A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Tuesday 20 January 2015

Prince Ranariddh mocked the CNRP សម្ដេច​ក្រុមព្រះ នរោត្ដម រណឫទ្ធិ ចំអក​ឲ្យ​គណបក្ស​សង្គ្រោះ​ជាតិ

រណឫទ្ធិ ៦២០
សម្ដេច​ក្រុមព្រះ នរោត្ដម រណឫទ្ធិ ថ្លែង​ក្នុង​ពិធី​សមាជ​វិសាមញ្ញ ប្រកាស​តួនាទី​ប្រធាន​គណបក្ស​ហ៊្វុនស៊ិនប៉ិច នា​មជ្ឈមណ្ឌល​សន្និបាត និង​ពិព័រណ៍​កោះពេជ្រ នៅ​ថ្ងៃ​ទី ១៩ មករា ២០១៥។
 RFA/Sek Bandith
សម្ដេច​ក្រុម​ព្រះ នរោត្តម រណឫទ្ធិ ដែល​ទើប​ទទួល​បាន​ដំណែង​ជា​ប្រធាន​បក្ស​ហ្វ៊ុនស៊ិនប៉ិច ​មក​វិញ ​បាន​ចំអក​ឲ្យ​មេដឹកនាំ​គណបក្ស​សង្គ្រោះ​ជាតិ​ថា មិន​ចាំ​បាច់​វាយ​ប្រហារ​ដោយ​សម្ដី​ប្រឆាំង​គណបក្ស​រាជានិយម​មួយ​នេះ​ទេ។ ព្រះអង្គ​មាន​បន្ទូល​ថា ថ្នាក់​ដឹកនាំ​គណបក្ស​ប្រឆាំង គួរ​រង់ចាំ​ការ​កាត់​សេចក្ដី​ក្នុង​ពេល​លទ្ធផល​បោះឆ្នោត​ឃុំ សង្កាត់ និង​បោះ​ឆ្នោត​សកល​ខាង​មុខ​នេះ​វិញ​ល្អ​ជាង។
ពិធី​សមាជ​ជា​លើក​ដំបូង​ក្រោយ​ពី​សម្ដេច​ក្រុមព្រះ​យាង​មក​គ្រង​តំណែង​នេះ​ឡើង​វិញ នៅ​ក្នុង​គណបក្ស​ហ្វ៊ុនស៊ិនប៉ិច នោះ​គឺ​ជា​ការ​រៀបចំ​យ៉ាង​ប្រណិត​ដែល​ខុស​ពី​គណបក្ស​នយោបាយ​ដទៃ​ទៀត។ សមាជ​ដែល​រៀបចំ​ក្រោម​ការ​ចូលរួម​ពី​អ្នក​គាំទ្រ​ប្រមាណ ២​ពាន់​នាក់​នា​មជ្ឈមណ្ឌល​កោះពេជ្រ គឺ​ទំនង​ជា​ការ​មាន​ការ​អនុញ្ញាត ឬ​បើក​ភ្លើង​ខៀវ​ពី​រដ្ឋាភិបាល ដើម្បី​រៀបចំ​ពិធី​សមាជ​នៅ​ទី​នោះ។
ប្រព័ន្ធ​នៃ​ការ​រៀបចំ​កាល​ពី​ព្រឹក​ថ្ងៃ​​ទី​១៩ មករា គឺ​មិន​ខុស​ពី​ប្រព័ន្ធ​នៃ​ការ​រៀបចំ​របស់​​រដ្ឋាភិបាល​ធ្លាប់​ធ្វើ​នោះ​ទេ។ មាន​ការ​យាមកាម​យ៉ាង​ត្រឹមត្រូវ កង​អង្គរក្ស​ត្រួត​ពិនិត្យ​ដោយ​ប្រុងប្រយ័ត្ន។ ថ្វី​បើ​គណបក្ស​ហ្វ៊ុនស៊ិនប៉ិច នៅ​ពេល​នេះ សម្ដេច​ក្រុម​​ព្រះ នរោត្តម រណឫទ្ធិ មាន​បន្ទូល​ថា កសាង​ឡើង​ពី​​បាត​​ដៃ​ទទេ សូម្បី​ទីស្នាក់ការ​គណបក្ស​ពិត​ប្រាកដ​ក៏​ពុំ​ទាន់​មាន​ដែរ​នោះ ក៏​ពិធី​ដែល​រៀបចំ​កាល​ពី​ព្រឹក​ថ្ងៃ​ទី​១៩ មករា គឺ​មិន​ដូច​គណបក្ស​ដែល​ខ្សត់ខ្សោយ ឬ​កកើត​ដោយ​ពុំ​មាន​ធនធាន​នោះ​ឡើយ។កោះពេជ្រ ក៏​ពុំ​មែន​​ចេះ​តែ​អ្នក​ណាៗ អាច​ធ្វើ​ពិធី​បាន​ដោយ​ងាយ​ឡើយ ប្រ​សិន​បើ​រក​ឃើញ​ថា ការ​រៀបចំ​ពិធី​ដែល​មក​ពី​គណបក្ស​មាន​និន្នាការ​ប្រឆាំង​រដ្ឋាភិបាល ជាពិសេស​មិទ្ទិញ​តាម​បែប​គណបក្ស​ ដែល​មាន​អ្នក​ចូល​រួម​រាប់​ពាន់នាក់​យ៉ាង​ដូច្នេះ​ទៀត​ផង។

នៅ​មុខ​ច្រក​ចេញ​ចូល​នៅ​ក្នុង​ពិធី​បំពាក់​ដោយ​ឧបករណ៍​ត្រួត​ពិនិត្យ​យ៉ាង​តឹងរ៉ឹង និង​ប្រុង​ប្រយ័ត្ន​ខ្ពស់។ ចំពោះ​សម្ភារៈ​សម្រាប់​ដាក់​ឲ្យ​ត្រួតពិនិត្យ​នេះ​ទៀត​សោត គឺ​ជា​របស់​បញ្ជា​ការដ្ឋាន​កង​អង្គរក្ស​នៃ​ក្រសួង​មហាផ្ទៃ ថែម​ទៀត​ផង។
នៅ​ក្នុង​សាល​ដ៏​ធំ​ឯ​ណោះ​វិញ តន្ត្រី​ចម្រុះ ទាំង​បុរាណ និង​សម័យ បាន​ប្រគំ​ចូល​គ្នា​យ៉ាង​រងុំ អម​ដោយ​​ការ​បញ្ចាំង​រូបភាព ដើម្បី​បញ្ជូន​រូបភាព​ឲ្យ​អ្នក​គាំទ្រ​ដែល​នៅ​ជ្រុង​ទាំង​សង្ខាង​នៅ​ក្នុង​សាល​បាន​ទស្សនា​ដោយ​ផ្ទាល់។
រៀបចំ​កាយ​វិការ​ហាក់​ដូច​ជា​សាស្ត្រាចារ្យ​​នៅ​លើ​វេទិកា និង​ពេល​ខ្លះ​ព្រះអង្គ​ហាក់​ដើរ​តួ​ជា​អ្នក​កំប្លែង​ផង សម្ដេច​ក្រុមព្រះ នរោត្តម រណឫទ្ធិ ព្រះអង្គ​មាន​បន្ទូល​ថា លោក កឹម សុខា គួរ​បញ្ឈប់​វប្បធម៌ រិះគន់​គណបក្ស​ហ្វ៊ុនស៊ិនប៉ិច នៅ​ទី​សាធារណៈ។ ជា​អ្នក​នយោបាយ​ដែល​ធ្លាប់​ត្រូវ​បាន​គណបក្ស​ប្រជាជន​កម្ពុជា ធ្វើ​រដ្ឋ​ប្រហារ​ពី​ទម្លាក់​ពី​នាយករដ្ឋមន្ត្រី​ទី​មួយ កាល​ពី​ឆ្នាំ​១៩៩៧ និង​ជា​អ្នក​នយោបាយ​ដែល​ធ្លាប់​ត្រូវ​បាន​គេ​ធ្វើ​បក្ស​ប្រហារ​កាល​ពី​ឆ្នាំ​២០០៦ ព្រះអង្គ​បន្ត​ថា តាម​​ពិត​ទៅ​មេដឹកនាំ​គណបក្ស​សង្គ្រោះ​ជាតិ គឺ​សុទ្ធ​តែ​ព្រះអង្គ​ធ្លាប់​ធ្វើ​គុណ​ក្នុង​ជីវិត​នយោបាយ​របស់​ពួកគេ​ទាំង​លោក កឹម សុខា និង​លោក សម រង្ស៊ី ជាពិសេស លោក កឹម សុខា ដែល​សម្ដេច​ក្រុមព្រះ ប្រៀប​ប្រដូច​ថា គឺ​ជា​អ្នក​នយោបាយ​ដែល​ភ្លេច​គុណ ក្នុង​គ្រា​ជួប​ជួប​បញ្ហា​កាល​ពី​អតីតកាល៖ «ឲ្យ​គេហទំព័រ​ដើម​អំពិល​សរសេរ​ចុះ។ មនុស្ស កឹម សុខា នេះ​ជា​មនុស្ស​ដល់​ត្រើយ​សើយ​គូថ។ ដល់​ត្រើយ​ហើយ​ភ្លេច។ ខ្ញុំ​អត់​ចង់​បាន​ការ​សង​គុណ​​ពី​គាត់​ទេ»
បើ​ទោះ​ជា​សមាជ​គណបក្ស​ដែល​រៀបចំ​ឡើង​ដោយ​បន្ថែម​តួនាទី​អនុ​ប្រធាន​ទី​មួយ និង​អនុ​ប្រធាន​ទី​ពីរ ដែល​គណបក្ស​រាជា​និយម​មួយ​នេះ ​ពុំ​ធ្លាប់​មាន​នោះ ក៏​ការ​អនុម័ត​កាល​ពី​ព្រឹក​ថ្ងៃ​ទី​១៩ មករា ពុំ​បាន​ឆ្លងកាត់​​ការ​សម្រេច​ពី​អង្គ​សមាជ​នោះ​ដែរ។ សម្តេច​ក្រុមព្រះ​ដែល​ត្រូវ​បាន​អង្គ​សមាជ​ផ្តល់​សេចក្តី​ទុកចិត្ត​ធ្វើ​ជា​ប្រធាន​ឡើង​វិញ​នេះ គ្រាន់​តែ​ប្រកាស​ឲ្យ​អ្នក​គាំទ្រ​លើក​ដៃ បន្ទាប់​ពី​សម្តេច អរុណ រស្មី ប្រគល់​ត្រា និង​លោក កែវ ពុទ្ធរស្មី ប្រគល់​ទង់​របស់​បក្ស​តែ​ប៉ុណ្ណោះ។ មើល​​ទៅ​ពិធី​សមាជ​ដែល​រៀបចំ​ឡើង​នៅ​កោះពេជ្រ​នោះ ទំនង​ជា​ពិធី​គម្រប់​កិច្ច​ដែល​មិន​ចាំបាច់​ឆ្លង​កាត់​ការ​បោះ​ឆ្នោត ដូច​អ្វី​ដែល​គណបក្ស​រាជា​និយម​មួយ​នេះ ធ្លាប់​បាន​អះអាង​ថា សមាជ​វិសាមញ្ញ​ដែល​ធ្វើ​ដូច​ការ​គ្រោង​ទុក​នេះ ត្រូវ​អនុវត្ត​ដោយ​ម៉ត់ចត់ ប្រជាធិបតេយ្យ និង​តម្លាភាព។
វិទ្យុ​អាស៊ីសេរី ពុំ​អាច​ទាក់ទង​លោក កឹម សុខា អនុ​ប្រធាន​គណបក្ស​សង្រ្គោះ​ជាតិ ដើម្បី​បំភ្លឺ​បាន​ទេ នៅ​ថ្ងៃ​ទី​១៩ មករា។
បើ​ទោះ​ជា​បែប​ណា លោក គង់ គាំ ប្រធាន​គណបក្ស សម រង្ស៊ី អះអាង​កាល​ពី​ថ្ងៃ​ទី​១៨ មករា ថា គណបក្ស​នយោបាយ​ធំៗ​នៅ​កម្ពុជា ទាំង​អស់ មិន​ថា​គណបក្ស​ហ៊្វុនស៊ិនប៉ិច គណបក្ស​សង្រ្គោះជាតិ ឬ​គណបក្ស​ប្រជាជនកម្ពុជា​ឡើយ គឺ​សុទ្ធ​សឹង​តែ​ជា​គណបក្ស​រាជា​និយម​ទាំង​អស់។ ប៉ុន្តែ​ដោយ​ឡែក​សម្រាប់​គណបក្ស​ហ៊្វុនស៊ិនប៉ិច វិញ គឺ​ជា​គណបក្ស​រាជា​និយម​ដែល​អន់ និង​ល្ងង់​ជាង​គេ​បំផុត៖ «បោះ​ឆ្នោត ២០១៣ មាន ហ្វ៊ុនស៊ិនប៉ិច​ទេ? មាន ញឹក ប៊ុនឆៃ បោះ​ឆ្នោត​ឆ្នាំ​២០១៣។ ហ្វ៊ុនស៊ិនប៉ិច បោះឆ្នោត​តែ​​ជាមួយ​សង្គ្រោះ​ជាតិ​ដែរ​ហ្នឹង។ លទ្ធផល​សូន្យ។ ឥឡូវ​នេះ រណឫទ្ធិ និង ញឹក ប៊ុនឆៃ ទៅ​ហ្វ៊ុនស៊ិនប៉ិច​ហើយ​មែន​ទេ។ មិនមែន​​ត្រឹម​តែ​សូន្យ​ទេ សូន្យ វ៉ែនតា (០០)»
គណបក្ស​ហ្វ៊ុនស៊ិនប៉ិច ធ្លាប់​ជា​គណបក្ស​ដែល​មាន​ប្រជាប្រិយភាព​ និង​ទទួល​បាន​ការ​គាំទ្រ​​ខ្លាំង​ក្នុង​ការ​បោះឆ្នោត​អាណត្តិ​ទី​មួយ កាល​ពី​២២ ឆ្នាំ​មុន។ កាល​ណោះ គឺ​ឆ្នាំ​១៩៩៣ គណបក្ស​រាជា​និយម​មួយ​នេះ បាន​ទទួល​សំឡេង​ឆ្នោត​រហូត​ដល់ ៥៨​អាសនៈ ក្នុង​ចំណោម ១២០​អាសនៈ នៅ​ក្នុង​​រដ្ឋ​សភា។ ក៏ប៉ុន្តែ​សំឡេង​នៃ​ការ​គាំទ្រ​នេះ បាន​ថយ​ចុះ​ជា​បន្តបន្ទាប់ រហូត​ដល់​សូន្យ​កៅអី ក្នុង​អាណត្តិ​ទី​ប្រាំ​នេះ។
សម្ដេច​ក្រុម​ព្រះ នរោត្តម រណឫទ្ធិ ព្រះអង្គ​ធ្លាប់​បរាជ័យ​ក្នុង​ជីវិត​នយោបាយ​របស់​ព្រះអង្គ​ម្ដង​ហើយ​ម្ដង​ទៀត ចាប់​តាំង​ពី​ក្រោយ​ឆ្នាំ១៩៩៣ មក។ គេ​នៅ​រង់​ចាំ​មើល​ថា ​ការ​ហក់​ចូល​ឆាក​នយោបាយ​ឡើង​វិញ​ជា​ថ្មី​ទៀត​របស់​ព្រះអង្គ​លើក​នេះ  អាច​មាន​ការ​រីក​ចម្រើន​ជាង​មុន ឬ​ក៏​ដូច​មុន?

No comments: