ដោយ ខែ សុណង
2016-02-09 
លោកនាយករដ្ឋមន្ត្រី ហ៊ុន សែន ថតរូបជាមួយពលរដ្ឋក្រោយពេលបញ្ចប់ពិធីចែកសញ្ញាប័ត្រដល់និស្សិតសលកវិទ្យាល័យជាតិគ្រប់គ្រង នាកោះពេជ្រ នៅថ្ងៃទី៥ កុម្ភៈ ឆ្នាំ២០១៦។
RFA/Brach Chev
រដ្ឋមន្ត្រីក្រសួងអភិវឌ្ឍន៍ជនបទ លោក ជា សុផារ៉ា បានតែងតាំងមន្ត្រី ៥រូប ឲ្យតាមដានបណ្ដឹង សំណូមពរ និងកង្វល់របស់ប្រជាពលរដ្ឋដែលបង្ហោះតាមទំព័រហ្វេសប៊ុក (Facebook) របស់លោកនាយករដ្ឋមន្ត្រី ហ៊ុន សែន ពាក់ព័ន្ធវិស័យអភិវឌ្ឍន៍ជនបទ។
សេចក្ដីសម្រេចរបស់លោក ជា សុផារ៉ា ប្រកាសនៅថ្ងៃទី០៩ ខែកុម្ភៈ ឲ្យដឹងថា មន្ត្រីទាំង ៥រូប ដែលចាំតាមដាននោះមានតួនាទីពីថ្នាក់រដ្ឋលេខាធិការ ប្រធានការិយាល័យស្រាវជ្រាវ មន្ត្រីខុទ្ទកាល័យ អនុប្រធានការិយាល័យសម្ភារៈ និងអនុប្រធានការិយាល័យកិច្ចការទូទៅ។
ការបង្កើតក្រុមការងារនេះ ធ្វើឡើងក្រោយមួយថ្ងៃបន្ទាប់ពីលោកនាយករដ្ឋមន្ត្រី ហ៊ុន សែន បានចេញសេចក្ដីណែនាំមួយ កាលពីថ្ងៃទី០៨ កុម្ភៈ ទៅឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រីប្រតិភូ រដ្ឋមន្ត្រីគ្រប់ក្រសួង ប្រធានគ្រប់ស្ថាប័ន និងអភិបាលនៃគណៈអភិបាលរាជធានីខេត្ត ឲ្យយកចិត្តទុកដាក់ដោះស្រាយលើបញ្ហានានាដែលសព្វថ្ងៃលោកទទួលបានព័ត៌មានចម្រុះ រួមទាំងពាក្យបណ្ដឹង និងសំណូមពរពីប្រជាពលរដ្ឋទូទាំងប្រទេសឲ្យមានតម្លាភាព និងមានប្រសិទ្ធភាពខ្ពស់។
សេចក្ដីណែនាំដដែលបានតម្រូវឲ្យចាត់តាំងក្រុមការងារតាមដានស្រង់របាយការណ៍ព័ត៌មានប្រចាំថ្ងៃ និងសំណូមពរនានារបស់ប្រជាពលរដ្ឋដែលលោកបានទទួលផ្ទាល់ក្នុងប្រអប់សំបុត្រហ្វេសប៊ុកពីប្រជាពលរដ្ឋ។
ថ្មីៗនេះ លោក ហ៊ុន សែន បានបង្អួតពីប្រជាប្រិយភាពហ្វេសប៊ុក របស់លោក ក្រោយពីលោកទទួលបានអ្នកចុចចូលចិត្ត (Like) ជាង ២លាននាក់។
ទោះជាយ៉ាងណាក៏ដោយ សង្គមស៊ីវិលមើលឃើញថា ការណែនាំរបស់លោក ហ៊ុន សែន ឲ្យមន្ត្រីថ្នាក់ក្រោមតាមដានសំណូមពររបស់ពលរដ្ឋលើទំព័រហ្វេសប៊ុក នៅពេលនេះ ធ្វើឡើងគ្រាន់តែដើម្បីចំណេញនយោបាយ។ ពួកគេថា វិធានការនេះមិនអាចដោះស្រាយបញ្ហាជាតិធំៗ ប្រកបដោយប្រសិទ្ធភាពនោះឡើយ៕
No comments:
Post a Comment