អ្នកដឹកនាំគណបក្សសង្គ្រោះជាតិ បានអះអាងជាថ្មីម្តងទៀតថា ការដែលសមាជិកសភាមកពីគណបក្សសង្គ្រោះជាតិ មិនចូលរួមសម័យប្រជុំដំបូងរបស់រដ្ឋសភាអាណត្តិទី៥ គឺជាការត្រឹមត្រូវ និងជាបំណងដែលប្រជាពលរដ្ឋខ្មែរចង់បាន។
ដោយ កែវ និមល
2013-09-25 RFA
អ្នកដឹកនាំគណបក្សសង្គ្រោះជាតិ បានថ្លែងបញ្ជាក់នៅក្នុងសន្និសីទកាសែត នៅថ្ងៃទី២៥ កញ្ញា នៅទីស្នាក់ការគណបក្សសង្គ្រោះជាតិ ថា ការមិនចូលរួមរបស់សមាជិកសភាគណបក្សសង្គ្រោះជាតិ ក្នុងសម័យប្រជុំដំបូងរបស់រដ្ឋសភា គឺជាការគោរពតាមច្បាប់រដ្ឋធម្មនុញ្ញ និងគោរពតាមឆន្ទៈប្រជាពលរដ្ឋ។
លោក កឹម សុខា អនុប្រធានគណបក្សសង្គ្រោះជាតិ បានថ្លែងថា សមាជិកសភាចំនួន ៥៥រូបរបស់គណបក្សសង្គ្រោះជាតិ មិនចូលរួមសម័យប្រជុំដំបូង និងសម័យលើកទី១ របស់រដ្ឋសភាអាណត្តិទី៥ នេះ គឺគោរពតាមបំណងរបស់ប្រជាពលរដ្ឋ ដែលទាមទារថា ការប្រជុំសភាដំបូងនោះត្រូវតែមានការដោះស្រាយបង្ហាញការពិត ទាក់ទងលទ្ធផលការបោះឆ្នោតជាមុនសិន និងត្រូវមានការគោរពច្បាប់។
លោក កឹម សុខា បានប្រកាសថា គណបក្សប្រជាជនកម្ពុជា មិនត្រឹមតែបិទបាំងភាពត្រឹមត្រូវនៃលទ្ធផលការបោះឆ្នោតប៉ុណ្ណោះទេ គឺថែមទាំងរំលោភរដ្ឋធម្មនុញ្ញ និងអនុវត្តមាត្រាធម្មនុញ្ញបន្ថែម ដោយខុសឆ្គងទៅទៀត។
លោក សម រង្ស៊ី ប្រធានគណបក្សសង្គ្រោះជាតិ បានហៅរដ្ឋសភាថ្មី និងរដ្ឋាភិបាលថ្មី ដែលទើបបង្កើតនោះថា ជារដ្ឋាភិបាលកុម្មុយនីស្តទៀតផង ដោយសាររដ្ឋសភានោះមានសមាជិកមកពីគណបក្សតែមួយ និងបានបោះឆ្នោតបង្កើតរដ្ឋាភិបាលមួយតាមនីតិវិធីមិនត្រឹមត្រូវ។
កាលពីថ្ងៃទី២៤ កញ្ញា លោកនាយករដ្ឋមន្ត្រី ហ៊ុន សែន បានថ្លែងនៅក្នុងបរិវេណវិមានរដ្ឋសភាថា ការចោទថា រដ្ឋសភាថ្មីនេះជារដ្ឋសភាឯកបក្ស ជាពាក្យមិនត្រឹមត្រូវ ពីព្រោះទ្វាររដ្ឋសភាបើកចំហស្វាគមន៍សមាជិករដ្ឋសភាមកពីគណបក្សសង្គ្រោះជាតិ ជានិច្ច ប៉ុន្តែ សមាជិកសភាទាំងនោះបានធ្វើពហិការមិនចូលប្រជុំ ហើយនាំគ្នាទៅខេត្តសៀមរាប ទៅវិញ។
ទាក់ទងជាមួយការចូលប្រជុំសភានៅពេលអនាគត លោក សម រង្ស៊ី បានមានប្រសាសន៍នៅក្នុងសន្និសីទកាសែតថា គណបក្សសង្គ្រោះជាតិ នឹងពិចារណាការចូលប្រជុំក្នុងរដ្ឋសភានោះក្នុងលក្ខខណ្ឌថា កាលណាគណបក្សប្រជាជនកម្ពុជា យល់ព្រមបង្កើតគណៈកម្មាធិការស៊ើបអង្កេតការពិត ទាក់ទងលទ្ធផលការបោះឆ្នោត និងយល់ព្រមធ្វើការកែទម្រង់ផ្សេងៗ បម្រើដល់ផលប្រយោជន៍ប្រជាពលរដ្ឋទូទៅ។
ចំពោះការចោទប្រកាន់របស់លោកនាយករដ្ឋមន្ត្រី ហ៊ុន សែន ថា កន្លងមកតំណាងគណបក្សសង្គ្រោះជាតិ ចូលរួមប្រជុំជាមួយតំណាងគណបក្សប្រជាជនកម្ពុជា ផ្ដោតការពិភាក្សាទៅលើការទាមទារអំណាចគ្រប់គ្រងរដ្ឋសភានោះ លោក កឹម សុខា អនុប្រធានគណបក្សសង្គ្រោះជាតិ បានពន្យល់ឲ្យដឹងថា តាមសំណូមពររបស់ប្រជាពលរដ្ឋ គឺការបោះឆ្នោតអាណត្តិទី៥ ដើម្បីឲ្យមានការផ្លាស់ប្ដូរ។ ដូច្នេះ ការបែងចែកការគ្រប់គ្រងស្ថាប័នរដ្ឋសភា មកឲ្យគណបក្សសង្គ្រោះជាតិ និងការគ្រប់គ្រងរដ្ឋាភិបាលដោយគណបក្សប្រជាជនកម្ពុជា នោះ គឺជាការបែងចែកអំណាចឲ្យមានតុល្យភាពក្នុងការគ្រប់គ្រងប្រទេស។
ក្រៅពីប្រកាសមិនទទួលស្គាល់រដ្ឋសភា និងរដ្ឋាភិបាលថ្មីនេះ អ្នកដឹកនាំគណបក្សសង្គ្រោះជាតិ បានព្រមានថានឹងធ្វើបាតុកម្មតវ៉ា ហើយបានអំពាវនាវសុំសហគមន៍អន្តរជាតិ កុំទទួលស្គាល់រដ្ឋាភិបាលថ្មីនេះ និងបានព្រមានចំពោះក្រុមហ៊ុនអន្តរជាតិធំៗ សុំកុំចុះកុងត្រាជំនួញជាមួយរដ្ឋាភិបាលនេះ ពីព្រោះកុងត្រាទាំងនោះអាចត្រូវបដិសេធនៅពេលអនាគត។
ចំពោះទំនាស់គណបក្សនយោបាយឈ្នះឆ្នោតទាំង២ នៅកម្ពុជា នេះ នៅក្នុងថ្ងៃទី២៥ កញ្ញា នេះដែរ លោក សុរិយា ស៊ូប៊ែឌី (Surya Subedi) អ្នករាយការណ៍ពិសេសអំពីបញ្ហាសិទ្ធិមនុស្សនៅកម្ពុជា របស់អង្គការសហប្រជាជាតិ បានថ្លែងនៅក្នុងសេចក្តីថ្លែងការណ៍ ជំរុញឲ្យមានការបន្តចរចារវាងអ្នកដឹកនាំនៃគណបក្សនយោបាយដែលឈ្នះឆ្នោតទាំង២ នៅកម្ពុជា ដើម្បីដោះស្រាយវិបត្តិដែលប្រទេសកម្ពុជា កំពុងជួបប្រទះបច្ចុប្បន្ននេះឲ្យចប់ឆាប់រហ័ស។
លោក សុរិយា ស៊ូប៊ែឌី បានរៀបរាប់ថា ការបោះឆ្នោតនៅកម្ពុជា លើកនេះ មានប្រជាពលរដ្ឋពាក់កណ្ដាលបោះឆ្នោត គាំទ្រគណបក្សមួយ ហើយពាក់កណ្ដាលទៀត គាំទ្រគណបក្សមួយទៀត។ ដូច្នេះ វាមានភាពចាំបាច់ណាស់ដែលតម្រូវឲ្យរដ្ឋសភាថ្មីនេះ មានសមាជិកសភាតំណាងឲ្យគណបក្សទាំង២ ហើយរដ្ឋសភាថ្មីនេះត្រូវតែមានភាពតំណាងពិតប្រាកដឲ្យប្រជាពលរដ្ឋទាំងអស់ ដែលបានបោះឆ្នោតកាលពីថ្ងៃទី២៨ កក្កដា កន្លងមក៕
No comments:
Post a Comment