ដោយ អ៊ុក សាវបូរី
2014-04-25 RFA
មន្ត្រីប៉ូលិសចូលនិវត្តន៍ឆ្នាំ២០១២ ត្អូញមិនទាន់បើកបានប្រាក់រំឭកអតីតភាពការងារ ឬប្រាក់ឧបត្ថម្ភគោលនយោបាយ។ មន្ត្រីប៉ូលិសចូលនិវត្តន៍ជាច្រើននាក់នៅក្នុងខេត្តកណ្ដាល ត្អូញត្អែរពីការលំបាកក្នុងជីវភាព និងពុំមានប្រាក់ព្យាបាលជំងឺនៅពេលភាគីពាក់ព័ន្ធមិនបានបើកប្រាក់រំឭកសោធននិវត្តន៍ដល់ពួកគាត់។ បញ្ហានេះ មន្ត្រីការិយាល័យសោធននិវត្តន៍ក្រសួងមហាផ្ទៃ ឲ្យដឹងថា ឯកសារកំពុងតែរត់ការនៅឡើយ។ លោកសន្យានឹងខិតខំបើកប្រាក់រំឭកនោះជូនប៉ូលិសនិវត្តន៍នៅក្នុងឆ្នាំ២០១៤។
ប៉ូលិសច្រើននាក់នៅខេត្តកណ្ដាល អះអាងថា ពួកគាត់បានចូលនិវត្តន៍ពីឆ្នាំ២០១២ មិនបានទទួលប្រាក់រំឭកអតីតភាពការងារពីរាជរដ្ឋាភិបាលនៅឡើយ។
អតីតប៉ូលិសស្នងការខេត្តកណ្ដាល លោក ហង់ ប៊ុនសាន ឲ្យដឹងថា គាត់ចូលនិវត្តន៍ពីឆ្នាំ២០១២។ មកដល់បច្ចុប្បន្ន គាត់មិនទាន់ទទួលបានប្រាក់រំឭកអតីតភាពការងារ ឬហៅថាប្រាក់ឧបត្ថម្ភគោលនយោបាយនៅឡើយ។ លោកថា បានបម្រើជាតិតាំងពីឆ្នាំ១៩៧៩ រដ្ឋបានផ្តល់ប្រាក់ប្រចាំខែចំនួន ៦៧ម៉ឺន និង ៥ពាន់រៀលក្នុង១ខែ។ ប្រាក់នោះគាត់បើករហូតដល់ពេលចូលនិវត្តន៍។ ក្រោយចូលនិវត្តន៍ លោកចេះតែរង់ចាំប្រាក់រំឭកអតីតភាពការងារ ឬប្រាក់ឧបត្ថម្ភគោលនយោបាយ ព្រោះលោកចាស់ កំពុងតែមានជំងឺប្រចាំកាយ ទន្ទឹងរង់ចាំប្រាក់នោះណាស់ ដើម្បីផ្គត់ផ្គង់ជីវភាព និងថែទាំសុខភាព៖«ចាំហ្នឹងរង់ចាំលុយគេថាលុយរំឭក ប្រចាំដែលយើងធ្វើការមកគេរំឭកឲ្យយើងនោះប៉ុន្មានខែៗ ក៏ឲ្យទៅចេះតែរង់ចាំ ចេះតែចាំៗហើយដឹងប៉ុន្មាន ក៏គេអត់ប្រាប់យើង ឲ្យដឹងចំនួនពិតប្រាកដប៉ុន្មានខែទៅប៉ុន្មានខែដែរ»។
ចំណែកអតីតប៉ូលិសប៉ុស្តិ៍ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល លោក ប៉ែន ចន្ថា ឲ្យដឹងថា គាត់ចូលនិវត្តន៍ពីថ្ងៃទី២៧ ខែសីហា ឆ្នាំ២០១២។ គាត់ក៏មិនទាន់បានទទួលប្រាក់រំឭកអតីតភាពការងារដែលបម្រើជាតិពីឆ្នាំ១៩៧៩ មកដែរ។ លោកក៏កំពុងរង់ចាំប្រាក់រំឭកអតីតភាពការងារជាង ៣០ឆ្នាំមកនោះ៖ «វាគួរតែពីថ្ងៃយើងរ៉ឺត្រែតទៅវាត្រូវ ៨ខែ បានលុយ ដល់ឥឡូវនេះវាលើស ៨ខែ២ដងហើយ វាអត់ទាន់ឃើញបានលុយ គឺគេគុណតាមខែយើង គឺត្រូវយើងបានលុយប៉ុន្មាន គេគុណប៉ុណ្ណឹង។ ប៉ុន្តែគុណហ្នឹង គុណប្រាក់បើករាល់ថ្ងៃក៏មិនដឹង កាលពីនៅធ្វើការមិនដឹង គឺខ្ញុំមិនបានដឹងត្រង់ហ្នឹង»។
តាមការឲ្យដឹងពីមន្ត្រីរាជការចូលនិវត្តន៍ អះអាងថា ប្រាក់អតីតភាពការងារ គឺជាប្រាក់ដែលផ្តល់ដល់មន្ត្រីរាជការដែលបានប្រឹងប្រែងធ្វើការ ឬហៅថាប្រាក់ឧបត្ថម្ភគោលនយោបាយ។ ប្រាក់នោះ ប៉ូលិសម្នាក់ៗមិនបានដឹងមុនថាទទួលបានប្រាក់ប៉ុន្មាន ឬទទួលទៅតាមឋានៈបែបណាទេ។ ប៉ុន្តែតាមពួកគាត់សាកសួរ អ្នកចូលនិវត្តន៍មុនៗ គឺអាចតិចជាងប្រាក់ខែដែលពួកគាត់កំពុងធ្វើការនៅក្នុងតំណែង។
ពាក់ព័ន្ធបញ្ហាត្អូញត្អែររបស់មន្ត្រីប៉ូលិសចូលនិវត្តន៍នៅខេត្តកណ្ដាល អំពីការយឺតយ៉ាវក្នុងការទទួលបានប្រាក់រំឭកអតីតភាពការងារជាង ៣០ឆ្នាំ ប្រធានការិយាល័យសោធននិវត្តន៍ក្រសួងមហាផ្ទៃ លោក សេង ជា បានឲ្យដឹងថា មន្ត្រីប៉ូលិសចូលនិវត្តន៍នៅឆ្នាំ២០១២ មានច្រើនគ្នា។ រីឯឯកសារមន្ត្រីចូលនិវត្តន៍ ត្រូវរត់ការសុំប្រាក់រំឭកអតីតភាពការងាររបស់មន្ត្រីទាំងនោះ វានៅចុងឆ្នាំ ឯការបិទបញ្ជី គឺនៅខែ១១ ទើបឯកសារនេះចេះតែពន្យារពីឆ្នាំ២០១២ មក ២០១៣។ ក្រោយបោះឆ្នោតជាតិឆ្នាំ២០១៣ បញ្ហានយោបាយមិនត្រូវគ្នា រដ្ឋសភាពន្យារការអនុម័តថវិកាជាតិទៀត។ បញ្ហាទាំងនោះទើបមិនទាន់អាចបើកប្រាក់រំឭកដល់មន្ត្រីសោធននិវត្តន៍ឲ្យបានទាន់ពេល។
លោកថា ទោះជាយ៉ាងណា មន្ត្រីចូលនិវត្តន៍ទាំងនោះនឹងទទួលបានបើកប្រាក់រឭកអតីតភាពការងារនៅក្នុងឆ្នាំ២០១៤ នេះ៖ «ហើយសំណើរបស់គាត់ គឺចំសំណើដែលថា លុយវាសល់ពីចាយ វាមិនអាចលើកបាន។ ឧទាហរណ៍ លុយ ៣០០លាន ហើយលុយយើងសល់តែ ២០០លាន យើងមិនអាចលើកទៅហិរញ្ញវត្ថុបានទេ។ អ៊ីចឹង ក៏ទុកសំណើដល់ ២០១៣ អូស១៤នេះ។ ឥឡូវយើងកំពុងតែរត់ហើយ។ ឆ្នាំហ្នឹងឆ្នាំធ្លាក់ ជូនគាត់ហើយ អត់មានយកទៅណាទេ គឺថាក្នុងគោលបំណង ខ្ញុំចង់បានឲ្យលឿនជូនគាត់ ប៉ុន្តែបងដឹងស្រាប់ហើយ ការរត់ការ។ លុយប្រចាំឆ្នាំគាត់អត់បានដឹងទេ តែលើកមិនទាន់ខែ១១ គេបិទហើយ។ អ៊ីចឹងត្រូវលើកមក ថវិកាឆ្នាំក្រោយទៀតហើយ»។
តាមការឲ្យដឹងពីមន្ត្រីប៉ូលិសចូលនិវត្តន៍ គឺនៅក្នុងឆ្នាំ២០១២ មានប៉ូលិសចូលនិវត្តន៍ទូទាំងប្រទេសសរុបចំនួន ៧៣នាក់ ក្នុងនោះ ប៉ូលិសខេត្តកណ្តាល មាន ២២នាក់៕
No comments:
Post a Comment