By Thmey Thmey
(អត្ថបទចុះផ្សាយនៅថ្ងៃ 
06-01-2014, 
8:52 pm) | ដោយ បាន សំអាង
06-01-2014, 8:52 pm) | ដោយ បាន សំអាង មេដឹកនាំ គណបក្សសង្គ្រោះជាតិ លោក សម រង្ស៊ី បាននិយាយនៅក្នុងបទសម្ភាសន៍ជាមួយ ទូរទស្សន៍ Channel NewsAsia របស់សិង្ហបុរីថា ដោយសារតែពេលនេះបាតុកម្មត្រូវបានហាមធ្វើនៅរាជធានីភ្នំពេញ ដូច្នេះលោកនឹងដឹកនាំធ្វើបាតុកម្មជាបន្តទៀត នៅតាមបណ្ដាខេត្តផ្សេងៗវិញ។
ប្រមុខបក្សប្រឆាំងរូបនេះក៏បាន ប្រាប់ទូរទស្សន៍នោះថា៖« ប្រជាជនកម្ពុជា ៨០ ភាគរយ រស់នៅតាមទីជនបទ។ ដូច្នេះយើងនឹងពុះពារបន្តទៀត តាមរយៈការរៀបចំអ្នកគាំទ្រយើង និងសកម្មជនប្រជាធិបតេយ្យជាច្រើនទៀត នៅទូទាំងប្រទេស។ ឥឡូវនេះយើងផ្ដោតទៅលើតែតាមបណ្ដាខេត្ត ហើយយើងនឹងត្រឡប់ចូលមកភ្នំពេញវិញ នៅពេលដែលពេលវេលាសមរម្យអាចឲ្យយើងចូលមកបាន»។
នៅក្នុងបទសម្ភាសន៍នោះដែរ លោក សម រង្ស៊ី បានប្រៀបធៀបចលនានៃការផ្លាស់ប្ដូរ នៅក្នុងប្រទេសកម្ពុជានៅពេលនេះថា វានឹងដូចអ្វីដែលបានកើតឡើងនៅក្នុងប្រទេសហ្វីលីពីន តាមរយៈអំណាចនៃ បាតុកម្មរបស់ប្រជាជន ក្នុងទសវត្សរ៍ឆ្នាំ១៩៨០ នោះ។
សូមបញ្ជាក់ថា ចាប់តាំងពីពេលដែលមានអំពើហិង្សា រហូតដល់មានអ្នកស្លាប់នៅក្នុងការប៉ះរវាងក្រុមបាតុករ ដែលជាកម្មកររោងចក្រកាត់ដេររួចមកនោះ ក្រសួងមហាផ្ទៃ ក៏ដូចជាសាលារាជធានីភ្នំពេញ បានចេញនូវសេចក្ដីជូនដំណឹងមួយស្ដីពី ការមិនអនុញ្ញាតអោយគណបក្សសង្គ្រោះជាតិ រៀបចំបាតុកម្មទៀតឡើយ រហូតដល់ស្ថានភាពសន្តិសុខ និងសណ្តាប់ធ្នាប់ត្រូវបានបានធានាឡើងវិញ៕
No comments:
Post a Comment