ដោយ ម៉ម មុនីរតន៍
2016-01-05 rfa
 |
លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធដាក់ឲ្យប្រើប្រាស់ស្ពានអាកាស ៥ មករា នៅជិតសាលាតិចណូ នៅថ្ងៃទី៥ ខែមករា ឆ្នាំ២០១៦។ RFA/Morm Moniroth |
ប្រមុខរដ្ឋាភិបាល ប្រតិកម្មចំពោះគណបក្សប្រឆាំងដែលរិះគន់ការដាក់ឈ្មោះស្ពានអាកាសថ្មីជិតសាលាតិចណូ ថាជាស្ពាន ៥មករា ចំថ្ងៃខួបអាពាហ៍ពិពាហ៍របស់ លោក ហ៊ុន សែន។ ប្រធានគណបក្សប្រជាជនកម្ពុជា ចាត់ទុកថា នេះជាការរករឿងមិនចេះចប់មិនចេះហើយរបស់គណបក្សប្រឆាំង។ លោកនាយករដ្ឋមន្ត្រីថ្លែងថា ជាញឹកញាប់ គណបក្សជំទាស់ទាំងមេទាំងកូន តែងរិះគន់រដ្ឋាភិបាលទាំងខុសរបៀបជាហូរហែក្នុងពេលកន្លងមកនេះ។
ចំណែកអ្នកវិភាគនយោបាយវិញយល់ឃើញថា ជាទម្លាប់នៅក្នុងសង្គមប្រជាធិបតេយ្យ ការផ្លែផ្កាដាក់គ្នាទៅវិញទៅមករបស់អ្នកនយោបាយ ជារឿងធម្មតាទៅហើយ។ ម្យ៉ាងវិញទៀត ការដៀមដាមដាក់គ្នាដូចនេះរបស់អ្នកនយោបាយ ជាបរិបថដដែលៗយូរមកហើយ។
មន្ត្រីគណបក្សប្រឆាំងនៅពុំទាន់មានប្រតិកម្ម ឬឆ្លើយតបបែបណានៅឡើយទេ ជុំវិញការចោទប្រកាន់ដូចនេះរបស់ លោក ហ៊ុន សែន ហើយការរក្សាជំហរនៅស្ងៀមពេលនេះ ត្រូវបានអ្នកវិភាគយល់ឃើញថា ប្រហែលជាគណបក្សជំទាស់ចង់បន្ធូរស្ថានការណ៍នយោបាយ ដែលកំពុងឡើងកម្ដៅ ឲ្យស្ថិតក្នុងកម្រិតមួយទាប ឬអាចជាមធ្យោបាយក្នុងការបញ្ចៀសហិង្សានយោបាយក៏អាចថាបាន។
លោក ហ៊ុន សែន ថ្លែងការពារថា ការចោទប្រកាន់របស់តំណាងរាស្ត្រគណបក្សសង្គ្រោះជាតិ ប្រឆាំងរដ្ឋាភិបាល គឺជាហេតុផលពុំអាចទទួលយកបានឡើយ។ ការថ្លែងដូចនេះរបស់ប្រធានគណបក្សប្រជាជនកម្ពុជា ក្នុងពេលដែលលោកចូលរួមសម្ពោធដាក់ឲ្យប្រើប្រាស់ស្ពានអាកាសមួយថ្មីទៀត នៅជិតសាលាតិចណូ ដែលត្រូវគេប្រសិទ្ធិនាមថា ស្ពាន ៥មករា កាលពីព្រឹកថ្ងៃទី៥ មករា។
 |
| ស្ពានអាកាស ៥ មករា នៅជិតសាលាតិចណូ ក្នុងថ្ងៃសម្ពោធដាក់ឲ្យប្រើប្រាស់នៅថ្ងៃទី៥ ខែមករា ឆ្នាំ២០១៦។ RFA/Morm Moniroth |
មុនពិធីសម្ពោធមួយថ្ងៃ អ្នកវិភាគ និងអ្នកនយោបាយចំអកថា ការព្យាយាមដាក់ឈ្មោះស្ពានឲ្យត្រូវនឹងថ្ងៃកំណើតអាពាហ៍ពិពាហ៍របស់ លោក ហ៊ុន សែន ដូចនេះ ជាការបង្ហាញសាច់ដុំ និងជារបៀបនៃការអនុវត្តវប្បធម៌ទំយើ ច្រើនជាងហេតុផលនានា។ ក្រៅពីនេះ លោក ហ៊ុន សែន ត្រូវគេមើលឃើញថា កំពុងប្រមូលសមិទ្ធផលទាំងឡាយឲ្យក្លាយជាទ្រព្យសម្បត្តិរបស់ខ្លួន ច្រើនជាងសម្បត្តិសាធារណៈរបស់រដ្ឋ បើទោះជាសមិទ្ធផលទាំងនោះជាលុយជំនួយ ឬបានមកពីប្រភពថវិកាកម្ចីក្តី។
បើទោះជាបែបណា លោកនាយករដ្ឋមន្ត្រី ហ៊ុន សែន អះអាងថា ការដាក់ឈ្មោះស្ពានថ្មីថាជាស្ពាន ៥មករា នេះ វាមិនគាប់ជួនទៅនឹងពិធីខួបកំណើតថ្ងៃអាពាហ៍ពិពាហ៍របស់លោកឡើយ។ ជាងនេះទៀត លោក ហ៊ុន សែន បញ្ជាក់ថា សម្រាប់ថ្ងៃទី៥ មករា នេះ មានកំណើតមនុស្សច្រើនណាស់នៅក្នុងពិភពលោក រួមទាំងមានមនុស្សជាច្រើនផ្សេងទៀត ក៏មានថ្ងៃអាពាហ៍ពិពាហ៍ដូចនេះដែរ។ ហេតុនេះ ការដាក់ឈ្មោះស្ពានអាកាសថ្មីនេះថាជាស្ពាន ៥មករា នោះ វាពុំមែនជាការទាមទាររបស់លោកឡើយ។ ផ្ទុយទៅវិញ លោក ហ៊ុន សែន រិះគន់គណបក្សប្រឆាំងថា ជាទម្លាប់មិនកែនិស្ស័យតាំងពីថ្នាក់កំពូលរហូតដល់មន្ត្រីនៅថ្នាក់ក្រោម ដែលតែងមើលឃើញរដ្ឋាភិបាលក្នុងផ្លូវមិនល្អជាដរាបមក។ លោកបន្តថា «ខ្ញុំព្រះករុណាខ្ញុំចង់សួរថា តើថ្ងៃ ៥ មករា នេះ ជាថ្ងៃសម្រាប់ទាំងអស់គ្នា ឬជាថ្ងៃរបស់ខ្ញុំព្រះករុណាខ្ញុំ។ បើសិនជាកាសែតវាឆ្កួត មេដឹកនាំបក្សក្នុងឋានៈជាអ្នកតំណាងរាស្ត្រ កុំឆ្កួត។ បើសិនជាស្ពាននេះដាក់ថាជាស្ពានអនុស្សាវរីយ៍ខួបលើកទី៤០ របស់សម្ដេចតេជោ និងភរិយា អាហ្នឹងចាំថា។ តែ ៥ មករា មនុស្សមួយពិភពលោក វា ៥ មករា ហើយចាំបាច់មករករឿង។ ទាំងមេទាំងកូនវាអ៊ីចឹង បានវាអ៊ីចឹង»។
បើទោះជា លោក ហ៊ុន សែន ច្រានចោលការដាក់ឈ្មោះស្ពានអាកាសជិតសាលាតិចណូ ថាពុំមែនជាកាដូសម្រាប់ខួបអាពាហ៍ពិពាហ៍ដល់ភរិយារបស់លោកក្តី តែលោកបានរំឭកយ៉ាងពិស្ដារអំពីការតស៊ូរបស់លោក ទម្រាំបាន អ្នកស្រី ប៊ុន រ៉ានី ធ្វើជាភរិយា។ លើសពីនេះទៀត លោក ហ៊ុន សែន ថែមទាំងបញ្ជាក់ទៀតថា ក្នុងពេលដែលលោកថ្លែងសន្ទរកថានេះ គឺកាលពី ៤០ឆ្នាំមុន រូបលោក និងភរិយា កំពុងស្ថិតក្នុងវ័យកំលោះ និងក្រមុំនៅឡើយទេ។ លោកបន្តថា «ខ្ញុំព្រះករុណាខ្ញុំក៏មិនភ្លេចនឹងនិយាយដែរ។ ម៉ោងនេះ ពេលនេះ កាលពី ៤០ឆ្នាំមុន គេបានកំពុងតែតម្រៀបជួរខ្ញុំព្រះករុណាខ្ញុំ និងភរិយាខ្ញុំដូចទាហានអ៊ីចឹង។ ១៣គូដើរចូលរោងការ។ ពេលនោះនៅកំលោះទេ ម៉ោងហ្នឹង ឯណេះក៏នៅក្រមុំដែរម៉ោងហ្នឹង។ ថ្មើរហ្នឹងគេទើបនឹងអានប្រវត្តិរូបទេ»។
វិទ្យុអាស៊ីសេរី ពុំទាន់អាចសុំការបំភ្លឺពីមន្ត្រីគណបក្សសង្គ្រោះជាតិ ជុំវិញការចោទប្រកាន់របស់ លោក ហ៊ុន សែន បានភ្លាមៗនៅឡើយទេ នៅថ្ងៃទី៥ មករា។
ជុំវិញរឿងនេះ លោក អ៊ូ វីរៈ ប្រធានអង្គការនៃវេទិកាអនាគត យល់ឃើញថា វាពុំមានអ្វីដែលចម្លែកឡើយ ដែលអ្នកនយោបាយប្រើប្រាស់វេទិកាឌឺដងដាក់គ្នាដូចនេះ។ លោកបន្តថា ជាទម្លាប់នៅក្នុងសង្គមប្រជាធិបតេយ្យ អ្នកនយោបាយតែងប្រើប្រាស់ពិធីរបៀបនេះដើម្បីទាក់ទាញការគាំទ្ររបស់ខ្លួន។ ផ្ទុយទៅវិញ លោក អ៊ូ វីរៈ ចាត់ទុកថា អ្វីដែលជាបញ្ហានោះ នៅត្រង់ថា ប្រសិនបើអ្នកនយោបាយប្រើគុកច្រវាក់ និងប្រព័ន្ធតុលាការ ឬជាការគំរាមកំហែងផ្នែកនយោបាយ ទាំងនេះទើបជាក្ដីកង្វល់ និងជាវិបត្តិសម្រាប់សង្គម។ លោកបន្តថា «ការប្រទាំងប្រទើស ឬមួយការរិះគន់គ្នាទៅវិញទៅមកទាក់ទិនឈ្មោះក៏ដោយ ឈ្មោះផ្លូវក៏ដោយ ធ្វើផ្លូវក៏ដោយ មិនធ្វើផ្លូវក៏ដោយ គឺជារឿងដែលធម្មតា។ ខ្ញុំមិនយកចិត្តទុកដាក់ទេ អ្វីដែលយើងយកចិត្តទុកដាក់ នៅពេលណាដែលតុលាការត្រូវបានប្រើទៅលើសិទ្ធិនយោបាយរបស់គណបក្សនយោបាយ អាហ្នឹងបានយើងព្រួយបារម្ភ»។
បើទោះជាបែបណា លោក ហ៊ុន សែន បានដៀមដាមឲ្យគណបក្សជំទាស់ថា ដោយសារតែការរករឿងមិនសមហេតុសមផល ប្រឆាំងការអភិវឌ្ឍរបស់រដ្ឋាភិបាល ទើបជំរុញឲ្យមនុស្សមួយចំនួនក្នុងបក្សត្រូវជួបទុក្ខ ទាំងស្ថានភាពនៅកម្ពុជា កំពុងតែមានភាពសម្បូរសប្បាយ និងរីកចម្រើន៕
1 comment:
why wasting time on such trivial matter ? CNRP needs to focus on more important issues such as employment... don't they pay any attention to the world economy... US and europe are supposed to enter recession this year... translate less export from cambodia thus reducing jobs and more unemployed people... china and US just have a stock market crashes and according to economists , this is only the beginning ... central banks can intervene with stocks market buying, but they cannot create jobs -- no matter how much money they print... the US central bank has been printing trillions of dollars and yet there are now 93 millions americans out of work, right now and more will be laid off from the oil sectors if oil price keep dropping... similar in europe their unemployment rate is above 10 percent.. note the rate only counts those actively looking for work not those who gave up looking for one.... So what is CNRP plan to do when people begin losing jobs...that is more important than a name of a street .. don't like that name call it by another one .
Post a Comment