ដោយ៖ ញឹម សុខន និងអ៊ឹង ប៊ុនថន | ថ្ងៃពុធ ទី11 ខែធ្នូ ឆ្នាំ2013 | 1 ម៉ោង មុន
ស្តាប់សំឡេង៖ | ចម្លងទុក |
ក្រុមប្រជាជនដែលធ្វើការតវ៉ា(រូបថតដោយ ញឹម សុខន)
ពលរដ្ឋមួយក្រុមមានគ្នាជាង១០នាក់ នៅព្រឹកថ្ងៃពុធនេះ បានហែក្បួនរកអន្តរាគមន៍ពីស្ថានទូតបរទេស មួយចំនួនប្រចាំកម្ពុជា ដើម្បីដាក់សម្ពាធលើរដ្ឋាភិបាលកម្ពុជាឲ្យ រកយុត្តិធម៌ រឿងបោះឆ្នោត សម្រាប់អាណត្តិទី៥នេះ។
អ្នកតវ៉ាទាំង ១១នាក់នោះ បានធ្វើបាតុកម្ម ដោយមិនមានអ្នកនយោបាយណាដឹកនាំទេ ហើយពួកគេត្រូវកម្លាំងចម្រុះរាជធានីភ្នំពេញ ចាប់ខ្លួនបញ្ជូនទៅវត្តកៀនឃ្លាំង ខណ្ឌឫស្សីកែវ កាលពីយប់មិញ បន្ទាប់ពីពួកគេព្យាយាមដាក់ញត្តិនៅស្ថានទូតអាមេរិក ក្នុងទិវាសិទ្ធិមនុស្សអន្តរជាតិ១០ធ្នូ ជំរុញឲ្យស្ថានទូតមហាអំណាចមួយនេះ ជួយរកយុត្តិធម៌រឿងបោះឆ្នោត។
ក្រុមអ្នកតវ៉ាអះអាងប្រាប់អ្នកសារព័ត៌មានថា ការតវ៉ានេះ គឺអ្វីៗផុសចេញពីការឈឺចាប់របស់ពួកគេ ដែលរងគ្រោះរឿងដីធ្លី និងអយុត្តិធម៌សង្គម ដែលរដ្ឋាភិបាលបច្ចុប្បន្នមិនអាចដោះស្រាយបាន។
ក្បួនដង្ហែរបស់ពួកគេ នៅថ្ងៃពុធនេះ បានចេញពីស្ថានទូតបារាំងប្រចាំកម្ពុជា តាមមហាវិថីព្រះមុនីវង្ស ឆ្ពោះទៅកាន់ស្ថានទូតជប៉ុន ស្រែកទាមទាររកយុត្តិធម៌ពីលទ្ធផលបោះឆ្នោត។ប៉ុន្តែត្រូវបានអាជ្ញាធររារាំង និងគំរាមដកយកឧបករណ៍តវ៉ា ដូចជា មេក្រូ និងរឺម៉កម៉ូ តូនៅពេលពួកគេចូលសម្រាកបាយថ្ងៃត្រង់នៅវត្តកោះ ស្ថិតក្នុងខណ្ឌដូនពេញ ៖ “បើគេហ៊ានដោះណាស់ ក៏យើងត្រូវតែហ៊ានប្ដូរដែរ ត្រូវតែហ៊ានប្ដូរដោយសារមេក្រូហ្នឹងដែរ។ ខ្ញុំដូចថា ប្ដូរជីវិតដើម្បីប្រទេសជាតិ ដើម្បីទឹកដី សិទ្ធិសេរីភាព ហើយបើបិទសិទ្ធិសេរីភាពចឹងឲ្យខ្ញុំពឹងអី ចេញមកពីផ្ទះមកគិតថា ខ្លួនច្បាស់ជាស្លាប់ហើយ ប៉ុន្ដែស្លាប់ៗទៅ ឲ្យតែជាតិយើងបានរស់នោះណា” ។
យ៉ាងណាក៏ដោយ ការប្រឈមមុខដាក់គ្នា្ននោះ មិនបង្កឲ្យមានហិង្សាទេ ដោយសារកម្លាំងអាជ្ញាធរ ដែលដឹកនាំដោយអភិបាលរងរាជធានីភ្នំពេញ លោក ឃួង ស្រេង ថានឹងមិនទាមទារដកហូតឧបករណ៍ របស់ក្រុមអ្នកតវ៉ា។
ការសម្រេចបែបនេះ របស់អាជ្ញាធរស្របពេលដែលក្រុមព្រះសង្ឃមួយក្រុម អង្គការសង្គមស៊ីវិល និងអ្នកសារព័ត៌មានជាច្រើន ព្រមទាំងតំណាង UN ផង បានសម្រុកចូលក្នុងវត្តកោះ ដើម្បីឃ្លាំមើលពីចំណាត់ការនោះ។
មន្ត្រីស៊ើបអង្កេតជាន់ខ្ពស់នៅអង្គការ លីកាដូ លោក អំ សំអាត ដែលតាមដានករណីនេះ យល់ថា ការតវ៉ាបែបនេះ អ្នកតវ៉ាអាចប្រឈមខ្លាំងជាមួយអាជ្ញាធរ ដែលមិនទាន់ស្គាល់ពីសិទ្ធិសេរីភាពរបស់ពលរដ្ឋ ប៉ុន្តែលោកថា បើប្រទេសគោរពនូវលិទ្ធិប្រជាធិបតេយ្យ អាជ្ញាធរមិនគួរប្រើហឹង្សាទៅលើអ្នកតវ៉ាដោយសន្តិវិធីទេ ៖ “ប្រជាធិបតេយ្យស្រុកគេ គេម្នាក់ពីរនាក់ ទៅបីបួននាក់ ក៏គេអាចទៅឈរមុខផ្ទះប្រធានាធិបតេយ្យ ឫក៏ក្រសួងណាមួយដើម្បីធ្វើការទាមទារ ឫក៏បិទបាដាអីផ្សេងៗនោះ ឃើញថា អាហ្នឹងហើយដែលគេហៅថា លទ្ធិប្រជាធិបតេយ្យនោះ” ។
នៅក្នុងទិវាសិទ្ធិមនុស្ស១០ធ្នូ នៅទីលានប្រជាធិបតេយ្យ និងនៅខេត្តសៀមរាប ដែលមានប្រជាពលរដ្ឋចូលរួមរាប់ម៉ឺននាក់ជាមួយ មេដឹកនាំគណបក្សសង្គ្រោះជាតិ បានទាមទារឲ្យលោក ហ៊ុន សែន ចុះចេញពីដំណែង និងបោះឆ្នោតឡើងវិញ។ ប៉ុន្តែលោក ស ខេង នៅថ្ងៃពុធនេះ បានបដិសេធការទាមទារនេះ៕
(រូបថតដោយ ញឹម សុខន)
សូមសរសេរមកកាន់ លោក ញឹម សុខន តាមរយៈ sokhorn@vodhotnews.com
No comments:
Post a Comment