Sam Rainsy: The ruling CPP is behind the creation of new small parties ​លោក​សម រង្ស៊ី​៖ បក្ស​តូចៗ​បង្កើត​និង​ត្រៀម​បង្កើត​គឺ​បក្ស​កាន់​អំណាច​នៅ​ពីក្រោយ​​

ដោយ៖​ ពៅ មេត្តា​ | ថ្ងៃព្រហស្បតិ៍ ទី15 មករា 2015, 

លោក​ សម រង្ស៊ី ប្រធាន​គណបក្សសង្គ្រោះជាតិ នាពេលកន្លងមក​

ប្រធាន​គណបក្ស​សង្គ្រោះ​ជាតិ លោក សម រង្ស៊ី ហៅ​គណបក្ស​តូចៗ​ដែល​បង្កើតឡើង​ហើយ និង​ត្រៀម​បង្កើត​មួយចំនួនទៀត​នោះ គឺ​ធ្វើ​ឲ្យ​បែក​សំឡេង​គណបក្ស​គណបក្ស​ប្រឆាំង និង​ជួយ​ដល់​គណបក្ស​ប្រជាជន​កម្ពុជា ។​

ក្នុង​វេទិកា​ជួប​ជាមួយ​ប្រជាពលរដ្ឋ​នៅ​​ឃុំ​ពោធិ៍​អង្ក្រង ស្រុក​បសេដ្ឋ ខេត្ត​កំពង់ស្ពឺ កាលពី​ថ្ងៃ​ទី​១៤ ខែ​មករា​លោក សម រង្ស៊ី ថ្លែងថា​ដើម្បី​យកឈ្នះ​គណបក្ស​ប្រជាជន​បច្ចុប្បន្ន ​ត្រូវមាន​ការរួបរួម​គ្នា​ពី​អ្នកស្នេហាជាតិ ទាំងអស់​ចូលរួម​ជាមួយ​គណបក្ស​សង្គ្រោះ​ជាតិ ។ លោក សម រង្ស៊ី បន្តថា​ដោយសារ​ការបារម្ភ​ខ្លាច​មាន​ការរួបរួម​គ្នា​ពី​ក្រុម​ប្រឆាំង ទើប​បក្ស​កាន់​អំណាច​បង្កើត​បក្ស​តូចៗ​ឡើង ។ លោក​ថា «​គណបក្ស​តូចៗ​ហ្នឹង​អត់​មាន​ឈ្នះ​ខ្លួនឯង​ទេ ដែល​ធ្វើ​ហ្នឹង​គឺ​ធ្វើឲ្យ​គណបក្ស​ប្រជាជនឈុះ្ន បងប្អូន​យល់ បងប្អូន​មិន​ត្រូវ​លេងសើច​ជាមួយ​គណបក្ស​តូចៗ​ហ្នឹង​ទេ ។ ពួក​គណបក្ស​តូចៗ​ហ្នឹង​គឺ​បម្រើ​គណបក្ស​ប្រជាជន ខ្លួនឯង​(​គណបក្ស​តូចៗ​)​អត់​ឈ្នះ​ដឹង​ថា​អត់​ឈ្នះ ធ្វើ​នេះ​ដើម្បី​ជួយ​គណបក្ស​ប្រជាជន បំបែក​សំឡេង​បន្តិច គឺ​អាច​ជួយ​គណបក្ស​ប្រជាជន​បាន ។ អ៊ីចឹង​ហើយ​គណបក្ស​ប្រជាជន​ក៏​ចេះ​គិត​ដែរ គឺ​ជួយ​គណបក្ស​តូចៗ​» ។​

​លោក សម រង្ស៊ី មិន​បាន​ថ្លែង​ឲ្យចំ​ថា បក្ស​តូចៗ​ណា​ខ្លះ​នោះ​ទេ តែ​បក្ស​តូចៗ​ដែល​មន្ត្រី​គណបក្ស​សង្គ្រោះ​ជាតិ​ធ្លាប់​រិះគន់​នោះ គឺ​ក្រុម​អ្នកវិភាគ និង​មន្ត្រី​អង្គការ​សង្គម​ស៊ីវិល​មួយក្រុម​បង្កើត​ជា​បណ្តាញ​សង្គម​ខ្មែរ​ដើម្បី​ខ្មែរ ហើយ​ចាប់ផ្តើម​បង្កើត​គណបក្ស​មូលដ្ឋាន ។ 

លោក កែម ឡី ស្ថាបនិក​បណ្តាញ​ខ្មែរ​ដើម្បី​ខ្មែរ​ធ្លាប់​លើក​ឡើង​ថា ការបង្កើត​គណបក្ស​មូលដ្ឋាន បង្កើតឡើង​ដើម្បីឲ្យ​ប្រជាពលរដ្ឋ​ស្គាល់​សិទ្ធិ និង​ចេះ​ប្រើ​អំណាច​របស់​ខ្លួន​ក្នុង​កិច្ចការ​នយោបាយ ។ លោក​បញ្ជាក់ថា​ការបង្កើត​បណ្តាញ ឬ​បក្ស​មូលដ្ឋាន​ឡើង​ដោយសារ​គណបក្ស​នយោបាយ​បច្ចុប្បន្ន រួម​ទាំង​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​ផង មិន​មាន​គោលនយោបាយ​ប្រជាធិបតេយ្យ​ផ្ទៃក្នុង​របស់​បក្ស ។​

ស្ថាបនិកបណ្តាញខ្មែរដើម្បីខ្មែរមួយរូបទៀតលោក យ៉េង វីរៈ ថ្លែងថា​សំដី​របស់លោក សម រង្ស៊ី គឺសំដៅលើអ្នកនយោបាយមិនមែនសំដៅលើក្រុមលោកទេ ។ លោកបន្តថា ក្រុមលោក​អប់រំឲ្យពលរដ្ឋចេះប្រើសិទ្ធិ និង​ចេះធ្វើនយោបាយ​ ហើយបើលោក សម រង្ស៊ី ចង់ឲ្យពលរដ្ឋ​ចូលរួមជាមួយបក្សខ្លួន ត្រូវធ្វើយ៉ាងឲ្យពលរដ្ឋ​ជឿជាក់ ។ លោក​ថា «ត្រូវ​តែ​បញ្ចុះបញ្ចូល​គេ ហើយ​ម៉េ​ចមិន​ចូល​[គណបក្ស​]គាត់តែ​ម្តង​ទៅ ពាក្យ​នេះ​វា​អាស្រ័យ​នឹង​គាត់​ត្រូវ​ការធ្វើ​ឲ្យ​គេ​ជឿ ​បញ្ចុះ​បញ្ចូលធ្វើ​ឲ្យ​​គេចូល​ជា​មួយ​បាន​​​» ។

លោក យ៉េង វីរៈ​ ក៏បានសម្តែងការសោកស្តាយផងដែរថា អ្នកនយោបាយខ្មែរនៅតែប្រើវប្បធម៌លាបពណ៌ឲ្យគ្នាទៅ​វិញ​ទៅ​មក​ ។​

នាយក​ប្រតិបត្តិ​គណៈកម្មាធិការ​អព្យាក្រឹត្យ​និង​យុត្តិធម៌​ដើម្បី​ការបោះឆ្នោត​ដោយ​សេរី និង​ត្រឹមត្រូវ​នៅ​កម្ពុជា  លោក ហង្ស ពុទ្ធា មានប្រសាសន៍ថា ការបង្កើត​គណបក្ស​គឺ​ជា​សិទ្ធិ​របស់​ប្រជា​ពលរដ្ឋ​គ្រប់រូប​មានចែង​ក្នុង​រដ្ឋធម្មនុញ ។​

​កាលពី​ចុងឆ្នាំ​២០១៤ បណ្តាញ​ខ្មែរ​ដើម្បី​ខ្មែរ​បាន​ប្រកាស​ជា​ផ្លូវការ​ឡើង ហើយ​បណ្តាញ​នេះ ក៏​បាន​ប្រកាស​ពី​ការបង្កើត​គណបក្ស​តូចៗ​តាម​មូលដ្ឋាន ដែល​ក្នុង​១​បក្ស​មាន​គ្នា​៨០​នាក់ ។ របាយការណ៍​ដែល​បង្ហាញ​នៅក្នុង​ថ្ងៃ​ប្រកាស​បណ្តាញ​នោះ គឺ​មាន​គណបក្ស​មូលដ្ឋាន​៤០ ដែល​បាន​ចុះឈ្មោះ ហើយ​តាម​គម្រោង​គណបក្ស​មូលដ្ឋាន​ទាំងនេះ​នឹង​បង្កើតឡើង​នៅ​ទូទាំង​ប្រទេស ៕

សូម​សរសេរ​មក​លោក ពៅ មេត្តា តាមរយៈ minpov@vodhotnews.com