ដោយ៖ បូ សាវី | ថ្ងៃសុក្រ ទី10 ខែមករា ឆ្នាំ2014 | VOD
មន្ត្រីប៉េអឹមក្រុងសៀមរាបការពារសន្តិសុខ និងសណ្តាប់ធ្នាប់ នៅថ្ងៃទី១០មករា (រូបថត បូ សាវី)
សន្តិសុខ និងសណ្តាប់ធ្នាប់នៅទីរួមខេត្តសៀមរាប ត្រូវបានរឹតបន្តឹង ខណៈដែលថ្នាក់ដឹកនាំគណបក្សសង្គ្រោះជាតិ នឹងជួបជាមួយសមាជិសមាជិកា និងអ្នកគាំទ្ររបស់ខ្លួន នៅព្រឹកថ្ងៃទី១០ខែមករានេះ។
សេចក្តីរាយការណ៍ពីខេត្តសៀមរាប បានឲ្យដឹងថា នៅព្រឹកថ្ងៃសុក្រនេះ កម្លាំងសមត្ថកិច្ចចម្រុះជាច្រើនរយនាក់ ត្រូវបានដាក់ពង្រាយនៅតាមដងផ្លូវមួយចំនួន និងនៅជិតទីស្នាក់ការគណបក្សសង្គ្រោះជាតិនៅក្រុងសៀមរាប ខេត្តសៀមរាប ខណៈដែលលោកសម រង្ស៊ី និងលោកកឹម សុខា នឹងជួបជាមួយអ្នកគាំទ្ររបស់ខ្លួន នៅផ្សារលើ ផ្សារចាស់ និងជួបសមាជិកសមាជិកា នៅទីស្នាក់ការ ដើម្បីបង្ហាញពីគោលជំហរគណបក្ស។
តាមកាលវិភាគនៃការជួបជុំ នៅថ្ងៃសុក្រទី១០ ខែមករា ម៉ោង៨និង៣០នាទី លោក សម រង្ស៊ី និងលោក កឹម សុខា ប្រធាននិងអនុប្រធានគណបក្សសង្គ្រោះជាតិ ទៅភូមិកក្រាញ់ ក្រុងសៀមរាប ទល់មុខវត្តគង់មុច ខេត្តសៀមរាប នៅថ្ងៃសៅរ៍ ទី១១ ខែមករា ម៉ោង៨ព្រឹក ទៅភូមិអូអំពិល ក្រុងសេរីសោភ័ណ្ឌ ខេត្តបន្ទាយមានជ័យ និងនៅថ្ងៃទី១២ ខែមករា ម៉ោង៧និង៣០នាទីព្រឹក ទៅភូមិ អូរតាគាំ២ ក្រុងបាត់ដំបង ខេត្តបាត់ដំបង។
ការប្រកាសជួបជុំនេះ ធ្វើឡើងបន្ទាប់ពីកម្លាំងសមត្ថកិច្ច បានចុះទៅបង្ក្រាបបាតុករនៅទីលានប្រជាធិបតេយ្យរាជធានីភ្នំពេញ និងប្រកាសមិនឲ្យគណបក្សសង្គ្រោះជាតិ ធ្វើបាតុកម្មតទៅទៀត រហូតដល់ស្ថានការណ៍មានភាពធូរស្រាល៕
សរសេរមកកាន់លោក បូ សាវី តាមរយៈ savy@vodhotnews.com
No comments:
Post a Comment