែលគណបក្សប្រឆាំងគិតគូរ គឺរឿងប្រទេសជាតិ៖ «ជាពិសេសស្ថានការណ៍នៅលើពិភពលោកវិវឌ្ឍន៍ទៅរកភាពវិជ្ជមានទាំងអស់ រឿងអីសម្រាប់កម្ពុជា នៅទ្រឹងក្នុងល្បែងនយោបាយគាបសង្កត់អ្នកប្រជាធិបតេយ្យអ្នកស្នេហាជាតិ? ដូច្នេះមិនអាចទៅរួចទេ ខ្ញុំជឿថា ប្រជាពលរដ្ឋនឹងសម្រេចដ៏ត្រឹមត្រូវនៅពេលខាងមុខ»។
ឆ្លើយតបនឹងបញ្ហានេះ ថ្វីត្បិតតែគណបក្សសង្គ្រោះជាតិ ប្រើយុទ្ធសាស្ត្រមិនឆ្លង មិនឆ្លើយ និងមិនឈ្លោះក្ដី ប៉ុន្តែលោកនាយករដ្ឋមន្ត្រី ហ៊ុន សែន ធ្លាប់បានប្រកាសថា ការប្រើ ម៣ នេះ គឺហួសសម័យកាលទៅហើយ។ លោក ហ៊ុន សែន ថែមទាំងព្រមានថា ករណី លោក កឹម សុខា នេះកុំចោទថាពាក់ព័ន្ធនឹងរដ្ឋាភិបាល។ លោកថែមទាំងព្រមានបញ្ចេញរូបថត លោក កឹម សុខា នៅព្រលានយន្តហោះទៀតផង។
ទោះបីជារដ្ឋាភិបាលព្យាយាមបដិសេធ និងគេចវេះពីការចោទប្រកាន់ថា រដ្ឋាភិបាលនៅពីក្រោយខ្នងករណីបញ្ចេញរឿងអាស្រូវស្នេហា លោក កឹម សុខា នេះក៏ដោយ ក៏ប៉ុន្តែអ្នកវិភាគលើកឡើងថា បើសិនជាខ្សែអាត់សំឡេងគ្មានអ្នកណារៀបចំទេនោះ ប្រហែលជារដ្ឋាភិបាលចាត់ការទៅលើអ្នកចាត់ការអ្នកបញ្ចេញសំឡេងនោះបាត់ទៅហើយ។ ម្យ៉ាងវិញទៀត មន្ត្រីរដ្ឋាភិបាលក៏មានពាក់ព័ន្ធនឹងរឿងអាស្រូវស្នេហានេះដែរ ក្នុងនោះមានករណីខ្លះមានការបាញ់សម្លាប់ដែរ ដូចជាករណី អ្នកស្រី ពិសិដ្ឋ ពីលីកា ជាដើម។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត មាស នី មានប្រសាសន៍ថា តាមការវិភាគរបស់លោក ការបញ្ចេញសំឡេងខ្សែអាត់រឿងអាស្រូវនេះ អាចជាការដាក់សម្ពាធទៅលើគណបក្សប្រឆាំង គឺទី១ ជាការបង្ខំឲ្យគណបក្សប្រឆាំងបញ្ជូនមនុស្សទៅជំនួសកៅអីអនុប្រធានសភារបស់ លោក កឹម សុខា ដែលកំពុងនៅទំនេរ។ ទី២ អាចជាការដាក់សម្ពាធ លោក កឹម សុខា ក្នុងការទទួលយកតួនាទីប្រធានគណបក្សសង្គ្រោះជាតិ ដើម្បីចាត់ការ លោក សម រង្ស៊ី កំពុងតែនិរទេសខ្លួននោះ៖ «ជាការបំបែកបំបាក់ផង ហើយធ្វើឲ្យក្បាលម៉ាស៊ីនគណបក្សសង្គ្រោះជាតិ គ្មានពេលចុះទៅឃោសនាអីទេ មានតែព្រួយបារម្ភពីបញ្ហាផ្ទាល់ខ្លួន និងដោះស្រាយ និងគ្មានពេលដោះស្រាយរឿងផ្សេងទេ។ ម្យ៉ាងបើសិនជាគណបក្សកាន់អំណាចជួបប្រទះរឿងអាស្រូវដូចគ្នានេះ គណបក្សប្រឆាំងគ្មានអំណាចអីទៅវាយបកវិញទេ»។
អ្នកវិភាគលើកឡើងថា ការហែកហួរគ្នារបស់អ្នកនយោបាយឥតឈប់ឈរនេះ គឺជានយោបាយធ្វើឲ្យប្រទេសជាតិខាតបង់ ព្រោះថា អ្នកនយោបាយមិនបានលើកគោលនយោបាយក្នុងការដោះស្រាយបញ្ហាប្រទេសជាតិយកមកដោះស្រាយនោះទេ ដូចជាបញ្ហាអន្តោប្រវេសន៍ បញ្ហាព្រំដែន ការលុបបំបាត់អំពើពុករលួយ ការលើកស្ទួយជីវភាពប្រជាពលរដ្ឋតាមរយៈការរកទីផ្សារ និងដោះស្រាយបញ្ហាវិស័យកសិកម្មកំពុងតែជួបប្រទះ ជាដើម។ ផ្ទុយទៅវិញ រដ្ឋាភិបាលហាក់កំពុងប្រើប្រាស់បញ្ហាបុគ្គល ដើម្បីបិទបាំងបញ្ហាសង្គមកំពុងកើតមាននាពេលបច្ចុប្បន្នទៅវិញ៕
4 comments:
ចង់ដោះស្រាយរបៀបណាក៍ដោះទៅ តែគេដាក់អន្ទាក់ជាប់ហើយ ម្តងនេះមិនចូល គេថាខុសច្បាប់ បើចូលក៍គេបង្កើតថាខុសច្បាប់ ដូច្នេះច្បាស់ជាជាប់គុក ហើយបក្សសង្រ្គោះជាតិ ហ៊ុន សែន លប់ឈ្មោះបោះឆ្នោតបាន ឃើញទេចាញមុនបោះឆ្នោតទៅទៀត ហ៊ុន ចង់ឲ្យខ្មោចរាំលេងរបៀបណាក៍បានដែរ ចង់ខ្មែរមួយស្រុកស្អប់ ហ៊ុន សែនក៍វាមិនខ្វល់ដែរ ឲ្យតែយួនពេញចិត្ត គ្មានអ្នកណាធ្វើអីវាបានទេ មិនពិតឬ? ដាំចេក មើលទៅណា
Hun Sen sagas and deceits never end, until and unless the Viet colonization of Cambodia is stopped and stopped soon.
Hun Sen sagas and deceits never end, until and unless the Viet colonization of Cambodia is stopped and stopped soon.
I know that Ah Kwack Hun Sen and his clans are animal.
But Kem Sokha must not make some stupid mistake by fucking around. Are you out of your mind ?? If you like to fuck so much, get out of the CNRP. Don't stain the CNRP's reputation.
Post a Comment