ដោយ៖ ញឹម សុខន | ថ្ងៃអាទិត្យ ទី23 ខែកុម្ភៈ ឆ្នាំ2014, VOD
លោក សួស សំអុល អនុប្រធានភូមិសំបួរ និងជាអ្នកគាំទ្រគណបក្សប្រជាជនកម្ពុជា (រូបថត៖ ញឹម សុខន)
អ្នកគាំទ្របក្សកាន់អំណាចម្នាក់ នៅខេត្តកំពង់ស្ពឺ អំពាវនាវនៅថ្ងៃអាទិត្យនេះ ឲ្យរដ្ឋាភិបាលចាប់ខ្លួន ជនដៃដល់បាញ់សម្លាប់កម្មករ នៅផ្លូវ៉េងស្រេង រាជធានីភ្នំពេញ មកផ្តន្ទាទោស ដើម្បីបំបាត់និទណ្ឌភាពនៅកម្ពុជា។
អនុប្រធានភូមិសំបួរ ឃុំរលាំងគ្រើល ស្រុកសំរោងទង ខេត្តកំពង់ស្ពឺ លោក សួស សំអុល អាយុ៥២ឆ្នាំ ឲ្យអ្នកសារព័ត៌មានដឹង ក្នុងពិធីជួបជុំជនរងគ្រោះ នៅតំបន់បឹងកក់ នាថ្ងៃអាទិត្យទី២៣ខែកុម្ភៈនេះថា លោកជាអ្នកគាំទ្រគណបក្សប្រជាជនកម្ពុជាមួយរូប មិនគាំទ្រឲ្យជនដៃដល់បាញ់សម្លាប់មនុស្ស បន្តរស់នៅក្រៅច្បាប់ ដូចករណីបាញ់បង្ក្រាបបណ្ដាលឲ្យស្លាប់ និងរបួសរាប់សិបនាក់ នៅផ្លូវវ៉េងស្រេងទេ។
យ៉ាងណាក៏ដោយ លោក សួស សំអុល ក៏មានកូនប្រុសម្នាក់ឈ្មោះ គឹម ផលលាភ បានស្លាប់ ក្នុងព្រឹត្តិការណ៍បង្ក្រាបនោះដែរ។ លោក ទទូចឲ្យរដ្ឋាភិបាលចាត់វិធានការនេះ ឲ្យមានប្រសិទ្ធភាព ចាប់ជនដៃដល់និងអ្នកពាក់ព័ន្ធយកមកផ្តន្ទាទោស ដើម្បីទប់ស្កាត់ វប្បធម៌សម្លាប់មនុស្សក្រៅច្បាប់ និងផ្តល់យុត្តិធម៌ដល់អ្នករងគ្រោះ។
ក្រោយព្រឹត្តិការណ៍ប៉ះទង្គិច សមត្ថកិច្ចមួយចំនួនត្រូវបានអះអាងថា បានរងរបួសដោយដុំថ្ម កម្មករយ៉ាងតិច៥នាក់ស្លាប់ ជាង៤០នាក់ទៀតរងរបួស ២១នាក់កំពុងឃុំខ្លួនក្នុងពន្ធនាគារ ដោយសារទាមទារប្រាក់ឈ្នួល១៦០ដុល្លារក្នុងមួយខែ។
ក្រោយផ្ទុះហិង្សា រដ្ឋាភិបាលបានបង្កើតគណៈកម្មការស៊ើបអង្កេតថ្មីមួយ ដឹកនាំដោយ រដ្ឋមន្ត្រីក្រសួងមហាផ្ទៃ លោក ស ខេង ដើម្បីសិក្សាពីការខូចខាតទ្រព្យសម្បត្តិឯកជន និងការផ្ទុះហិង្សានៅលើផ្លូវវ៉េងស្រេងនេះ ។
ប៉ុន្តែមកដល់ពេលនេះ ក្រសួងមួយនេះ មិនទាន់ប្រកាសឲ្យដឹងថា មានមនុស្សប៉ុន្មាននាក់ នឹងត្រូវនាំខ្លួនឡើងតុលាការ ប្រឈមមុខច្បាប់ ហើយស្ថាប័នណាខ្លះទទួលខុសត្រូវករណីបាញ់សម្លាប់កម្មករនេះទេ បើទោះបីជាមានការថ្កោលទោសពីសហគមន៍ជាតិ និងអន្តរជាតិក៏ដោយ៕
សូមសរសេរមកលោក ញឹម សុខន តាមរយៈ sokhorn@vodhotnews.com
No comments:
Post a Comment