ដោយ៖ ឡាយ សាមាន | ថ្ងៃពុធ ទី11 ខែធ្នូ ឆ្នាំ2013, VOD
(រូបភាពពី police.gov.kh)
អគ្គស្នងការដ្ឋាននគរបាលជាតិ នៅថ្ងៃពុធនេះឲ្យដឹងថា ខ្លួនបានត្រៀមកម្លាំងរួចជាស្រេច សម្រាប់ការពារសុវត្ថិភាព និងរក្សាសណ្តាប់ធ្នាប់សាធារណៈ ខណៈដែលគណបក្សសង្គ្រោះជាតិ ប្រកាសធ្វើមហាបាតុកម្ម ទាមទារយុត្តិធម៌ជូនម្ចាស់ឆ្នោត រៀងរាល់ថ្ងៃអាទិត្យ ចាប់ផ្តើមពីថ្ងៃទី១៥ ខែធ្នូ។
សេចក្តីប្រកាសព័ត៌មានរបស់គណបក្សសង្គ្រោះជាតិ ចេញផ្សាយកាលពីម្សិលមិញ នបាប្រកាសពីគម្រោងរបស់ខ្លួន ដើម្បីទាមទារស៊ើបអង្កេតភាពមិនប្រក្រតីនៃការបោះឆ្នោ និងអំពាវនាវឲ្យប្រជាពលរដ្ឋខ្មែរចូលរួមបាតុកម្មនៅរៀងរាល់ថ្ងៃអាទិត្យឲ្យបានច្រើនកុះករ នៅទីលានប្រជាធិបតេយ្យ និងតាមបណ្តាខេត្តនានា។
អ្នកនាំពាក្យស្នងការដ្ឋាននគរបាលជាតិ លោក គៀត ច័ន្ទថារិទ្ធ ប្រាប់ VOD នៅថ្ងៃទី១១ ខែធ្នូនេះ ថា កម្លាំងសមត្ថកិច្ច និងត្រូវបានដាក់ពង្រាយ តាមចំណុចគោលដៅ ដូចសព្វដង ដើម្បីការពារប្រជាពលរដ្ឋ និងបាតុករ ជៀសវាងហិង្សា ដែលអាចកើតមានជាយថាហេតុ អំឡុងបាតុកម្ម ៖ "យើងឃើញស្រាប់ហើយរាល់ដងច្រើនលើកហើយ មិនមានអីខុសពីហ្នឹងទេ គឺសំខាន់ការពារធ្វើម៉េចកុំឲ្យមានរឿងអីកើតឡើង"។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា ចំនួនអ្នកចូលរួមនៅថ្ងៃទី១៥ ខែធ្នូនេះមានចំនួនប្រមាណពីបីទៅបួនម៉ឺននាក់។ លោក បន្តថា បាតុកម្មនៅតែទាមទាររកយុត្តិធម៌ជូនម្ចាស់ឆ្នោតដដែល តែមិនទាន់ប្រាកដថា ត្រូវហែក្បួន ឬអត់ទេ ៖ "ទាមទារឲ្យមានការកែទម្រង់ស្ថាប័នជាតិសំខន់ៗ ហើយទាមទារឲ្យមានការបោះឆ្នោតឡើងវិញ មានសារជាថ្មីមួយទៀត ដែលក្រោយពីការកែទម្រង់គណៈកម្មាធិការជាតិរៀបចំការបោះឆ្នោតហើយសមាសភាពថ្មី បញ្ជីឈ្មោះបោះឆ្នោតថ្មី ការកែទម្រង់ប្រព័ន្ធផ្សព្វផ្សាយនិយាយរួមគឺការកែទម្រង់ប្រព័ន្ធការបោះឆ្នោតទាំងមូលតែម្តង បន្ទាប់ពីនោះហើយ យើងនិងចាប់ផ្តើមបោះឆ្នោតសារជាថ្មី"។
កន្លងទៅ លោក ជួន សុវណ្ណ ឲ្យដឹងថា កម្លាំងនគរបាលជាតិ ត្រូវតែហ្វឹកហាត់បន្ថែមទៀត ដើម្បីឲ្យយន្តការការពារ និងប្រឆាំងបាតុករហិង្សា ឲ្យកាន់តែមានប្រសិទ្ធភាពថែមទៀត។ លោក ជួន សុវណ្ណ បានលើកឧទាហរណ៍ករណីការប៉ះទង្គិចចំនួនពីរ គឺ កាលពីថ្ងៃទី១៥ កញ្ញា ការប៉ះទង្គិចគ្នា យ៉ាងធ្ងន់ធ្ងរ នៅស្ពានអាកាសក្បាលថ្នល់ និងការប៉ះទង្គិចគ្នាធ្ងន់ធ្ងរមួយទៀត គឺនៅ ថ្ងៃទី១២ វិច្ឆិកា ស្ថិតនៅមុខ វត្តស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ៕
សូមសរសេរមកកាន់ លោក ឡាយ សាមាន តាមរយៈ laysamean168@yahoo.com
No comments:
Post a Comment