A Change of Guard

សូមស្តាប់វិទ្យុសង្គ្រោះជាតិ Please read more Khmer news and listen to CNRP Radio at National Rescue Party. សូមស្តាប់វីទ្យុខ្មែរប៉ុស្តិ៍/Khmer Post Radio.
Follow Khmerization on Facebook/តាមដានខ្មែរូបនីយកម្មតាម Facebook: https://www.facebook.com/khmerization.khmerican

Wednesday 24 October 2012

Tens of thousands gathered in front of the Royal Palace to mark the 7th Day of Sihanouk's passing មនុស្ស​រាប់​ម៉ឺន​នាក់​មក​គោរព​ព្រះ​វិញ្ញាណក្ខន្ធ​នៅ​ថ្ងៃ​កាន់ទុក្ខ​គម្រប់​៧​ថ្ងៃ


The king and the Queen Mother visit the mourners in front of the royal Palace.

ដោយ ទេព សុរ៉ាវី និង វណ្ណ វិចារ RFA 2012-10-23 

ព្រះរាជ​ពិធី​បុណ្យ​កាន់​ទុក្ខ​ជា​ផ្លូវ​ការ ៧​ថ្ងៃ នៃ​ព្រះ​បរម​សព​ព្រះ​បាទ​សម្ដេច​ព្រះ នរោត្តម សីហនុ ត្រូវ​បញ្ចប់​នៅ​ថ្ងៃ​ទី​២៣ ខែ​តុលា នេះ។

RFA/Tep Soravy
២៣-តុលា-២០១២៖ ប្រជាពលរដ្ឋ​គោរព​ព្រះ​វិញ្ញាណក្ខន្ធ​ព្រះ​ករុណា​ព្រះបាទ​សម្ដេច​ព្រះ នរោត្ដម សីហនុ នៅ​ថ្ងៃ​កាន់ទុក្ខ​គម្រប់​៧​ថ្ងៃ នា​ព្រះ​បរម​រាជវាំង។
ពិធី​ចុង​ក្រោយ​នេះ គេ​ឃើញ​មាន​ប្រជាពលរដ្ឋ​​មក​ពី​គ្រប់​ទិសទី ទាំង​កម្មករ និង​ក្រុម​និស្សិត​ជា​ច្រើន​ម៉ឺន​នាក់ បាន​ដង្ហែ​ជា​ក្បួន​មក​ជួប​ជុំ​គ្នា​នៅ​ខាង​មុខ​ព្រះ​បរម​រាជវាំង ដោយ​មាន​រូប​ព្រះ​ឆាយាល័ក្ខណ៍ ផ្កាភ្ញី ធូប ទៀន មក​គោរព​ព្រះ​វិញ្ញាណក្ខន្ធ​ព្រះអង្គ។ ព្រះ​សង្ឃ​ប្រមាណ​ជាង ១​ម៉ឺន​អង្គ​​ក៏​បាន​ចូល​រួម​គោរព​ព្រះ​វិញ្ញាណក្ខន្ធ​នេះ​ដែរ។
សូម​ស្ដាប់​សេចក្ដី​រាយការណ៍​របស់​លោក វណ្ណ វិចារ ពី​មុខ​ព្រះ​បរម​រាជ​វាំង អំពី​ទិដ្ឋភាព​ទូទៅ​នៅ​មុខ​ព្រះ​បរម​រាជវាំង៖

យុវជន​កោរ​សក់​បួស​មុខ​ព្រះ​ឆាយាល័ក្ខណ៍​ព្រះ​មហា​វីរក្សត្រ

ប្រជាពលរដ្ឋ​ខ្មែរ និង​យុវជន​ប្រមាណ ៣០​នាក់ បាន​កោរ​សក់​បួស​មុខ​ព្រះ​ឆាយាល័ក្ខណ៍​ព្រះបាទ នរោត្តម សីហនុ នៅ​ទីលាន​ប្រជាធិបតេយ្យ មុន​នឹង​ពួកគាត់​ដង្ហែ​ក្បួន​កាន់​មរណទុក្ខ​ខាង​មុខ​ព្រះ​បរម​រាជវាំង។

ក្បួន​ដង្ហែ​ដែល​មាន​ពលរដ្ឋ​ប្រមាណ ២០០​នាក់ ដឹកនាំ​ដោយ​ក្រុម​យុវជន​គណបក្ស សម រង្ស៊ី មាន​ស្លៀក​ពាក់​ស​កាន់​ទុក្ខ មាន​ព្រះ​ឆាយាល័ក្ខណ៍ និង​ព្រះ​រាជ​សកម្មភាព​អតីត​ព្រះ​មហា​វីរក្សត្រ ត្រូវ​បាន​ដង្ហែ​ដោយ​ថ្មើរ​ជើង ដើរ​សន្សឹមៗ​ដោយ​មាន​សមត្ថកិច្ច​ការពារ។ ម្ដង​នេះ​សមត្ថកិច្ច​មិន​បាន​រារាំង​ដំណើរ​ក្បួន​ដង្ហែ​របស់​សមាជិក​គណបក្ស​ ប្រឆាំង​ដូច​សព្វ​មួយ​ដង​ទេ តែ​បាន​ដាក់​រនាំង​រាំង​មិន​ឲ្យ​ដង្ហែ​តាម​ផ្លូវ​ជាតិ​ធំ ដូច​ជា​ផ្លូវ​ព្រះ​នរោត្តម​ជាដើម។
សីហនុ ៣០៥
២៣-តុលា-២០១២៖ ព្រះសង្ឃ​បំបួស​យុវជន​ស្ម័គ្រ​ចិត្ត​កោរ​សក់​កាន់​មរណទុក្ខ​ព្រះ​បរម​សព​ អតីត​ព្រះ​មហាក្សត្រ​នៅ​ទីលាន​ប្រជាធិបតេយ្យ មុន​ដង្ហែ​មក​ព្រះ​បរម​រាជវាំង។ RFA/Tep Soravy
លោក សួង សុភ័ណ្ឌ តំណាង​យុវជន​មក​ពី​គណបក្ស សម រង្ស៊ី ដឹកនាំ​ការ​ហែ​ក្បួន​ឲ្យ​ដឹង​ថា ការ​ជួបជុំ​ដង្ហែ​ក្បួន និង​ពិធី​បួស​កាន់​ទុក្ខ​នៅ​ថ្ងៃ​ទី​២៣ ខែ​តុលា គឺ​ដើម្បី​ចូលរួម​មរណទុក្ខ​របស់​ព្រះបាទ នរោត្ត សីហនុ។ ម្យ៉ាង​ជា​ការ​បង្ហាញ​ភក្តីភាព និង​ការ​គោរព​ស្នាព្រះហស្ត​របស់​ព្រះអង្គ។
លោក សួង សុភ័ណ្ឌ៖ «ការ​កោរ​ថ្ងៃ​នេះ គឺ​បង្ហាញ​ទី​១ គឺ​ការ​គោរព​ព្រះបាទ នរោត្តម សីហនុ។ ទី​២ គឺ​គោរព​ស្នា​ព្រះហស្ត​របស់​ព្រះអង្គ ដែល​បាន​បន្សល់​ទុក​កិច្ច​ព្រមព្រៀង​សន្តិភាព​ទីក្រុង​ប៉ារីស ដែល​មាន​ន័យ​សំខាន់ៗ​៣។ ទី​១ ធ្វើ​ឲ្យ​ប្រទេស​កម្ពុជា មាន​ប្រជាធិបតេយ្យ​ពិត​ប្រាកដ ទី​២ ធ្វើ​ឲ្យ​ប្រទេស​កម្ពុជា ពោរពេញ​ទៅ​ដោយ​ការ​គោរព​សិទ្ធិ​មនុស្ស​បាន​ត្រឹមត្រូវ​តាម​គោលការណ៍​នៃ​ ច្បាប់ និង​ទី​៣ ធ្វើ​ឲ្យ​ប្រទេស​កម្ពុជា បញ្ចប់​ជម្លោះ​ខ្មែរ​នឹង​ខ្មែរ។ អ៊ីចឹង​គោលការណ៍ ៣​ចំណុច​ដែល​ព្រះអង្គ​បន្សល់​ទុក​ជា​ស្នាព្រះហស្ត​ឲ្យ​ព្រះអង្គ​នេះ គឺ​អស្ចារ្យ​បំផុត​ដែល​ខ្មែរ​យើង​នឹង​លុត នឹង​ក្រាប នឹង​ទូល​ព្រះអង្គ ដើម្បី​យក​ស្នាដៃ​ព្រះអង្គ​យក​មក​ប្រើប្រាស់​ក្នុង​សង្គម​កម្ពុជា ដើម្បី​មាន​ឯកភាព​ពលរដ្ឋ និង​មន្ត្រី​គ្រប់​ជាន់​ថ្នាក់»
ក្បួន​ដង្ហែ​ដែល​មាន​ព្រះសង្ឃ​ជាង ១០​អង្គ ចូល​រួម មាន​ទាំង​តា​អាចារ្យ យាយជី​ផង​នោះ បាន​មក​ធ្វើ​ពិធី​សូត្រ​ធម៌​បង្សុកូល​នៅ​មុខ​ព្រះ​បរម​រាជវាំង ដោយ​ឧទ្ទិស​កុសល​ថ្វាយ​ព្រះ​បរម​សព របស់​ព្រះអង្គ​ឲ្យ​ទៅ​សោយ​សុខ​នៅ​ស្ថាន​សុគតិភព។
កម្មករ​ជាង​១​ម៉ឺន​នាក់​ចូល​រួម​គោរព​ព្រះ​វិញ្ញាណក្ខន្ធ
ពិធី​បង្សុកូល​នៅ​មិន​ទាន់​ចប់​សព្វ​ស្រួល​បួល​ផង ក្បួន​ដង្ហែ​របស់​ក្រុម​កម្មករ​ជាង ១​ម៉ឺន​នាក់​ផ្សេង​ទៀត ដែល​ដឹកនាំ​ដោយ​សហជីព​សេរី​កម្មករ បាន​ដង្ហែ​ក្បួន​ពី​ទីស្នាក់ការ​កណ្ដាល​របស់​ខ្លួន មក​កាន់​ព្រះ​បរម​រាជវាំង ដោយ​មាន​ពាក់​ឈ្នួត​ក្បាល​ធ្វើ​អំពី​ក្រដាស​ខ្មៅ មាន​សរសេរ​អក្សរ​ថា «សម្ដេច​តា​ព្រះ​រាជ​បិតា​ឯករាជ្យ​ជាតិ»។
សីហនុ កម្មករ ៣០៥
២៣-តុលា-២០១២៖ ក្រុម​កម្មករ​ដង្ហែ​ក្បួន​មក​កាន់​ព្រះ​បរម​រាជវាំង ដើម្បី​គោរព​ព្រះ​វិញ្ញាណក្ខន្ធ​ព្រះ​បរម​សព​អតីត​ព្រះ​មហាក្សត្រ។ RFA/Tep Soravy
ក្បួន​ដង្ហែ​ដែល​មាន​មនុស្ស​ច្រើន​កុះករ​នោះ ត្រូវ​បាន​ឈប់​នៅ​មុខ​ព្រះ​បរម​រាជវាំង មុខ​ព្រះ​ឆាយាល័ក្ខណ៍​របស់​ព្រះអង្គ មុន​នឹង​ពួកគេ​អុជ​ធូប​លុតជង្គង់​បួងសួង​ដល់​វិញ្ញាណក្ខន្ធ​របស់​ ព្រះអង្គ។ធូប ទៀន មាន​ជាប់​នឹង​ដៃ​របស់​កម្មករ បាន​អុជ​ហុយ​ផ្សែង​ស​ពេញ​មេឃ រី​ឯ​ផ្កា​ម្លិះ ផ្កា​ឈូក បាន​ដាក់​ថ្វាយ​នៅ​មុខ​ព្រះ​ឆាយាល័ក្ខណ៍​របស់​ព្រះអង្គ​ជា​ពំនូកៗ​គរ​ដូច​ ភ្នំ។
កម្មការិនី​រោងចក្រ ហុងវ៉ា កញ្ញា ចន្ថា ដែល​បាន​ចូល​រួម​គោរព​ព្រះ​វិញ្ញាណក្ខន្ធ​ព្រះអង្គ ឲ្យ​ដឹង​ថា ថៅកែ​រោងចក្រ​មិន​អនុញ្ញាត​ឲ្យ​កម្មករ​មក​គោរព​ព្រះ​បរម​សព​ព្រះអង្គ​ទេ។ តែ​ខាង​សហជីព​បាន​ស្នើ​ទៅ​ថៅកែ​រោងចក្រ និង​ជួល​ឡាន​ដឹក​កម្មករ​ឲ្យ​មក​គោរព​ព្រះ​វិញ្ញាណក្ខន្ធ​ព្រះអង្គ​ជា​លើក​ ចុង​ក្រោយ។
នាង​សំដែង​ការ​សោកស្ដាយ ដោយ​រៀបរាប់​ទាំង​អួល​ដើម​ក​ថា ដោយ​វ័យ​ក្មេង​នាង​មិន​បាន​ដឹង​ច្រើន​ពី​គុណ​សម្បត្តិ​ព្រះអង្គ​ទេ តែ​ក្រោយ​ពេល​ដែល​ទ្រង់​សោយទិវង្គត ទើប​នាង​បាន​ដឹង​ពី​សមិទ្ធផល​ជាច្រើន​ដែល​ទ្រង់​បាន​បន្សល់​ទុក​ឲ្យ​កូន​ ខ្មែរ​ជំនាន់​ក្រោយ៖ «ដូច​ថា គេ​មិន​ឲ្យ​ឈប់​ទេ ដូច​ថា សហជីព​ទាំង​អស់​នឹង​សុំ​ជួល​ឡាន​ឲ្យ​ពួក​ខ្ញុំ​ជិះ​មក​ទាំង​អស់​គ្នា មក​គោរព​វិញ្ញាណក្ខន្ធ​គាត់ ជា​ថ្ងៃ​ចុង​ក្រោយ គោរព ៧​ថ្ងៃ។ គួរ​សោកស្ដាយ​ថា ខ្ញុំ​វា​ក្មេង ដូច​ថា​អត់​សូវ​ដឹង​អី ដល់​ពេល​គេ​ចាក់​ផ្សាយ​ឲ្យ​ឃើញ​ទៅ បាន​ដឹង​ថា គាត់​មាន​តម្លៃ​វា​យ៉ាង​ម៉េច​ចំពោះ​ពួក​យើង។ ចង់​ឲ្យ​គាត់​ទៅ​កាន់​សុគតិភព ដើម្បី​ជួយ​មើល​កូន​ចៅ​ជំនាន់​ក្រោយ»
នៅ​ថ្ងៃ​ចុង​ក្រោយ​នៃ​ពិធី​បុណ្យ​កាន់​ទុក្ខ ឬ​ថ្ងៃ​បុណ្យ ៧​ថ្ងៃ នៃ​ព្រះ​បរម​សព​របស់​ព្រះបាទ នរោត្តម សីហនុ នៅ​វេលា​ពេល​ព្រឹក មាន​មនុស្ស​ជាង ២​ម៉ឺន​នាក់ មក​ចូល​រួម​កាន់​មរណទុក្ខ និង​គោរព​ព្រះ​វិញ្ញាណក្ខន្ធ​ទ្រង់​នៅ​មុខ​ព្រះ​បរម​រាជវាំង។ ចំនួន​នេះ​នឹង​មាន​ការ​កើន​ឡើង​ថែម​ទៀត នៅ​គ្រា​ដែល​មាន​ពលរដ្ឋ​ជា​ច្រើន​មក​ពី​គ្រប់​ទិសទី ធ្វើ​ដំណើរ​ជា​បន្តបន្ទាប់​មក​ព្រះ​បរម​រាជវាំង ដើម្បី​គោរព​ព្រះ​វិញ្ញាណក្ខន្ធ​នៅ​ពេល​រសៀល។
ក្នុង​ពិធី​បុណ្យ​កាន់​ទុក្ខ​ទី​៧ ជា​ផ្លូវ​ការ​នេះ ព្រះសង្ឃ​ជិត ១​ម៉ឺន​អង្គ និមន្ត​ពី​គ្រប់​ទី​វត្ត​អារាម មក​តាំង​សមាធិ និង​សូត្រ​ធម៌​បង្សុកូល​ប្រមូល​កុសល​ថ្វាយ​ដល់​អតីត​ព្រះ​មហាក្សត្រ​ដែល​សោយ ​ទិវង្គត។ ការ​តាំង​សមាធិ​របស់​ព្រះសង្ឃ​ច្រើន​អង្គ​នេះ ធ្វើ​ស្រដៀង​នឹង​ការ​តាំង​សមាធិ​កាល​ពី​ថ្ងៃ​ទី​២០ ខែ​តុលា កន្លង​ទៅ។
ពលរដ្ឋ​ម្នាក់​មក​ពី​ខេត្ត​កំពង់ចាម អ្នកស្រី ខឹម ជឿ ដែល​បាន​មក​ចូល​រួម​កាន់​មរណទុក្ខ​ព្រះ​បរម​សព​ព្រះអង្គ​ចំនួន ២​ថ្ងៃ​មក​ហើយ ឲ្យ​ដឹង​ថា ទោះ​ជា​ព្រះអង្គ​ចូល​ទិវង្គត​ពិត​មែន តែ​អ្នកស្រី​សង្ឃឹម​ថា ព្រះអង្គ​នៅ​តែ​ជា​ម្លប់​ដ៏​ត្រជាក់​សម្រាប់​ពលរដ្ឋ​ខ្មែរ​គ្រប់ៗ​គ្នា៖ «កូន​ចៅ​សូម​មក​កាន់​មរណទុក្ខ​នេះ​ឲ្យ​អស់​ពី​កម្លាំង​ចិត្ត កម្លាំង​កាយ។ មក​នេះ​ព្រោះ​គិត​ថា សម្ដេច​មាន​ម្លប់​ដ៏​ត្រជាក់ មក​អបអរ​សាទរ​ប្រជារាស្ត្រ​កូន​ចៅ​ទាំង​អស់​គ្នា​ឲ្យ​សុខ​សប្បាយ​ទាំង​អស់​ គ្នា។ ខ្ញុំ​សូម​បួងសួង​ដល់​សម្ដេច​ឪ​ជា​ប្រធាន ឲ្យ​ជា​ម្លប់​ដល់​កូន​ចៅ​នៅ​ខាង​ក្រោយ​ឲ្យ​បាន​សេចក្ដី​សុខ សេចក្ដី​ចំរើន ផុត​ទុក្ខ ផុត​ទោស ទាំង​អស់​ដល់​អនាគត»
រដ្ឋាភិបាល​បាន​ចេញ​សារាចរ​ណែនាំ ដោយ​កំណត់​ឲ្យ​ប្រជាពលរដ្ឋ​ខ្មែរ​គ្រប់​រូប​កាន់​ទុក្ខ​ផ្លូវការ​ក្នុង​ រយៈពេល ៧​ថ្ងៃ ចាប់​ពី​ថ្ងៃ​ទី​១៧ ដល់​ថ្ងៃ​ទី​២៣ ខែ​តុលា។ ព្រះ​បរម​សព​ព្រះ​បាទ​សម្ដេច​ព្រះ នរោត្តម សីហនុ នឹង​ត្រូវ​តម្កល់​ទុក​ក្នុង​ព្រះ​បរម​រាជវាំង​រយៈពេល ៣​ខែ។ ក្នុង​អំឡុង​ពេល​នោះ ភ្ញៀវ​ជាតិ អន្តរជាតិ ប្រជាពលរដ្ឋ និង​មន្ត្រី​រាជការ មាន​សិទ្ធិ​ចូល​រួម​គោរព​ព្រះ​វិញ្ញាណក្ខន្ធ​របស់​ព្រះអង្គ​បាន។ រី​ឯ​កាលបរិច្ឆេទ​នៃ​ការ​បូជា​ព្រះ​បរម​សព ខាង​គណៈកម្មាធិការ​ជាតិ​រៀបចំ​ព្រះ​រាជ​ពិធី​បុណ្យ​ព្រះ​បរម​សព​ព្រះអង្គ​ នឹង​សម្រេច​តាម​ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។
សូម​ស្ដាប់​សេចក្ដី​រាយការណ៍​របស់​លោក វណ្ណ វិចារ ពី​មុខ​ព្រះ​បរម​រាជ​វាំង អំពី​ទិដ្ឋភាព​ទូទៅ​នៅ​មុខ​ព្រះ​បរម​រាជវាំង៖

1 comment:

Anonymous said...

The mass gathering,mourning of King father is a clear sign of a powerful supporting from the public for the monarchy.

Now it is time that the Monarchy should realize about their power and use it wisely if they want to survive to the next charter of monarch of Cambodia.
To collude with Hun and Hanoi it's only destroy the monarchy itself. The monarch,Sihamony,should be brave and neutral to all parties.He should speak out about injustice and especially land that Hun secretly giving away to Hanoi.The king should believes that if people with him there will be no one can destroy him,but to let his power to be abused by other like Hun and Hanoi and keep himself silent is a crime against himself and his subjects.

Your country needs you.

True Khmer