A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Saturday 18 May 2013

Vietnamese authority defrocked two Khmer Krom monks ព្រះសង្ឃ​ខ្មែរ​ក្រោម​៣​អង្គ​ត្រូវ​វៀតណាម​ចាប់​ផ្សឹក

ព្រះសង្ឃ​ចំនួន ៣​អង្គ ត្រូវ​បាន​អាជ្ញាធរ​វៀតណាម ខេត្ត​ឃ្លាំង សហការ​នឹង​មេគណ​ខេត្ត ត្រូវ​បាន​ចាប់​ព្រះ​កាយ​ដើម្បី​ផ្សឹក ក្រោម​បទ​ចោទ​ប្រកាន់​ថា ព្រះសង្ឃ​ទាំង​នោះ​បាន​ទាក់ទង​នឹង​អង្គការ​សមាគម​ខ្មែរ​កម្ពុជា​ក្រោម​នៅ​ ក្រៅ​ប្រទេស ដែល​ខុស​ច្បាប់​វៀតណាម។
ដោយ ទីន ហ្សាការីយ៉ា RFA
2013-05-18
ការ​ចាប់​ខ្លួន​ព្រះសង្ឃ​នេះ ធ្វើ​ឡើង​នៅ​ក្រោយ​ពេល​អាជ្ញាធរ​បាន​ចាប់​ខ្លួន​ប្រជាពលរដ្ឋ​ចំនួន ៥​នាក់​ផ្សេង​ទៀត កាល​ពី​ថ្ងៃ​ទី១៥ ឧសភា ដោយសារ​ប្រជាពលរដ្ឋ​ទាំង​នោះ​តវ៉ា​ការពារ​ព្រះសង្ឃ​គង់​នៅ​ក្នុង​វត្ត។
ព្រះចៅ​អធិការ​វត្ត​ព្រៃជាប់ ស្ថិត​នៅ​ស្រុក​ជ្រោយញ ខេត្ត​ឃ្លាំង ត្រូវ​បាន​អាជ្ញាធរ​វៀតណាម ដោះ​លែង​ឲ្យ​នៅ​ក្រៅ​ឃុំ​វិញ ក្នុង​ចំណោម​ព្រះសង្ឃ​ចំនួន ៣​អង្គ ដែល​អាជ្ញាធរ​បាន​ចាប់​ខ្លួន​កាល​ពី​ថ្ងៃ​ទី១៦ ឧសភា។
ព្រះសង្ឃ​មួយ​អង្គ​សុំ​មិន​បញ្ចេញ​ព្រះ​នាម បាន​ឲ្យ​ដឹង​តាម​ទូរស័ព្ទ​ពី​ប្រទេស​វៀតណាម នៅ​ថ្ងៃ​ទី១៨ ឧសភា ថា អាជ្ញាធរ​វៀតណាម បាន​ដោះ​លែង​ព្រះចៅ​អធិការ​វត្ត​ស្ដីទី​វត្ត​ព្រៃជាប់ ព្រះតេជព្រះគុណ លី ចិន្តា ឲ្យ​នៅ​ក្រៅ​ឃុំ​វិញ ក្រោយ​គេ​បាន​ផ្សឹក​ព្រះអង្គ​នៅ​ថ្ងៃ​ទី១៦ ដដែល​នោះ ប៉ុន្តែ​ព្រះអង្គ​មាន​សភាព​មិន​ប្រក្រតី ពោល​គឺ​ព្រះអង្គ​បាត់​ការ​ចងចាំ និង​បែក​ពពុះ​មាត់​រហូត​ដល់​សន្លប់។ ព្រះតេជព្រះគុណ​ឲ្យ​ដឹង​ថា នៅ​ព្រះសង្ឃ​ចំនួន ២​អង្គ​ទៀត អាជ្ញាធរ​មិន​ទាន់​ដោះ​លែង​នៅ​ឡើយ។
ព្រះតេជព្រះគុណ​ដដែល បាន​ឲ្យ​ដឹង​ទៀត​ថា ក្រៅ​ពី​ការ​ចាប់​ខ្លួន​ព្រះសង្ឃ​នៅ​វត្ត​ព្រៃជាប់ នៅ​ឯ​វត្ត​សេរីតាសេក នៅ​ក្នុង​ខេត្ត​ឃ្លាំង ដូច​គ្នា អាជ្ញាធរ​វៀតណាម កំពុង​ឡោម​ព័ទ្ធ​វត្ត​តាំង​ពី​ថ្ងៃ​ទី១៧ ឧសភា ក្នុង​គោល​បំណង​ចង់​ចាប់​ព្រះចៅ​អធិការ​វត្ត​ព្រះនាម លីវ នី និង​ព្រះសង្ឃ​ព្រះនាម ថាច់ ធឿន។ ប៉ុន្តែ ប្រជាពលរដ្ឋ​នៅ​វត្ត​ព្រៃជាប់ បាន​រារាំង​មិន​ឲ្យ​អាជ្ញាធរ​ចាប់​ខ្លួន​ព្រះសង្ឃ​ទាំង​ពីរ​អង្គ​នេះ​ទេ។

ការ​ចាប់​ខ្លួន​ព្រះសង្ឃ​នៅ​វត្ត​ទាំង​ពីរ​ដើម្បី​ចាប់​ផ្សឹក​នេះ ធ្វើ​ឡើង​តាម​សេចក្ដី​ប្រកាស​របស់​ប្រធាន​សមាគម​សាមគ្គី​ព្រះសង្ឃ​ស្នេហា​ ជាតិ ព្រះនាម យឿង ញឿង ដោយ​បញ្ជាក់​ពី​មូលហេតុ​នៃ​ការ​ចាប់​ខ្លួន​នោះ​ថា ព្រះសង្ឃ​ទាំង​នោះ​មាន​ជាប់​ពាក់ព័ន្ធ​នឹង​អង្គការ​សមាគម​នៅ​ក្រៅ​ប្រទេស។
វិទ្យុ​អាស៊ីសេរី មិន​អាច​ទាក់ទង​ប្រធាន​សមាគម​សាមគ្គី​ព្រះសង្ឃ​ស្នេហា​ជាតិ ព្រះតេជព្រះគុណ យឿង ញឿង ដើម្បី​សុំ​បំភ្លឺ​អំពី​បញ្ហា​នេះ​បាន​នៅ​ឡើយ​ទេ នៅ​ថ្ងៃ​ទី១៨ ឧសភា។
តំណាង​សហព័ន្ធ​ខ្មែរ​កម្ពុជា​ក្រោម​ប្រចាំ​នៅ​កម្ពុជា លោក តាំង សារៈ មាន​ប្រសាសន៍​ថា អាជ្ញាធរ​វៀតណាម បាន​ចោទ​ប្រកាន់​ព្រះសង្ឃ​ខ្មែរ​ក្រោម​បែប​នេះ​ជា​រឿង​រើសអើង ហើយ​បញ្ហា​នេះ​ជា​រឿង​រំលោភ​សិទ្ធិ​មនុស្ស។
ការ​ប៉ុនប៉ង​ចង់​ចាប់​ផ្សឹក​ព្រះចៅ​អធិការ​វត្ត​ព្រៃជាប់ ព្រះតេជព្រះគុណ លី ចិន្តា និង​ព្រះចៅ​អធិការ​វត្ត​សិរីតាសេក នេះ មិន​មែន​ជា​លើក​ទី១ ទេ អាជ្ញាធរ​វៀតណាម ចុះ​ទៅ​ចាប់​ផ្សឹក​ព្រះសង្ឃ​ទាំង​ពីរ​អង្គ​នេះ​ជា​ច្រើន​លើក​មក​ហើយ តែ​មិន​បាន​សម្រេច ដោយសារ​ប្រជាពលរដ្ឋ​ជំទាស់។
ទាក់ទង​នឹង​បញ្ហា​នេះ លេខាធិការដ្ឋាន​អង្គការ​សមាគម​ខ្មែរ​កម្ពុជា​ក្រោម នៅ​ថ្ងៃ​ទី១៨ ឧសភា បាន​ចេញ​សេចក្ដី​ថ្លែងការណ៍​ថា ការ​ចាប់​ផ្សឹក​ព្រះសង្ឃ និង​ការ​ចាប់​ខ្លួន​ប្រជាពលរដ្ឋ​ខ្មែរ​នៅ​ស្រុក​ជ្រោយញ នេះ ជា​រឿង​រំលោភ​សិទ្ធិ​មនុស្ស​យ៉ាង​ធ្ងន់ធ្ងរ។
សេចក្ដី​ថ្លែងការណ៍​សង្កត់​ធ្ងន់​ថា អាជ្ញាធរ​វៀតណាម បាន​ជ្រៀតជ្រែក​កិច្ចការ​ផ្ទៃ​ក្នុង​របស់​វត្ត​ព្រៃជាប់ និង​វត្ត​សេរីតាសេក។ ការ​ចាប់​ផ្សឹក​ព្រះសង្ឃ​នៅ​វត្ត​ព្រៃជាប់ គឺ​មិន​បាន​អនុវត្ត​តាម​ពុទ្ធ​បញ្ញត្តិ​ទេ ពីព្រោះ​ថា​ព្រះសង្ឃ​ទាំង​នោះ​គ្មាន​ធ្វើ​ខុស​អ្វី​នឹង​ពុទ្ធ​សាសនា​ទេ។ ហើយ​ផ្អែក​តាម​ដីកា​ចាប់​ខ្លួន​នោះ គ្មាន​មូលដ្ឋាន​ច្បាស់​លាស់ ដោយ​ចោទ​ពី​បទ​ព្រះសង្ឃ​ទាំង​នោះ​នៅ​តែ​បន្ត​សកម្មភាព​ទាក់ទង​ជាមួយ​ស្ថាប័ន ​ខ្មែរ​នៅ​ក្រៅ​ប្រទេស។ បញ្ហា​នេះ អាជ្ញាធរ​វៀតណាម បាន​រំលោភ​ទៅ​លើ​គោលការណ៍​សិទ្ធិ​មនុស្ស ពិសេស​សេចក្ដី​ថ្លែងការណ៍​ជា​សកល​ស្ដីពី​សិទ្ធិ​មនុស្ស និង​សេចក្ដី​ប្រកាស​ស្ដីពី​ជនជាតិ​ដើម​ភាគ​តិច ពាក់ព័ន្ធ​នឹង​សិទ្ធិ​សេរីភាព​ក្នុង​ការ​បញ្ចេញ​មតិ និង​ទទួល​បាន​ព័ត៌មាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

No comments: