ដោយ៖ អ៊ឹង ប៊ុនថន | ថ្ងៃចន្ទ ទី11 ខែវិច្ឆិកា ឆ្នាំ2013 | 23 នាទី មុន
ប្រាសាទព្រះវិហារ (រូបថត បូ សាវី)
តុលាការយុត្តិធម៌អន្តរជាតិ ICJ នៅថ្ងៃចន្ទនេះ បានសម្រេចថា ដីដែលស្ថិតនៅជុំវិញប្រាសាទព្រះវិហារ គឺស្ថិតក្រោមអធិបតេយ្យភាពរបស់កម្ពុជា ហើយថៃត្រូវដកកងកម្លាំងរបស់ខ្លួនចេញពីតំបន់នោះ។
នេះជាការប្រកាសសាលដីកា របស់តុលាការយុត្តិធម៌អន្តរជាតិ បន្ទាប់ពីកម្ពុជាបានប្តឹងឲ្យតុលាការនេះ បកស្រាយឡើងវិញ លើសាលដីកាឆ្នាំ១៩៦២ ដោយសារតែភាគីថៃ ទាមទារកាន់កាប់ដីទំហំ៤,៦គីឡូម៉ែត្រក្រឡា ជុំវិញប្រាសាទព្រះវិហារ ដែលបានចុះបញ្ជីជាសម្បត្តិបេតិកភណ្ឌពិភពលោកនោះ។
លោកចៅក្រម Peter Tomka ថ្លែងក្នុងសវនាការរយៈពេលមួយម៉ោង ចាប់ពីម៉ោង៤ ដល់ម៉ោង៥រសៀលនេះ ៖"ដោយជាឯកច្ឆន្ទ សូមប្រកាសថា ក្នុងការបកស្រាយសាលដីកាឆ្នាំ១៩៦២ អង្គជំនុំជម្រះ សូមសម្រេចថា ប្រទេសកម្ពុជា មានអធិបតេយ្យភាពទៅលើដីនៅជុំវិញប្រាសាទព្រះវិហារ ដូចដែលការចែងនៅកថាខណ្ឌ៩៨ នៃសាលដីកានេះ ហើយដូច្នេះថៃត្រូវតែដកចេញពីទឹកដីនេះ កងទ័ព នគរបាល ហើយនឹងឆ្មាំទាំងអស់ដែលនៅតំបន់ព្រះវិហារនេះ"។
ទោះជាយ៉ាងណា តំបន់ភ្នំទ្រព្យ នៅជិតប្រាសាទព្រះវិហារ តុលាការមិនបកស្រាយថា ស្ថិតក្នុងអធិបតេយ្យភាពរបស់ប្រទេសណាឡើយ បើទោះជាតំបន់ភ្នំទ្រព្យនេះ ជាសមរភូមិប្រយុទ្ធរវាងកងទ័ពនៃប្រទេសទាំងពីរ ក្រោយពីកងទ័ពថៃវាយចូលតំបន់ប្រាសាទព្រះវិហារក៏ដោយ។ តុលាការយុត្តិធម៌អន្តរជាតិ ICJ បានសម្រេចឲ្យកម្ពុជាឈ្នះក្តីលើសំណុំរឿងប្រាសាទព្រះវិហារ កាលពីថ្ងៃទី១៥ ខែមិថុនា ឆ្នាំ១៩៦២។ តុលាការកំពូលនេះ បានបញ្ជាឲ្យ ថៃដកទង់ជាតិ និងកងទ័ពរបស់ខ្លួនចេញពីប្រាសាទព្រះវិហារ និងបរិវេណជុំវិញប្រាសាទ ព្រមទាំងប្រគល់វត្ថុបុរាណខ្មែរដែលថៃយកទៅនោះប្រគល់មកកម្ពុជាវិញ។ តាំងពីពេលនោះមក ជម្លោះត្រូវបានបញ្ចប់ទាំងស្រុង ប៉ុន្តែកងទ័ពឈុតខ្មៅថៃ ដែលបានវាយដណ្តើមកាន់កាប់ដីទំហំ៤,៦គីឡូម៉ែត្រក្រឡា ជុំវិញប្រាសាទព្រះវិហារ គឺមួយសប្តាហ៍ បន្ទាប់ពីកម្ពុជា បានចុះបញ្ជីប្រាសាទដ៏ចំណាស់នេះ ទៅជាសម្បត្តិបេតិកភណ្ឌពិភពលោក នៅថ្ងៃទី៧ខែកក្កដាឆ្នាំ២០០៨៕
សរសេរមកកាន់លោក អ៊ឹង ប៊ុនថន តាមរយៈ thorn@vodhotnews.com
1 comment:
នេះជាការរៀបចំនយោបាយរបស់យួនទេ សូមកុំចាប់អារម្មណ៏ពេក
យើង នឹងស្នើរ អោយតុលាការ យកករណី ចោរ លួចសន្លឹកឆ្នោត ទៅឡាអេ និង សើររើរឿងឧក្រឹតកម្ម របស់ រដ្ឋាភិបាលអាយ៉ងយួនបរទេស
សូម ងាកមករកជំងឺពិតរបស់កម្ពុជា រឿងដីមួយដុំតូច(៤.៦ គីឡូម៉ែត្រការរ៉េ)នៅក្បែរប្រសាទ
វាមិនសំខាន់ទេ សំខាន់យួនមានបំណងលេបយក កម្ពុជានៅជំនាន់នេះ ដូចជា
កោះ ត្រល់ ជាដើម ។
Post a Comment