ដោយ កេសរណ្ណីយ្យា
2016-02-15 rfa
 |
កិច្ចប្រជុំកំពូលអាស៊ាន-អាមេរិក នៅប្រទេសមីយ៉ាន់ម៉ា (Myanmar) កាលពីថ្ងៃទី១៣ ខែវិច្ឆិកា ឆ្នាំ២០១៤។ Photo courtesy of AFP Photo courtesy of AFP |
កិច្ចប្រជុំកំពូលអាមេរិក-អាស៊ាន នឹងចាប់ផ្ដើមនៅថ្ងៃច័ន្ទ ទី១៥ កុម្ភៈ នេះ នាមជ្ឈមណ្ឌលឧទ្យានសាន់នីឡែនដ៍ (Sunnylands) ស្ថិតនៅក្រុងរេនឆូ ម៉ារាហ្ស (Rancho Mirage) នៃរដ្ឋកាលីហ្វ័រញ៉ា សហរដ្ឋអាមេរិក។
មន្ត្រីរដ្ឋាភិបាលសហរដ្ឋអាមេរិក បញ្ជាក់ប្រាប់អ្នកសារព័ត៌មានឲ្យដឹងថា កិច្ចប្រជុំកំពូលអាមេរិក-អាស៊ាន រយៈពេលពីរថ្ងៃដាច់ដោយឡែកនៅលើទឹកដីសហរដ្ឋអាមេរិក នេះ នឹងផ្ដោតសំខាន់លើការពង្រឹងកិច្ចសហប្រតិបត្តិការក្នុងវិស័យពាណិជ្ជកម្ម វិនិយោគ វិស័យថាមពល ការប្រយុទ្ធប្រឆាំងអំពើភេរវកម្ម និងបញ្ហាសមុទ្រចិនខាងត្បូង ព្រមទាំងជជែកពិភាក្សាអំពីស្ថានភាពសិទ្ធិមនុស្សក្នុងតំបន់អាស៊ានដែរ។
លោកប្រធានាធិបតីអាមេរិក បារ៉ាក់ អូបាម៉ា (Barack Obama) ក្នុងអំឡុងពេលកិច្ចប្រជុំកំពូលអាស៊ាននៅប្រទេសម៉ាឡេស៊ី កាលពីខែវិច្ឆិកា ឆ្នាំ២០១៥ បានអញ្ជើញមេដឹកនាំអាស៊ានទាំង១០ ក្នុងនោះមានលោកនាយករដ្ឋមន្ត្រី ហ៊ុន សែន ផង ទៅចូលរួមសន្និសីទកំពូលនេះ។
សមាជិកព្រឹទ្ធសភាសហរដ្ឋអាមេរិក ចំនួន ៧រូប កាលពីសប្ដាហ៍មុន បានសរសេរលិខិតទៅលោកនាយករដ្ឋមន្ត្រី ហ៊ុន សែន តាមរយៈស្ថានទូតកម្ពុជា ប្រចាំរដ្ឋធានីវ៉ាស៊ីនតុន ដើម្បីបង្ហាញក្តីកង្វល់របស់ខ្លួន ដោយលើកឡើងអំពីស្ថានការណ៍រំលោភបំពានទៅលើគោលការណ៍លទ្ធិប្រជាធិបតេយ្យ និងសិទ្ធិមនុស្ស ពីសំណាក់រដ្ឋាភិបាល លោក ហ៊ុន សែន។
មន្ត្រីជាន់ខ្ពស់ស្ថានទូតខ្មែរប្រចាំនៅរដ្ឋធានីវ៉ាស៊ីនតុន បដិសេធមិនទទួលលិខិតរបស់សមាជិកព្រឹទ្ធសភាអាមេរិក ទាំង ៧រូបនោះ ផ្ញើបន្តជូនទៅលោកនាយករដ្ឋមន្ត្រី ហ៊ុន សែន ទេ ប៉ុន្តែមិនបញ្ជាក់ពីមូលហេតុអ្វីឡើយ។
អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch = HRW) ដែលមានមូលដ្ឋាននៅទីក្រុងញីវយ៉ក (New York) សហរដ្ឋអាមេរិក ជំរុញឲ្យសហរដ្ឋអាមេរិក ដាក់សម្ពាធលើប្រមុខរដ្ឋាភិបាលកម្ពុជា លោក ហ៊ុន សែន នៅពេលដែលលោកទៅចូលរួមកិច្ចប្រជុំកំពូលអាមេរិក-អាស៊ាន នេះ ឲ្យគោរពសិទ្ធិសេរីភាពនៃការជួបប្រជុំនៅកម្ពុជា។
អង្គការសម្ព័ន្ធមិត្តខ្មែរ-អាមេរិកាំង នៅសហរដ្ឋអាមេរិក ក៏នឹងរៀបចំបាតុកម្មនៅថ្ងៃច័ន្ទ ១៥ កុម្ភៈ នេះ ខណៈដែល លោក ហ៊ុន សែន ទៅចូលរួមក្នុងកិច្ចប្រជុំកំពូលអាមេរិក-អាស៊ាន រយៈពេលពីរថ្ងៃចាប់ពីថ្ងៃទី១៥-១៦ ខែកុម្ភៈ នេះ៕
1 comment:
To make this summit credible, the whole group members must uncover the criminal dictator's face. They must exclude that criminal from the group.
That criminal is easy to distinguish from the rest, it has only one eye.
Post a Comment