ដោយ ទីន ហ្សាការីយ៉ា
2014-05-06
កងសន្តិសុខសាលារាជធានីភ្នំពេញ យាមការពារមិនឲ្យមានការជួបជុំគ្នាហែក្បួន ជិតទីលានប្រជាធិបតេយ្យ នៅថ្ងៃទី២ ខែឧសភា ឆ្នាំ២០១៤។
RFA/Morm Moniroth
សាលារាជធានីភ្នំពេញ បានប្រើប្រាស់កងកម្លាំងសន្តិសុខដែលមិនមែនជាកងកម្លាំងអាជ្ញាធរមានសមត្ថកិច្ច ទៅបង្ក្រាបការហែក្បួននានា និងបង្ក្រាបប្រជាពលរដ្ឋធ្វើបាតុកម្ម ហើយបានប្រើអំពើហិង្សាមិនរើសមុខនោះឡើយ។ មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) ឲ្យដឹងថា គេនឹងដាក់ពាក្យប្ដឹងទៅតុលាការក្នុងពេលឆាប់ៗ ពីករណីកងសន្តិសុខវាយអ្នកយកព័ត៌មានរបស់វិទ្យុសំឡេងប្រជាធិបតេយ្យ (VOD) ម្នាក់រងរបួសធ្ងន់នោះ។
ការប្រកាសដាក់ពាក្យបណ្ដឹងទៅតុលាការនេះ នៅបន្ទាប់ពីក្រសួងព័ត៌មាន បានចេញសេចក្តីថ្លែងការណ៍មួយ ចាត់ទុកការប្រើអំពើហិង្សាលើអ្នកសារព័ត៌មាន គឺជាការរំលោភបំពានធ្ងន់ធ្ងរដល់សេរីភាពសារព័ត៌មាននៅកម្ពុជា។
មេធាវីរបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ កំពុងរៀបចំពាក្យប្ដឹងដាក់ទៅសាលាដំបូងរាជធានីភ្នំពេញ ប្ដឹងពីករណីសន្តិសុខខណ្ឌដូនពេញ ប្រើអំពើហិង្សាលើអ្នកយកព័ត៌មានរបស់ខ្លួនឲ្យរបួសធ្ងន់ ក្នុងពេលបំពេញបេសកកម្ម។
ប្រធាននាយកដ្ឋានអភិវឌ្ឍន៍ប្រព័ន្ធផ្សព្វផ្សាយនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ណុប វី បានឲ្យដឹងនៅថ្ងៃទី៦ ឧសភា ថា មេធាវីតំណាងឲ្យអង្គការលោកកំពុងពិនិត្យមើលផ្លូវច្បាប់ ក្នុងការដាក់ពាក្យប្ដឹងរកអ្នកទទួលខុសត្រូវ ចំពោះការប្រើអំពើហិង្សាលើបុគ្គលិករបស់លោក ថាតើត្រូវប្ដឹងទៅតុលាការ ប្ដឹងអភិបាលរាជធានីភ្នំពេញ ឬប្ដឹងអភិបាលខណ្ឌដូនពេញ ក្នុងការប្រើប្រាស់សន្តិសុខប្រើអំពើហិង្សាធ្វើឲ្យ លោក ឡាយ សាមៀន អ្នកយកព័ត៌មានវិទ្យុសំឡេងប្រជាធិបតេយ្យ ឲ្យរងរបួសធ្ងន់កាលពីថ្ងៃទី២ ឧសភា នោះ។
«សំឡេង»
លោក ណុប វី បន្ថែមថា លោក ឡាយ សាមៀន មានស្ថានភាពធូរស្រាលបន្តិចហើយ ប៉ុន្តែលោកមិនទាន់បាននិយាយស្ដី និងបរិភោគអាហារបានស្រួលនៅឡើយ ពីព្រោះលោកបានបាក់ឆ្អឹងថ្ពាល់ផ្នែកខាងក្រោម និងរបួសរួបរាងកាយខ្លាំងទៀត។ លោក ណុប វី បានរំឭកថា លោក ឡាយ សាមៀន រងរបួសនៅខណៈលោកបានថតរូបក្រុមសន្តិសុខបានប្រើអំពើហិង្សាលើព្រះតេជព្រះគុណ លួន សាវ៉ាត ស្រាប់តែភ្លាមៗនោះ ក្រុមសន្តិសុខទាំងនោះបានបង្វែរមកដកហូតម៉ាស៊ីនថត ប្រើអំពើហិង្សាលើ លោក ឡាយ សាមៀន វិញ។
«សំឡេង»
ឆ្លើយតបនឹងបញ្ហានេះ មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា ការចង់ប្ដឹងសាលារាជធានីភ្នំពេញ ដើម្បីឲ្យទទួលខុសត្រូវលើការប្រើប្រាស់អំពើហិង្សាលើអ្នកសារព័ត៌មាននេះ ជាសិទ្ធិរបស់ស្ថាប័នមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ។ ប៉ុន្តែ លោកអះអាងថា អ្នកដែលទទួលខុសត្រូវលើករណីប្រើប្រាស់អំពើហិង្សានេះ គឺអ្នកដែលហែក្បួនកាលពីថ្ងៃទី២ ឧសភា គឺសំដៅលើគណបក្សសង្គ្រោះជាតិ។
«សំឡេង»
ក្រសួងព័ត៌មាន បានចេញសេចក្តីថ្លែងការណ៍មួយកាលពីថ្ងៃទី៤ ឧសភា ដោយចាត់ទុកការគំរាមកំហែង អំពើហិង្សា ការរឹបអូសសម្ភារៈ និងការប្រមាថចំពោះអ្នកសារព័ត៌មាន ជាការរំលោភបំពានធ្ងន់ធ្ងរដល់សេរីភាពសារព័ត៌មាននៅកម្ពុជា។ ក្រសួងព័ត៌មាន អំពាវនាវដល់ក្រុមអ្នកតវ៉ា បាតុករ និងអាជ្ញាធរមានសមត្ថកិច្ច កងកម្លាំងរក្សាសន្តិសុខសណ្ដាប់ធ្នាប់ ត្រូវប្រកាន់យកនូវការអនុវត្តសិទ្ធិសេរីភាព និងសមត្ថកិច្ចរបស់ខ្លួនឲ្យបានត្រឹមត្រូវតាមច្បាប់។
ក្រៅពីប្រើអំពើហិង្សាលើព្រះតេជព្រះគុណ លួន សាវ៉ាត និងលោក ឡាយ សាមៀន ឲ្យរងរបួសធ្ងន់នោះ ក្រុមសន្តិសុខក៏ប្រើប្រាស់អំពើហិង្សាវាយអ្នកយកព័ត៌មានជាជនបរទេសម្នាក់ទៀតដែរ។
នាយកវិទ្យាស្ថានកម្ពុជា សម្រាប់ការសិក្សាសារព័ត៌មាន លោក មឿន ឈានណារិទ្ធិ បានថ្កោលទោសចំពោះការប្រើប្រាស់អំពើហិង្សាលើអ្នកសារព័ត៌មាននេះ។ លោកបន្ថែមថា សារព័ត៌មានជានិយាមមួយសម្រាប់វាស់វែងនូវការដឹកនាំរបស់រដ្ឋាភិបាល តែការប្រើប្រាស់ការគំរាមកំហែងលើអ្នកសារព័ត៌មាននេះ ជាការរុញច្រានឲ្យសង្គមកម្ពុជា ដើរខុសគន្លងប្រជាធិបតេយ្យ។
«សំឡេង»
គិតចាប់តាំងពីឆ្នាំ១៩៩៣ មកមានអ្នកសារព័ត៌មានចំនួន ១២នាក់ហើយត្រូវបានគេសម្លាប់។ មកទល់ពេលនេះ រដ្ឋាភិបាលមិនទាន់រកឃាតកឃើញយកមកកាត់ទោសនៅឡើយ។
អង្គការឃ្លាំមើលសេរីភាពអន្តរជាតិ ហ្វ្រីឌឹម ហៅស៍ (Freedom House) កាលពីដើមខែឧសភា បានចេញរបាយការណ៍មួយស្ដីពីសិទ្ធិសេរីភាពសារព័ត៌មានសម្រាប់ឆ្នាំ២០១៤ រកឃើញថា អង្គការប្រទេសកម្ពុជា ជាប់លេខរៀងទី១៤៧ ជាប្រទេសគ្មានសេរីភាពក្នុងចំណោមប្រទេស១៩៧៕
No comments:
Post a Comment