មន្រ្តីជាន់ខ្ពស់អាមេរិកចាប់ផ្តើមទស្សនៈកិច្ចផ្លូវការនៅកម្ពុជា

មន្រ្តីជាន់ខ្ពស់អាមេរិកចាប់ផ្តើមទស្សនៈកិច្ចផ្លូវការនៅកម្ពុជា
ដោយ លោក អុឹង ប៊ុនថន​​ | ថ្ងៃចន្ទ ទី១៨ ខែកក្កដា ឆ្នាំ២០១៦​ vod


ឧបការីរដ្ឋមន្រ្តីក្រសួងការបរទេសសហរដ្ឋអាមេរិកលោក Tom Malinowski (រូបភាពពីហ្វេសប៊ុក)
មន្រ្តីជាន់ខ្ពស់ផ្នែកការទូតសហរដ្ឋអាមេរិកចាប់ផ្តើមធ្វើទស្សនកិច្ចផ្លូវការនៅកម្ពុជានៅថ្ងៃនេះចំពេលដែលស្ថានការណ៍នយោបាយនៅកម្ពុជាត្រូវបានគេមើលឃើញថាកំពុងតែតានតឹងខ្លាំង បន្ទាប់ពីមានការបាញ់សម្លាប់ លោក កែម ឡី។

ឧបការីរដ្ឋមន្រ្តីក្រសួងការបរទេសសហរដ្ឋអាមេរិកលោក Tom Malinowski បានជួបលោក កឹម សុខា ប្រធានស្តីទីគណបក្សសង្រ្គោះជាតិនៅព្រឹកនេះ ប៉ុន្តែមិនទាន់ដឹងថាបានលើកឡើងពីបញ្ហាអ្វីខ្លះនោះទេ។ តាមគម្រោងលោក Tom Malinowski នឹងជួបមន្រ្តីក្រសួងការបរទេសកម្ពុជានៅម៉ោង៤រសៀលនេះ។

លោកឧបការីមកកម្ពុជានៅថ្ងៃទី១៨និង១៩ខែកក្កដានេះ ដោយថាដើម្បីបញ្ជាក់ពីសារៈសំខាន់នៃសិទ្ធិមនុស្ស នៅក្នុងទំនាក់ទំនងរវាងសហរដ្ឋអាមេរិកនិងប្រទេសកម្ពុជា។



ក្នុងសេចក្តីប្រកាសព័ត៌មានរបស់ស្ថានទូតអាមេរិកឲ្យដឹងថា លោកឧបការីរដ្ឋមន្រ្តីទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារ (DRL) រូបនេះនឹងជួបជាមួយមន្រ្តីរដ្ឋាភិបាល សមាជិកនៃគណបក្សប្រឆាំង  ក្រុមសង្គមស៊ីវិលក្នុងស្រុក និងតំណាងទីភ្នាក់ងារអន្តរជាតិ ដោយថាដើម្បីពិភាក្សាពីសារៈសំខាន់នៃការបោះឆ្នោតដែលមានភាពសេរី និងយុត្តិធម៌ នៅកម្ពុជា។ លោកក៏នឹង “រំលឹកឲ្យកម្ពុជាលើកកំពស់បទដ្ឋានសិទ្ធិមនុស្សអន្តរជាតិ ហើយធានាការការពារអង្គការសិទ្ធិមនុស្ស“។ លោកឧបការីរដ្ឋមន្រ្តីនឹងទៅទស្សនាសារមន្ទីរប្រល័យពូជសាសន៍ទួលស្លែង ដើម្បីស្វែងយល់បន្ថែមទៀតពីប្រវត្តិសាស្រ្តនៃអតីតពន្ធនាគារនិងមជ្ឈមណ្ឌលសួរចំលើយនេះ។

សេចក្តីប្រកាសព័ត៌មានបន្ថែមថានៅថ្ងៃទី១៩កក្កដា លោកឧបការីរដ្ឋមន្រ្តី Malinowski នឹងចូលរួមនៅក្នុងការសំណេះសំណាលជាមួយយុវជនកម្ពុជាលើប្រធានបទនៃការបោះឆ្នោតនៅសហរដ្ឋអាមេរិក។

ដំណើរទស្សនៈកិច្ចរបស់មន្រ្តីការទូតនៃប្រទេសមហាអំណាចខាងប្រជាធិបតយ្យនេះគឺធ្វើឡើងចំពេលដែលគណបក្សកាន់អំណាចនិងគណបក្សប្រឆាំងមិនទាន់វិលចូលតុចរចា បើទោះជាមានការជំរុញពីសហគមន៍អន្តរជាតិ ក្រោយពីមានការករណីតាមចាប់ខ្លួនលោក កឹម សុខា និងចាប់ឃុំខ្លួនមន្រ្តីសិទ្ធិមនុស្សអាហុក៤នាក់ និងមន្រ្តី គ.ជ.ប លោក នី ចរិយា។

ចំណែកស្ថានការណ៍ភ្ញាក់ផ្អើលចុងក្រោយនេះគឺការបាញ់សម្លាប់លោក កែម ឡី ជាអ្នកវិភាគបញ្ហាសង្គមដែលតែងរិះគន់មិនសំចៃមាត់លើរដ្ឋាភិបាល៕