Kem Sokha summoned to court a second time on 5th July តុលា​ការចេញ​ដីកាកោះ​ឲ្យ​លោក កឹម សុខា ចូលខ្លួន​ជា​លើក​ទី​២​នៅ​ថ្ងៃទី​៥ កក្កដា

Kem Sokha campaigns in Kampong cham on 28th June, 2013.
 
(ថ្ងៃទី 2 កក្កដា 2013, ) | ដោយ: មុនី​រាជ​ CEN

ភ្នំពេញ: លោក កឹម សុខា ប្រធានស្តីទី​គណបក្ស សង្គ្រោះ​ជាតិ ត្រូវបាន​តុលាការ​សាលាដំបូង​រាជធានី​ភ្នំពេញ ចេញ​កោះ​ដី​កោះ ឲ្យ​ចូលខ្លួន ជា​លើក​ទី​២ ទៅកាន់​តុលាការ​នៅ​ថ្ងៃទី​៥ ខែកក្កដា ឆ្នាំ​២០១៣ ខាងមុខនេះ ដើម្បី​ធ្វើការ​សាកសួរ​អំពី​ដំណើររឿង បរិហាកេរ្តិ៍​ជា​សាធារណៈ តាម​បណ្តឹង​របស់​ក្រុម​ជនរងគ្រោះ​រស់រានមានជីវិត​ពី​ការសម្លាប់​នៅ​គុក​ ទួលស្លែង​បាន​ប្តឹង​។​

​    ​

​ការចេញ​ដីកាកោះ​ឲ្យ​លោក កឹម សុខា ចូលខ្លួន​ជា​លើក​ទី​២ នេះ គឺ​បន្ទាប់ពី​ដីកាកោះ​លើក​ទី​១ ឲ្យ​ចូលខ្លួន​នៅ​ថ្ងៃទី​២៧ ខែមិថុនា ឆ្នាំ​២០១៣ លោក កឹម សុខា មិនបាន​ទៅ​ចូលខ្លួន​នៅ​តុលាការ​ឡើយ​។​

​    ​

​មន្ត្រី​តុលាការ​បាន​ ឲ្យ​ដឹង​កាលពី​ល្ងាច​ថ្ងៃទី​២ ខែកក្កដា ថា តុលាការ​បាន​បញ្ជូន​ដីកាកោះ​ជា​លើក​ទី​២ ទៅជូន​លោក កឹម សុខា ប្រធានស្តីទី​គណបក្ស សង្គ្រោះ​ជាតិ ដើម្បី​ឲ្យ​ចូលខ្លួន​មកកាន់​តុលាការ​សាលាដំបូង​រាជធានី​ភ្នំពេញ នៅ​ថ្ងៃទី​៥ ខែកក្កដា ឆ្នាំ​២០១៣​។ ហើយ​ត្រូវបាន​មន្ត្រី​គណបក្ស សង្គ្រោះ​ជាតិ ទទួលយក​ហើយ​កាលពី​ព្រឹក​ថ្ងៃទី​២ ខែកក្កដា ឆ្នាំ​២០១៣​។

​មន្ត្រី​ ដដែល​បាន​ឲ្យ​ដឹង​ទៀតថា ដីកាកោះ​នេះ​គឺ​ចេញ​ដោយ​លោក មាស ច័ន្ទ​ពិសិដ្ឋ ព្រះរាជ​អាជ​រង និង​ជា​តំណាង អយ្យការ​អម សាលាដំបូង​រាជធានី​ភ្នំពេញ ចុះ​ថ្ងៃទី​២៨ ខែមិថុនា ឆ្នាំ​២០១៣ ហើយ​ត្រូវបាន​បញ្ជូនទៅ​លោក កឹម សុខា កាលពី​ថ្ងៃទី​២ ខែ​ក្កដា ឆ្នាំ​២០១៣​។​

​ចំណែក​លោក ជូ​ង ជូ​ងី មេធាវី​ការពារ​ក្តី​លោក កឹម សុខា បាន​ប្រាប់​អ្នកកាសែត​ថា នៅ​ថ្ងៃទី​៣ ខែកក្កដា លោក​យក​លិខិត ទៅ​តុលាការ សុំ​ពន្យា​ពេល ឲ្យ​ចប់​យុទ្ធនាការ​ឃោសនាបោះឆ្នោត និង​ការបោះឆ្នោត​រួចរាល់​សិន​។ ដោយ​លោក​បាន​ថ្លែងថា  បើ​លោក កឹម សុខា ទៅ​តុលាការ​ក្នុងពេល​យុទ្ធនាការ​ឃោសនាបោះឆ្នោត និង​មាន​ប្រជាពលរដ្ឋ​ជាច្រើន ទៅជា​មួយ ធ្វើ​ឲ្យ​ប៉ះពាល់ ដល់​ចរាចរណ៍​...​ពីព្រោះ​គាត់​ជា​ប្រធានស្តីទី​គណបក្ស សង្គ្រោះ​ជាតិ មាន​មហាជន​គាំទ្រ​គាត់​ច្រើន ហើយ​បើ​គាត់​ទៅ​តុលាការ​អាចមាន​មនុស្ស​រាប់ម៉ឺន​នាក់​ទៅតាម​។

​លោក ជូ​ង ជូ​ងី បាន​បញ្ជាក់ថា លោក​បានរៀបចំ​ឯកសា​រដាក់​សុំ​ពន្យា​ពេល ហើយ​គម្រោង​នឹងដាក់​នៅ​ថ្ងៃទី​៣ ខែកក្កដា ឆ្នាំ​២០១៣​។ រឿងនេះ​មិនមែនជា​រឿង​ជាបន្ទាន់​អ្វី​ទេ គឺ​តុលាការ​ចាត់ការ​តាម​សម្រួល​ទៅ មិនជា​បង្ខំ​អ្វី​ពេក​ទេ​។​

​សូម​រម្លឹកថា ជនរងគ្រោះ​ក្នុង​របប​កម្ពុជា​ប្រជាធិបតេយ្យ​(​របប​ខ្មែរក្រហម​)​ចំនួន​៤​ នាក់ គឺ​លោក​ជុំ ម៉ី​,​លោក នង ចាន់​ផល​,​លោក នង ចាន់ថន និង​អ្នកស្រី ជិន ម៉េ​ត បានដាក់​ពាក្យបណ្តឹង​ប្តឹង​លោក កឹម សុខា ពីបទ​បរិហាកេរ្តិ៍ និង​ទាមទារ​សំណង ជំងឺ​ចិត្ត ១​ពាន់​ដុល្លារ ទៅ​សាលាដំបូង​រាជធានី​ភ្នំពេញ​កាលពី​ថ្ងៃទី​១៤ ខែមិថុនា ឆ្នាំ​២០១៣​។ ហើយ​នៅ​ថ្ងៃទី​២៤ ខែមិថុនា ឆ្នាំ​២០១៣ តុលាការ​បាន​កោះហៅ​ជនរងគ្រោះ​ទាំង​៤​នាក់ ចូល​បំភ្លឺ​អំពី​ដំណើររឿង​ដែល​បាន​ប្តឹង​លោក កឹម សុខា​៕ - See more at: http://www.cen.com.kh/localnews/show_detail/135?token=MWZkMzJkNT#sthash.yRd6fNPY.dpuf