ដោយ មណ្ឌល កែវ RFA
2013-05-28
2013-05-28
ស្ដាប់ ឬ ទាញយកសំឡេង
ការចោទប្រកាន់នេះ បានកើតឡើងនៅពេលដែលលោក អ៊ូ ច័ន្ទឫទ្ធិ
តំណាងរាស្ត្រមណ្ឌលខេត្តកណ្ដាល គណបក្សសិទ្ធិមនុស្ស
និងបច្ចុប្បន្នជាប្រធានគណៈកម្មការវិន័យគណបក្សសង្គ្រោះជាតិ
បានចុះមកជួបជាមួយប្រជាពលរដ្ឋខេត្តពោធិ៍សាត់
ក្នុងវេទិកាសាធារណៈមួយ នៅឃុំស្យា ស្រុកកណ្ដៀង។
ប្រធានគណបក្សសង្គ្រោះជាតិប្រចាំខេត្តពោធិ៍សាត់ លោក ញឹម ញេង
បានឲ្យដឹងថា នៅព្រឹកថ្ងៃទី២៧ ឧសភា
ពេលដែលគណបក្សសង្គ្រោះជាតិបានរៀបចំវេទិកាសាធារណៈមួយក្នុងគោលបំណង
ឲ្យប្រជាពលរដ្ឋជួបសំណេះសំណាលជាមួយអ្នកតំណាងរាស្ត្រ
ស្រាប់តែមានមន្ត្រីអាជ្ញាធរឃុំ និងស្រុក
បានយកមេក្រូមកដាក់បំពងសំឡេងរំខានក្នុងកម្មវិធី
មិនអាចស្ដាប់ឮការជជែកគ្នា
បណ្ដាលឲ្យការជួបជុំគ្នានេះមិនអាចដំណើរការបានឡើយ។
លោក ញឹម ញេង៖ «អ្នកដែលមកចាក់មេក្រូរំខាននេះ
មិនមែនប្រជាពលរដ្ឋទេ តែគឺអាជ្ញាធរមូលដ្ឋានតែម្ដង។ ទី១
គឺសមាជិកក្រុមប្រឹក្សាស្រុក ទី២ គឺសមាជិកក្រុមប្រឹក្សាឃុំ និងទី៣
គឺអាជ្ញាធរប៉ូលិសតែម្ដង
គេនាំគ្នារៀបចំចាក់មេក្រូរំខានការជួបជុំរបស់គណបក្សសង្គ្រោះ
ជាតិ...»។
លោក ញឹម ញេង បានឲ្យដឹងបន្ថែមថា
នេះជាលើកទី២ហើយក្នុងខេត្តពោធិ៍សាត់
ដែលអាជ្ញាធរបានបង្កការរំខានក្នុងកម្មវិធីជួបជុំរវាងអ្នក
តំណាងរាស្ត្រនិងម្ចាស់ឆ្នោតនេះ។ លោកថា កាលពីថ្ងៃទី២០ ឧសភា
កន្លងទៅក៏មានការចាក់ធុងបាសរំខានពេលលោក កឹម សុខា
និងព្រះអង្គម្ចាស់ ធម្មិកោ បានមកជួបជាមួយប្រជាពលរដ្ឋនៅឃុំអន្លង់វិល
ផងដែរ។
លោក ញឹម ញេង៖ «ការចាក់ធុងបាសរំខាននេះនៅឯខេត្តស្វាយរៀង
ខ្ញុំបានលេងម្ដងហើយ។
ខ្ញុំទូរស័ព្ទទៅប្រាប់ចៅហ្វាយខេត្តឲ្យមកបិទតែម្ដង។
ឥឡូវនៅខេត្តពោធិ៍សាត់ នេះ អត់ស្ដាប់ ហ៊ុន សែន ទេ។ នៅស្វាយរៀង
ពេលខ្ញុំប្រាប់គាត់ថា សម្ដេច ហ៊ុន សែន
អត់ឲ្យធ្វើអ៊ីចឹងទេគាត់មកបិទភ្លាម។ តែនៅពោធិ៍សាត់នេះ
ចេញមកប្រឆាំងមុនគេហើយអាជ្ញាធរខេត្តពោធិ៍សាត់នេះ...»។
ឆ្លើយតបចំពោះការចោទប្រកាន់នេះ ប្រធានក្រុមប្រឹក្សាស្រុកកណ្ដៀង
គឺលោក ពុទ្ធ រិទ្ធី បានឲ្យដឹងថា
អាជ្ញាធរគ្មានបំណងរំខាននរណានោះទេ។ លោកថា មេក្រូដែលចាក់នោះ
គឺអាជ្ញាធរឃុំបានធ្វើកម្មវិធីរៃអង្គាសប្រាក់ដើម្បីជួសជុលកំណាត់
ផ្លូវដែលបានខូចខាតក្នុងរដូវភ្លៀងនេះ។
លោកថា គណបក្សប្រឆាំងយកលេសចោទដោយចង់ឲ្យអ្នកស្ដាប់បានឮពីឈ្មោះគណបក្សនេះតែប៉ុណ្ណោះ៖ «រឿង
នេះអ៊ីចេះទេ មិនមែនទៅចាក់មេក្រូដើម្បីរំខានអីទេ គ្រាន់ថា
គណៈកម្មការទ្រទ្រង់
និងថែទាំផ្លូវគាត់មានកម្មវិធីហ្នឹងដាក់នៅភូមិហ្នឹង
ដើម្បីរៃអង្គាសថវិកាយកទៅជួសជុលផ្លូវ។ អត់មានចាក់រំខានអីទេ
តាមការពិតគាត់ចាក់តែចម្រៀងតិចៗ
និងឲ្យពរជ័យនៅពេលដែលគេយកលុយមកចូលបុណ្យ...»។
ទាក់ទងចំពោះបញ្ហានេះ
នាយកប្រតិបត្តិគណៈកម្មាធិការអព្យាក្រឹតដើម្បីការបោះឆ្នោតដោយសេរី
និងត្រឹមត្រូវនៅកម្ពុជា ហៅកាត់ថា និកហ្វិច (NICFEC) បណ្ឌិត ហង្ស
ពុទ្ធា មានប្រសាសន៍ថា គណបក្សនយោបាយនៅកម្ពុជា ទាំងអស់
គួរតែប្រកាន់យកសេចក្ដីថ្លៃថ្នូរ និងភាពចាស់ទុំផ្នែកនយោបាយ
ដោយមិនត្រូវបង្កការរំខានគ្នាទៅវិញទៅមកនៅពេលដែលសមាជិកគណបក្ស
ណាមួយជួបសំណេះសំណាលជាមួយមន្ត្រីថ្នាក់លើរបស់គណបក្សគេនោះឡើយ។
លោកថា
ប្រមុខរដ្ឋាភិបាលក៏ធ្លាប់មានប្រសាសន៍ផ្ដាំផ្ញើឲ្យអាជ្ញាធរគ្រប់
លំដាប់ថ្នាក់បង្កលក្ខណៈងាយស្រួលដល់គណបក្សនយោបាយដែលចូលរួមក្នុង
ដំណើរការបោះឆ្នោតនេះផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
No comments:
Post a Comment