ដោយ៖ ស៊ុន ណារិន | ថ្ងៃអាទិត្យ ទី8 ខែកញ្ញា ឆ្នាំ2013, ម៉ោង 04:05 PM
ស្ថានទូត
អាមេរិកប្រចាំកម្ពុជា សម្តែងការព្រួយបារម្ភនឹងលទ្ធបោះឆ្នោត
ដែលត្រូវបានប្រកាសដោយគជប នៅព្រឹកថ្ងៃអាទិត្យនេះ
ដោយលើកឡើងពីសេចក្តីរាយការណ៍នៃភាពមិនប្រក្រតីមួយចំនួននៃការបោះឆ្នោត
។
គជប បានប្រកាសជាផ្លូវការថា
គណបក្សប្រជាជនកម្ពុជា ទទួលបាន៦៨អាសនៈ
ប្រហែលជា៤៨.៨ភាគរយនៃអ្នកចូលរួមបោះឆ្នោតសរុប៦.៦៣លាននាក់
ហើយគណបក្សសង្គ្រោះជាតិ ទទួលបាន៥៥អាសនៈ ស្មើនឹង៤៤.៥ភាគរយ គឺ២.៩២
លានសំឡេង។
អ្នកនាំពាក្យរបស់ស្ថានទូតអាមេរិក លោក
សៀន ម៉ាកគិនតូស (Sean McIntosh)
ប្រាប់VODតាមរយៈអ៊ីម៉េលនៅថ្ងៃអាទិត្យនេះថា សហរដ្ឋអាមេរិក
នៅតែព្រួយបារម្ភពីការរាយការន៍នៃភាពមិនប្រក្រតីធ្ងន់ធ្ងរនៃដំណើរការ
បោះឆ្នោត ហើយនៅតែអំពាវនាវឲ្យមានការស៊ើបអង្កេតពេញលេញ និងមានតម្លាភាព
ទៅលើភាពមិនប្រក្រតីទាំងឡាយ ដើម្បីឲ្យអ្នកបោះឆ្នោត
អាចទុកចិត្តបាន។លោកបន្តថា សហរដ្ឋអាមេរិក
អំពាវនាវឲ្យគ្រប់គណបក្សទាំងអស់ ចាប់យកឱកាសនេះ
ដើម្បីអនុវត្តកំណែទម្រង់តាមប្រជាធិបតេយ្យដ៏មានន័យ ពង្រឹងនីតិរដ្ឋ
និងបង្កើនការគោរពសម្រាប់សិទ្ធិមនុស្ស។
ក្នុងសន្និសីទសារព័ត៌មាននៅរសៀលថ្ងៃ
អាទិត្យនេះ គណបក្សសង្គ្រោះជាតិ បានច្រានចោលលទ្ធផលបោះឆ្នោត
ប្រកាសដោយគជប ដោយលើកឡើងថា លទ្ធផលនេះ
ត្រូវបានរៀបចំដោយគណបក្សប្រជាជនកម្ពុជា
និងត្រូវបានប្រថាប់ត្រាដោយគជប និងក្រុមប្រឹក្សាធម្មនុញ្ញ។
គណបក្សសង្គ្រោះជាតិ ក៏បានព្រមានធ្វើមហាបាតុកម្មទ្រង់ទ្រាយធំ
និងខ្លាំងក្លាជាងមុន រយៈពេលបីថ្ងៃពេញ
គឺចាប់ពីថ្ងៃទី១៥ដល់ទី១៧ខែកញ្ញា ដោយប្រជាជន
មិនត្រឡប់ទៅផ្ទះនោះទេ។ គណបក្សសង្គ្រោះជាតិ លើកឡើងថា បាតុកម្មនោះ
គឺដើម្បីទាមទារឲ្យមានការបង្កើតគណៈកម្មការឯករាជ្យ
ដោយមិនមានវត្តមានគជប។
សមាជិកគណៈអចិន្ត្រៃយ៍នៃគណៈកម្មាធិការ
កណ្តាល និងជាតំណាងរាស្ត្រនៃគណបក្សប្រជាជនកម្ពុជា លោក ជាម យៀប
ថ្លែងថា លទ្ធផលសន្លឹកឆ្នោតដែល គ.ជ.ប
ប្រកាសនៅព្រឹកថ្ងៃអាទិត្យនេះ គឺត្រឹមត្រូវគណបក្សប្រជាជនកម្ពុជា
ទទួលយកបាន។ លោកបញ្ជាក់ថា
ក្នុងដំណើរការបោះឆ្នោតមានការចូលរួមអង្កេតទាំងគណបក្សនយោបាយ
អង្គការសង្កមស៊ីវិលជាតិ និងអន្តរជាតិ ដូច្នេះលទ្ធផលនោះ
ពិតជាអាចជឿទុកចិត្តបាន។
លោកជាម យៀប បញ្ជាក់ថា
ពេលនេះគណបក្សប្រជាជនកម្ពុជា ត្រៀមខ្លួនចាំការកោះពីព្រះមហាក្សត្រ
ដើម្បីចូលរួមប្រជុំសភាលើកដំបូង។ តែលោកសម រង្ស៊ី ថ្លែងថា
គណបក្សសង្គ្រោះជាតិ នឹង ធ្វើពហិការចូលរួមប្រជុំសភា
ដែលនឹងធ្វើឲ្យរដ្ឋាភិបាលកម្ពុជា មិនត្រូវបានទទួលស្គាល់
និងមិនស្របតាមសន្ធិសញ្ញាទីក្រុងប៉ារីស៕
សរសេរមកកាន់ លោក ស៊ុន ណារិន តាមរយៈsun_narin@vodhotnews.com
No comments:
Post a Comment