Yim Sovan said Sam Rainsy will return home to lead an election rally in Cambodia លោក យឹម សុវណ្ណ ប្រកាសថា លោក​សម​រង្ស៊ី នឹង​វិល​មក​ដឹកនាំ​ក្បួន​ឃោសនាបោះឆ្នោត របស់​គណបក្សប្រឆាំង​

(ថ្ងៃទី 6 កក្កដា 2013,) | ដោយ: មុនីរាជ CEN

ភ្នំពេញ: អ្នកនាំពាក្យ​គណបក្ស​សង្គ្រោះ​ជាតិ លោក យឹម សុវណ្ណ បានប្រកាសថា លោក​សម​រង្ស៊ី នឹង​វិល​មក​កាន់​ប្រទេស​កម្ពុជា​វិញ ក្នុង​ពេល​ឆាប់​ខាងមុខនេះ ដើម្បី​ដឹកនាំ​ក្បួន​ឃោសនា​បោះឆ្នោត​របស់​គណ​បក្សប្រឆាំង​។ ក៏​ប៉ុន្តែ​លោក យឹម សុវណ្ណ មិន​បានបញ្ជាក់​ច្បាស់​ថា លោក​សម​រង្ស៊ី នឹង​វិល​មក​វិញ នៅ​ថ្ងៃ​ណា​ឲ្យ​ច្បាស់​នោះ​ទេ​។​

​ចំពោះ​សំណួរ​ថា បើសិនជា​លោក​សម​រង្ស៊ី វិល​មក​វិញ នឹង​ត្រូវ​ប្រឈម​ផ្លូវច្បាប់ ដោយ​ត្រូវ​ជាប់ពន្ធនាគារ​ជា​ដើម​នោះ ត្រូវបាន​លោក យឹម សុវណ្ណ បដិសេធ​មិន​អត្ថាធិប្បាយ​ទេ​។ តែ​លោក​ថា លោក​សម​រង្ស៊ី នឹង​លះបង់​អ្វីៗ​ទាំងអស់ ដើម្បី​ប្រជាពលរដ្ឋ​កម្ពុជា​។​

​ លោក យឹម សុវណ្ណ បាន​ថ្លែង​ដូច្នេះ បន្ទាប់​ពី​គណបក្ស​សង្គ្រោះ​ជាតិ បាន​រៀបចំ​ពិធី​បង្សុកូល ឧទ្ទិស​កុសល ជូន​ដល់​ជនរងគ្រោះ​អ្នកស្លាប់ ក្នុង​ព្រឹត្តិការណ៍​ផ្ទុះអាវុធ កាលពី​ថ្ងៃ​ទី​៥ និង​ថ្ងៃ​ទី​៦ ខែកក្កដា ឆ្នាំ​១៩៩៧​។ ពិធី​ជួបជុំ​នោះ ធ្វើឡើង នៅ​ទីស្នាក់ការ​គណបក្ស​សង្គ្រោះ​ជាតិ នៅ​ចាក់អង្រែលើ ខណ្ឌមានជ័យ រាជធានី​ភ្នំពេញ នា​ព្រឹក​ថ្ងៃទី​៦ ខែកក្កដា ឆ្នាំ​២០១៣។


លោកសមរង្ស៊ី ត្រូវបានតុលាការផ្តន្ទាទោសកំបាំងមុខ ដាក់ពន្ធនាគារជាង ១០ ឆ្នាំ ក្នុង​សំណុំ​រឿង​ព្រំដែនកម្ពុជាវៀតណាម កាលពីចុងឆ្នាំ២០០៩។ លោកសមរង្ស៊ី បាន​ចាក​ចេញ​ទៅ​ក្រៅ​ប្រទេស មុនពេលតុលាការ កាត់ទោសកំបាំងមុខលើរូបលោក៕

- See more at: http://www.cen.com.kh/localnews/show_detail/19?token=NmVkZGNkNG#sthash.UJnFivzW.dpuf