A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Thursday, 20 December 2012

Cambodia-Thailand agreed to redeploy troops away from the Preah Vihear temple precinct កម្ពុជា-ថៃ ព្រម​ព្រៀង​ឲ្យ​មាន​ការ​កែ​សម្រួល​កងទ័ព​ចេញ​ពី​តំបន់​ប្រាសាទ​ព្រះវិហារ

ដោយ វណ្ណ វិចារ 2012-12-19 RFA
បន្ទាប់​ពី​ជំនួប​គ្នា​ពេញ​មួយ​ថ្ងៃ​ទី១៨ ធ្នូ រួច​មក មន្ត្រី​ជាន់​ខ្ពស់​ក្រសួង​ការពារ​ជាតិ​កម្ពុជា ឲ្យ​ដឹង​ថា អង្គភាព​ជំនាញ​ដោះ​មីន​របស់​ប្រទេស​កម្ពុជា និង​ថៃ គ្រោង​នឹង​សម្អាត​មីន​ក្នុង​តំបន់​ប្រាសាទ​ព្រះវិហារ ដើម្បី​បើក​ផ្លូវ​ឈាន​ទៅ​កែ​សម្រួល​កងទ័ព ប៉ុន្តែ​អ្នក​វិភាគ​យល់ថា កម្ពុជា នៅ​តែ​បណ្តោយ​ឲ្យ​ថៃ ដើរ​ខ្សែ​លើ​ដដែល។

RFA/Vann Vicha, Gen. Neang Phat.
រដ្ឋលេខាធិការ​ក្រសួង​ការពារ​ជាតិ និង​ជា​ប្រធាន​ក្រុម​ដោះស្រាយ​ទំនាស់​ប្រាសាទ​ព្រះវិហារ លោក នាង ផាត ក្នុង​សន្និសីទ​កាសែត​ស្ដីពី​លទ្ធផល​កិច្ច​ប្រជុំ​កម្ពុជា-ថៃ កាល​ពី​ថ្ងៃ​ទី១៩ ខែ​ធ្នូ ឆ្នាំ​២០១២។
កម្ពុជា-ថៃ ព្រម​ព្រៀង​គ្នា​ជា​ថ្មី​កែ​សម្រួល​កងទ័ព​នៅ​តំបន់​ប្រាសាទ​ព្រះវិហារ ជា​លក្ខណៈ​ឯកតោ​ភាគី ឬ​ដក​ទ័ព​ស្រេច​តែ​ចិត្ត​រៀងៗ​ខ្លួន​នៅ​អំឡុង​ខែ​កុម្ភៈ ឆ្នាំ​២០១៣ ខាង​មុខ។ រដ្ឋលេខាធិការ​ក្រសួង​ការពារ​ជាតិ​កម្ពុជា យល់​ថា ការ​ព្រម​ព្រៀង​នេះ​ជា​ជំហាន​មួយ​ថ្មី​ទៀត​នៃ​ស្មារតី​សាល​ដីកា​បង្គាប់​ តុលាការ​ក្រុង​ឡាអេ ប៉ុន្តែ​អ្នក​ជំនាញ​នយោបាយ​ហៅ​ការ​ចរចា​ទ្វេភាគី​នេះ​ជា​ការ​បើក​ដៃ​ឲ្យ​ថៃ យក​ប្រៀប និង​កេង​ចំណេញ​មក​លើ​កម្ពុជា។
រដ្ឋលេខាធិការ​ក្រសួង​ការពារ​ជាតិ និង​ជា​ប្រធាន​ក្រុម​ដោះស្រាយ​ទំនាស់​ប្រាសាទ​ព្រះវិហារ លោក នាង ផាត មាន​ប្រសាសន៍​ថា កម្ពុជា ជា​អ្នក​រក​ឃើញ​ទីតាំង​ដែល​បង្គាប់​ដោយ​ដីកា​តុលាការ​ក្រុង​ឡាអេ ហើយ​គ្រោង​នឹង​នាំ​ភាគី​ថៃ ទៅ​ពិនិត្យ​ស្នើ​ឲ្យ​មាន​ការ​ឯកភាព​គ្នា ដើម្បី​ដោះ​មីន​ដោយ​មជ្ឈមណ្ឌល​សកម្មភាព​កម្ចាត់​មីន​កម្ពុជា (ស៊ីម៉ាក់ = CMAC) និង​មជ្ឈមណ្ឌល​សកម្មភាព​កម្ចាត់​មីន​ថៃ (ធីម៉ាក់ = TMAC)។ លោក​បន្ត​ថា បន្ទាប់​ពី​ដោះ​មីន​រួច ភាគី​ទាំង​ពីរ​ក៏​ព្រម​ព្រៀង​គ្នា​កែ​សម្រួល​កងទ័ព ប៉ុន្តែ​លោក​បដិសេធ​មិន​ប្រាប់​ពី​ចំនួន​ទ័ព​ដែល​ត្រូវ​ដក​ចេញ​នោះ​ឡើយ។
លោក នាង ផាត៖ «សាល​ដីកា​តុលាការ​អន្តរជាតិ​បញ្ជាក់​ជូន​ធ្វើ​ឲ្យ​ តំបន់​ប្រាសាទ​ព្រះវិហារ ជា​តំបន់​គ្មាន​កងទ័ព​បណ្ដោះ​អាសន្ន ដូចនេះ​យើង​ត្រូវ​កែ​សម្រួល​កងទ័ព​ដើម្បី​ឲ្យ​មាន​សន្តិភាព​បណ្ដោះ​អាសន្ន យើង​ជជែក​គ្នា នឹង​ឡើង​ផែនការ​កែ​សម្រួល​ទ័ព​នៅ​ត្រីមាស​ទី១ ឆ្នាំ​២០១៣»
កន្លង​ទៅ កម្ពុជា ធ្លាប់​កែ​សម្រួល​ទ័ព​ជា​ឯកតោ​ភាគី​ចេញ​ពី​ទឹកដី​របស់​ខ្លួន​ម្តង​រួច​ទៅ​ ហើយ ដោយ​កាល​នោះ​កម្ពុជា ប្ដូរ​កងទ័ព​ចេញ ជំនួស​ទៅ​វិញ​ដោយ​កម្លាំង​នគរបាល។ ប៉ុន្តែ​អ្នក​ជំនាញ​វិទ្យាសាស្ត្រ​នយោបាយ យល់​ថា ការ​កែ​សម្រួល​ទ័ព​កាល​ណោះ​ជា​ការ​អនុវត្ត​គោល​នយោបាយ​ការពារ​ជាតិ​ដ៏​ទន់​ ខ្សោយ។
ចំពោះ​ការ​កែ​សម្រួល​កងទ័ព​លើក​នេះ អ្នក​ជំនាញ​វិទ្យាសាស្ត្រ​នយោបាយ លោក​បណ្ឌិត សុខ ទូច មាន​ប្រសាសន៍​ថា កម្ពុជា និង​ថៃ មិន​បាន​អនុវត្ត​តាម​ដីកា​បង្គាប់​របស់​តុលាការ​ក្រុង​ឡាអេ ដែល​បញ្ជា​ឲ្យ​ដាក់​អ្នក​អង្កេត​ការណ៍​ឥណ្ឌូនេស៊ី នោះ​ឡើយ ដោយ​ភាគី​ទាំង​ពីរ​ព្យាយាម​ចរចា​ទ្វេភាគី​ទៅ​វិញ។ លោក​បន្ត​ថា កម្ពុជា ជា​ម្ចាស់​ទឹកដី ម្ចាស់​ប្រាសាទ តាម​អំណាច​សាល​ក្រម​ស្ថាពរ​របស់​តុលាការ​អន្តរជាតិ ប៉ុន្តែ​កម្ពុជា នៅ​តែ​បណ្តោយ​ឲ្យ​ថៃ ឆ្លៀត​ឱកាស​កេង​ចំណេញ​នយោបាយ​ដដែល។
លោក សុខ ទូច បញ្ជាក់​ថា រដ្ឋាភិបាល​ថៃ មិន​ដែល​មាន​ចេតនា​ល្អ​ដោះស្រាយ​រឿង​ប្រាសាទ​ព្រះវិហារ ទេ រាប់​ទាំង​រដ្ឋាភិបាល​របស់​លោកស្រី យីងឡាក់ ហើយ​បើ​សិន​កម្ពុជា នៅ​តែ​បន្ត​ចរចា​ទ្វេភាគី​នោះ ភាគី​ថៃ កាន់​តែ​ចំណេញ៖ «លក្ខណៈ​ទ្វេភាគី​ គេ​នៅ​តែ​ធ្វើ​នំ​អត់​ម្សៅ យើង​នៅ​តែ​ចាញ់​ប្រៀប​គេ បើ​គេ​ឈ្នះ​ជោគជ័យ គេ គេ​ចាញ់​គេ​រួច​ខ្លួន។ កម្ពុជា ដាច់​ខាត​ត្រូវ​តែ​រក​ភាគី​ទី៣ ដើម្បី​ដោះស្រាយ​រឿង​ហ្នឹង ទាំង​យន្តការ​ច្បាប់ និង​យោធា ជៀសវាង​ប្រើប្រាស់​យន្តការ​ធ្វើ​ជា​ពន្យារ​កំណើត​រដ្ឋាភិបាល យីងឡាក់»
ប្រទេស​ទាំង​ពីរ បាន​កែ​សម្រួល​កងទ័ព​លើក​ទី​មួយ កាល​ពី​ថ្ងៃ​ទី១៨ ខែ​កក្កដា ឆ្នាំ​២០១២ ហើយ​ការ​កែ​សម្រួល​នេះ​ធ្វើ​ឡើង​បន្ទាប់​ពី​កិច្ច​ជំនួប​ដោយ​ទ្វេភាគី​រវាង​ លោក ហ៊ុន សែន ជាមួយ​នាយក​រដ្ឋមន្ត្រី​ថៃ អ្នកស្រី យីងឡាក់ ស៊ីណាវ៉ាត់ ដោយ​គ្មាន​ការ​ចូល​រួម​ពី​ភាគី​ឥណ្ឌូនេស៊ី តាម​ការ​បង្គាប់​របស់​តុលាការ​យុត្តិធម៌​ក្រុង​ឡាអេ កាល​ពី​ថ្ងៃ​ទី១៨ ខែ​កក្កដា ឆ្នាំ​២០១១ នោះ​ឡើយ។ រឿង​ក្តី​ប្រាសាទ​ព្រះវិហារ នេះ ត្រូវ​បាន​តុលាការ​យុត្តិធម៌​អន្តរជាតិ បន្ត​នីតិវិធី​ច្បាប់ និង​ឈាន​ទៅ​បកស្រាយ​សាល​ក្រម​តុលាការ​ដែល​កាត់​ក្តី​ឲ្យ​កម្ពុជា ឈ្នះ កាល​ពី​ឆ្នាំ​១៩៦២ តាម​បណ្ដឹង​របស់​កម្ពុជា៕

1 comment:

Escorts Doha said...

Well said..I am exactly looking for the same post that I have got at your blog, I am not sure if someone can let me know, is their any way to book Escorts Barcelona or may be one in Escorts doha , please help
http://www.Callyourescort.es