Tue, 9 February 2016 ppp
ការកាប់ដុតព្រៃរានយកដីក្នុងតំបន់ព្រៃឡង់កន្លងមក។ រូបថត ភ្នំពេញ ប៉ុស្ដិ៍
|
ភ្នំពេញៈ បើអ្នកឃើញផ្សែងអ័ព្ទនោះគឺដោយសារដល់រដូវកាលភ្លើងឆេះព្រៃហើយ ហើយរូបភាពប្រចាំថ្ងៃពីផ្កាយរណបអង្កេតមើលផែនដីរបស់អង្គការណាសាបានបង្ហាញនូវទីកន្លែង និងចំនួនភ្លើងឆេះជាឧបករណ៍មួយដែលប្រើប្រាស់ដោយមន្រ្តីរដ្ឋបាលព្រៃឈើដើម្បីអង្កេតមើលអគ្គិភ័យដែលអាចបង្កឡើងដោយសកម្មភាពខុសច្បាប់។
លោកបណ្ឌិត កៅ ដាណា ប្រធានការិយាល័យគ្រប់គ្រងព្រៃឈើនៅរដ្ឋបាលព្រៃឈើបានថ្លែងថារូបភាពពីអង្គការណាសាត្រូវបានប្រើដើម្បីរកមើល «ចំណុចក្តៅ» ឬភាពមិនប្រក្រតីនៃកម្ដៅដែលអាចបង្ហាញពីកន្លែងដែលកំពុងមានភ្លើងឆេះព្រៃ។
លោកបានបន្តថា៖ «កាលពីខែវិច្ឆិកាហើយរហូតដល់ខែមេសាមានកន្លែងក្តៅយ៉ាងហោចណាស់ចំនួនពី ៤០‑៥០ កន្លែងរៀងរាល់ថ្ងៃ»។ លោកថាពេលខ្លះអាចមានជិតដល់ទៅ ១០០០ កន្លែង។
លោក ដាណា បន្តថាការិយាល័យរបស់លោកនឹងរាយការណ៍ពីចំណុចក្តៅទៅឲ្យការិយាល័យរដ្ឋបាលព្រៃឈើនៅមូលដ្ឋានដែលនៅក្បែរនោះដើម្បីធ្វើការស៊ើបអង្កេត និងរាយការណ៍មកវិញ។ ខណៈដែលមានអគ្គិភ័យច្រើនដោយសារតែធ្វើកសិកម្មដែលដុតនៅខាងក្រៅ ឬដែលកើតឡើងតាមធម្មជាតិលោក ដាណា បានបញ្ជាក់ថា៖ «ភ្លើងឆេះព្រៃតាមធម្មជាតិមិនសូវមានច្រើនទេ»។
រូបភាពពី ផ្កាយរណប បង្ហាញពីភ្លើងឆេះ ត្រង់ចំណុចអុជពណ៌ក្រហម ស្ទើរពាសពេញផ្ទៃប្រទេសកម្ពុជា កាលពីថ្ងៃទី ៦ កុម្ភៈ។ រូបថត NASA
លោកបានលើកឡើងថា ភ្លើងឆេះព្រៃកើតឡើងភាគច្រើនដោយសារតែសកម្មភាពខុសច្បាប់ដូចជាការឈូសឆាយ និងការកាប់ និងដុតដើម្បីចាប់យកដីធ្លី។
លោកថ្លែងថា៖ «ពេលខ្លះភ្លើងឆេះព្រៃកើតឡើងនៅក្នុងដីសម្បទានសេដ្ឋកិច្ច ឬជិតភូមិប៉ុន្តែយើងមិនដឹងថា តើវាជាភ្លើងឆេះក្នុងព្រៃ ឬនៅវាលស្រែទេយើងត្រូវចំណាយពេលច្រើនដើម្បីស៊ើបអង្កេត»។
ព្រះតេជគុណ ហៀក សុភាព នាយកប្រតិបត្តិនៃសមាគមពុទ្ធសាសនិកដើម្បីបរិស្ថានជាអង្គការដែលកន្លងមកបានជួយអ្នកភូមិប្រយុទ្ធ និងពន្លត់អគ្គិភ័យក្នុងព្រៃនៅខេត្តកំពង់ឆ្នាំងបានមានសង្ឃដីកាថាក្រៅពីប្រជាជនដុតព្រៃដើម្បីចាប់យកដីធ្លី និងភ្លើងដែលបង្កឡើងដោយការធ្វេសប្រហែសដូចជាការបោះកន្ទុយបារីភ្លើងឆេះខ្លះបង្កឡើងដោយអ្នកប្រមាញ់សត្វ។
ព្រះអង្គបន្តថា៖ «បញ្ហាមួយទៀតគឺមនុស្សគេប្រមាញ់សត្វព្រៃ បរបាញ់សត្វពួកគេចាប់ផ្តើមបោះជំរំហើយនៅពេលដែលពួកគេមិនអាចរកសត្វព្រៃបានពួកគេបានដុតព្រៃដើម្បីដេញសត្វព្រៃចេញ»។
លោក Nick Marx ប្រធានជួយសង្គ្រោះជីវិតសត្វព្រៃនៅអង្គការសម្ព័ន្ធសត្វព្រៃបាននិយាយថាលោកបានឮការអនុវត្តបែបនេះប៉ុន្តែមិនទាន់បានជួបផ្ទាល់ភ្នែកទេ។
ខណៈដែលរដ្ឋាភិបាលមានកម្មវិធីពង្រឹងបុគ្គលិកព្រៃឈើនៅមូលដ្ឋានលោក កៅ ដាណា បានថ្លែងថាឧបករណ៍នៅតែជាឧបសគ្គក្នុងការដោះស្រាយបញ្ហាអគ្គិភ័យនៅក្នុងប្រទេសកម្ពុជាដែលជាប្រទេសមួយដែលមានចំណុចក្តៅច្រើនបំផុតក្នុងតំបន់មួយទសវត្សរ៍កន្លងមកនេះ។
រដូវប្រាំងដែលកាន់តែធ្ងន់ធ្ងរដោយព្រឹត្តិការណ៍ El-Nino បានធ្វើឲ្យអ្នកជំនាញព្យាករថានឹងមានចំនួនអគ្គិភ័យច្រើនក្នុងឆ្នាំនេះ។ តាមអ៊ីមែលផ្ញើមកកាន់ភ្នំពេញប៉ុស្តិ៍កាលពីម្សិលមិញលោកបណ្ឌិត Veerachai Tanpipat អ្នកស្រាវជ្រាវឯករាជ្យបានថ្លែងថាខណៈពេលនេះមិនអាចសន្និដ្ឋានបានទេប៉ុន្តែ «ស្ថានភាពដែលធ្វើឲ្យឆេះព្រៃនៅភាគខាងជើងនៃប្រទេសកម្ពុជាមាននៅទីនោះមួយរយៈពេលហើយ»៕ TK
Alessandro Marazzi Sassoon
No comments:
Post a Comment