តំណាងរាស្ត្រជាប់ឆ្នោតរបស់គណបក្សសង្គ្រោះជាតិ ទាំង ៥៥រូប សម្រេចសរសេរលិខិតថ្វាយព្រះមហាក្សត្រ ទូលថ្វាយពីជំហរមិនចូលរួមប្រជុំសភាជាលើកដំបូងនៅថ្ងៃច័ន្ទ ទី២៣ ខែកញ្ញា ឡើយ។ ការសម្រេចនេះ ធ្វើឡើងបន្ទាប់ពីមានកិច្ចប្រជុំបិទទ្វារមួយនៅរសៀលថ្ងៃទី១៤ ខែកញ្ញា ឆ្នាំ២០១៣ នៅទីស្នាក់ការកណ្ដាលគណបក្សសង្គ្រោះជាតិ។
មន្ត្រីអ្នកនាំពាក្យគណបក្សប្រឆាំង លោក យឹម សុវណ្ណ មានប្រសាសន៍ថា គណបក្សអនុញ្ញាតឲ្យបេក្ខជនជាប់ឆ្នោតទាំងអស់ជ្រើសរើសថា នឹងទៅចូលរួមប្រជុំសភាថ្មីលើកដំបូង ឬក៏អត់?
លោកបន្តថា ឆ្លងកាត់ការពិភាក្សាគ្នាល្អិតល្អន់ តំណាងរាស្ត្រជាប់ឆ្នោតថ្មីទាំងអស់យល់ថា ការរកយុត្តិធម៌ជូនម្ចាស់ឆ្នោតជាប្រការសំខាន់បំផុត ហើយឯកភាពគ្នាថា នឹងដាក់លិខិតទូលថ្វាយព្រះមហាក្សត្រ ដើម្បីឲ្យព្រះអង្គពន្យារពេលក្នុងការបើកកិច្ចប្រជុំសភាជាលើកដំបូងដែលគ្រោងធ្វើនៅថ្ងៃទី២៣ ខែកញ្ញា ឆ្នាំ២០១៣ ខាងមុខ។
ទោះយ៉ាងណាក្តី គណបក្សសង្គ្រោះជាតិ មិនទាន់កំណត់ថ្ងៃថ្វាយលិខិតស្នើសុំព្រះរាជានុញ្ញាតពន្យារពេលបើកកិច្ចប្រជុំសភាជាលើកដំបូងនៅឡើយទេ៕
No comments:
Post a Comment