A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Sunday 21 July 2013

Four Cambodian "illegal loggers" shot dead by Thai soldiers ពលរដ្ឋ​ខ្មែរ​៤​នាក់​ស្លាប់​និង​២​នាក់​របួស​ដោយសារ​ទាហាន​ថៃ​បាញ់

ពលរដ្ឋ​ខ្មែរ​ចំនួន ៤​នាក់​ស្លាប់ និង ២​នាក់​ផ្សេង​ទៀត​រង​របួស ដោយសារ​ទាហាន​ថៃ​ បាញ់​រះ ក្នុង​ពេល​ឆ្លង​ដែន​រក​កាប់​ឈើ​គ្រញូង​ក្នុង​ទឹកដី​ថៃ។
ដោយ ហង្ស សាវយុត RFA
2013-07-21
ប្រភព​ពី​ប្រជាពលរដ្ឋ​នៅ​ស្រុក​អន្លង់វែង និង​ស្រុក​ត្រពាំងប្រាសាទ ខេត្ត​ឧត្តរមានជ័យ បាន​អះអាង​ថា យ៉ាង​ហោច​ណាស់​​មាន​អ្នក​ភូមិ​ខ្មែរ​ចំនួន ៤​នាក់​ស្លាប់ និង ២​នាក់​ផ្សេង​ទៀត​រង​របួស ដោយ​សារ​ទាហាន​ថៃ​ បាញ់​រះ នៅ​កន្លែង​២​ផ្សេង​គ្នា ក្នុង​ពេល​ឆ្លង​ដែន​រក​កាប់​ឈើ​គ្រញូង​ក្នុង​ទឹកដី​ថៃ។
​បុរស​ម្នាក់​ជា​អ្នក​ភូមិ​ថ្នល់កែង នៃ​ឃុំ​ផ្អាវ ស្រុក​ត្រពាំងប្រាសាទ ដែល​សុំ​មិន​បញ្ចេញ​ឈ្មោះ បាន​មាន​ប្រសាសន៍​កាល​ពី​រសៀល​ថ្ងៃ​អាទិត្យ ទី​២១ ខែ​កក្កដា ថា អ្នក​ភូមិ​របស់​គាត់​ចំនួន ២​នាក់ បាន​ស្លាប់ និង​ម្នាក់​រង​របួស​កាល​ពី ៥​ថ្ងៃ​មុន នៅ​ពេល​ឆ្លង​ដែន​ទៅ​រក​កាប់​ឈើ​គ្រញូង​ខុស​ច្បាប់​ក្នុង​ទឹក​ដី​ថៃ នៃ​ខេត្ត​ស៊ីសាកេត។
បុរស​ដដែល​បាន​បញ្ជាក់​ថា ជន​រងគ្រោះ​ទាំង​នោះ ម្នាក់​ឈ្មោះ ថា អាយុ​ជាង ២០​ឆ្នាំ និង​ឈ្មោះ សែន អាយុ​ប្រមាណ ១៥​ឆ្នាំ ជា​បងប្អូន​នឹង​គ្នា​បាន​ស្លាប់។ ចំណែក​ឯ​ម្នាក់​ទៀត​ឈ្មោះ ពៅ ភាព បាន​រង​របួស​នៅ​ពេល​ឆ្លង​ព្រំដែន​ទៅ​កាប់​ឈើ​គ្រញូង​នៅ​ម្ដុំ​ចំណុច​អតីត​ ចម្ការ​ខ្នុរ តាម៉ុក ភាគ​ខាង​កើត​ពី​ច្រក​ព្រំដែន​ក្បាល​ទន្សោង៖ «គាត់​ ទៅ​រក​ឈើ​គ្រញូង​នៅ​ក្នុង​ដី​ថៃ។ គ្នា​គាត់ ៥​នាក់ ដល់​អ៊ីចឹង​ថៃ បាញ់​ស្លាប់ ២​នាក់ របួស​ម្នាក់ ហើយ​ក្មេងៗ ២​នាក់​នោះ រត់​រួច​ទាំង​អស់ ម្នាក់​ទៀត​អ្នក​របួស។ ប៉ូលិស​ខាង​ខេត្ត​គាត់​យក​ទៅ​សួរ​នៅ​ខេត្ត​ហើយ»

ចំណែក​នៅ​ឯ​ច្រក​ព្រំដែន ឃុំ​ត្រពាំងតាវ ស្រុក​អន្លង់វែង ​មាន​សេចក្ដី​រាយការណ៍​ថា ទាហាន​ការពារ​ព្រំដែន​ថៃ ​បាន​បាញ់​សម្លាប់​ប្រជាពលរដ្ឋ​ខ្មែរ ២​នាក់ និង​ម្នាក់​ទៀត​រង​​របួស ដោយសារ​ឆ្លង​ដែន​ ខុស​ច្បាប់​ទៅ​កាប់​ឈើ​គ្រញូង​ដូច​គ្នា​នេះ។
បុរស​អ្នក​ភូមិ​តានី ឃុំ​រុនតាឯក នៃ​ស្រុក​បន្ទាយស្រី ខេត្ត​សៀមរាប គឺ​លោក អាន រ៉ា ដែល​ជា​អ្នក​រង​របួស​ដោយសារ​ទាហាន​ថៃ បាញ់​នោះ បាន​មាន​ប្រសាសន៍​ថា កាល​ពី​ថ្ងៃ​ទី​១៥ ខែ​កក្កដា កន្លង​ទៅ  លោក​និង​គ្នីគ្នា​មួយ​ចំនួន​បាន​នាំ​គ្នា​ឆ្លង​ដែន​ខុស​ច្បាប់​ទៅ​កាប់​ឈើ​ គ្រញូង​ក្នុង​ទឹក​ដី​ថៃ តាម​ច្រក​ព្រំដែន​ចន្លោះ​បង្គោល​ឡាក់​លេខ​២។ នៅ​ពេល​ដែល​ឆ្លង​ផុត​ពី​ព្រំដែន​​ខ្មែរ​បាន​បន្តិច ទាហាន​ថៃ​ ក៏​បាន​បាញ់​រះ។
លោក អាន រ៉ា៖ «ដល់​ពាក់​កណ្ដាល​ផ្លូវ​ហើយ ដី​ថៃ នៅ​ម្ដុំ​ចូល​ច្រក​ផ្លូវ​ខ្ទំ។ ស្លាប់ ២​នាក់ របួស​ខ្ញុំ​មួយ ត្រូវ​ភ្លៅ។ បាញ់​ច្រើន​ដែរ តែ​ត្រូវ ១​គ្រាប់។ ខ្ញុំ​ប្ដូរ​រត់​បាន​រួច»
ទោះ​យ៉ាង​ណា អនុ​ប្រធាន​ក្រុម​ការងារ​ទំនាក់ទំនង​ព្រំដែន​កម្ពុជា-​ថៃ ប្រចាំ​ច្រក​ជាំសាង៉ាំ នៃ​ស្រុក​អន្លង់វែង លោក តូច រ៉ា​ បាន​មាន​ប្រសាសន៍​ថា លោក​មិន​ទាន់​បាន​ទទួល​ព័ត៌មាន​ស្ដីពី​ការ​បាញ់​រះ​នោះ​នៅ​ឡើយ​ទេ។
សមាគម​ការពារ​សិទ្ធិ​មនុស្ស​អាដហុក (Adhoc) ខេត្ត​ឧត្តរមានជ័យ ​បាន​ផ្ដល់​តួលេខ​ត្រួសៗ​ថា ចាប់​តាំង​ពី​អំឡុង​ខែ​មករា រហូត​មក​ដល់​ត្រឹម​ថ្ងៃ​ទី​២១ ខែ​កក្កដា គឺ​មាន​ប្រជាពលរដ្ឋ​ខ្មែរ​ចំនួន ១៩​នាក់​បាន​ស្លាប់ និង ៦​នាក់​រង​របួស ដោយសារ​ទាហាន​ថៃ បាញ់​រះ នៅ​ពេល​ឆ្លង​ដែន​ខុស​ច្បាប់​ទៅ​កាប់​ឈើ​គ្រញូង។
បន្ថែម​លើ​នេះ សកម្មភាព​ជួញដូរ និង​ដឹក​ជញ្ជូន​ឈើ​គ្រញូង​ចេញ​ពី​ខេត្ត​ជាប់​ព្រំដែន​ថៃ ឆ្ពោះ​ទៅ​ព្រំដែន​វៀតណាម ​បាន​កម្រើក​ឡើង​វិញ​ហើយ​មួយ​រយៈពេល​មក​នេះ។ មន្ត្រី​តុលាការ​ខេត្ត​សៀមរាប មួយ​រូប បាន​ឱ្យ​ដឹង​កាល​ពី​ដើម​ខែ​កក្កដា ថា បច្ចុប្បន្ន​បទល្មើស​ជួញ​ដូរ​ឈើ​គ្រញូង បាន​កើន​ឡើង​វិញ ហើយ​មាន​រូបភាព​សាហាវ ពិបាក​បង្ក្រាប​ផង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

No comments: