ដោយ ទេព សុរ៉ាវី 2013-02-10 RFA Service
ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា
ចង់ឃើញប្រទេសកម្ពុជា បន្តលើកមុខមាត់របស់ខ្លួនលើឆាកអន្តរជាតិ។
លោកជឿជាក់ថា
បើអន្តរជាតិបន្តយកចិត្តទុកដាក់ចំពោះប្រទេសកម្ពុជានោះ
កម្ពុជានឹងមានការផ្លាស់ប្ដូរជាវិជ្ជមានបានច្រើន។
ឯកអគ្គរដ្ឋទូតសហរដ្ឋអាមេរិក លោក វីល្លៀម ថត
(William E.Todd)
មានប្រសាសន៍នៅក្នុងការទស្សនាការរាប់សន្លឹកឆ្នោតជ្រើសរើស
ប្រធានាធិបតីសហរដ្ឋអាមេរិក នាស្ថានទូតសហរដ្ឋអាមេរិក កាលពីថ្ងៃទី៧
ខែវិច្ឆិកា ឆ្នាំ២០១២។
ទន្ទឹមនឹងគ្នានេះ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក
វីល្លៀម ថត (William Todd) ឲ្យដឹងថា មន្ត្រីថ្នាក់ខ្ពស់អាមេរិកចំនួន
៣រូប នឹងមកធ្វើទស្សនកិច្ចនៅកម្ពុជា នៅពេលដ៏ខ្លីខាងមុខ
ដើម្បីបង្ហាញឲ្យឃើញថា
សហរដ្ឋអាមេរិកបន្តចាត់ទុកទំនាក់ទំនងរបស់ខ្លួនជាមួយប្រទេសកម្ពុជា
ជារឿងដ៏មានសារសំខាន់
ហើយលោកក៏នឹងជំរុញឲ្យមានឱកាសវិនិយោគនៅកម្ពុជា
ឲ្យបានច្រើនថែមទៀត។
ការអះអាងរបស់លោក វីល្លៀម ថត
គឺជាការឆ្លើយតបទៅនឹងសំណួរជាច្រើនដែលបានសរសេរចោទសួរលោកតាម
គេហទំព័រ (Website) អំពីតួនាទីជាអន្តរជាតិរបស់ប្រទេសកម្ពុជា
ក្រោយពីបញ្ចប់តួនាទីជាប្រធានអាស៊ានកាលពីឆ្នាំមុន។
មានមតិជាច្រើនហាក់នៅស្រពេចស្រពិលចំពោះដំណើររបស់កម្ពុជា
លើឆាកអន្តរជាតិ។
ក្នុងខ្ទង់សារព័ត៌មានប្រចាំសប្ដាហ៍របស់លោក វីល្លៀម ថត
លោកមានជំនឿថា បើអន្តរជាតិបន្តយកចិត្តទុកដាក់ចំពោះប្រទេសកម្ពុជា
នោះកម្ពុជានឹងមានការផ្លាស់ប្ដូរជាវិជ្ជមានថែមទៀត។
ទន្ទឹមគ្នានោះ មន្ត្រីថ្នាក់ខ្ពស់ ៣នាក់ រួមមានអ្នកស្រី ម៉ារី
ឡេនឌ្រូ (Mary Landrieu) សមាជិកព្រឹទ្ធសភា លោក ថូម៉ាស ខណាត់ (Thomas
Conant)
មេបញ្ជាការរងប្រចាំនៅបញ្ជាការដ្ឋាននៃកងកម្លាំងសហរដ្ឋអាមេរិក
ប្រចាំតំបន់ប៉ាស៊ីហ្វិក (PACOM) និងលោក ម៉ៃខល ផូសនើ (Michael Posner)
ប្រធានការិយាល័យផ្នែកលទ្ធិប្រជាធិបតេយ្យសិទ្ធិមនុស្ស
និងការងាររបស់ក្រសួងការបរទេសសហរដ្ឋអាមេរិក
នឹងមកទស្សនកិច្ចផ្លូវរដ្ឋនៅពេលខាងមុខដ៏ខ្លី
ដើម្បីជួយជំរុញការវិនិយោគបរទេសនៅកម្ពុជា
កែលំអប្រព័ន្ធនៃប្រទេសកម្ពុជា
ទាក់ទងនឹងការស្មុំកូនចិញ្ចឹមទៅក្រៅប្រទេស
លើកកម្ពស់ជំនាញឯកទេសនៃកងយោធានៃប្រទេសកម្ពុជា
ដោយផ្ដោតលើសកម្មភាពថែរក្សាសន្តិភាព
និងការងារដោះមីនរបស់អង្គការសហប្រជាជាតិ
និងពង្រឹងលទ្ធិប្រជាធិបតេយ្យ និងតាមរយៈការបោះឆ្នោតប្រកបដោយសេរី
និងយុត្តិធម៌ អភិបាលកិច្ចល្អ និងគោរពនីតិរដ្ឋ។
លោក វីល្លៀម ថត៖ «យើងជឿថា
អន្តរជាតិនឹងនៅតែផ្ដោតការយកចិត្តទុកដាក់មកលើប្រទេសកម្ពុជា
ដដែល ក្នុងពេលដែលប្រទេសកម្ពុជា អនុវត្តការផ្លាស់ប្ដូរវិជ្ជមាន
និងបន្តការអភិវឌ្ឍរបស់ខ្លួន។
ហេតុដូច្នេះហើយបានជាបុគ្គលិករបស់ខ្ញុំ ហើយនិងរូបខ្ញុំ
កំពុងខិតខំធ្វើការដើម្បីជួយជំរុញវិនិយោគបរទេសនៅកម្ពុជា
កែលំអប្រព័ន្ធនៃប្រទេសកម្ពុជា
ទាក់ទងនឹងការសុំកូនចិញ្ចឹមទៅក្រៅប្រទេស
លើកកម្ពស់ជំនាញឯកទេសនៃកងយោធានៃប្រទេសកម្ពុជា
ពង្រឹងលទ្ធិប្រជាធិបតេយ្យ និងអភិបាលកិច្ចល្អនៅកម្ពុជា»។
ទាក់ទិនបញ្ហានេះ អ្នកនាំពាក្យទីស្ដីការគណៈរដ្ឋមន្ត្រី លោក ផៃ
ស៊ីផាន បញ្ជាក់ថា កម្ពុជាកំពុងឋិតក្នុងសភាពការពង្រឹងទំនាក់ទំនងល្អ
និងកិច្ចសហប្រតិបត្តិការជាអន្តរជាតិ
រួមមានការពង្រឹងទប់ស្កាត់បទល្មើសភេរវកម្ម ការជួញដូរ
ទប់ស្កាត់ការពារគ្រឿងញៀន ការរំលោភសិទ្ធិមនុស្សជាដើម។
លោក ផៃ ស៊ីផាន បន្ថែមទៀតថា
ការបាត់បង់ទំនាក់ទំនងផ្នែកការទូតមួយរយៈក្នុងសម័យសង្គ្រាម
និងការផ្ដើមទំនាក់ទំនងជាមួយប្រទេសលោកខាងលិចក្នុងទសវត្សរ៍ឆ្នាំ
១៩៨០ ជាការកសាងមុខមាត់កម្ពុជា ឡើងវិញ ក្នុងឆាកអន្តរជាតិ។
លោកបន្តថា៖ «កម្ពុជាដើរតួនាទីយ៉ាងសំខាន់បន្ទាប់ពីដៃគូជាមួយ
អន្តរជាតិក្នុងការសំអាតដីចេញពីមីន និងគ្រឿងមិនទាន់ផ្ទុះ
និងកម្ពុជា
បានបញ្ជូនប្រជាជនពួកយើងមួយចំនួនធំចូលរួមសកម្មភាពស្តារ
ដើម្បីឲ្យដីហ្នឹងក្លាយជាដីផលិតផលវិញ។ ជាមួយគ្នានេះដែរ
សកម្មភាពសហរដ្ឋអាមេរិក កំពុងតែពង្រឹងបន្ថែម ហើយបន្ថែមទៀត ការងារទូត
សេដ្ឋកិច្ច និងការងារផ្សេង»។
ទំនាក់ទំនងរវាងកម្ពុជា និងសហរដ្ឋអាមេរិក
គេឃើញមានការរីកចម្រើនច្រើន។ កន្លងមកលោក វីល្លៀម ថត
ឯកអគ្គរដ្ឋទូតសហរដ្ឋអាមេរិកថ្មីប្រចាំប្រទេសកម្ពុជា
ធ្លាប់ធ្វើដំណើរទៅប្រទេសសិង្ហបុរី និងប្រទេសថៃ
ដើម្បីជំរុញឲ្យមានឱកាសវិនិយោគនៅកម្ពុជា។
លោក វីល្លៀម ថត សន្យាថា នឹងបន្តជជែកជាមួយក្រុមហ៊ុនអាមេរិក
អំពីបរិយាកាសសេដ្ឋកិច្ចដ៏រស់រវើកនៅកម្ពុជា
ហើយកម្ពុជានឹងមានភាពប្រសើរឡើងច្រើនសម្រាប់ការធ្វើជំនួញ៕
No comments:
Post a Comment