2015-09-05 rfa
 |
| អ្នកចូលរួមផ្ដល់ប្រាក់វិភាគទានសម្រាប់គម្រោងទូរទស្សន៍ព្រះអាទិត្យ ថតរូបអនុស្សាវរីយ៍ជាមួយប្រធាននិងអនុប្រធានគណបក្សសង្គ្រោះជាតិ នៅថ្ងៃទី២៧ មិថុនា ឆ្នាំ២០១៥។
RFA/Brach Chev
|
គណបក្សសង្គ្រោះជាតិ កំពុងរង់ចាំលទ្ធផលស្រាវជ្រាវរបស់អាជ្ញាធរខេត្តកណ្ដាល ករណីជនមិនស្គាល់មុខទាមទារប្រាក់មូលនិធិទ្រទ្រង់ទូរទស្សន៍ព្រះអាទិត្យរបស់គណបក្ស។ ការទន្ទឹងរង់ចាំលទ្ធផលនេះ នៅបន្ទាប់ពីគណបក្ស បានដាក់លិខិតស្នើឲ្យអធិការនៃអធិការដ្ឋាននគរបាលស្រុកកណ្ដាលស្ទឹង រកឈ្មោះ ស សុគុណ ដែលអះអាងថាជាតំណាងពលរដ្ឋចូលវិភាគទានដល់គណបក្សជាង ៥លាន ៣សែនរៀល។
អាជ្ញាធរប៉ូលិសស្រុកកណ្ដាលស្ទឹង ខេត្តកណ្ដាល បដិសេធថាគ្មានមនុស្សឈ្មោះ ស សុគុណ ដែលទាមទារប្រាក់មូលនិធិទ្រទ្រង់បង្កើតទូរទស្សន៍ព្រះអាទិត្យរបស់គណបក្សសង្គ្រោះជាតិ នៅមូលដ្ឋាននោះទេ។
អធិការនៃអធិការដ្ឋាននគរបាលស្រុកកណ្ដាលស្ទឹង លោក ម៉ែន ចាន់រិទ្ធ ថ្លែងនៅថ្ងៃទី៥ ខែកញ្ញា ថា បន្ទាប់ពីលោកបានស្រាវជ្រាវ អាជ្ញាធរហ៊ានអះអាងថា ពុំមានឈ្មោះ ស សុគុណ ដែលតាំងខ្លួនជាតំណាងពលរដ្ឋ ៣៥គ្រួសារនៅក្នុងស្រុកកណ្ដាលស្ទឹង នោះទេ។ លោកបញ្ជាក់ថា ពុំមានឈ្មោះនេះនៅក្នុងបញ្ជីក្រោមដែនគ្រប់គ្រងរបស់លោកឡើយ៖ «អត់មានអីសោះ។ ដល់តែមកថានៅស្រុកកណ្ដាលស្ទឹង មានឈ្មោះហ្នឹងចឹង វាអត់ដឹងខាងណាមកពីខាងណី? បើនិយាយឲ្យខ្លីថា អត់មាននៅក្នុងបញ្ជីគ្រប់គ្រងរបស់យើង»។
ការបដិសេធរបស់សមត្ថកិច្ចនេះ បន្ទាប់ពីគណបក្សសង្គ្រោះជាតិ បានដាក់លិខិតទៅអធិការដ្ឋាននគរបាលស្រុកកណ្ដាលស្ទឹង កាលពីថ្ងៃទី២ ខែកញ្ញា ឆ្នាំ២០១៥ ឲ្យជួយផ្ដល់ដំណឹងរកឈ្មោះ ស សុគុណ ដែលអះអាងថាជាតំណាងប្រជាពលរដ្ឋចំនួន ៣៥គ្រួសារ រស់នៅស្រុកកណ្ដាលស្ទឹង ឲ្យទៅទទួលយកប្រាក់ដែលបានចូលវិភាគទានទ្រទ្រង់បង្កើតទូរទស្សន៍ព្រះអាទិត្យចំនួនជាង ៥លាន ៣សែនរៀលនោះវិញ ដោយភ្ជាប់មកជាមួយនូវបង្កាន់ដៃទទួលវិភាគទានច្បាប់ដើម។
ទាក់ទងព័ត៌មាននេះ មន្ត្រីជាន់ខ្ពស់គណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថា គណបក្សរកមិនឃើញថាមានឈ្មោះ ស សុគុណ ជាតំណាងពលរដ្ឋ ៣៥គ្រួសារក្នុងបញ្ជីមូលនិធិនោះទេ។ លោកបន្តថា សម្រាប់ស្រុកកណ្ដាលស្ទឹង មានពលរដ្ឋប្រមាណជាង ១០០គ្រួសារ ដែលបានមកចូលរួមវិភាគទានទ្រទ្រង់ការបង្កើតទូរទស្សន៍ ដែលគណបក្សទទួលបានប្រាក់ជាង ១លានរៀល។ លោកបានចាត់ទុកថា នេះគឺជាការបង្កើតព័ត៌មាននាំឲ្យមហាជនមានការសង្ស័យដល់គណបក្ស៖ «យើងអត់ជឿអ្វីដែលគេបង្កើតហ្នឹងទេ ព្រោះការចូលវិភាគទាននេះ គឺជាការចូលដោយស្ម័គ្រចិត្ត ហើយពេលដែលស្ម័គ្រចិត្ត គឺអ្នកបក្សបានផ្ដល់បង្កាន់ដៃឲ្យទៅអ្នកចូលហ្នឹងវិញ។ ដូច្នេះហើយ យើងមិនជឿថាអ្នកចូលដោយស្ម័គ្រចិត្តនោះគាត់មកសុំដកវិញទេ»។
ទោះជាមានការបកស្រាយពីគណបក្សថាយ៉ាងណាក្ដី នៅក្នុងលិខិតតវ៉ាមួយដាក់ជូនទៅថ្នាក់ដឹកនាំគណបក្សសង្គ្រោះជាតិ មានចុះហត្ថលេខាឈ្មោះ ស សុគុណ បានបដិសេធចំពោះការឆ្លើយតបរបស់គណបក្ស ដែលថាជាការរៀបចំទុករបស់គូបដិបក្ខ។ ញត្តិតវ៉ានោះសរសេរថា នេះជាការប្រកែកដោយគ្មានមូលដ្ឋានពិតប្រាកដ ដើម្បីគេចវេសពីការបង្ហាញឯកសារចំណូលចំណាយ។
កាលពីពេលកន្លងទៅ ក៏មានការចុះផ្សាយព័ត៌មានអំពីពលរដ្ឋចំនួន ២៧គ្រួសារផ្សេងទៀត ដែលអះអាងថា ជាសមាជិកគណបក្សសង្គ្រោះជាតិ ប្រចាំខេត្តស្វាយរៀង បានទាមទារលុយពីមូលនិធិនោះមកវិញដែរ។ ខ្លឹមសារដែលមានបញ្ជាក់នៅក្នុងញត្តិតវ៉ាចុះថ្ងៃទី២៦ ខែសីហា បានសរសេរថា ពួកគេមិនបានឃើញអ្វីវិវឌ្ឍទៅមុខទាល់តែសោះរបស់ទូរទស្សន៍ ក្រៅពីការផ្សាយប្រមូលលុយឥតស្រាកស្រាន្ត ហើយថា ទូរទស្សន៍នេះមានតែឈ្មោះ ដែលបង្កើតឡើងជាលេសសម្រាប់ប្រមូលលុយពីប្រជាពលរដ្ឋ ព្រោះគ្មានគោលការណ៍ដឹកនាំច្បាស់លាស់។
ថ្វីត្បិតថាយ៉ាងនេះក៏ដោយចុះ មន្ត្រីគណបក្សសង្គ្រោះជាតិ អំពាវនាវឲ្យអ្នកដែលអះអាងថា បានចូល ប្រាក់មូលនិធិបង្កើតទូរទស្សន៍ព្រះអាទិត្យណា ដែលចង់ទាមទារប្រាក់វិញ អាចដកវិញបានដោយគ្រាន់តែភ្ជាប់មកជាមួយនូវបង្កាន់ដៃច្បាប់ដើម ប៉ុន្តែគេឃើញតែលិខិតតវ៉ា ពុំមាននរណាម្នាក់ចេញមុខផ្ទាល់នៅឡើយ។ រហូតមកដល់ពេលនេះ គណបក្សសង្គ្រោះជាតិ បានទទួលវិភាគទានទាំងក្នុងប្រទេស និងក្រៅប្រទេសសរុបប្រមាណ ៧០ម៉ឺនដុល្លារអាមេរិក៕
No comments:
Post a Comment