ដោយ៖ ជន ស្រីណុច | ថ្ងៃអាទិត្យ ទី8 ខែកញ្ញា ឆ្នាំ2013 | VoD
(រូបភាពពី google.com)
គណបក្សសង្គ្រោះជាតិច្រានចោលលទ្ធផលផ្លូវការនៃបោះឆ្នោតថ្នាក់ជាតិ
នីតិកាលទី៥ ឆ្នាំ២០១៣
ចេញផ្សាយដោយគណៈកម្មាធិការជាតិរៀបចំការបោះឆ្នោត នៅព្រឹកថ្ងៃអាទិត្យ
ដោយហេតុផលថា
មិនបានដោះស្រាយបញ្ហាភាពមិនប្រក្រតីឲ្យបានត្រឹមត្រូវ។
ការប្រកាសច្រានចោល ធ្វើឡើងភ្លាមបន្ទាប់ពី គ.ជ.ប ប្រកាសលទ្ធផលសន្លឹកឆ្នោតផ្លូវការ នៅម៉ោង៨ព្រឹកថ្ងៃអាទិត្យនេះ។
អនុប្រធានគណបក្សសង្គ្រោះជាតិ លោក កឹម សុខា
បានច្រានចោលលទ្ធផលបោះឆ្នោតផ្លូវការ ដែលប្រកាសដោយ គ.ជ.ប
ព្រោះមិនបានធ្វើការស៊ើបអង្កេត
និងដោះស្រាយភាពមិនប្រក្រតីឲ្យបានត្រឹមត្រូវ។
នៅមហាបាតុកម្មព្រឹកថ្ងៃសៅរ៍ ទី០៧ ខែកញ្ញា
មេដឹកនាំគណបក្សសង្គ្រោះជាតិ បានប្រកាសថា
ខ្លួននឹងដឹកនាំធ្វើមហាបាតុកម្មទូទាំងប្រទេស បើ គ.ជ.ប
ប្រកាសលទ្ធផលនៃការបោះឆ្នោតផ្លូវការដោយមិនបានធ្វើការស៊ើបអង្កេត
ឲ្យបានត្រឹមត្រូវ។
តាមលទ្ធផលផ្លូវការស្តីពីការបោះឆ្នោតថ្នាក់ជាតិនីតិកាលទី៥
ដែលប្រកាសដោយ គ.ជ.ប នៅថ្ងៃទី០៨ ខែកញ្ញានេះ បានឲ្យដឹងថា
គណបក្សប្រជាជនកម្ពុជាទទួលបានជ័យជំនះលើខេត្តចំនួន១៥ក្នុងនោះ
រួមមាន បន្ទាយមានជ័យ បាត់ដំបង កោះកុង ក្រចេះ មណ្ឌលគិរី រតនៈគិរី ជាដើម។
ចំណែក គណបក្សសង្គ្រោះជាតិទទួលជ័យជំនះ លើខេត្តរាជធានី
ចំនួនបួនក្នុងនោះមាន ភ្នំពេញ កណ្តាល ព្រៃវែង និងកំពង់ចាម។
គណបក្សទាំងពីរទទួល បានអាសនៈស្នើគ្នាក្នុងខេត្តចំនួន៥
ក្នុងនោះមាន កំពង់ស្ពឺ កំពង់ធំ កំពត កំពង់ឆ្នាំង និងខេត្តតាកែវ៕
សូមសរសេរមកកាន់ កញ្ញា ជន ស្រីណុច តាមរយៈ chornsreynoch@vodhotnews.com
---------------------------------------------------------------ដោយ៖ ពៅ មេត្ដា | ថ្ងៃអាទិត្យ ទី8 ខែកញ្ញា ឆ្នាំ2013 |VoD
(រូបភាពពី google.com)
មន្ត្រីជាន់ខ្ពស់គណបក្សប្រជាជនកម្ពុជា
ប្រកាសទទួលស្គាល់លទ្ធផលផ្លូវការនៃសន្លឹកឆ្នោត
ដែលគណៈកម្មាធិការជាតិរៀបចំការបោះឆ្នោត
បានប្រកាសនៅព្រឹកថ្ងៃអាទិត្យ ទី០៨ ខែកញ្ញានេះ។
សមាជិកគណៈអចិន្ត្រៃយ៍នៃគណៈកម្មាធិការកណ្តាល
និងជាតំណាងរាស្ត្រនៃគណបក្សប្រជាជនកម្ពុជា លោក ជាម យៀប ថ្លែងថា
លទ្ធផលសន្លឹកឆ្នោតដែល គ.ជ.ប
ប្រកាសនៅព្រឹកថ្ងៃអាទិត្យនេះត្រឹមត្រូវគណបក្សលោកទទួលយកបាន។
លោកបញ្ជាក់ថា
ក្នុងដំណើរការបោះឆ្នោតមានការចូលរួមអង្កេតទាំងគណបក្សនយោបាយ
អង្គការសង្កមស៊ីវិលជាតិ និងអន្តរជាតិ ដូច្នេះលទ្ធផលនោះ
ពិតជាអាចជឿទុកចិត្តបាន។
លោក ជាម យៀប បញ្ជាក់ថា
ពេលនេះគណបក្សប្រជាជនកម្ពុជាត្រៀមខ្លួនចាំការកោះពីព្រះមហាក្សត្រ
ដើម្បីចូលរួមប្រជុំសភាលើកដំបូង។
តាមរដ្ឋធម្មនុញសភានឹងបើកកិច្ចប្រជុំលើកដំបូងយ៉ាងយូរ៦០ថ្ងៃ
ក្រោយការបោះឆ្នោតតាមការកោះរបស់ព្រះមហាក្សត្រ។
ទន្ទឹមនឹងការត្រៀមខ្លួនប្រជុំសភាលើកដំបូងនេះ លោក ជាម យៀប
ក៏បានបញ្ជាក់ដែរ គណបក្សប្រជាជន
នៅតែជួបប្រជុំជាមួយគណបក្សសង្គ្រោះជាតិ
ដើម្បីដោះស្រាយពីភាពមិនប្រក្រតី
ប្រសិនបើមានការស្នើសុំពីគណបក្សសង្គ្រោះជាតិនោះ៕
សូមសរសេរមកកាន់ លោក ពៅ មេត្តា តាមរយៈ minpov@vodhotnews.com
No comments:
Post a Comment