ដោយ៖ បូ សាវី | ថ្ងៃអាទិត្យ ទី15 ខែធ្នូ ឆ្នាំ2013, VOD
ស្លាកគណបក្សប្រជាជនកម្ពុជា មួយផ្ទាំង ដែលមានរូបថ្នាក់ដឹកនាំទាំងបី ដាក់តាំងនៅគល់ស្ពានថ្ម ស្ទឹងសៀមរាប ក្បែរអតីតមន្ទីរទេសចរណ៍ខេត្ដសៀមរាប ស្ថិតនៅក្នុងសង្កាត់ស្លក្រាម ក្រុងសៀមរាប ត្រូវជនមិនស្គាល់អត្ដសញ្ញាណ យកថ្នាំពណ៌ក្រហម បាញ់លុបរូបថតថ្នាក់ដឹកនាំម្នាក់។
ស្លាកនោះ មានរូបលោក ជា ស៊ីម ប្រធានគណបក្ស លោក ហ៊ុន សែន អនុប្រធាន និងលោក ហេង សំរិន ប្រធានកិត្ដិយស។ រូបថ្នាក់ដឹកនាំបក្សកាន់អំណាចទាំងបី ត្រូវជនមិនស្គាល់មុខ យកថ្នាំពណ៌បាញ់ តែរូបលោកនាយករដ្ឋមន្ដ្រី ហ៊ុន សែន។
អភិបាលរងខេត្ដសៀមរាប លោក ប៊ុន ថាឬទ្ធិ ថ្លែងថា លោកមិនទាន់ទទួលព័ត៌មានជាក់លាក់ជុំវិញករណីនេះទេ ប៉ុន្តែលោកថា អាជ្ញាធរបានចុះទៅពិនិត្យស្លាកនោះហើយ។
យ៉ាងនេះក្ដី នាយកប្រតិបត្ដិអង្គការខុមហ្វ្រែល លោក គល់ បញ្ញា មានប្រសាសន៍ថា ករណីនេះ មិនប៉ះពាល់ដល់លទ្ធិប្រជាធិបតេយ្យធ្ងន់ធ្ងរឡើយ។ ប៉ុន្ដែលោកស្នើឲ្យអាជ្ញាធរ ដែលគ្រប់គ្រងអំណាចនៅតំបន់នោះ ស៊ើបអង្កេត រកមុខអ្នកដែលបានប្រព្រឹត្ដ ដើម្បីជៀសវាងការទម្លាក់កំហុសលើគណបក្សផ្សេង។ លោកថា ការបំផ្លាញស្លាកគណបក្សក្រោយពេលបោះឆ្នោតហើយនោះ មិនត្រូវគេចាត់ទុកជាករណីធ្ងន់ធ្ងរទេ។
បើតាមអាជ្ញាធរ ខេត្ដសៀមរាប ឲ្យដឹងថា ស្លាកគណបក្សប្រជាជនកម្ពុជា មិនធ្លាប់មានជនអនាមិកកាប់បំផ្លាញ និងទម្លាក់ចោលឡើយ ដែលខុសពីស្លាកគណបក្សសង្គ្រោះជាតិ ដែលដាក់តាមផ្លូវសាធារណៈមួយចំនួន ត្រូវជនមិនស្គាល់អត្ដសញ្ញាណបំផ្លាញអស់ជាង១០ស្លាក ហើយករណីនេះ មិនត្រូវសមត្ថកិច្ចដោះស្រាយនៅឡើយទេ៕
សូមសរសេរមកកាន់លោក បូ សាវី តាមរយៈ savy@vodhotnews.com
No comments:
Post a Comment