ដោយ៖ តាំង វីដា | ថ្ងៃសុក្រ ទី13 ខែធ្នូ ឆ្នាំ2013, VOD
ថ្នាក់ដឹកនាំគណបក្សសង្គ្រោះជាតិ ប្រកាសជំហរចុងក្រោយទាមទារការបោះឆ្នោតជ្រើសតាំងតំណាងរាស្ត្រអាណត្តិទី៥ ឡើងវិញ បន្ទាប់ពីសម្ព័ន្ធកំណែទម្រង់ការបោះឆ្នោត បង្ហាញរបាយការណ៍រួម សរុបភាពមិនប្រក្រតី និងបញ្ហានៃដំណើរការបោះឆ្នោតឆ្នាំ២០១៣ នៅព្រឹកថ្ងៃសុក្រនេះ។
អនុប្រធានគណបក្សសង្គ្រោះជាតិ លោក កឹម សុខា ឆ្លើយនឹងសំណួរអ្នកសារព័ត៌មាន ក្រោយចូលស្តាប់បទបង្ហាញ និងកិច្ចពិភាក្សារបស់សម្ព័ន្ធកំណែទម្រង់ការបោះឆ្នោតពាក់ព័ន្ធនឹងដំណើរការបោះឆ្នោតនៅឆ្នាំ២០១៣នេះថា ភាពមិនប្រក្រតីនៃការបោះឆ្នោត គឺត្រូវបានរកឃើញថា គណបក្សសង្គ្រោះជាតិ ឈ្នះឆ្នោត ហើយជំហរចុងក្រោយរបស់គណបក្សសង្គ្រោះជាតិ គឺមហាបាតុកម្ម ថ្ងៃទី១៥ធ្នូនេះ គឺទាមទារការបោះឆ្នោតឡើងវិញ ដោយតម្លាភាព ដើម្បីបង្ហាញការពិត។ លោកបន្តថា ភាពជាប់គាំងនយោបាយនៅពេលនេះ គឺទាមទារការដោះស្រាយរួមគ្នារវាងគណបក្សទាំងពីរ។
កាលពីថ្ងៃព្រហស្បតិ៍ លោក សម រង្ស៉ី បានបញ្ជាក់ជំហរចុងក្រោយរបស់គណបក្ស ប្រាប់វិទ្យុVOAថា លោកទាមទារគណបក្សកាន់អំណាចប្រគល់ជ័យជម្នះពីការបោះឆ្នោតឲ្យគណបក្សជំទាស់វិញដោយមិនចាំបាច់ចរចា។ លោកបញ្ជាក់ថា លោកនឹងមិនទៅចរចាចង់បានតំណែងពីគណបក្សប្រជាជន ដែលលោកចោទថាបានលួចតំណែងពីរាស្ត្រ ព្រោះតំណែងនោះ គឺប្រជារាស្ត្រប្រគល់ឲ្យគណបក្សសង្គ្រោះជាតិ។
កាលពីថ្ងៃទី១០ធ្នូ ក្នុងទិវាសិទ្ធិមនុស្សអន្តរជាតិ ថ្នាក់ដឹកនាំគណបក្សសង្គ្រោះជាតិ បានអំពាវនាវឲ្យពលរដ្ឋខ្មែរផ្លាស់ប្តូរថ្នាក់ដឹកនាំបច្ចុប្បន្ន តាមរយៈការបោះឆ្នោតឡើងវិញ ដោយហេតុផលថា ពលរដ្ឋបាត់បង់សិទិ្ធរបស់ខ្លួនក្នុងការជ្រើសរើសអ្នកដឹកនាំ។
កាលពីថ្ងៃទី១១ខែធ្នូ រដ្ឋមន្ត្រីក្រសួងមហាផ្ទៃ លោក ស ខេង បានថ្លែងទៅកាន់អ្នកសារព័ត៌មានថា គណបក្សកាន់អំណាច និងគណបក្សសង្គ្រោះជាតិ កំពុងតែពិភាក្សាបន្ត ដើម្បីរកដំណោះស្រាយពីការបោះឆ្នោត តែការរៀបចំបោះឆ្នោតឡើងវិញមិនអាចកើតឡើង ក្នុងរយៈពេលពីរឬបីខែដូចនៅប្រទេសថៃទេ គឺអាចទៅរួចក្នុងរយៈពេល១ឆ្នាំទៅ២ឆ្នាំ។ លោកបញ្ជាក់ថា ៖"ខ្ញុំគិតថា បញ្ហានេះ ស៊ីសងទៅលើមូលហេតុចម្បង តើបញ្ហាអ្វីខ្លះដែលនាំឲ្យឈានទៅដល់ការបោះឆ្នោតឡើងវិញ។ ហើយកម្ពុជា យើងមិនទាន់ដើរដល់ថៃទេ បើថាត្រូវបោះឆ្នោតឡើងវិញ ក៏ត្រូវការពេលវេលា យ៉ាងហោចណាស់ពី១ឆ្នាំ ទៅ២ឆ្នាំ ដើម្បីយើងរៀបចំ"៕
សរសេរមកកាន់ លោក តាំង វីដា តាមរយៈ vida@vodhotnews.com
No comments:
Post a Comment