ដោយ៖ ឡាយ សាមាន | ថ្ងៃពុធ ទី22 តុលា 2014 |
អនុប្រធានគណៈកម្មការទី២នៃរដ្ឋសភា មកពីគណបក្សសង្គ្រោះជាតិ ស្នើអគ្គលេខាធិការរដ្ឋសភា បង្ហាញបញ្ជីបុគ្គលិកនៃអង្គភាពនិងពន្យល់ពីរបៀបគ្រប់គ្រង និងការចំណាយថវិកា បន្ទាប់ពីលោកទទួលដំណឹងថា មានការប្រព្រឹត្តអំពើពុករលួយ។
លិខិតចុះហត្ថលេខាដោយលោក សុន ឆ័យ ផ្ញើជូនអគ្គលេខាធិការរដ្ឋសភា លោក ឡេង ប៉េងឡុង នៅថ្ងៃទី ២១ ខែ តុលានេះ បានលើកឡើងថា លោកបានទទួលព័ត៌មានពីការចំណាយមិនត្រឹមត្រូវរបស់រដ្ឋសភាលើបុគ្គលិក និងការតែងតាំងក្រុមគ្រួសារមន្ត្រីម្នាក់ឲ្យក្តោបក្តាប់ការគ្រប់គ្រង និងលួចបំបាត់ថវិការដ្ឋសភា ដែលបណ្តាលឲ្យខូចឈ្មោះដល់ស្ថាប័ននីតិបញ្ញត្តិ។
លិខិតបន្តថា លោក មិត្ត ការ៉េន ដែលសព្វថ្ងៃជាអគ្គលេខាធិការរងនៃរដ្ឋសភា ដែលធ្លាប់មានតួនាទីជាអគ្គនាយករដ្ឋបាល និងហិរញ្ញវត្ថុ បានយកឥទ្ធិពលខ្លួនតែងតាំងក្រុមគ្រួសារខ្លួនជាច្រើននាក់ឲ្យបម្រើ ការងារក្នុងសភា។ មន្ត្រីដែលមានតួនាទីសំខាន់ៗទាំងនោះរួមមាន លោក ហង្ស វិចិត្រ អគ្គនាយកដ្ឋានហិរញ្ញវត្ថុ អតីតប្រធាននាយកដ្ឋាន ហិរញ្ញវត្ថុ ជាកូនប្រសារលោក មិត្ត ការ៉េន។ លោកស្រី រ៉េន សុវឌ្ឍានា អនុប្រធាននាយកដ្ឋានហិរញ្ញវត្ថុ ជាកូនបង្កើតលោក មិត្ត ការ៉េន និងលោក មិត្ត ទីមាន ប្រធាននាយកដ្ឋានសវនកម្មផ្ទៃក្នុង ជាប្អូនប្រុសបង្កើតលោក មិត្ត ការ៉េន។ ចំណែក កញ្ញា មិត្ត ច័ន្ទលីនដា ប្រធានការិយាល័យសវនកម្មទី២ ជាក្មួយលោក មិត្ត ការ៉េន និងលោក ហាយ សឺមី អនុប្រធាននាយកដ្ឋានគ្រប់គ្រងសារពើភ័ណ្ឌ ជាប្អូនថ្លៃលោក មិត្ត ការ៉េន ផងដែរ។ លិខិតដដែលឲ្យដឹងបន្តថា លោក អៀ ថារ៉ាឌី ប្រធាននាកដ្ឋានបុគ្គលិក អតីតប្អូនថ្លៃ និងលោកស្រី ថា លីមី អនុប្រធានការិយាល័យ កាន់ប្រាក់បៀវត្សតំណាងរាស្ត្រ ជាកូនប្រសារលោក មិត្ត ការ៉េន។
VOD មិនអាចសុំការឆ្លើយតបពីអគ្គលេខាធិការរដ្ឋសភា លោក ឡេង ប៉េងឡុង បាននៅឡើយទេនៅរសៀលថ្ងៃពុធនេះ។
តែលោក បានប្រាប់អ្នកកាសែតក្នុងស្រុកថា លោកមិនទាន់អាចឆ្លើយតបបានទេ ដោយរង់ចាំការសម្រេចរបស់ថ្នាក់ដឹកនាំ និងគណៈកម្មការអិចន្ត្រៃយ៍រដ្ឋសភាជាមុនសិន។
លោក សុន ឆ័យ បញ្ជាក់ថា ការតែងតាំងកូន និងក្មួយជាច្រើនទៀតជាមន្ត្រី និងបុគ្គលិកក្នុងអគ្គលេខាធិការដ្ឋានរដ្ឋសភា គឺធ្វើឲ្យបាត់បង់ថវិការដ្ឋសភាជាច្រើន ដែលទង្វើទាំងនេះ គឺមានលក្ខណៈជាអំពើពុករលួយមានលក្ខណៈជាប្រព័ន្ធទ្រង់ទ្រាយធំ ដែលត្រូវមានវិធានការបញ្ឈប់ជាបន្ទាន់ តាមរយៈការបញ្ចប់តួនាទី និងឲ្យមានការស៊ើបឯករាជ្យមួយ៕
សូមសរសេរមកកាន់លោក ឡាយ សាមាន តាមរយៈ samean@vodhotnews.com
No comments:
Post a Comment