ដោយ៖ តាំង វីដា | ថ្ងៃព្រហស្បតិ៍ ទី13 ខែកុម្ភៈ ឆ្នាំ2014 | 1 ម៉ោង មុន
មន្ត្រីជាន់ខ្ពស់គណបក្សសង្គ្រោះជាតិ ឲ្យដឹងថា សម្ភារៈមួយចំនួនដែលអាជ្ញាធរសាលារាជធានីភ្នំពេញ បានរឹបអូស ពេលចុះបង្ក្រាបការប្រមូលផ្តុំនៅទីលានប្រជាធិបតេយ្យ កាលពីថ្ងៃទី៤ ខែមករា ត្រូវបានរកឃើញ ខណៈមួយចំនួន មិនទាន់ឃើញនៅឡើយ។
ការអះអាងនេះ ធ្វើឡើងនៅរសៀលថ្ងៃព្រហស្បតិ៍នេះ ក្រោយពីកិច្ចពិភាក្សាស្តីពី ការធ្វើកិច្ចសន្យាប្រគល់សម្ភារៈ រវាងក្រុមការងារគណបក្សសង្គ្រោះជាតិ និងមន្ត្រីសាលារាជធានីភ្នំពេញ។
អនុប្រធានគណៈកម្មាធិការវិន័យ គណបក្សសង្គ្រោះជាតិ លោក ហូរ វ៉ាន់ ប្រាប់VODថា សម្ភារៈមួយចំនួនដូចជា ម៉ូតូ ម៉ាស៊ីនភ្លើង និងឧបករណ៍ភ្លេង ត្រូវបានផ្ទៀងផ្ទាត់ត្រឹមត្រូវតាមបញ្ជី តែសម្ភារៈប្រើប្រាស់ប្រចាំថ្ងៃមួយចំនួនទៀត របស់បាតុករ ដែលបានរាយនាមក្នុងបញ្ជីគណបក្សនេះ ហើយមិនឃើញមានក្នុងបញ្ជីរបស់សាលារាជធានីនោះឡើយ។
លោក ហូរ វ៉ាន់ គូសបញ្ជាក់ថា ក្រុមការងារគណបក្សនេះ មិនទាន់យកវត្ថុ និងសម្ភារៈដែលរឹបអូសទាំងនោះ មកវិញនៅឡើយទេ ដោយរង់ចាំការជួបប្រជុំផ្ទៀងផ្ទាត់ជាថ្មីនៅថ្ងៃខាងមុខនេះ ដើម្បីចាត់ចែងវិធានការ ចំពោះសម្ភារៈ ដែលបាត់បង់។
កាលពីថ្ងៃទី៤ ខែមករា បន្ទាប់ពីក្រសួងមហាផ្ទៃ បានប្រកាសបម្រាមហាមការប្រមូលផ្តុំ នៅទីសាធារណៈ សមត្ថកិច្ចអាជ្ញាធរ ប្រមាណ ២០០នាក់ និងសន្តិសុខសាលារាជធានី ជាង៥០នាក់ បានឡោមព័ទ្ធទីលានប្រជាធិបតេយ្យ ដែលជាទីតាំងបាតុករគណបក្សសង្គ្រោះជាតិ កំពុងធ្វើបាតុករទាមទារការបោះឆ្នោតឡើងវិញ។ ក្នុងគ្រានោះ ប្រជាបាតុករ ជាង ២០០នាក់ ត្រូវបង្ខំឲ្យចាកចេញ ហើយសម្ភារៈត្រូវបានអាជ្ញាធរសាលារាជធានីភ្នំពេញរឹបអូសទុកក្នុងឃ្លាំង៕
កាលពីថ្ងៃទី៤ ខែមករា បន្ទាប់ពីក្រសួងមហាផ្ទៃ បានប្រកាសបម្រាមហាមការប្រមូលផ្តុំ នៅទីសាធារណៈ សមត្ថកិច្ចអាជ្ញាធរ ប្រមាណ ២០០នាក់ និងសន្តិសុខសាលារាជធានី ជាង៥០នាក់ បានឡោមព័ទ្ធទីលានប្រជាធិបតេយ្យ ដែលជាទីតាំងបាតុករគណបក្សសង្គ្រោះជាតិ កំពុងធ្វើបាតុករទាមទារការបោះឆ្នោតឡើងវិញ។ ក្នុងគ្រានោះ ប្រជាបាតុករ ជាង ២០០នាក់ ត្រូវបង្ខំឲ្យចាកចេញ ហើយសម្ភារៈត្រូវបានអាជ្ញាធរសាលារាជធានីភ្នំពេញរឹបអូសទុកក្នុងឃ្លាំង៕
សរសេរមកកាន់លោក តាំង វីដា តាមរយៈvida@vodhotnews.com
No comments:
Post a Comment