2013-02-15
ចំនួនភ្ញៀវទេសចរជាតិ អន្តរជាតិ ចូលទស្សនាប្រាសាទព្រះវិហារ
បានកើនទ្វេដងនាពិធីបុណ្យចូលឆ្នាំប្រពៃណីចិនឆ្នាំនេះ។ កំណើននេះ
ជំរុញឲ្យប្រជាពលរដ្ឋ ពិសេសកងយោធពលខេមរភូមិន្ទរស់នៅ
និងប្រចាំការនៅតំបន់ប្រាសាទព្រះវិហារ អាចឆ្លៀតរកប្រាក់កម្រៃ
ដើម្បីផ្គត់ផ្គង់គ្រួសារលើសេវាបម្រើភ្ញៀវទេសចរ។
ភ្ញៀវទេសចរជាតិ និងអន្តរជាតិចូលទស្សនាប្រាសាទព្រះវិហារ កាលពីថ្ងៃទី១២ ខែកុម្ភៈ ឆ្នាំ២០១៣។
មន្ត្រីទីស្នាក់ការនៃអាជ្ញាធរជាតិព្រះវិហារ ប្រចាំការនៅតំបន់គ១
ឃុំកន្ទួត ស្រុកជាំខ្សាន្ត ខេត្តព្រះវិហារ បានឲ្យដឹងថា រយៈពេល ៣ថ្ងៃ
គិតពីថ្ងៃអាទិត្យ ទី១០ ដល់ថ្ងៃអង្គារ ទី១២ ខែកុម្ភៈ
ចំនួនភ្ញៀវទេសចរជាតិ អន្តរជាតិ ដែលចូលទស្សនាខេត្តព្រះវិហារ
ក្នុង១ថ្ងៃៗមានជាងមួយពាន់នាក់។
មន្ត្រីម្នាក់ស្នើមិនបញ្ចេញឈ្មោះ ឲ្យដឹងថា
កំណើនភ្ញៀវទេសចរបានជួយលើកស្ទួយជីវភាពរស់នៅរបស់ប្រជាពលរដ្ឋ
ពិសេសកងទ័ពប្រចាំការនៅតំបន់ប្រាសាទព្រះវិហារ
មានប្រាក់ចំណូលសម្រាប់ផ្គត់ផ្គង់គ្រួសារប្រចាំថ្ងៃ។
លោកថា ពលរដ្ឋ និងកងទ័ព
ក្រោយពេលទំនេរពីបំពេញភារកិច្ចការពារទឹកដី
ពួកគាត់ឆ្លៀតរត់ម៉ូតូឌុប ដឹកភ្ញៀវឡើងទស្សនាប្រាសាទ
ទទួលបានប្រាក់ចំណូលចន្លោះពី ១ម៉ឺន ៥ពាន់រៀល ទៅ ៣ម៉ឺនរៀល
ឬក៏ច្រើនជាងនេះ។
មន្ត្រីនគរបាលការពារបេតិកភណ្ឌប្រចាំការតំបន់ប្រាសាទព្រះវិហារ
ក៏បានឲ្យដឹងថា ចំនួនភ្ញៀវទេសចរជាតិ និងអន្តរជាតិ
ចូលទស្សនាប្រាសាទព្រះវិហារ បានកើនទ្វេដងនៅថ្ងៃមានបុណ្យជាតិ
ឬថ្ងៃចុងសប្ដាហ៍
ដោយក្នុង១ថ្ងៃៗមានភ្ញៀវចូលទស្សនាប្រាសាទព្រះវិហារ ជាង ១រយឡាន
ឬស្មើជាង ១ពាន់នាក់។ រីថ្ងៃធម្មតា ក៏មានភ្ញៀវចន្លោះពី ២០ឡាន ទៅ
៣០ឡាន ចូលទស្សនាប្រសាទព្រះវិហារ ដែរ មិនថាតែថ្ងៃមានបុណ្យជាតិ
ឬពិធីបុណ្យផ្សេងៗនោះទេ។
លោកបន្តថា ភ្ញៀវទេសចរអាចធ្វើដំណើរឡើងទស្សនាប្រាសាទព្រះវិហារ
ដោយមធ្យោបាយរថយន្ត ឬម៉ូតូផ្ទាល់ខ្លួនក៏បាន ឬតាមម៉ូតូ
និងរថយន្តឈ្នួលក៏បាន។ ប៉ុន្តែលោកថា
យកល្អគួរភ្ញៀវទេសចរគួរជួលម៉ូតូឌុប
ឬរថយន្តដែលរង់ចាំបម្រើសេវាដឹកជញ្ជូននៅក្បែរជើងប្រាសាទព្រះវិហារ
អាចមានសុវត្ថិភាពជាង
ព្រោះពួកគេមានជំនាញបើកបរឡើងភ្នំមានចំណោទខ្ពស់ស្ទាត់ជំនាញ។
មន្ត្រីដដែលអះអាងទៀតថា
សព្វថ្ងៃនេះភ្ញៀវទេសចរដែលមកទស្សនាប្រាសាទព្រះវិហារ
មានលក្ខណៈទូលំទូលាយ ដោយមានសេវាដឹកជញ្ជូនអាហារដ្ឋានលក់ម្ហូបអាហារ
និងសេវាស្នាក់នៅមានតម្លៃសមរម្យ និងសម្បូរបែប។
ក្រុមអ្នករត់ម៉ូតូឌុប និងរថយន្តដឹកភ្ញៀវទេសចរ បានឲ្យដឹងថា
រថយន្ត១គ្រឿងអាចដឹកភ្ញៀវចំនួន ១០នាក់ឡើង
និងចុះពីប្រាសាទព្រះវិហារ ដោយភ្ញៀវចំណាយប្រាក់តែចំនួន
១០ម៉ឺនរៀលប៉ុណ្ណោះ។ រីឯម៉ូតូឌុបវិញ
១គ្រឿងភ្ញៀវត្រូវចំណាយប្រាក់ចន្លោះពី ១ម៉ឺន ៥ពាន់រៀល ទៅ ២ម៉ឺនរៀល
សម្រាប់សេវាដឹកជញ្ជូនឡើង និងចុះពីប្រាសាទ។
ក្រុមអ្នករត់ម៉ូតូឌុបបានសង្កត់ធ្ងន់ថា
ភ្ញៀវទេសចរដែលចង់ឡើងទស្សនាប្រាសាទព្រះវិហារ គួរជួលម៉ូតូឌុប
ឬរថយន្តពីជើងភ្នំ ជំនួសការប្រើមធ្យោបាយផ្ទាល់ខ្លួន ព្រោះថា
ការបើកបរផ្លូវឡើងចំណោទខ្ពស់ គឺទាមទារអ្នកស្ទាត់ជំនាញ។
ទាក់ទិនបញ្ហានេះ
អាជីវករលក់អាហារហូបចុកនៅក្បែរប្រាសាទព្រះវិហារ ក៏បានឲ្យដឹងថា
ភ្ញៀវទេសចរទាំងជាតិ និងអន្តរជាតិ
មិនចាំបាច់វេចខ្ចប់ម្ហូបអាហារពីផ្ទះនោះទេ
ព្រោះនៅនេះមានបម្រើអាហារហូបចុកមានតម្លៃសមរម្យ។
លោក អឿយ ញាណ ជាអាជីវករលក់ម្ហូបអាហារនៅក្បែរប្រាសាទ
មានប្រសាសន៍ថា អាហារហូបចុកមានលក់ជូនភ្ញៀវទេសចរតាមតម្រូវការ
និងមានតម្លៃសមរម្យ ដោយម្នាក់ៗចំណាយប្រាក់ចាប់ពី ៦ពាន់រៀល ទៅ
៨ពាន់រៀល អាចទទួលទានអាហារមួយឆ្អែត។ លោកថា
ភ្ញៀវទេសចរមិនចាំបាច់នាំយកអាហារពីផ្ទះមកទេ នាំឲ្យមានសំរាម
ប៉ះពាល់ដល់បរិស្ថានប្រាសាទព្រះវិហារ ទេ
ព្រោះនៅទីនេះមានអាហារគ្រប់មុខរង់ចាំបម្រើ។
មនុស្សវ័យចាស់ដែលបានមកទស្សនាខេត្តព្រះវិហារ កាលពីថ្ងៃពុធ
ទី១៣ ខែកុម្ភៈ មានអារម្មណ៍រីករាយពេលបានមកដល់ប្រាសាទព្រះវិហារ។
ពួកគាត់បានរំលឹកដល់គុណបំណាច់របស់អតីតព្រះមហាក្សត្រ ព្រះករុណា
សម្ដេចព្រះនរោត្តម សីហនុ ដែលបានទាមទារ
និងយកឈ្នះក្តីប្រាសាទព្រះវិហារ ពីប្រទេសថៃ នៅឆ្នាំ១៩៦២។
យ៉ាងណាក៏ដោយ មន្ត្រីប្រចាំការនាទីស្នាក់ការអាជ្ញាធរព្រះវិហារ
ស្រុកជាំខ្សាន្ត បានអះអាងថា
កំណើនភ្ញៀវទេសចរបានកើនពីមួយថ្ងៃទៅមួយថ្ងៃ។
កំណើននេះអាចមកពីផ្លូវធ្វើដំណើរល្អ
និងមានសេវាបម្រើគ្រប់ហេដ្ឋារចនាសម្ព័ន្ធ
រង់ចាំបម្រើដល់ភ្ញៀវទេសចរដែលចូលមកទស្សនាប្រាសាទបុរាណ
មានវ័យចំណាស់ជាង ១ពាន់នេះ៕
No comments:
Post a Comment