ដោយ យាង សុជាមេត្តា
2016-01-15 rfa
 |
| អគ្គលេខាធិការរបស់គណៈកម្មាធិការជាតិរៀបចំការបោះឆ្នោត (គ.ជ.ប.) លោក ទេព នីថា
Photo: RFA
|
សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១៥ ខែមករា បានបោះឆ្នោតជ្រើសរើសលោក ទេព នីថា ដែលជាអគ្គលេខាធិការ គ.ជ.ប ចាស់ ឲ្យបន្តកាន់តំណែងនេះជាថ្មីទៀតសម្រាប់អាណត្តិរបស់ គ.ជ.ប ថ្មី។
លោក ទេព នីថា ថ្លែងថា លោកសប្បាយចិត្តដូចជាសិស្សបានប្រលងជាប់នៅពេលលោកទទួលដំណឹងថា លោកត្រូវបាន គ.ជ.ប ជ្រើសរើសឲ្យធ្វើជាអគ្គលេខាធិការ គ.ជ.ប ជាថ្មីទៀត បើទោះជាលោកបានកាន់តំណែងនេះអស់រយៈពេលជាង ១០ឆ្នាំមកហើយក្តី។
កើតក្នុងឆ្នាំ១៩៥៤ នៅរាជធានីភ្នំពេញ ក្នុងត្រកូលមន្ត្រីរាជការ លោក ទេព នីថា មានបងប្អូនបង្កើតទាំងអស់ចំនួន ៦នាក់ ប៉ុន្តែ ៤នាក់ បានស្លាប់ក្នុងសម័យខ្មែរក្រហម។
ដោយសារបានកើតក្នុងត្រកូលមន្ត្រីរាជការនៅក្នុងទីក្រុង លោក ទេព នីថា មានឱកាសសិក្សាបញ្ចប់ថ្នាក់វិទ្យាល័យនៅភ្នំពេញ ហើយនៅមុនសម័យខ្មែរក្រហមចូលកាន់អំណាចក្នុងឆ្នាំ១៩៧៥ លោកបានសិក្សានៅមហាវិទ្យាល័យគរុកោសល្យ។
បន្ទាប់ពីពួកខ្មែរក្រហមដួលរលំនៅឆ្នាំ១៩៧៩ លោក ទេព នីថា ដែលក្រោយមកបានក្លាយជាមន្ត្រីរាជការក្នុងសម័យសាធារណរដ្ឋប្រជាមានិតកម្ពុជា។ លោកត្រូវបានគេបញ្ជូនឲ្យទៅសិក្សាបន្តនៅសហភាពសូវៀត ផ្នែកសង្គមវិទ្យា និងវិទ្យាសាស្ត្រសង្គម ហើយក្រោយមកក៏បានទៅសិក្សាផ្នែកគ្រប់គ្រងនៅប្រទេសវៀតណាម អស់រយៈពេល ២ឆ្នាំបន្ថែមទៀត។ នៅរវាងឆ្នាំ១៩៩៧-១៩៩៨ លោកបានបញ្ចប់ការសិក្សាថ្នាក់អនុបណ្ឌិតផ្នែកវិទ្យាសាស្ត្រនយោបាយនៅសាកលវិទ្យាល័យមួយក្នុងរាជធានីភ្នំពេញ។
ទាក់ទងនឹងប្រវត្តិការងារវិញ លោកបានធ្វើជាគ្រូពេទ្យនៅខេត្តព្រះវិហារ នៅឆ្នាំ១៩៧៩ ហើយនៅឆ្នាំ១៩៨០ លោកបានមកធ្វើការនៅសមាគមយុវជនមួយនៅភ្នំពេញ។ រហូតដល់ឆ្នាំ១៩៩៧ លោកបានចូលធ្វើការនៅក្នុងគណៈកម្មាធិការជាតិរៀបចំការបោះឆ្នោត ដែលមានតួនាទីជានាយកខុទ្ទកាល័យអគ្គលេខាធិការ ហើយចាប់ពីឆ្នាំ២០០៣ មក លោកត្រូវបានជ្រើសរើសឲ្យធ្វើជាអគ្គលេខាធិការនៃ គ.ជ.ប។
លោក ទេព នីថា ឲ្យដឹងថា លោកមិនមានវត្តមាននៅភ្នំពេញ នោះទេ ពេលដែល គ.ជ.ប កំពុងជ្រើសរើសអគ្គលេខាធិការ និងអគ្គលេខាធិការរងថ្មី ប៉ុន្តែនៅពេលទទួលដំណឹងថា លោកត្រូវបាន គ.ជ.ប ជ្រើសរើសឲ្យធ្វើជាអគ្គលេខាធិការជាថ្មីឡើងវិញ លោក ទេព នីថា ថ្លែងថា លោកមិនត្រឹមតែសប្បាយចិត្តនោះទេ ហើយក៏ថែមទាំងភ្ញាក់ផ្អើលទៀតផង ដោយសារលោកថា នៅក្នុងការជ្រើសរើសលើកនេះ មានបេក្ខជនដាក់ពាក្យចូលរួមប្រកួតប្រជែងច្រើន។
លោក ទេព នីថា៖ «វាដូចជារឿងកូនសិស្សប្រលងជាប់ ឬដូចជាអ្នកស្វែងរកការងារធ្វើហើយត្រូវបានជ្រើសរើស។ ខ្ញុំសប្បាយចិត្តដោយសារតែការជ្រើសរើសលើកនេះ មានការប្រកួតប្រជែងច្រើន និងមានការតាមដានច្រើន អ៊ីចឹងទេ ការដែលបានជ្រើសរើសនេះ ជាកិត្តិយសមួយដែរ ហើយក៏សូមអរគុណ គ.ជ.ប ដែលបានជ្រើសរើសខ្ញុំ ព្រមទាំងអគ្គលេខាធិការរង ៤រូបទៀត»។
ក្នុងមុខតំណែងជាអគ្គលេខាធិការ នៃ គ.ជ.ប លោក ទេព នីថា នឹងទទួលខុសត្រូវរួម និងទទួលបន្ទុកគ្រប់គ្រងផ្ទាល់ទៅលើនាយកដ្ឋានហិរញ្ញវត្ថុ និងរដ្ឋបាលរបស់ គ.ជ.ប។
លោក ទេព នីថា ឲ្យដឹងថា អ្វីដែលលោកចាប់ផ្ដើមធ្វើមុនគេ គឺរៀបចំធ្វើសមាហរណកម្មមន្ត្រី គ.ជ.ប ទៅក្នុងស្ថាប័នថ្មីតាមលក្ខន្តិកៈដោយឡែកស្របតាមរដ្ឋធម្មនុញ្ញ និងច្បាប់ស្ដីពីការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត។ ចំណុចសំខាន់មួយទៀត គឺការត្រៀមរៀបចំការចុះឈ្មោះបោះឆ្នោតដើម្បីធ្វើបញ្ជីបោះឆ្នោតសម្រាប់ការបោះឆ្នោតនៅឆ្នាំ២០១៧។
លោក ទេព នីថា៖ «ខ្ញុំត្រូវបានជ្រើសរើសជាមួយអគ្គលេខាធិការរង ៤រូបទៀត ហើយអាចថាសមាសភាពនេះមានលក្ខណៈចម្រុះ។ ទោះយ៉ាងណាក៏ដោយ យើងមានច្បាប់មួយជាបន្ទាន់ដើម្បីយើងរៀបចំអនុវត្តបទបញ្ជា នីតិវិធី ព្រមទាំងក្រមសីលធម៌នៃមន្ត្រីបោះឆ្នោត ហើយដោយផ្អែកលើបន្ទាត់នេះ ផ្អែកលើច្បាប់នេះ ដែលយើងអាចពង្រឹងកម្លាំងទាំងអស់គ្នាដើម្បីអនុវត្តឲ្យបានសម្រេចនូវភារកិច្ចរៀបចំការបោះឆ្នោត តាមការដឹកនាំរបស់គណៈកម្មាធិការជាតិរៀបចំការបោះឆ្នោត»។
បើទោះជាមានការប្ដេជ្ញាចិត្តក្នុងការបំពេញការងារប្រកបដោយប្រសិទ្ធភាពរបស់លោក ទេព នីថា ក្តី កន្លងមកក៏មានការរិះគន់ជាហូរហែដែរថា លោក ទេព នីថា ដែលបានកាន់តំណែងជាអគ្គលេខាធិការនេះអស់ជាង ១០ឆ្នាំទៅហើយនោះ មិនគួរដាក់ពាក្យប្រកួតប្រជែងជាថ្មីទៀតនោះទេ ហើយគួរទុកឱកាសឲ្យអ្នកថ្មីដែលមានសមត្ថភាព មានគំនិតថ្មីចូលបំពេញតួនាទីនេះវិញម្ដង ដើម្បីធ្វើឲ្យស្ថាប័ន គ.ជ.ប រឹតតែមានប្រសិទ្ធភាព ជៀសវាងការចោទប្រកាន់ថាលំអៀងទៅរកបក្សកាន់អំណាចដូចពេលកន្លងមក។
លោក ទេព នីថា ឆ្លើយតបថា លោកមានសិទ្ធិដាក់ពាក្យចូលរួមប្រកួតប្រជែងដូចពលរដ្ឋខ្មែរផ្សេងទៀត ហើយលោកក៏មានសមត្ថភាពនិងបទពិសោធន៍គ្រប់គ្រាន់ក្នុងការបំពេញការងារនេះបន្តទៀត។
ចំពោះអ្នករិះគន់លោកយ៉ាងណានោះ លោក ទេព នីថា ថាវាជាការយល់ឃើញរបស់ពួកគេ៖ «ជាធម្មតា យើងធ្វើអីក៏ដោយវាមិនបានល្អ ១០០% នោះទេ ហើយធ្វើអីក៏ដោយមិនដែលមានអ្នកណាស្រឡាញ់យើងទាំងអស់ដែរ អ៊ីចឹងទេតែងមានអ្នកស្អប់អ្នកស្រឡាញ់ មានការងារខ្លះធ្វើបាន ខ្លះធ្វើមិនបាន តែជាទូទៅខ្ញុំធ្វើការងារបោះឆ្នោតកន្លងមកនេះ គឺយើងបានសម្រេចការបោះឆ្នោតប៉ុន្មានលើកចប់ចុងចប់ដើម ទោះបីជាក្រោយការបោះឆ្នោតមានបញ្ហាខ្លះក៏ដោយ តែខ្ញុំគិតថា បញ្ហាខ្លះ វាមិនមែនកើតឡើងដោយសារការបោះឆ្នោតទេ តែវាទាក់ទងទៅរឿងប្រកួតប្រជែងនយោបាយច្រើនជាង»។
លោក ទេព នីថា សង្កត់ធ្ងន់ថា ដើម្បីវាយតម្លៃការងាររបស់ គ.ជ.ប ឬមន្ត្រីណាម្នាក់ក្នុង គ.ជ.ប គេត្រូវពិនិត្យមើលច្បាប់ នីតិវិធី ឬបទបញ្ជាផ្ទៃក្នុង គ.ជ.ប ជាមុនសិន រួចមើលការអនុវត្តជាក់ស្ដែងរបស់ពួកគេ។ លោកថា បើគ្រាន់តែវាយតម្លៃដោយផ្អែកលើនិន្នាការនយោបាយទេ គេមិនអាចរកឃើញភាពត្រឹមត្រូវរបស់ គ.ជ.ប ឡើយ។
យ៉ាងណាក៏ដោយ ចាប់តាំងពី គ.ជ.ប ត្រូវបានបង្កើតឡើងនៅឆ្នាំ១៩៩៧ ហើយបានរៀបចំការបោះឆ្នោតជ្រើសតាំងតំណាងរាស្ត្រចំនួន ៤លើករួចមក គណបក្សប្រឆាំង និងអ្នកសង្កេតការណ៍បោះឆ្នោតតែងរអ៊ូរទាំពីភាពមិនប្រក្រតីនានាដែលបានកើតឡើងមុននិងក្នុងពេលបោះឆ្នោត។ ពួកគេចោទប្រកាន់ថា គ.ជ.ប មិនឯករាជ្យ ហើយតែងលំអៀងទៅរកបក្សកាន់អំណាច។ ប្រការនេះ វាផ្ទុយទៅនឹងបាវចនារបស់ គ.ជ.ប ដែលថា គ.ជ.ប ជាស្ថាប័នឯករាជ្យ អព្យាក្រឹត សច្ចៈ យុត្តិធម៌ និងតម្លាភាព៕
2 comments:
ពិតជាមួយដំប នឺង បួន អាពត ដូចជាអាពាង នៅតែអក្សរ " ព " ដដែល ។
If the NEC selected Khmer traitor Tep Netha as its general secretary, there must be something wrong in the NEC's process.
Khmer people must make a huge demonstration to stop the evil Yuon from going forward on its plan to swallow Cambodia - Vietnamization of Cambodia through its Khmer puppets.
The RIGHT TIME to make the demonstration is NOW to stop Tep Nitha from becoming the NEC's secretary.
Khmer people cannot wait until after the election to make the demonstration when the CPP again declares itself as the winner. At that time (after the election), Khmer people's demonstration will be useless and will empower Hun Sen to crush Khmer people at will, arguing that the demonstration was just a ploy to illegally topple him.
Therefore, the road to save Cambodia starts from here - keep this crook Tep Nitha away from the NEC. The CNRP must take necessary actions to stop this crook Tep Nitha. It is ridiculous when this so called new NEC brought back this Tep Nitha as the candidate for the new NEC's general secretary, and now selected him.
Bun Thoeun
Post a Comment