ដោយ៖ តាំង វីដា និងស៊ុន ណារិន | ថ្ងៃពុធ ទី13 ខែវិច្ឆិកា ឆ្នាំ2013 | 1 ម៉ោង មុន
ស្ត្រី អាយុ៦៧ឆ្នាំ នៅព្រឹកថ្ងៃពុធនេះ បានគាំងបេះដូងស្លាប់ នៅពេលដឹងថាចៅរបស់ខ្លួន ត្រូវបានសមត្ថកិច្ច ចាប់ខ្លួននៅពេលប៉ះទង្គិចជាមួយកម្មកររោងចក្រSL នៅស្ពានស្ទឹងមានជ័យ។
នៅសៀលថ្ងៃពុធនេះ ម្តាយយុវជន ដែលត្រូវបានចាប់ខ្លួន និងត្រូវបានដោះលែងនោះ អ្នកស្រី យស់ ណយ មកពីខេត្តព្រៃវែង បានតាមមករកកូននៅស្នងការដ្ឋាននគរបាលរាជធានីភ្នំពេញ។ អ្នកស្រី ឲ្យដឹងទាំងទឹកភ្នែកថា ម្តាយរបស់អ្នកស្រី ដែលត្រូវជាយាយជនរងគ្រោះ បានគាំងបេះដូងស្លាប់នៅម៉ោងប្រមាណជា៩និង៣០នាទី ថ្ងៃពុធនេះ នៅពេលដឹងដំណឹងថាចៅ ត្រូវបានចាប់ខ្លួន ក្នុងពេលប៉ះទង្គិចរវាងកម្មករ និងកម្លាំងសមត្ថកិច្ច នៅស្ពានស្ទឹងមានជ័យ។
យុវជនដែលត្រូវដោះលែងនោះ មានឈ្មោះថា ធារ៉ា អាយុ១៩ឆ្នាំ ជាអ្នកលក់លៀសហាល។ យុវជនម្នាក់នេះ ត្រូវបានដោះលែង បន្ទាប់ពីអគ្គស្នងការដ្ឋាននគរបាលជាតិ ស៊ើបសួរហើយ ហើយរកឃើញថាមិនជាប់ពាក់ព័ន្ធ។
នៅរសៀលថ្ងៃពុធនេះ ស្នងការដ្ឋាននគរបាលរាជធានីភ្នំពេញ សម្រេចដោះលែងជនសង្ស័យ២៩នាក់ ដែលបានចាប់ខ្លួនពាក់ព័ន្ធនឹងករណីហិង្សាជាមួយសមត្ថកិច្ចកាលពីព្រឹកថ្ងៃអង្គារ តែឃុំខ្លួនពីរនាក់ ដោយសង្ស័យថាបានប្រើហិង្សាក្នុងពេលមានការប៉ះទង្គិច។ជនសង្ស័យទាំងពីរ ត្រូវចោទពីបទបំផ្លាញទ្រព្យសម្បត្តិសាធារណៈ និងប្រើហិង្សាលើកម្លាំងសមត្ថកិច្ច។ លោកបញ្ជាក់ថា ជនសង្ស័យពីរនាក់ ដែលត្រូវចោទនោះ មិនមែនជាកម្មកររោងចក្រSLទេ។
ក្នុងចំណោមជនសង្ស័យ២៩នាក់ ដែលត្រូវដោះលែង កម្មករSL មានតែ១នាក់ប៉ុណ្ណោះ ក្រៅពីនោះសុទ្ធតែជាអ្នកធ្វើដំណើរ ម៉ូតូឌុប និងពលរដ្ឋនៅតំបន់នោះ។ជនសង្ស័យម្នាក់ អាយុ១៥ឆ្នាំ មានមុខរើសអេតចាយ និងម្នាក់ទៀត អាយុ១៩ឆ្នាំ មុខរបរបើករម៉ក់ដឹកខ្សាច់។ អ្នកទាំងពីរ រស់នៅក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ក្នុងហេតុការណ៍ប៉ះទង្គិចគ្នានោះ គ្រាប់បែកផ្សែង រថយន្តពន្លត់អគ្គិភ័យ និងគ្រាប់កាំភ្លើង ត្រូវបានប្រើ ដើម្បីបង្ក្រាបក្រុមបាតុករ។ចំណែកកម្មករ បានប្រើដុំថ្មចោលលើសមត្ថកិច្ចវិញ និងបានដុតបំផ្លាញរថយន្តពីរគ្រឿង និងម៉ូតូពីរគ្រឿងរបស់សមត្ថកិច្ច។
សេចក្តីថ្លែងការណ៍របស់អគ្គស្នងការដ្ឋាននគរបាលជាតិ ចេញផ្សាយកាលពីថ្ងៃអង្គារ ឲ្យដឹងថា ក្នុងព្រឹត្តិការណ៍នៃការប៉ះទង្គិចនោះ ជនឱកាសនិយមមួយក្រុម ដែលមិនមែនជាកម្មករ បានឆ្លៀតញុះញង់បញ្ឆេះបង្កឲ្យមានអំពើហិង្សាមលើសមត្ថកិច្ច ដោយគប់ដុំថ្ម បាញ់ទឹកចំពាមគ្រាប់ដែក និងវាយដុតបំផ្លាញមធ្យោបាយ ព្រមទាំងហ៊ុំព័ទ្ធ ចាប់ខ្លួនកងកម្លាំងសមត្ថកិច្ចចំនួន៥នាក់ នៅវត្តស្ទឹងមានជ័យ។សេចក្តីថ្លែងការណ៍បន្តថា ស្ថិតក្នុងស្ថានភាពបែបនេះ ចាប់បង្ខំឲ្យកងកម្លាំងមានសមត្ថកិច្ច ត្រូវប្រើប្រាស់វិធានការសមស្រប ដើម្បីការពារខ្លួន រាំងស្កាត់អំពើហិង្សាកុំឲ្យរីករាលដាល និងការពារសន្តិសុខ សុវត្ថិភាពជូនកម្មករ ដែលធ្វើបាតុកម្មដោយសន្តិវិធី។
កាលពីព្រឹកថ្ងៃអង្គារ កម្មករជាង១ពាន់នាក់ ភាគច្រើនជាបុរស មកពីរោងចក្រSL ដែលមានទីតាំងនៅសង្កាត់បឹងទំពុន ខណ្ឌមានជ័យ គ្រោងហែក្បួនទៅកាន់ផ្ទះលោកនាយករដ្ឋមន្ត្រី ហ៊ុន សែន នៅក្បែរវិមានឯករាជ្យ ប៉ុន្តែក្បួនដង្ហែនេះ ត្រូវបានរារាំងត្រង់ចំណុចស្ពានស្ទឹងមានជ័យ ត្រើយខាងលិច ដោយសមត្ថកិច្ចប្រមាណ៣០០នាក់ ប្រដាប់ដោយខែល ដំបងឆក់។ ការរារាំងនេះ រហូតធ្វើឲ្យមានការប៉ះទង្គិចគ្នា៕
សូមសរសេរមកកាន់លោក តាំង វីដា តាមរយៈ vida@vodhotnews.com
1 comment:
she was too old, can not help
she died, due to natural caused,then blaming on polices for money..
Post a Comment