សកម្មជនដីធ្លីនៅតំបន់បឹងកក់ អ្នកស្រី យ៉ោម បុប្ឆា បានបដិសេធចំពោះការចុះផ្សាយរបស់កាសែតក្នុងស្រុកមួយចំនួន ដែលលើកឡើងថា អ្នកស្រីត្រូវបានស្វាមីវាយដំធ្វើបាប ដោយសារការប្រច័ណ្ឌក្នុងរឿងស្នេហាផិតក្បត់។ អ្នកស្រីថា ការចុះផ្សាយនេះគឺជារឿងមិនពិត និងជាការបង្ខូចកេរ្តិ៍ឈ្មោះរបស់អ្នកស្រីនិងសហគមន៍បឹងកក់។
ដោយ ម៉ៅ សុធានី
2014-01-16
សកម្មជនដីធ្លី អ្នកស្រី យ៉ោម បុប្ផា ផ្ដល់បទសម្ភាសន៍ដល់វិទ្យុអាស៊ីសេរី កាលពីថ្ងៃទី១៥ មករា ឆ្នាំ២០១៤។
RFA/Uon Chhin
សកម្មជនដីធ្លីតំបន់បឹងកក់ អ្នកស្រី យ៉ោម បុប្ឆា កំពុងស្វែងរកលទ្ធភាពក្នុងការប្តឹងកាសែតក្នុងស្រុក ដែលបានចុះផ្សាយថា អ្នកស្រីនិងស្វាមីមានវិបត្តិគ្រួសារដ៏ធ្ងន់ធ្ងរ រហូតដល់លែងលះគ្នានោះគឺដោយសារការផិតក្បត់។
អ្នកស្រី យ៉ោម បុប្ឆា បានប្រាប់វិទ្យុអាស៊ីសេរីតាមទូរស័ព្ទថា រឿងរ៉ាវដែលកើតឡើងកាលពីថ្ងៃអង្គារ ទី១៤ ខែមករា នោះ គឺអតីតស្វាមីលោក លួស សាខន បានមកផ្ទះអ្នកស្រី ដោយបានឃាត់អ្នកស្រីមិនឲ្យចេញពីផ្ទះ ដើម្បីទៅចូលរួមគាំទ្រមេដឹកនាំគណបក្សសង្គ្រោះជាតិ លោក សម រង្ស៊ី និងអនុប្រធានលោក កឹម សុខា នៅខាងមុខតុលាការក្រុងភ្នំពេញ។
អ្នកស្រី យ៉ោម បុប្ផា៖ «គាត់បានចាក់សោពីក្រៅមិនឲ្យខ្ញុំចេញពីផ្ទះ ដោយសារតែខ្ញុំចង់ទៅតុលាការដើម្បីគាំទ្រលោក សម រង្ស៊ី ហើយគាត់ចាក់សោមិនឲ្យចេញ ហើយប្រតាយប្រតប់ជាមួយគាត់មានរបួសស្នាមខ្លះៗ តិចតួច។ គាត់បានឲ្យខ្ញុំឈប់តស៊ូមតិ ដើម្បីឲ្យមានពេលវេលាមើលកូន ហើយយើងបានឈ្លោះគ្នាមែន។ ប៉ុន្តែពុំមែនដូចដើមអំពិល កម្ពុជាថ្មី ឬកោះសន្តិភាព ដែលចោទប្រកាន់ថា ខ្ញុំមានសហាយបានប្ដីវាយធ្វើបាប។ ខ្ញុំសូមបដិសេធ ហើយចេតនាចង់ឲ្យសហគមន៍បឹងកក់ ស្អុយឈ្មោះ អសោច មិនឲ្យមានការគាំទ្រ ព្រោះគេដឹងថា ពលរដ្ឋនិងសហគមន៍អន្តរជាតិ គេគាំទ្រសហគមន៍បឹងកក់ ក៏ដូចជានាងខ្ញុំច្រើន...»។
អ្នកស្រី យ៉ោម បុប្ឆា បន្តថា អ្នកស្រីនិងអតីតស្វាមី លោក លួស សាខន បានសម្រេចលែងលះគ្នាដោយសន្តិវិធី ប៉ុន្តែពុំទាន់ដាច់ស្រេចនៅឡើយទេ ហើយស្វាមីក៏បានចុះចេញពីផ្ទះមួយរយៈ។ អ្នកស្រី បុប្ឆា បញ្ជាក់ថា ការលែងលះគ្នានេះ គឺដោយសារតែអ្នកស្រីខឹងសំបារជាមួយស្វាមីដែលបានប្រព្រឹត្តល្បែងស៊ីសង លក់ទ្រព្យសម្បត្តិអស់ក្នុងអំឡុងពេលដែលអ្នកស្រីជាប់ក្នុងពន្ធនាគាររយៈពេលជាងមួយឆ្នាំ។ អ្នកស្រីក៏បានបញ្ជាក់ថា រឿងរ៉ាវដែលកើតឡើងកាលពីថ្ងៃអង្គារ នោះ គឺដោយសារស្វាមីចង់ត្រូវរ៉ូវគ្នាវិញមិនចង់លែងលះនោះទេ។
អ្នកស្រី យ៉ោម បុប្ឆា៖ «ខ្ញុំបានលែងលះគ្នាដោយសន្តិវិធី ពីព្រោះពេលខ្ញុំនៅក្នុងពន្ធនាគារគាត់ពិបាកចិត្ត និងខូចចិត្តក៏លេងល្បែងចាញ់អស់លុយ។ ពេលចេញមកវិញ ខ្ញុំសុំលែងលះ ហើយគាត់ក៏បានយល់ព្រម។ គាត់បានចេញពីផ្ទះ ឥឡូវពួកខ្ញុំអត់បានរស់នៅជាមួយគ្នាទេ។ ការពិតយើងមានបញ្ហាជាមួយគ្នាមែន កាលពីម្សិលមិញ (១៤ មករា) តែមិនមែនដោយសារខ្ញុំមានសហាយទេ គឺគាត់មកចង់សុំផ្សះផ្សាទំនាក់ទំនងឡើងវិញ តែខ្ញុំមិនព្រម ម្ល៉ោះហើយក៏មានបញ្ហានេះកើតឡើងទៅ...»។
ចំណែកលោក លួស សាខន ដែលជាស្វាមីអ្នកស្រី យ៉ោម បុប្ឆា ក៏បានបញ្ជាក់ប្រាប់វិទ្យុអាស៊ីសេរី តាមទូរស័ព្ទផងដែរថា បញ្ហាដែលអ្នកស្រី យ៉ោម បុប្ផា លើកឡើងនេះ គឺជារឿងពិត ហើយថាលោកពុំចង់លែងលះគ្នាទេ ដោយមិនចង់ឲ្យកូនកំព្រាគ្មានឪពុកម្ដាយ។
លោកបានបញ្ជាក់ថា ប្រការដែលកាសែតក្នុងស្រុកមួយចំនួនចុះផ្សាយអត្ថបទថា ភរិយាលោកផិតក្បត់នោះ គឺជាទង្វើមួយខុសវិជ្ជាជីវៈ ហើយថា អ្នកកាសែតគេគួរតែទូរស័ព្ទមកលោក ឬភរិយា សួរនាំរឿងរ៉ាវសិនមុននឹងចុះផ្សាយ៖ «ប្រការដែលខ្ញុំនិងប្រពន្ធខ្ញុំមានបញ្ហាបន្តិចបន្តួចនោះ គឺពុំមែនមកពីប្រពន្ធខ្ញុំមានសហាយស្មន់ហើយក្បត់ខ្ញុំទេ នេះជារឿងពិត។ ខ្ញុំខឹងប្រពន្ធខ្ញុំ មិនឲ្យចេញតវ៉ាទៀត ដោយសារកូនគ្មាននរណាមើល ដើម្បីឲ្យប្រពន្ធខ្ញុំយកចិត្តទុកដាក់ក្នុងគ្រួសារ។ ឈ្លោះគ្នាបន្តិចបន្តួចដែរ តែមិនមែនវាយគ្នាងាប់រស់ដែរ។ ហើយទី២ ចំណែកកាសែតក្នុងស្រុកចុះផ្សាយ ពុំបានមកសួរខ្ញុំទេ គឺគេចុះផ្សាយដោយគំនិតគេយល់ឃើញ ហើយកាសែតទាំងនោះពុំមានឯករាជ្យ និងមានវិជ្ជាជីវៈ...»។
អ្នកស្រី យ៉ោម បុប្ឆា គឺជាសកម្មជនដីធ្លីម្នាក់ក្នុងចំណោមសកម្មជនដីធ្លីជាច្រើននាក់ទៀត រួមមានអ្នកស្រី ទេព វន្នី និងលោក ស៊ូ សុផល ជាដើម។ លោក ស៊ូ សុផល នេះហើយ ដែលបានរងការចោទថា ក្បត់ភរិយារបស់ខ្លួន ទៅសហាយស្មន់ជាមួយអ្នកស្រី យ៉ោម បុប្ឆា។
លោក លួស សាខន បន្តថា លោកនឹងទៅឆ្លើយបញ្ជាក់ការពិតទាំងអស់នៅតុលាការ ប្រសិនបើភរិយាលោកប្ដឹងកាសែតក្នុងស្រុកទាំងនោះពីបទបរិហារកេរ្តិ៍៖ «គេមិនចង់ឲ្យប្រពន្ធខ្ញុំមានកេរ្តិ៍ឈ្មោះ គេបង្កើតរឿងនេះឡើង។ ខ្ញុំទៅឡើងតុលាការ ឬទៅណាក៏ដោយ ក៏ខ្ញុំមិនដែលនិយាយថា ប្រពន្ធខ្ញុំមានសហាយស្មន់ដែរ។ ខ្ញុំមើលកាសែតព្រឹកមិញ ខ្ញុំសើច គេថាខ្ញុំបិទទ្វារវ៉ៃប្រពន្ធខ្ញុំ ប្រពន្ធខ្ញុំមានសហាយជាមួយក្មេងស្ទាវនៅតំបន់បឹងកក់ ឈ្មោះ ស៊ូ សុផល។ ស៊ូ សុផល នេះ ជាបុរសនៅសហគមន៍មែន គេមានប្រពន្ធកូនរួចហើយ ហើយប្រពន្ធខ្ញុំនិងខ្ញុំមិនទាន់លែងដាច់គ្នាទេ ព្រោះខ្ញុំអត់ទាន់ថាលែងទេ ខ្លាចកូនកំព្រាម្តាយឪពុក...»។
ពាក់ព័ន្ធនឹងការចុះផ្សាយរបស់កាសែតក្នុងស្រុកអំពីរឿងរ៉ាវអ្នកស្រី យ៉ោម បុប្ឆា និងអតីតស្វាមីលោក លួស សាខន នេះ នាយកអង្គការក្រុមការងារពិសេសសិទ្ធិលំនៅឋាន លោក សៀ ភិរម្យ ក៏បានឲ្យដឹងថា លោកបានដឹងអំពីរឿងរ៉ាវស្វាមីអ្នកស្រី យ៉ោម បុប្ឆា តាំងពីពេលដែលលោកទៅសួរសុខទុក្ខនៅពន្ធនាគារ ហើយម្ដាយរបស់អ្នកស្រីក៏បានប្រាប់អំពីហេតុការណ៍ទាំងនោះផងដែរ។
លោក សៀ ភិរម្យ បដិសេធថា ការផ្សាយព័ត៌មាននេះគឺជារឿងប្រឌិត ដើម្បីហេតុផលណាមួយប៉ុណ្ណោះ៖ «បាទ! សហគមន៍បឹងកក់ ជាក្រុមគោលដៅរបស់ពួកយើង យើងធ្វើការអប់រំពីច្បាប់ពីសិទ្ធិលំនៅឋាន។ យើងបានស្គាល់គាត់ច្បាស់ណាស់ គាត់មិនបានប្រព្រឹត្តដូចជាការចោទប្រកាន់នោះទេ ពីព្រោះគាត់គិតពីការពារផ្ទះសម្បែងរបស់គាត់ ហើយការផ្សាយនោះមិនពិតទេ។ ការពិតគាត់បានប្រាប់ខ្ញុំតាំងពីនៅក្នុងពន្ធនាគារ ដោយសារខ្ញុំឧស្សាហ៍ទៅសួរសុខទុក្ខ ហើយគាត់ថា មិនអាចលើកលែងគ្រួសារគាត់បានទេ...»។
អ្នកស្រី យ៉ោម បុប្ឆា អះអាងថា អ្នកស្រីនៅតែបន្តចូលរួមសកម្មភាពតវ៉ា ជាមួយសហគមន៍បឹកកក់ រួមមានអ្នកស្រី ទេព វន្នី ជាដើម បើទោះបីជាមានឧបសគ្គយ៉ាងណាក៏ដោយ មិនថាបញ្ហាក្នុងគ្រួសារនោះទេ។ បញ្ហាទំនាស់ដីធ្លីនៅតំបន់បឹងកក់នេះ បានអូសបន្លាយជាយូរឆ្នាំមកហើយ ក្រោយដែលរដ្ឋាភិបាលកម្ពុជា បានផ្ដល់សិទ្ធិឲ្យក្រុមហ៊ុនស៊ូកាគូ អភិវឌ្ឍន៍លើផ្ទៃដីទំហំ ១៣៣ហិកតារ រយៈពេល ៩៩ឆ្នាំ។ ការអភិវឌ្ឍនៅតំបន់បឹងកណ្ដាល ទីក្រុងភ្នំពេញនេះ បណ្ដាលឲ្យប្រជាពលរដ្ឋជាង ៤ពាន់គ្រួសាររងការបណ្ដេញចេញដោយបង្ខំ និងបាត់បង់ទីជម្រករស់នៅ៕
No comments:
Post a Comment