 |
| ព្រឹទ្ធាចារ្យ គង់ ណៃ អ្នកសម្របសម្រួលការសម្ដែងចាប៉ីឆ្លើយឆ្លង។ រូប សហការី |
សម្រស់ព្រៃខ្មែរ ប្រធានបទចម្បងមហោស្រពចាប៉ីដងវែងលើកទី ១
ppp Fri, 25 March 2016
ប៉ាន់ រិទ្ធា
ភ្នំពេញៈ កម្មវិធីមហោស្រពចាប៉ីដងវែងលើកដំបូង នៅឯសាលមហោស្រពចតុមុខនៅថ្ងៃទី ៣ ខែមេសា ខាងមុខនេះបានដៅយកប្រធានបទសំខាន់ស្ដីពី សម្រស់ព្រៃខ្មែរ។
មហោស្រពរៀបចំដោយសហគមន៍ចាប៉ីដងវែងអមតៈ សហការជាមួយក្រសួងវប្បធម៌ និងវិចិត្រសិល្បៈ អង្គការសិល្បៈខ្មែរអមតៈ ក្រោមការឧបត្ថម្ភគាំទ្រពីអង្គការ USAID និង WINROCK ក្នុងគោលបំណងចង់ផ្សព្វផ្សាយ និងអភិរក្សសិល្បៈតន្ត្រីបុរាណចាប៉ីដងវែង នឹងរៀបរាប់ឲ្យយុវវ័យខ្មែរជំនាន់ក្រោយៗឲ្យស្វែងយល់ពីសារៈសំខាន់នៃព្រៃឈើខ្មែរ។
កម្មវិធីត្រួសៗរួមមានការបង្ហាញនូវទម្រង់សិល្បៈតន្ត្រីបុរាណជាច្រើនដូចជា ចាប៉ីឆ្លើយឆ្លងអំពីចាប៉ីខ្មែរ មន្តស្នេហ៍ចាប៉ី វង់ភ្លេងបញ្ជាន់អារក្ស ចម្រៀងក្រមាខ្មែរ វង់ភ្លេងការខ្មែរ តន្ត្រីគែន តន្ត្រីថូន ជាដើម ដោយលោក ពេជ្រ សារ៉ាត ប្រធានក្រុមសិល្បៈសហគមន៍ចាប៉ីដងវែងអមតៈ។
អ្នកផ្តួចផ្តើមរៀបចំមហោស្រពរូបនេះបានឲ្យដឹងថា៖ «កម្មវិធីដ៏ពិសេសពីរទៀតគឺការសម្តែងចាប៉ីឆ្លើយឆ្លងឈុតធំមានអ្នកលេងចាប៉ី ៩ នាក់ និង ១៥ នាក់ ដែលនឹងដេញដោលគ្នាលើប្រធានបទ សម្រស់ព្រៃខ្មែរ»។
 |
| សិល្បករ សិល្បការិនីខ្មែរ ចម្រុះជំនាន់នឹងបង្ហាញទេពកោសល្យក្នុងកម្មវិធីមហោស្រពចាប៉ីដងវែងលើកទី ១។ រូប សហការី |
យោងតាមលោក ពេជ្រ សារ៉ាត ក្រុមអ្នកលេងចាប៉ីដងវែងចម្រុះគ្រប់ជំនាន់ក៏មានសិល្បការិនីម្នាក់និងមានលោកតាព្រឹទ្ធាចារចាប៉ីដងវែង គង់ ណៃ ដើរតួជាអ្នកសម្របសម្រួលលើការសម្តែងចាប៉ីឆ្លើយឆ្លងទៀតផង។
តន្ត្រីចាប៉ីដងវែងនេះមានការពេញនិយមណាស់នាអំឡុងទសវត្សរ៍ទី ៦០-៧០ ពីសំណាក់ប្រជាជនខ្មែរ ដោយសារជាសិល្បៈតន្ត្រីមួយប្រភេទ ដែលតម្រូវឲ្យសិល្បករមានបញ្ញាឈ្លាសវៃ ចំណេះដឹងទូលំទូលាយ ហើយមានសំនួនវោហារស័ព្ទណែងណង នឹកឃើញភ្លាមច្រៀងភ្លែត។
សម័យបច្ចុប្បន្ន ចាប៉ីដងវែងហាក់ដូចថមថយប្រជាប្រិយភាពលែងចង់លេងឧបករណ៍នេះ មួយផ្នែកព្រោះតែមានទស្សនៈយល់ច្រឡំ និងជឿពាក្យចចាមអារ៉ាមដែលថា ការរៀនចាប៉ីដងវែងយូរៗទៅនឹងធ្វើឲ្យងងឹតភ្នែក ដោយមានសិល្បករព្រឹទ្ធាចារ្យជើងចាស់មួយចំនួនដូចជា លោកតា ប្រាជ្ញ ឈួន លោកតា គង់ ណៃ និងលោក ស្មៀន នេត ប៉េ ជាដើម។
ច្រានចោលទស្សនៈនេះ លោក ពេជ្រ សារ៉ាត ជាគ្រូបង្រៀនចាប៉ីដងវែងវ័យ ៣១ ឆ្នាំ បានលើកឡើងថា៖ «តាមពិតទស្សនៈនេះមិនត្រឹមត្រូវឡើយព្រោះថា ពួកគាត់សុទ្ធតែមានជំងឺភ្នែកតាំងពីកំណើត មិនមែនដោយសាររៀនចាប៉ីឡើយ។ ដូច្នេះចង់បង្កើតកម្មវិធីនេះបង្ហាញដល់យុវវ័យខ្មែរឲ្យចាប់អារម្មណ៍លើឧបករណ៍តន្ត្រីបុរាណនេះព្រោះថា វាក៏អាចប្រគំក្នុងបទសម័យបានដែរ»។
ប្រិយមិត្តចង់ទស្សនាមហោស្រពចាប៉ីដងវែងនេះ អាចរកជាវសំបុត្រតម្លៃ ២ ម៉ឺនរៀល នៅទីស្នាក់ការអង្គការសិល្បៈខ្មែរអមតៈ នៅអគារលេខ 128G9 មហាវិថីសម្តេចសុធារស រាជធានីភ្នំពេញ៕
No comments:
Post a Comment