ព្រះអង្គម្ចាស់នរោត្តម អរុណរស្មី យាងទៅបោះឆ្នោតជាតិអាណ្តតិទី៥ កាលពីព្រឹកថ្ងៃទី២៨កក្កដា ឆ្នាំ២០១៣ នៅខេត្តកំពង់ចាម។
RFI/Leang Delux
http://www.khmer.rfi.fr
]
ក្នុងសមាសភាពសមាជិករដ្ឋាភិបាលអាណត្តិទី៥នេះ គ្មានទៀតឡើយមន្ត្រីកូតាហ៊្វុនស៊ីនប៉ិច ដូច៤អាណត្តិមុន ក្នុងនាមជាគណបក្សដៃគូ របស់គណបក្សប្រជាជនកម្ពុជា។ ធៀបជាមួយអាណត្តិមុន ហ៊្វុនស៊ិនប៉ិចបានបាត់បង់តំណែង៥៥កន្លែង។ ទោះយ៉ាងណាក៏ដោយ អ្នកនាំពាក្យគណបក្សប្រជាជនកម្ពុជា បានអះអាងថា គណបក្សលោកនឹងប្រកាសអំពីគោលការណ៍សម្ព័ន្ធភាពជាមួយគណបក្សហ៊្វុនស៊ីនប៉ិច ក្នុងពេលខាងមុខ។
កាលពីអាណត្តិទី៤កន្លងទៅនេះ គណបក្សហ៊្វុនស៊ិនប៉ិចដែលបានឈ្នះអាសនៈ ក្នុងរដ្ឋសភាតែ២ ក្នុងនាមជាគណបក្សដៃគូរដ្ឋាភិបាលចម្រុះជាមួយគណបក្សប្រជាជនកម្ពុជា គណបក្សនេះបានផ្តល់តំណែងរដ្ឋលេខាធិការមួយ និងអនុរដ្ឋលេខាធិការមួយដល់គណបក្សហ៊្វុនស៊ិនប៉ិច នៅគ្រប់ក្រសួងនីមួយៗ។ ដូច្នេះ បើតាមរាប់ទាំងតំណែងឧបនាយករដ្ឋមន្ត្រីរបស់លោក ញឹក ប៊ុនឆៃ គណបក្សហ៊្វុនស៊ិនប៉ិច បានមានតំណែងយ៉ាងហោចណាស់៥៥ដែរ នៅក្នុងអាណត្តិទី៤នោះ។
ក្នុងអាណត្តិនេះ គ្មានទៀតឡើយសមាជិកគណបក្សហ៊្វុនស៊ិនប៉ិចនៅក្នុងរដ្ឋាភិបាល នេះបើតាមការបញ្ជាក់របស់លោកកែវ ពុទ្ធរស្មី មគ្គុទេសក៏របស់គណបក្សហ៊្វុនស៊ិនប៉ិច។ មគ្គុទេសក៏រូបនេះបានប្រាប់វិទ្យុបារាំង នៅថ្ងៃពុធនេះថា គណបក្សហ៊្វុនស៊ិនប៉ិចនឹងប្រើប្រាស់រយៈពេល៥ឆ្នាំទៅមុខ ដើម្បីពង្រឹងរចនាសម្ព័ន្ធ និងប្រជាប្រិយភាពនេះឡើងវិញ និងបន្តធ្វើការងារពង្រឹងលទ្ធិប្រជាធិបតេយ្យ និងជួយរួមចំណែកអភិវឌ្ឍប្រទេសកម្ពុជា។
ប្រសិនបើ លោកកែវ ពុទ្ធរស្មី ក្នុងលក្ខខណ្ឌសព្វថ្ងៃនេះ នៅរារែកមិនហ៊ានហៅគណបក្សហ៊្វុនស៊ិនប៉ិចខ្លួនឯងថា ជាគណបក្សសម្ព័ន្ធភាពជាមួយគណបក្សប្រជាជនកម្ពុជានោះ លោកខៀវ កាញារីទ្ធ បញ្ជាក់ថា គណបក្សហ៊្វុនស៊ិនប៉ិចនៅតែជាគណបក្សសម្ព័ន្ធភាពរបស់គណបក្សប្រជាជនកម្ពុជាដដែល។ គ្រាន់តែថា គេមិនអាចមានសមាជិកហ៊្វុនស៊ិនប៉ិចក្លាយជាសមាជិករដ្ឋាភិបាលឡើយ ដោយសារតែហ៊្វុនស៊ិនប៉ិចមិនបានឈ្នះអាសនៈ នៅក្នុងរដ្ឋសភា។ លោកខៀវ កាញារីទ្ធ បន្តថា គណបក្សប្រជាជនកម្ពុជារបស់លោកក៏គ្មានគោលការណ៍បង្កើតរដ្ឋាភិបាលចម្រុះឡើយក្នុងអាណត្តិនេះ។
ទោះយ៉ាងណាក៏ដោយ មន្ត្រីជាន់ខ្ពស់រូបនេះអះអាងថា គណបក្សប្រជាជនកម្ពុជារបស់លោក នឹងប្រកាសអំពីគោលការណ៍សម្ព័ន្ធភាពជាមួយគណបក្សហ៊្វុនស៊ិនប៉ិច ក្នុងពេលខាងមុខ។
គួររម្លឹកថា និយាយអំពីតំណែងរបស់សមាជិកគណបក្សហ៊្វុនស៊ិនប៉ិចដដែល គេអាចចោទសួរអំពីតំណែងឯកអគ្គរាជទូតកម្ពុជាប្រចាំប្រទេសម៉ាឡេស៊ី ដែលកាន់កាប់ដោយព្រះអង្គម្ចាស់ក្សត្រី នរោត្តម អារុណ រស្មី។ ត្រង់ចំនុចនេះ លោកមគ្គុទេសន៍គណបក្សហ៊្វុនស៊ិនប៉ិចបានបញ្ជាក់ថា តំណែងឯកអគ្គរាជទូតរបស់ព្រះអង្គម្ចាស់ក្សត្រី ប្រធានគណបក្សហ៊្វុនស៊ិនប៉ិចនោះ ត្រូវបានតែងតាំង ក្នុងក្របខណ្ឌព្រះមហាក្សត្រតែប៉ុណ្ណោះ៕
4 comments:
Post a Comment