ស្ដាប់ ឬ ទាញយកសំឡេង
លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានរដ្ឋសភា ថ្លែងក្នុងពិធីសម្ពោធទីស្នាក់ការគណបក្សសង្គ្រោះជាតិ នាខេត្តព្រះសីហនុ នៅថ្ងៃទី២៩ ខែវិច្ឆិកា ឆ្នាំ២០១៤។
RFA/Den Ayuthyea
មេដឹកនាំគណបក្សសង្គ្រោះជាតិ និងជាអនុប្រធានរដ្ឋសភា បានអះអាងពីភាពជោគជ័យនៃជំនួបពិភាក្សារវាងមេដឹកនាំគណបក្សជាប់ឆ្នោតទាំងពីរ ក្នុងការបង្កើតគណៈកម្មាធិការជាតិរៀបចំការបោះឆ្នោត (គ.ជ.ប) ថ្មី និងគណបក្សប្រឆាំងមានសិទ្ធិបង្កើតស្ថានីយទូរទស្សន៍ និងវិទ្យុ ជាដើម។
ប៉ុន្តែ ទន្ទឹមគ្នានេះក៏នៅមានចំណុចអវិជ្ជមានមួយចំនួនទៀត ដែលគណបក្សទាំងពីរត្រូវបន្តជួបពិភាក្សាគ្នារកដំណោះស្រាយ។
ថ្លែងនៅចំពោះមុខប្រជាពលរដ្ឋជាង ៥០០នាក់ ក្នុងពិធីសម្ពោធទីស្នាក់ការថ្មីនាខេត្តព្រះសីហនុ កាលពីព្រឹកថ្ងៃសៅរ៍ ទី២៩ ខែវិច្ឆិកា លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍ថា ជំនួបចរចាស្ងាត់ៗរវាង លោក សម រង្ស៊ី និងលោកនាយករដ្ឋមន្ត្រី ហ៊ុន សែន កាលពីថ្ងៃសុក្រ នាមន្ទីររដ្ឋសភា បានទទួលជោគជ័យទៅលើការបង្កើតក្បាលម៉ាស៊ីនដឹកនាំ គ.ជ.ប ថ្មី និងបក្សប្រឆាំងទទួលបានសិទ្ធិបង្កើតស្ថានីយទូរទស្សន៍ និងវិទ្យុ ស្របតាមកិច្ចព្រមព្រៀងនយោបាយ កាលពីថ្ងៃទី២២ ខែកក្កដា។
ប៉ុន្តែទន្ទឹមគ្នានេះ លោកថាក៏នៅមានចំណុចមិនច្បាស់លាស់ នៃការកំណត់សញ្ជាតិទៅលើសមាជិកក្បាលម៉ាស៊ីន គ.ជ.ប ថ្មី ត្រូវមានសញ្ជាតិខ្មែរតែមួយ និងមិនទាន់ច្បាស់អំពីសំណើសុំដោះលែងមន្ត្រីគណបក្សសង្គ្រោះជាតិ និងពលរដ្ឋសហគមន៍ដីធ្លីចេញពីពន្ធនាគារនៅឡើយទេ៖ «ចំណុចដែលខ្ញុំកត់សម្គាល់ថាល្អនោះ គឺបញ្ជាក់គ្នាច្បាស់ថា គ.ជ.ប ចាស់ ដែលនៅសព្វថ្ងៃនេះ ត្រូវតែបញ្ចប់មុនដាច់ខែកុម្ភៈ ឆ្នាំ២០១៥។ ហើយ គ.ជ.ប ថ្មី ត្រូវតែធ្វើកិច្ចការថ្មី និងអនុវត្តច្បាប់ថ្មី។ នេះជាចំណុចសំខាន់ដែលខ្ញុំ កឹម សុខា ពេញចិត្តជាងគេ។ ហើយចំណុចមួយទៀត គឺចំណុចដែលគណបក្សសង្គ្រោះជាតិ ទទួលបានសិទ្ធិបង្កើតស្ថានីយវិទ្យុផ្សាយបន្តផ្ទាល់តាមខេត្តនានា និងបង្កើតស្ថានីយទូរទស្សន៍សម្រាប់ក្រុមហ៊ុន ដែលជាម្ចាស់របស់គណបក្សសង្គ្រោះជាតិ»។
លោក កឹម សុខា ដែលជាអនុប្រធានរដ្ឋសភាផងនោះ បានចាត់ទុកភាពមិនច្បាស់លាស់នៃការដោះលែងសកម្មជនប្រឆាំង ឬពលរដ្ឋមានទំនាស់ដីធ្លីជាដើម ថាជាយុទ្ធសាស្ត្រចរចាដែលលោកនាយករដ្ឋមន្ត្រី ហ៊ុន សែន ធ្លាប់បានអនុវត្ត និងជាល្បិចកលនយោបាយរបស់មេដឹកនាំគណបក្សប្រជាជនកម្ពុជា ក្នុងការចរចានយោបាយជាមួយគណបក្សសង្គ្រោះជាតិ កន្លងមក។
យ៉ាងនេះក្តី មេដឹកនាំគណបក្សប្រឆាំងរូបនេះ ថ្លែងថា តាមរយៈជំនួបរវាង លោក សម រង្ស៊ី និងលោក ហ៊ុន សែន ជាសម្ងាត់កាលពីថ្ងៃសុក្រ ទី២៨ ខែវិច្ឆិកា នៅមន្ទីររដ្ឋសភា ឈានដល់បន្ធូរបន្ថយភាពតានតឹង និងចំណុចវិជ្ជមានគួរឲ្យកត់សម្គាល់។ ប៉ុន្តែលោកថា ចំណុចវិជ្ជមានទាំងនេះ គណបក្សសង្គ្រោះជាតិ នៅមិនទាន់អាចទទួលយកបាន ១០០ភាគរយទេ។
ងាកមកប្រជាពលរដ្ឋមានទំនាស់ដីធ្លីរ៉ាំរ៉ៃជាង ១០សហគមន៍ នាខេត្តព្រះសីហនុ ដែលបានចូលរួមក្នុងពិធីសម្ពោធទីស្នាក់ការថ្មីរបស់គណបក្សសង្គ្រោះជាតិ ក៏បានលើកពីបញ្ហារំលោភដីធ្លីពីសំណាក់ក្រុមហ៊ុន និងមន្ត្រីមានអំណាច ជូនមេដឹកនាំបក្សប្រឆាំងជួយអន្តរាគមន៍។
ត្រង់ចំណុចនេះ លោក កឹម សុខា បានសន្យាជាមួយប្រជាពលរដ្ឋថា នឹងយកញត្តិរបស់ប្រជាពលរដ្ឋមានទំនាស់ដីធ្លីនាខេត្តព្រះសីហនុ ដាក់ជូនគណៈកម្មការជំនាញរដ្ឋសភាពិនិត្យ និងជួយជំរុញទៅរដ្ឋាភិបាល ឲ្យពន្លឿនដោះស្រាយវិវាទនេះ៖ «ការដោះស្រាយទំនាស់ដីធ្លីនេះ ដោយសារតែបក្សសង្គ្រោះជាតិ មានតែតួនាទីក្នុងរដ្ឋសភា មិនដឹកនាំរដ្ឋាភិបាល។ លោកនឹងជំរុញឲ្យគណៈកម្មការទី១នៃរដ្ឋសភា ឲ្យចុះស្រាវជ្រាវករណីដីធ្លីនៅខេត្តព្រះសីហនុ ក្នុងមួយករណីៗឲ្យបានច្បាស់លាស់ ហើយតំណាងរាស្ត្ររបស់គណបក្សសង្គ្រោះជាតិ និងសមាជិកក្រុមប្រឹក្សាខេត្តព្រះសីហនុ ក៏នឹងតាមដានករណីដីធ្លីនេះជាបន្តទៀត។ ជាងនេះ ក៏នឹងអន្តរាគមន៍តាមរយៈប្រធានរដ្ឋសភាទៅរដ្ឋាភិបាល ឲ្យជួយដោះស្រាយទំនាស់ដីធ្លីនេះបន្តទៀត។ ជាងនេះ បក្សសង្គ្រោះជាតិ ក៏មិននៅស្ងៀមដែរ បើសិនជាមិនមានចម្លើយឆ្លើយតបពីរដ្ឋាភិបាល យើងនឹងឲ្យសមាជិកក្រុមប្រឹក្សាខេត្ត និងអ្នកតំណាងរាស្ត្រជាដើម ចុះទៅជួបលោកអភិបាលខេត្តព្រះសីហនុ ដោយផ្ទាល់ទៀត»។
យ៉ាងណាក៏ដោយ នៅក្នុងជំនួបសម្ងាត់រវាង លោក សម រង្ស៊ី ប្រធានគណបក្សសង្គ្រោះជាតិ និងលោកនាយករដ្ឋមន្ត្រី ហ៊ុន សែន អនុប្រធានគណបក្សប្រជាជនកម្ពុជា កាលពីថ្ងៃទី២៨ ខែវិច្ឆិកា នាមន្ទីររដ្ឋសភា បានព្រមព្រៀង ឬឯកភាពគ្នាចំនួន ៣ចំណុចសំខាន់ៗដូចជា ទី១ បានឯកភាពគ្នាកែសម្រួលបទបញ្ជាផ្ទៃក្នុងរដ្ឋសភា ដោយធ្វើវិសោធនកម្មប្រការ ៤៨ថ្មី នៃបទបញ្ជាផ្ទៃក្នុងរដ្ឋសភា ដើម្បីរៀបចំឲ្យមានថ្នាក់ដឹកនាំតំណាងរាស្ត្រនៃគណបក្សដែលមានអាសនៈនៅក្នុងរដ្ឋសភា និងរៀបចំឲ្យមានប្រធានក្រុមភាគតិចនៅរដ្ឋសភា ដែលមានឋានៈស្មើនាយករដ្ឋមន្ត្រី ដើម្បីជាគូសន្ទនាជាមួយនឹងប្រមុខរដ្ឋាភិបាល ទាក់ទងបញ្ហាប្រទេសជាតិ។
ទី២ លោកនាយករដ្ឋមន្ត្រី ហ៊ុន សែន បានយល់ព្រមតាមសំណើរបស់គណបក្សប្រឆាំង ក្នុងការបង្កើតស្ថានីយទូរទស្សន៍ និងស្ថានីយវិទ្យុផ្សាយបន្តទៅតាមបណ្ដាខេត្តនានា និងទី៣ សេចក្ដីស្នើសេចក្ដីព្រាងច្បាប់ស្ដីពីការរៀបចំ និងការប្រព្រឹត្តទៅនៃ គ.ជ.ប ថ្មី ដែលតំណាងគណបក្សទាំងពីរមិនទាន់ឯកភាពគ្នាទាំងស្រុងនោះ លោក ហ៊ុន សែន និងលោក សម រង្ស៊ី ឯកភាពគ្នាបន្តពិភាក្សាគ្នាទៀតនាសប្ដាហ៍ខាងមុខ។
លទ្ធផលនៃជំនួបចរចារវាងមេដឹកនាំគណបក្សទាំងពីរ ទទួលបានការសាទរពីប្រជាពលរដ្ឋមួយចំនួននាខេត្តព្រះសីហនុ។ ចំណែកអ្នកវិភាគស្ថានការណ៍នយោបាយ និងវិភាគសង្គម បញ្ចេញទស្សនៈថា លទ្ធផលនេះកើតឡើងដោយសារតែមេដឹកនាំគណបក្សសង្គ្រោះជាតិ និងគណបក្សប្រជាជនកម្ពុជា មានឆន្ទៈ និងសម្បទានឲ្យគ្មានទៅវិញទៅមក៕
No comments:
Post a Comment